“Nikmet Sangeng Ku Toninfong”

“Nikmet sangeng ku toninfong. . . . Jeova el muta yurumwos.”​—2 KRONIKEL 20:17.

1. Mea orekma lun Terrorist el oru nu sin met, a efu ku arulanu fwal sangeng lalos?

OREKMA lun terrorist! Kas se inge purakak sangeng ke insien met, a oru met puspis in pulakin sensen a wangin kasru yuro. El orala met puspis in fos ke sripen sangeng, asor, a koskosrok. A pa inge kain in kas su aksangengye met puspis su oanu me lokwalok nu selos ke lusen yiu puspis fwasru. Ke sripen mutanfwal puspis elos orek meun lain orekma lun terrorist ke kain in inkanek nu kemwa tusruktu elos tia kutangla paenang oasr sumwos na paye lun met in akkalemye kain in sangeng inge.

2. Oiye fuka Met Lo lun Jeova elos akkalemye ke ma upa su tuku ke orekma lun terrorist, a ma inge kol nu ke kusensiyuk fuka?

² Fwinne ou inge, oasr sripe se yok lasr in akkalemye fwinsrak paye. Met Lo lun Jeova, su arulanu kafofo ke orekma in luti in an 234 a territory puspis fwin fwalu nu fon elos srukye sie fwinsrak sakuruk ke pal fwasru. Elos tia sangeng a tia nunku la wanginla saflaiyen orekma lun terrorist, a elos lalalfongi la oasr saflaiyen ma inge ke pal fwasru​—a ke pal na futoto. Ya fwal nu sesr in wi ke fwinsrak mwomwo lalos ke pal fwasru? Su ku in kutangla in aksukosokye fwalu ke me lokwalok inge, a fuka ma inge ku in sikyuk? Ke sripen orekma silolel ke kain in inkanek puspis sun tari kais sie sesr, paenang arulanu mwo in tuni sripen fwinsrak mwomwo inge ke pal fwasru.

3. Mea sropon me aksangeng inge, a kas palu fuka akkalemyeyuk meet ke pal lasr?

³ Ke len inge, metu elos sangeng a fos ke inkanek puspis. Nunku ke met puspis su tia ku in kurunginelos sifwanu ke sripen matou, mas upa su wangin ono, a sou puspis su arulanu sikasrup a kofla in koneak me enenu lalos in moul. Paye, nunku ke kain in moul su kut tia ku in etu mea e fwa sikyuk! Mise ke pal su kut tia nunku ke sripen accident ku ongoiye su ku in sikyuk ke kutena pal, su akola in eisla liki kut kutena ma su kut arulanu lungse. Kain in sangeng a fosrnga se inge, wekunang meun ke munas lasr sifwanu a me asor puspis, orala pal lasr in fwal nu ke ma met sap Poul el fwak: “A etu ma se inge, tu in len safla pal in ongoiye lulap a fwa tuku. Tu met elos fwa sifwanu lungselos, . . . tia lungse met in sou lalos sifwanu, met silolel, met lesrik, tia sifwanu leum fwelos, met lemnak, met su tia lungse ma mwo.”​—2 Timote 3:1-3.

4. Kain in fwinsrak mwomwo fuka ku in liyeyuk ke pitse koluk su akkalemyeyuk in 2 Timote 3:1-3?

⁴ Fwinne ma simusla se inge el sramsram ke sie luma koluk, tusruktu el srisrngiye pa ke sie fwinsrak mwo. Loang akmwoye meyen pal in ongoiye se inge e fwa tuku ke “len safla” lun akmwuk koluk lun Setan ke pal inge. Kalmen ma inge pa, molela apkurun a Togusrai sumwosmwos lun God el akola in aola akmwuk koluk lun fwal se inge ke pal na futoto, pa inge ma Jisus el luti nu sin met tuma lutlut lal in siyuk ke pre. (Mattu 6:9, 10) Togusrai se inge pa guferment lun God in kosrao, su e “fwa tia musalla,” oanu met palu Daniel el fwak, a “el fwa kunausla togusrai inge nu kemwa [lun met], a a fwa tu ma patpat.”​—Daniel 2:44.

Met Kristian Su Tia Wi Ke Kutena U Su Lain Sie Sin Sie Lain Orekma lun Terrorist

5. Oiye fuka mutanfwal puspis elos akkalemye ke me sensen su tuku ke orekma lun terrorist?

⁵ Ke lusen yiu puspis somla, orekma lun terrorist el uniye tausen puspis lun met. Taran yok ke me sensen inge arulanu pengpeng fwin fwalu nu fon yokna tokin orekma lun terrorist sikyuk in an New York City a Washington, D.C., in September 11, 2001. Ke sripen orekma lun terrorist sun tari fwalu nu fon, paenang mutanfwal puspis fwin fwalu nu fon elos akesrui sie sin sie in lain ma inge. Ke sie me pupulyuk, in December 4, 2001, fwal nu ke sie report lun met orek news, “foreign minister puspis lun an 55 lun an Europe, North America a mutanfwal puspis in an Central Asia elos insese in oakiye sie plan” ma inge orekla in ma siefwunnu kaifweung lalos. Sie met lulap in an U.S. el kaksakin ma elos oru inge a fwak la “sie akmwuk sasu pa inge ke ku” in lain orekma lun terrorist. Ke lusen pal na futoto, foko foko lun met elos mutamwauk in akesrui ke ma The New York Times Magazine el pangpang “mutamweyen meun pa inge.” Lupan kutangla lun kaifweung lalos inge e fwa ku in liyeyuk ke pal fwasru. Tusruktu, fwokin meun inge ke orekma lun terrorist, pa sangeng lulap a alollo nu sin met puspis, tusruktu, ma inge tia sikyuk nu sin met nu kemwa su lalalfongi Jeova.

6. (a) Efu kutupal upa nu sin met puspis in kalem ke akmwuk lun Met Lo lun Jeova su tia wi ke kutena u su lain sie sin sie? (b) Kain in me srikasrak fuka fwin ke orekma lun politic Jisus el oakiye nu sin met tuma lutlut lal?

⁶ Met Lo lun Jeova elos arulanu eteyuk la elos tia wi ke kutena akmwuk lun politic. Fwinne met puspis elos lungse in oru pa ou inge ke pal in misla, tusruktu, fwin oasr kutena ma sikyuk elos mulkunla ma inge. Pal nu kemwa, sangeng a nukin ke ma e fwa sikyuk su tuku ke meun purakak nunuk yok a lungse ke mutanfwal. Ma inge oru in arulanu upa nu sin kutu met in kalem efu kutu met elos srunga in akesrui ku akkeye akmwuk pengpeng lun an. Tusruktu, met Kristian paye elos etu la elos enenu in akos ma sap lun Jisus nu selos in “tia ma lun fwalu.” (Jon 15:19; 17:14-16; 18:36; Jemes 4:4) Ma inge siyuk selos in tia wi ke kutena u su lain sie sin sie ke politic ku mokuikui lun fwalu. Jisus el sifwanu oakiye me srikasrak mwo. Ke sripen lalmetmet a ku sumwosmwos lal, paenang el ku in sang kasru yok ke mokuikui lun metu in len lal. Fwinne ou inge, el srunga in wi ke kutena mokuikui lun politic. Ke mutamweyen orekma lun forfor lal, Setan el kaifwe nu sel in ekla met kol lun togusrai nu kemwa fwin fwalu tusruktu Jisus el akkalemye srunga lal. Tok kutu, el tia lela kutu met in filiyel (oanu candidate ke politic) ke ofus lun politic oanu met kol lalos.​—Mattu 4:8-10; Jon 6:14, 15.

7, 8. (a) In tia wi ke mokuikui lun politic su Met Lo lun Jeova elos oru tia ku in kalmekin mea, a efu? (b) Fuka Rom 13:1, 2 el akkalemye la tia mwo in wi ke kutena orekma silolel lain guferment?

⁷ Lela met in tia tafongla in nunku la orekma lun Met Lo lun Jeova in tia wi ke kutena u luo su lain sie sin ku in kalmekin la elos akkeye ku insese ke orekma silolel. Meyen elos fwin oru ou inge elos sifwanu lain ma elos fwak la elos met kulansap lun “God lun lung a misla.” (2 Korint 13:11) Elos lotela tari ma Jeova el pula ke orekma silolel, Met sim lun Sam el simusla: “Jeova el srike met sumwosmwos, a el srunga met koluk a el su lungse silolel.” (Sam 11:5) Elos ouyepa etu ma Jisus el fwak nu sin met sap Piter: “Sifwil isungye kutlas nutum nu yen se, tu elos nu kemwa su eis kutlas fwa mise ke kutlas.”​—Mattu 26:52.

⁸ Fwinne me sramsram lun fwalu akkalemye la met Kristian kikiap elos orekmakin “kutlas” pal nu kemwa, tusruktu ma inge tia sikyuk nu sin Met Lo lun Jeova. Elos fwasr liki kain in orekma inge nu kemwa. Met Lo lun Jeova elos oaru in akos ma sap lun Rom 13:1, 2, NW.: “Lela met nu kemwa in akos nu ke ku [met kol lun guferment] su fulat lukelos; tu wangin ku a ma sin God mukena; a ku su on ma God el lela a srik lukel. Ke ma inge, el su lain ma ku, el lain akmwuk lun God; a elos su lain elos fwa eis lusla.”

9. Ke inkanek luo fuka Met Lo lun Jeova elos lain orekma lun terrorist?

⁹ Tusruktu, ke sripen orekma lun terrorist arulanu koluk paenang, ya tia fwal nu sin Met Lo lun Jeova in sang kasru in lain ma inge? Aok enenu, a elos oru tari ou inge. Ma se meet, elos tia wi ke kain in orekma koluk inge. Ma se akluo, elos luti met ke akmwuk lun met Kristian su fwin elos akos elos fwa som liki kain in orekma silolel nu kemwa.a Ke yiu tari’a, Met Lo lun Jeova elos orekmakin 1,202,381,302 aur in kasru kutu met in lutlut ke kain in moul Kristian inge. Pal inge su elos orekmakin tia som nu ke wangin sripe, meyen fwokin orekma lalos inge pa, oasr ke 265,469 met su baptaisla oanu sie Met Lo lun Jeova, ke ma inge elos akkalemye ye mutun met nu kemwa la elos srunga orekma silolel.

10. Mea fwinsrak puspis in akwanginyela ma koluk ke fwal lasr misenge?

¹⁰ Sayen ma inge, Met Lo lun Jeova elos akilen la wangin ku lalos sifwanu in aksafyela ma koluk nu kemwa fwin fwalu. Ke sripe se inge elos filiye lalalfongi lalos nu sin met siefwunnu su ku in oru ou inge​—Jeova God. (Sam 83:18) Fwinne elos arulanu kaifweung ke oaru, wangin ku lun met in aksafyela orekma silolel. Met sim lun Baibel su eis kasru sin God el sang kas in sensen nu ke pal lasr, “in len safla,” a fwak: “A met koluk a met mwosounkas elos fwa yokyokelik in ma koluk, a elos fwa keapela met a fwa sifwanu keapeyukla.” (2 Timote 3:1, 13) Kut fwin nunku nu ke ma inge, kut etu tari la fwinsrak lun met in kutangla liki ma koluk tianu arle mwo. Tusruktu, ke inkanek saye, kut ku in filiye lalalfongi lasr nu sin Jeova in aksafyela ma patpat ma koluk nu kemwa.​—Sam 37:1, 2, 9-11; Soakas 24:19, 20; Isaia 60:18.

Elos Tia Sangeng Ye Mutun Meun Su Lainelos

11. Kain in step fuka Jeova el oru tari meet in akwanginye orekma silolel?

¹¹ Ke sripen God lun misla el srunga orekma silolel, paenang kut ku in kalem ka efu el oakiye tari akmwuk puspis in kunausla sropon ma inge, Setan su Devil. Aok, el oru tari Setan in tia kutangla ke meun lal lain Maikael su Leum lun lipufon​—Togusra sasu su God el filiye ke tron, Jisus Kraist. Baibel el akkalemye ma inge: “A elos meun in kosrao: Maikael a lipufon lal elos som in meun nu sin dragon, a dragon el meun wi lipufon lal, a elos tia kutangla, a elos tia sifwil liye an selos in kosrao. A dragon lulap el sisila, serpent matu, el su pangpang Devil a Setan, su keapela fwalu nu fon; el sisila nu fwalu, a sisila lipufon lal oelul.”​—Fwakyuk 12:7-9.

12, 13. (a) Mea ma yok in yiu 1914? (b) Mea kas palu lal Ezekiel el palye ke met nu kemwa su akkeye Togusrai lun God?

¹² Akmwuk in oaoa lun Baibel a ma sikyuk nu kemwa fwin fwalu akkalemye la meun se inge in kosrao sikyuk in yiu 1914. Mutamwauk ke pal inge, ma koluk yokyokelik fwin fwalu. Fwakyuk 12:12 el aketeye efu ma inge sikyuk, el fwak: “Ke ma inge, komwos in engunak, O kosrao, a komwos su muta lu! We nu sin fwalu a mwea, tu Devil el oatuwot nu yuromwos, a el mulat ma lulap, tu el etu tu pal lal futoto.”

¹³ Arulanu kalem, mulat lun Devil arulanu yok nu sin met akmusrala su alu nu sin God a nu sin “sip ngie” su asrouki nu sel. (Jon 10:16; Fwakyuk 12:17) Me lain inge e fwa sun safla lal ke pal se Devil el oru meun upa lal lain met nu kemwa su akkeye Togusrai lun God su oakiyuki tari a elos nu kemwa su filiye lalalfongi lalos nu ka. Meun upa inge akkalemyeyuk tari in buk lun Ezekiel sapter 38 oanu meun lal “Gog lun an Magog.”

14. Kain in me kasru fuka Met Lo lun Jeova elos eis in pal meeta, tusruktu, ya ma inge sikyuk pal nu kemwa?

¹⁴ Tokin Setan el sisila liki kosrao me, kais kutu pal met lun God elos eis kasru sin kutu met kol lun politic lain orekma koluk lun Setan oanu me pupulyuk in Fwakyuk 12:15, 16 el akkalemye. Tia oanu ma sikyuk inge, Baibel el akkalemyela ke meun safla lal Setan lain met kulansap lun God, wangin kutena u lun met su akola in kasru met nu kemwa su filiye lalalfongi nu sin Jeova. Ya ma inge oru met Kristian in sangeng ku toninfong? Mo, na mo!

15, 16. (a) Kas in akkeye lun Jeova nu sin met lal in len lal Jiosafat, akkalemye fwinsrak mwomwo fuka ke pal fwasru nu sin met Kristian ke len inge? (b) Kain in me srikasrak fuka Jiosafat a met lal elos akkalemye nu sin met kulansap lun God ke len inge?

¹⁵ God el akola in kasru met lal oanu ma el oru meet ke mutanfwal lal in len lun Togusra Jiosafat. Kut ku in rid: “Komwos porongo, met Juda nu kemwa, a komwos met Jerusalem, a kom Togusra Jiosafat! Jeova el fwak ou inge nu sumwos, ‘Nik komwos sangeng, ku toninfong meyen u lulap se inge; tu meun se inge tia ma lomwos, a ma lun God. . . . Komwos fwa tia enenu in anwuk in meun se inge. Komwos tuyuk, a tu misla, a liye molela lun Jeova yurumwos. O Juda a Jerusalem; nikmet sangeng ku toninfong. Lutu illa lainelos, tu Jeova el muta yuromwos.’ ”​—2 Kronikel 20:15-17.

¹⁶ Met lun Juda nu kemwa akkeyeyuk la elos tia enenu in meun. In oupanu, ke pal se Gog lun Magog el meun lain met lun God, elos fwa tia enenu in orekmakin kofwen me meun in kurunginelos sifwanu. A, elos fwa “tu misla liye molela lun Jeova” yurolos. Paye, in tu misla tia ku in kalmekin la elos tia enenu in oru kutena ma, aok met lun God in len lan Jiosafat elos kafofo ke orekma. Kut ku in rid: “A Jiosafat el fwaksifwe; a met Juda nu kemwa a met Jerusalem elos epas ye mutun Jeova, a alu nu sin Jeova. . . . A, el [Jiosafat] papu yurin metu, el pakilosi su fwa on nu sin Jeova, a sang kaksak nuknukyung in ma mutal, ke elos illa ye mutun un met meun, a fwak: ‘Sang kulo nu sin Jeova, tu lungkulang lal on ma patpat.’ ” (2 Kronikel 20:18-21) Aok, fwinne ye mutun met lokwalok lalos su lungse in orek meun nu selos, met lun God elos kafofo in sang kaksak nu sin Jeova. Ma inge oakiye sie me srikasrak nu sin Met Lo lun Jeova ke ma elos enenu in oru ke pal se God el meun nu sin met lokwalok lalos.

17, 18. (a) Kain in oiye mwomwo fuka oasr yurin Met Lo lun Jeova ke len inge fwin elos nunku ke meun lal Gog? (b) Kain in kas in esmakin fuka tufwanu etukyung nu sin met Kristian fwusr?

¹⁷ Ke kut sano pal ingo​—fwinne Gog el mutamwauk tari ke meun lal—​Met Lo lun Jeova elos fwa tafwela in akkeye Togusrai lun God. Elos fwa tafwela in eis ku a me loeyuk yurin 94,600 kutu congregation fwin fwalu nu fon. (Isaia 26:20) Pa inge sie pal mwo na paye in sang kaksak nu sin Jeova ke pulaik! Aok, in moul a sano ke meun lal Gog su e fwa tuku na paye tia moklelos in tapulla ke sripen sangeng. A, ma inge purakak insielos in akyokye me kise kaksak lalos nu sin Jeova ke ku lalos kemwa.​—Sam 146:2.

¹⁸ Kain in oiye pulaik inge akkalemyeyuk tari ke inkanek mwo sin tausen puspis lun met fwusr fwin fwalu nu fon su sroang nu ke orekma lun forfor in luti pal e nu kemwa. In akkalemye ma mwo emeet su tuku ke kain in moul su elos sulela inge, tract inge Youths​—What Will You Do With Your Life? kitakutla ke district convention in yiu 2002. Met Kristian nu kemwa, met fwusr a met matu, elos sang kulo ke kas in kai puspis su akismakinyelos ke pal fwal.​—Sam 119:14, 24, 99, 119, 129, 146.

19, 20. (a) Efu met Kristian nu kemwa elos tia enenu in sangeng ku toninfong? (b) Mea me lutlut lasr toko el e fwa oru?

¹⁹ Fwinne oasr ma upa fwin fwalu, met Kristian nu kemwa tia enenu in sangeng ku toninfong. Elos etu la kitin pal lula Togusrai lun Jeova el aksafyela kain in orekma silolel nu kemwa ke pal siefwunnu a ma inge tia ku in sifwil liyeyuk. Elos eis pa me pwarak in etu la sifwil moulyuk ku in kasru met puspis su tula moul lalos ke sripen orekma silolel. Fwinne sifwil moulyuk ku in kasru kutu met ke pal se meet in eis pal mwo in lutlut kel Jeova, tusruktu nu sin kutu met, ma inge ku in kasrelos in tafwela ke mwolela lalos in kulansap nu sin God.​—Orekma 24:15.

²⁰ Oanu met Kristian paye, kut kalem ke me enenu nu sesr in tia wi ke kutena u su lain sie sin sie a kut kaifweung in oru ou inge. Kut lungse in srukye fwinsrak mwolanu se in “tu ku a liye molela lun Jeova.” Me lutlut se toko fwa akkeye lalalfongi lasr meyen ma inge ku in kasre kut in akilen ma sikyuk puspis in len lasr su ase nu sesr etauk ke akpayeyen kas palu lun Baibel.

[Footnotes]

Ya Kom Ku In Aketeye?

• Efu ku met puspis ke len inge elos pulakin la wangin fwinsrak lalos ke pal fwasru?

• Efu ku Met Lo lun Jeova elos srukye sie fwinsrak mwomwo ke pal fwasru?

• Mea Jeova el oru tari nu ke sropon orekma silolel nu kemwa?

• Efu kut tia enenu in sangeng ke meun lal Gog?

[Picture on page 21]

Jisus el oakiye me srikasrak mwo nu sin met Kristian ke oiye su tia wi ke kutena u su lain sie sin sie

[Pictures on page 24]

Tausen puspis sin Met Lo fwusr elos insemwomwo in sroang nu ke orekma lun forfor in luti pal e nu kemwa

[Picture Credit Line on page 20]

UN PHOTO 186226/M. Grafman