In Oru Sulela Sie Kain in Kunokon Su Kom Tia Ku in Pilesru

“IN ETU fuka in oru sulela, pa inge ma upa emeet, ke ma inge, sie kain in orekma na upa pa inge fwin sie met el ku in oru ou inge,” pa inge ma Napoleon Bonaparte, emperor lun an France in century ak19, el fwak ke sie pal. Saap kom insese ke ma el fwak inge, meyen apkurun met nu kemwa elos arulanu aksaokye ku lalos in oru sulela ke moul lalos. In pal se na, elos lotela la, kutupal arulanu upa in oru sulela.

Fwinne fwusesr ku upa, kom tia ku in pilesru kunokon lom in oru sulela. Len nu kemwa kut enenu in oru sulela puspis. Tokin kut tukakek ke lututeng, kut enenu in oru sulela ke ma kut enenu in nukom, ke ma kut lungse in kang ke mongo in lututeng, a ke ma puspis saye ke lusen len se. Pus ke sulela inge su kut oru tia arulanu yok sripe. Kutupal kut oru na ou inge fwinne kut tia nunku yok. Tia arulanu pukanten pal kom kofla in motul ke sripen kom nunku yok fwin mwo ku koluk sulela lom.

Ke inkanek saye, kutu nu ke sulela su metu elos oru ma ke pal fwasru. Met fwusr puspis fwin fwalu misinge elos enenu in oru sulela ke nien sun puspis su elos enenu in sun ke pal fwasru. Saap elos enenu in oru sulela ke kain in lutlut su elos enenu in oru lupaka kain in lutlut inge. Tok kutu, elos nu kemwa enenu in oru sulela elos fwin payuk ku muta na lolap. Elos nu kemwa su nunku in payuk enenu in oru sulela inge: ‘Ya fwal tari matwe luk in mano a nunuk tu Ngan ku in payuk? Kain partner fuka Nga lungse, ku yok liki ma inge, kain in partner fuka Nga enenu?’ Sulela su kut oru ke mokul ku mutan su kut akola in payuk arulanu purakak na paye moul lasr.

Fwin ke ma yok sripe, arulanu yok sripe in oru sulela ke inkanek lalmetmet, meyen insemwomwo lasr oakiyuki nu ke ma inge. Saap kutu met elos pulakin la elos etu na paye in oru kain in sulela inge paenang elos srunga in eis me kasru su tuku sin kutu met. Ya sie inkanek lalmetmet pa inge? Lela kut in liye.

[Picture Credit Line on page 3]

Napoleon: Tuku ke buk inge The Pictorial History of the World