KIHSEN SIYUCK LUHN MWET RIT

Suc Gog luhn Magog ma ahkkahlwemyeyuck ke puk luhn Ezekiel?

Ke lusen yac pucspucs, mwe rit nahtuhsr uh ahkuhtweyac lah Gog luhn Magog pa ine se ma ituckyang nuh sel Satan suc Devil tukun el sisilac liki inkuhsrao. Mwe ahkuhtweyac inge oreklac ke srihpen puk luhn Fwackyuk ahkkahlwemyel Satan oacna leum ke orekma in kuhnahoslah mwet nuhkewa luhn God fin facluh nohfohn. (Fwackyuk 12:1-17) Ke srihpac se inge, nuhnkeyuck muh Gog pa sie pac ine sahyac lal Satan.

Tuhsruhktuh, oasr kuhtuh kihsen siyuck yohk srihpac ma siyuckyuck ke srihpen mwe ahkuhtweyac inge. Efuh? Nuhnkuh ke ma inge: Ke sramsramkihnyuck pacl sac Gog el kuf ke mweun uh, Jeova el fahk kacl ohinge: “Ac nga ac fah lwelah tuh mahnolos in fah mwe mongo nuh sin won nuhkewa, ac kosro lemnak nuhkewa.” (Ezekiel 39:4) Jeova el fahk pac: “Ke pacl se sikyak ma inge uh, nga ac fah sang sie acn in facl Israel, . . . tuh Gog elan puckpucki we. Na Gog ac mwet mweun lal nuhkewa ac fah puckpucki.” (Ezekiel 39:11) Tuhsruhktuh, ac fuhkah sie ma oreklac in nguhn tuh mahnol “in fah mwe mongo nuh sin won nuhkewa, ac kosro lemnak nuhkewa”? Na fuhkah nuh ke sie acn in “puckpucki” fin facluh ac fah ituckyang nuh sel Satan? Bible uh ahkkahlwemye lah Satan el ac fah sisilac nuh in abyss ke lusen sie tausin yac, ac tiac na mongolac sin won kuh puckpucki ke sie acn.​—Fwackyuk 20:1, 2.

Ahkkahlwemyeyuck nuh sesr lah ke sahflahiyen sie tausin yac, Satan el ac fah ahksukohsohkyeyucklah liki abyss, ac “el ac fah ilme in kiacpuh muhtuhnfacl nuhkewa fin facluh nohfohn, suc pahngpahng Gog ac Magog. Satan el ac fah eisaloseni nuhkewa in mweun.” (Fwackyuk 20:8) Tuhsruhktuh, Satan el kuh in kiacpwellah Gog fuhkah, el fin pa pacna Gog? Ke ma inge, kahlwem lah “Gog” el tiac kalmackihnyuck nuh sel Satan, in oacna kahs pahluh ma sihmlac in Ezekiel kuh ke puk luhn Fwackyuk.

Ke ma inge, na suc Gog luhn Magog? In tohpohklah kihsen siyuck sacn, kuht enenuh in tuni ahkwoye ac lutlutkihn ma Suhmuhslah uh in konwacack lah suc kalyei mwet luhn God. Bible uh ahkkahlwemye ke mwe kalyei lal ‘Gog luhn Magog’ ac oacyacpac ke mwe kalyei orek sin “tohkohsrah luhn acn eir” ac sin “tohkohsrah luhn facluh.” (Ezekiel 38:2, 10-13; Daniel 11:40, 44, 45, BMK; Fwackyuk 17:14; 19:19) Yac ma inge luhmweyuck nuh ke mwe kalyei pucspucs ma orek ke pacl pucspucs uh? Moh tiac ohinge. Wacngihn ahlohloh kac lah Bible uh sruhmuhn ke mwe kalyei sefanna ke e pucspucs. Efuh kuht fahk ohinge? Mweyen ma Suhmuhslah uh fahk nuh sesr lah muhtuhnfacl nuhkewa luhn facluh ac fah wi nuhke orekma in kalyei sahflah se inge ma ac fah kol nuh ke Armageddon.​—Fwackyuk 16:14, 16.

Kuht fin nuhnkuh ahkwoye ke ma suhmuhslah nuhkewa inge ke mwe kalyei sahflah ma ac orek nuh sin mwet luhn God, ac arlacna kahlwem lah ine se inge Gog luhn Magog uh tiac na sramsramkuhnuhl Satan, a nuh sin u luhn muhtuhnfacl pucspucs. Yac u se inge ac fah kolyuck sin “tohkohsrah luhn acn eir”? Kuht tiac kuh in fahk lah meac. Tuhsruhktuh, kain in nuhnak inge ac kuh in fal nuhke ma Jeova el fahk kacl Gog inge: “Ac tuhkuh liki acn sum in acn eir, ac pwen un mwet mweun na luhlahp ac kuh suc fahsreni liki facl pucspucs ac elos nuhkewa kahsruhsr fin horse.”​—Ezekiel 38:6, 15.

Ke ohiyac sacpacna, mwet pahluh Daniel, suc moul ac muhta in pacl lal Ezekiel, el fahk ma inge ke tohkohsrah luhn acn eir: “Na pweng ma ac tuhkuh liki acn kuhtuhlacp ac eir uh ac fah ahksahngwengyacl, ac el ac mweun arulacna upac, ac uniyac mwet na pukanten. El ac fah tulokunwack pac lohm nuknuk na luhlahp lal inmahsrlon meoa ac eol soko ma Tempuhl uh oan we. Tuhsruhktuh el ac misac, ac wacngihn mwet ac muhta yohrohl in kahsrel.” (Daniel 11:44, 45) Ma inge oacna sie nuhke ma puk luhn Ezekiel fahk ke orekma lal Gog.​—Ezekiel 38:8-12, 16.

Tukun mwe kalyei sahflah se inge orek, meac sikyak tohkoh? Daniel el ahkkahlwemye nuh sesr: “A in pacl sac Michael [Jesus Christ] el fah tuyak [ke pacl in Armageddon], mwet fihsrack luhlahp se suc tu [muhtwacwacack in yac 1914] ke tuhlihk nuhtin mwet sram. Ac ac fah oasr sie pacl in kweok, a wacngihn sie pacl ou inge ke oasr sie muhtuhnfacl, ahok nuh ke pacl sana. Ac in pacl sa mwet sram fah moliyucklac, elos nuhkewa suc konweyuckyak sihmlac tari in puk sac.” (Daniel 12:1, BMK) Orekma lal Jesus inge, suc mwet tuhtahfpo luhn God, ahkkahlwemyeyuck pac in Fwackyuk 19:11-21.

Suc “Gog luhn Magog” ma ahkkahlwemyeyuck in Fwackyuk 20:8? Ke pacl in mwe srihfe ke sahflahiyen sie tausin yac, eltahl nuhkewa suc lain Jeova ac fah ahkkahlwemye kain in ohiyac kuluk oacna ma ahkkahlwemyeyuck sin ‘Gog luhn Magog,’ suc luhmweyuck nuh sin muhtuhnfacl nuhkewa ma ahkkulukye kuh kalyei mwet nuhkewa luhn God ke sahflahiyen lwen in ongaiyac luhlahp. Ac sahflahiyen u luo inge ac fah oacna sie, eltahl ac misac ma pahtpaht. (Fwackyuk 19:20, 21; 20:9) Ke ma inge, mwet nuhkewa suc lain God ke sahflahiyen sie tausin yac kuh pac in pahngpahng “Gog luhn Magog.”

Oacna mwet lutlut ke Kahs luhn God, kuht ke in etuh na pwacye ac liye ke pacl fahsruh uh lah suc ac fah ekihn oacna “tohkohsrah luhn acn eir.” Tuhsruhktuh, kuht finne nihkihn lah suc ac fah kol un muhtuhnfacl pucspucs uh, kuht luhlahlfongi ke ma luo ma ac fah sikyak na pwacye inge: (1) Gog luhn Magog ac mwet mweun lal eltahl ac fah kuhnausyucklac; ac (2) Tohkohsrah lasr suc kol inge, Jesus Christ, el fah molwelah mwet luhn God ac kololos nuhke sie facluh sasuc ma oasr mislac ac moul wo ma wacngihn kuhtwena mwe sensen kac.​—Fwackyuk 7:14-17.