“O Fuka Nga Lungse Ma Sap Lom!”

“O fuka nga lungse ma sap Lom! Nga nunku ka in len na fon.”​—SAM 119:97.

1, 2. (a) Kain in oiya fuka sikyak nu sin met sim lun Sam 119? (b) Oiya fuka el akkalemye ka, a efu?

MET sim lun Sam 119 el sun sie me srike upa. Me lokwalok puspus su akkalemye oiyen fulang su tia akkalemye sunak nu ke masap lun God elos oru me aksruksruk koluk nu sel a akkolukyel ke inkanek lun kaskas kikiap lalos. Met fwisrak puspus elos papu koluk lainul a oru me kalyai nu sel. Met koluk elos raunella, a moul lal sifwana oasr ke me sensen. Ma inge nukemwa orel in “tia motulla ke sripen asor yok.” (Sam 119:9, 23, 28, 51, 61, 69, 85, 87, 161) Fwinne el sun ma upa inge, met sim lun sam el fwak: “O fuka nga lungse ma sap Lom! Nga nunku ka in len na fon.”​—Sam 119:97.

² Kom ku in siyuk sum sifwana, “Fuka tu masap lun God el sie sropon me akpwarye a me akkeye nu sin met sim lun sam inge?” Me kasru yok lal tuku ke lulalfongi lal la Jeova el insemwomwo kel. Me insemwomwo nu kemwa su tuku ke masap su God el sang oru met sim lun sam inge in insemwomwo, fwinne oasr ma upa puspus su el pulakin sin met lokwalok nukemwa lal. El akilen la Jeova el akkalemye oiya kulang nu sel. Sayen ma inge, ke inkanek in orekmakin kas in kasru su tuku ke masap lun God oru met sim lun sam inge in lalmetmet liki met lokwalok nukemwa lal a kasrel pa in moul. Oiyen akos lal nu ke masap sang misla nu sel a sie me kasru yok nu sel in oasr nunak a pulakin mwomwo lal.​—Sam 119:1, 9, 65, 93, 98, 165.

3. Efu ku oasr ma upa nu sin met Kristian nukemwa in moulkin moul fwal nu ke akwuk mwo lun God ke pal inge?

³ Kutu sin met kulansap lun God ke pal inge elos sun pa me srike upa nu ke lulalfongi lalos. Saap kut tia sun sie ma upa su aksensenye moul lasr oana ke ma upa su met sim lun sam el sun, tusruktu kut muta ke sie pal su oasr “ongoiye lulap.” Met puspus su raunikutla wangin sunak lalos nu ke nunak lun God ke ma mwo a ma koluk​—niyen sun lalos el ku in akinsemwomwoyelos sifwana a oasr lungse yok nu ke ma puspus lun fwalu, elos insefulat a wangin sunak. (2 Timote 3:1-5) Met Kristian fwusr nukemwa elos enenu in kafweang in lain ma koluk puspus su me srife nu ke oiyen nasnas lalos. Ke kain in ma sikyak inge, tia fusrasr in sruokye lungse lasr nu sin Jeova a ke ma sumwos. Fuka kut ku in karungin kut sifwana?

4. Fuka met sim lun sam el akkalemye kulo lal nu ke masap lun God, a mea met Kristian elos enenu pa in oru?

⁴ Ma su sang kasru nu sin met sim lun sam in tu na ku ke ma upa puspus su el sun pa orekma lal in orekmakin pal yok in lutlutkin masap lun God a el sifwilpa nunku ka. Ke inkanek inge kasrel in akkeye lungse lal nu ke masap lun God. Paye la, apkurun fus nukemwa lun Sam 119 el akkalemye ke kutu masap lun Jeova.a Met Kristian ke pal inge elos tia muta ye Masap lal Moses, su God el sang nu sin met Israel. (Kolosse 2:14) Tusruktu, akwuk mwo nukemwa su akkalemyeyuk ke Masap inge srakna yok sripe nu ke pal inge. Akwuk nukemwa inge el me akkeye nu sin met sim lun sam, akwuk mwomwo inge nukemwa ku in me akkeye pa nu sin met kulansap lun God su kafweang in lain ma upa puspus lun moul ke pal inge.

5. Akwuk fuka ke Masap lal Moses kut fwa akuteye?

⁵ Lela kut in liye me akkeye fuka kut ku in eis ke akwuk tolu lun Masap lal Moses: akwuk ke Sabat, akwuk ke telani ke ima, a ke masap su lain oiyen rapku. Ke kais sie akwuk inge, kut fwa koneak la etauk ke akwuk puspus su oasr ke masap inge el yok sripe kut fwin lungse in kutangla me keok a ma upa nukemwa su oasr ke pal lasr inge.

Orekma in Afwalye Ma Enenu Lasr ke Me Kolyuk lun God

6. Me enenu fuka su arulanu yok sripe in oasr yurin met puspus?

⁶ Metu elos orekla su oasr me enenu nu ke ma yok sripe puspus. Ke sie me pupulyuk, me mongo, me nim, a loom, arulanu yok sripe fwin sie met el lungse in engankin pal nukemwa mano fukoko. Tusruktu, met el enenu pa in karungin ma “enenu lal ke ma lun ngun.” El fwa tia ku in pulakin insemwomwo na paye fwin el tia oru ma inge. (Mattu 5:3) Jeova el nunku ke orekma in akfwalye ma enenu inge oana ma yok sripe paenang el sapkin met kulansap lal in tui ke orekma lalos nukemwa ke lusen len fon se ke kais sie wik tu elos fwa ku in loang akmwoye nu ke ma puspus su kupasr nu ke orekma lalos in alu nu sin God.

7, 8. (a) Fuka God el orala len Sabat in tia oana sie nu ke len nukemwa saye? (b) Akwuk mwo fuka oasr ke len Sabat?

⁷ Akwuk ke Sabat el akkalemyeyuk ke yok sripaiyen orekma lun pal in akmwoye futoto lun sie met nu sin God. Pal se meet su kas inge “sabat” simusyukla in Baibel pa ke pal se oasr me sang ke manna yen mesis. Met Israel sapkinyuk in esani me mongo nalos ke lusen len onkosr. Ke len akonkosr, elos enenu in eis lupan me mongo fwal in orekmakinyuk “ke lusen len luo,” meyen ke len akitkosr wangin me mongo elos ku in koneak. Len akitkosr e fwa “sie sabat mutal nu sin Jeova,” ke lusen len se inge kais sie met el enenu in muta ke an lal sifwana. (Exodus 16:13-30) Sie sin Masap Sengoul el akkalemye la wangin kutena orekma fwa orek ke len Sabat. Len se inge el mutal. Fwin tia akosyuk me kai ka pa mise.​—Exodus 20:8-11; Oekyuk 15:32-36.

⁸ Masap ke Sabat el akkalemye nunak lun Jeova ke me karungin nu sin met kulansap lal ke mano ku ikwe a ke oiyen futoto lalos nu sel. “Len Sabat orek ke metu,” Jisus el fwak. (Mark 2:27) Ke len inge met Israel elos tia leyuk in mongla mukena a len inge sang pa pal mwomwo nu selos in akfutotoyelos sifwana a in akkalemye lungse lalos nu sin Met Oralosla. (Duteronomi 5:12) Pa inge sie len su mwuleyukla mukena in oru orekma in alu nu sin God. Wekunang ma inge pa orekma in alu lun sou, pre, a nunku ke Masap lun God. Akwuk inge el sang me karungin nu sin met Israel elos in tia orekmakin pal a ku lalos nukemwa in suk ma puspus lun fwalu. Akwuk ke Sabat el akesmakinyelos la futoto lalos nu sin Jeova pa ma yok sripe se emeet ke moul lalos. Jisus el kalweni akwuk mwomwo inge su tia ekyek ke el fwak: “Ma simusla, ‘Metu fwa tia moul ke bred mukena, a ke kas nu kemwa su tuku liki oalin Jeova.’”​—Mattu 4:4.

9. Me luti puspus fuka tuku ke akwuk lun len Sabat akkalemyeyuk nu sin met Kristian nukemwa?

⁹ Met kulansap lun God elos tila enenu in akfulatye sie len in mongla ke len sabat ke lusen ao 24, tusruktu akwuk ke len Sabat el tia me sramsram mukena ke pal meeta. (Kolosse 2:16) Ya tia sie me esmakin pa inge la kut enenu pa in oru meet orekma nukemwa su ku in akmwoye futoto lasr nu sin Jeova? Orekma lasr in suk ma puspus lun fwalu a in oru me akengan tia enenu in yok liki orekma nukemwa lasr su kupasr nu ke orekma in alu lasr nu sin God. (Hibru 4:9, 10) Ke ma inge kut ku in siyuk sesr sifwana: “Mea ma yok sripe emeet ke moul luk? Ya Nga oru meet ke moul luk in lutlut, pre, wi ke meeting nukemwa, a in wi ke orekma in luti peng mwo? Ku ya oasr orekma puspus saye su kut orekmakin nu ke pal yok lasr paenang wanginla pal in oru orekma nukemwa in kulansap nu sin God?” Kut fwin oru orekma nukemwa lasr in alu nu sin God pa ma se emeet ke moul lasr, Jeova el mwulela nu sesr ka la el fwa ase me enenu nukemwa nu ke moul lasr.​—Mattu 6:24-33.

10. Fuka kut ku in eis me insemwomwo ke orekmakinyen pal lasr nu ke orekma in kulansap nukemwa nu sin God?

¹⁰ Ke pal su kut orekmakin in lutlut ke Baibel a me rid nukemwa su tuku ka, a in nunku yok ke me luti mwomwo ka, ku in kasre kut in futoto nu sin Jeova. (Jemes 4:8) Oasr sie mutan su pangpang Susan, su mutamwauk in orekmakin pal lal ke yea 40 kutu somla in lutlutkin Baibel pal nukemwa, el akkalemye la ke el mutamwauk ke orekma inge el tia pulakin me akinsemwomwo nu sel ka. Ma inge sie orekma. Tusruktu ke el kafweang in rid, el engunkin yok in oru ma inge. Ingena el pulakin me asor yok fwin oasr kutena sripe sikyak in paenang el an tia ku in oru lutlut lal ke Baibel. “Orekma luk in oru me lutlut kasre yu yok in etu ke Jeova a in nunku kel oana sie Papa,” el fwak. “Nga ku in lulalfongel, tupanul, a nga ku in pulakin sukosok in sramsram nu sel ke pre. Arulanu mwo in etu la Jeova el akkalemye lungse yok lal nu sin met kulansap nukemwa lal, la fuka el karungin yu, a la fuka el kasre yu.” Kut pulakin pa me insemwomwo yok ke sripen oasr pa me kasru pal nukemwa nu ke me enenu lasr in ngun!

Masap lun God nu ke Orekma in Telani lun Ima

11. Fuka akwuk nu ke orekma lun telani ke fwako lun ima el sang me kasru nu sin met sekasrup?

¹¹ Ma se akluo ke Masap lal Moses su akkalemye nunak mwo lun God in sang karungin met kulansap lal pa ke sumwos lun sie met sekasrup nu ke orekma in telani fwako lun ima. Jeova el sapkin ke pal se met ima in an Israel el kosrani fwako lun ima lal, el enenu in lela met sekasrup elos in tuku telani ku eis ma nukemwa su met orekma elos tia telak ku filiye ma lula ke ima. Met ima elos tia enenu in kosrani ke sumwasrik in ima lalos, ku elos tia enenu in sifwil esani ma lula ke grepu ku olif u. Kap in wit su mulkinyukla ke ima tia enenu in sifwil touyak. Oiya inge el sie akwuk mwo in sang kasru met sekasrup, metsa puspus, met mukaimtal, a met katinmas nukemwa. Paye la, orekma in telani fwako lun ima el sie orekma upa, fwinnne oinge ke inknaek lun akwuk inge, elos ku in fwasr liki oiya lun sie met ngusr.​—Livitikus 19:9, 10; Duteronomi 24:19-22; Sam 37:25.

12. Kain in pal mwomwo fuka ke orekma in telani fwako lun ima el akkalemye nu sin met ima nukemwa?

¹² Masap nu ke orekma in telani fwako lun ima el tia akkalemye la fuka lupan fwokinsak ku wit elos fwa enenu in filiye nu sin met sekasrup. Oasr sumwos lun met ima in oru sulela lal fwin ma kosrani su elos fwa filiye ke sumwasrik ke ima lalos fwa on ke an sralup ku an ousriksrik. Ke ma inge, akwuk nu ke orekma in telani lun ima inge el lotelos in akkalemye kulang. Ma inge el sang pal mwomwo nu sin met ima nukemwa in akkalemye kulo lalos nu sin Met Sang kosrani lalos, meyen “el su pakomuta met enenu, sunakun [Met Oralla].” (Soakas 14:31) Boaz el sie sin met su orala ma inge. El kulang in orala akwuk tu Rut, sie mutan katinmas el fwa ku in telani fwako lun ima lal, a el fwa ku in telani lupa yok ke fwako lun barli. Jeova el arulanu akinsemwomwoyel Boaz ke oiyen kulang lal.​—Rut 2:15, 16; 4:21, 22; Soakas 19:17.

13. Mea akwuk nu ke telani fwako lun ima in pal meeta el luti kut?

¹³ Akwuk mwo nu ke masap in telani fwako lun ima el tia ekyek. Jeova el tupan met kulansap nukemwa lal in akkalemye kulang, yokna nu sin met enenu. Ke kut akkalemye kulang lasr ke inkanek yok, oasr pa me insemwomwo yok lasr tuku ka. “Sang, a a fwa etukot nu sumwos,” Jisus el fwak. “Srikasrak mwo, tanye, osrkoini nu sie, kakla. Elos fwa sot nu in imwom.”​—Luk 6:38.

14, 15. Fuka kut ku in akkalemye kulang, a me insemwomwo fuka ma inge ku in oru nu sesr a nu selos su kut sang me kasru?

¹⁴ Met sap Poul el kaifwe kut in “oru mwo nu sin met nu kemwa, a yokna nu selos su sou lun lulalfongi.” (Galetia 6:10) Ke ma inge, kut enenu in nunku yok ke met Kristian wiyesr nukemwa elos in eis me kasru ke inkanek lun kas in kasru lun Baibel ke pal nukemwa su elos sun me srike ke lulalfongi lalos. Tusruktu ya elos enenu pa me kasru mwo, ke sie me pupulyuk, in tuku nu ke Kingdom Hall ku in som nu ke sto in moli ma enenu lalos? Ya oasr kutena met matu, mas, ku met lili su tia ku in fwasr ke congregation lom su insemwomwokin fwin oasr sie met su fwa ku in muteta nu yurolos ku sang me kasru nu selos? Kut fwin kafweang in etu ma enenu nukemwa lalos inge, saap Jeova el ku in orekmakin kut in sang me top nu ke pre lun met enenu inge. Fwinne in kasru sie sin sie el sie pa kunokon lun met Kristian, in oru ma inge el sang pa kasru nu sin met su sang me kasru oinge. Orekma in akkalemye lungse paye nu sin met lili nukemwa el sropon me engan yok a insemwomwo paye su ku in oru Jeova in insemwomwo pa nu sesr.​—Soakas 15:29.

¹⁵ Siepa inkanek yok sripe su met Kristian elos enenu in akkalemye la elos lungse in sang pa ke inkanek in orekmakin pal a ku lalos in sramsramkin akwuk lun God. (Mattu 28:19, 20) Kutena met su pulakin insemwomwo su tuku ke orekma lalos in sang kasru sie met a el mwulela moul lal nu sin Jeova sang me akpayeye nu selos in etu la kas lun Jisus inge paye: “Insemwomwo in sang yok liki insemwomwo in eis.”​—Orekma 20:35.

Karungin Liki Rapku

16, 17. Mea masap sengoul el akkalemye nu sin metu in tia oru, a efu?

¹⁶ Ma se aktolu ke Masap lun God nu sin met Israel su kut fwa akuteye ka pa masap aksengoul, su sapkinyuk in tia rapku. Masap inge el akkalemye: “Nik kom rapkue loom sin met tulan. Nik kom rapkue mutan kien met tulan lom, ku met mokul kulansap lal, ku met mutan kulansap lal, ku kao natul, ku ass natul, ku kutena ma lun met tulan lom.” (Exodus 20:17) Wangin kutena met ku in sapkin masap inge, meyen wangin kutena met ku in etu insien met. Tusruktu, masap inge el akfulatye Masap nu ke sie an su fulat liki akwuk nu ke masap lun metu. Masap inge oru kais sie met Israel elos in etu la el fwa nununkeyuk sin Jeova, su ku in rid ku etu lungse lun inse. (1 Samuel 16:7) Sayen ma inge, masap inge el tungalye kain in orekma koluk nukemwa.​—Jemes 1:14.

¹⁷ Masap in lain rapku el akkeye met kulansap nukemwa lun God in fwasr liki lungse ke ma puspus, rapku, a ke oiyen torkaskas ke ma su sikyak nu ke moul lalos. El karunginelos pa liki me srife in pusre ku oru orekma lun kosro. Pal nukemwa oasr met puspus su oasr ma puspus lalos ku ke kutu oiya oasr me insemwomwo yok lalos liki me insemwomwo lasr ku lun kutu met. Kut fwin tia kutongye nunak lasr nu ke ma sikyak inge, kut ku in tila pulakin engan lasr a kut mutamwauk in sok ke kapkapek lun met puspus inge. Baibel el akkalemye oiyen rapku inge oana orekma in akkalemye “nunak likkeke.” Arulanu mwo nu sesr kut fwin tia akkalemye oiyen rapku.​—Rom 1:28-30.

18. Kain in oiya fuka oasr yen nukemwa fwin fwalu misenge, a kain in fwako koluk fuka ma inge ku in orala?

¹⁸ Oiya su oasr yen nukemwa fwin fwalu ke pal inge su akkeye lungse nu ke ma puspus lun fwalu a ke oiya lun alein. Ke inkanek lun me akkalemye, akwuk lun kuka el purakak kena lun met puspus in eis kain in ma sasu puspus a akkalemye kain in nunak inge pal nukemwa la kut tia insemwomwo kut fwin tia eis ma sasu nukemwa inge. Pa inge kain oiya su Masap lun Jeova el selngawiyuk. Oasr sie pa oiya su selngawiyuk ke masap lun Jeova pa ke lungse in eis me insemwomwo lun moul ke inkanek nukemwa a in eis me kasrup. Met sap Poul el sang kas in sensen: “A elos su lungse tu elos in kasrup, elos putatyung nu in me sruf a me kaisrip a lung in ikwe puspus su lalfon a me fosnga, su akmwalomye met in kanausten a nien tula. Tu lungse mani okan kain koluk nu kemwa, a kutu, ke elos suk ma inge, elos tafongla liki lalalfongi, a sifwana fwaksilosi ke me asor puspus.”​—1 Timote 6:9, 10.

19, 20. (a) Nu sin met nukemwa su lungse masap lun Jeova, ma puspus fuka arulanu yok sripe nu selos? (b) Mea sifwen me lutlut toko?

¹⁹ Elos nukemwa su lungse masap lun God elos akilen ke me sensen nukemwa su tuku ke oiya lun lungse ma puspus lun fwalu a elos karunginyuk liki ma inge. Ke sie me pupulyuk, met sim lun sam el pre nu sin Jeova: “Ekulang insiuk nu ke kas in luti lom, a tia nu ke rapku. Ma sap lun oalum mwo nu sik liki tausen ipen gold a silfer.” (Sam 119:36, 72) In lulalfongi ke ma paye lun kas inge fwa ku in kasre kut in sruokye sie oiya a nunak mwomwo su eneneyuk in fwasr liki me sruf lun lungse ke ma puspus, rapku, a in wanginla pulakinyen me insemwomwo ke oiyen moul lasr. Orekma in akkalemye lungse yok nu sin God ku “moul mutal,” a tia suk in eis ma puspus lun fwalu, pa key nu ke me insemwomwo yok.​—1 Timote 6:6.

²⁰ Akwuk mwomwo su oasr ke Masap su Jeova el sang nu sin met Israel in pal meeta el yok sripe nu ke pal lasr inge ke sripen oasr ma upa puspus su oana in pal se ke Jeova el sang Masap inge nu sel Moses. Kut fwin orekmakin yok masap inge ke moul lasr, paye la kut fwa ku in eis etauk paye nu ka, paenang kut fwa ku in lungse na paye ma inge, a kut fwa insemwomwo na paye ka. Oasr me luti puspus ke masap inge nu sesr, a yok sripaiyen me lutlut nukemwa inge su akkalemyeyuk ke moul a ke ma nukemwa su sikyak nu sin met puspus in pal meeta su akkalemyeyuk in Baibel. Kutu sin ma inge fwa akuteyuki ke me lutlut toko.

[Footnote]

Kom E Topuk Fuka?

• Efu ku met sim lun Sam 119 el lungse masap lun Jeova?

• Mea met Kristian elos ku in lotela ke akwuk lun Sabat?

• Ma yok sripe fuka su oasr pal nukemwa ke masap lun God nu ke orekma in telani fwako lun ima el akkalemye?

• Fuka masap in tia rapku el karungin kut?

[Petsa ke sra 19]

Mea masap ke Sabat el akkalemye yok?

[Petsa ke sra 21]

Mea masap nu ke orekma in telani fwako lun ima el luti kut?