Mokleyuk Ke “Orekma Sakuruk Lun God”

“Kut longolos kaskaskin orekma sakuruk lun God in kas lasr.”​—OREKMA 2:11.

1, 2.Kain in ma sakuruk fuka sikyuk fwin an Jerusalem ke pal in Pentecost 33 C.E.?

KE SIE lututeng lun pulanpal spring in yiu 33 C.E., oasr ma sakuruk sikyuk ke sie u lun mokul a mutan, elos inge met tuma lutlut lun Jisus Kraist su tukeni nu sie ke sie infwokil in an Jerusalem. “A pusra se tuku in kosrao me pusrpusr oanu kusan eng lulap, a nekla nu fon loom elos muta we. A lo sengalik oanu e sikme nu selos . . . , a elos nu kemwa seseslanu ke ngun mutal a mutamwauk in kaskas ke kutena lo, oanu ngun sang nu selos in fwak.”​—Orekma 2:2-4, 15.

² Sie u lulap lun met elos tukeni nu sie likin loom inge. Kutu sin met inge su muta likinum pa met Ju su isusla in an saye, “met mwo” elos tuku nu Jerusalem in akfulatye kofwo lun Pentecost. Elos arulanu lut meyen kais sie selos long met tuma lutlut ke pal se elos kaskaskin “orekma sakuruk lun God” ke kas lalos sifwanu.” Fuka met Galili inge nu kemwa ku in kaskaskin kas lalos?​—Orekma 2:5-8, 11.

3. Kain in peng mwo fuka met sap Piter el akkalemye nu sin met puspis ke pal in Pentecost?

³ Sie sin met Galili inge pa met sap Piter. El aketeye la ke lusen wik ekasr somla, Jisus Kraist su met sumwos anwuki sin met koluk. Tusruktu, God el akmoulyeak Mwen nutul. Tia pat toko, Jisus el sikme nu sin met tuma lutlut puspis lal, wekunang Piter a kutupa met su muta ke pal inge. Len siengoul somla, Jisus el somwak nu in kosrao. El pa okoila ngun mutal nu fwin met tuma lutlut lal. Ya oasr kalmen ma inge nu sin met nu kemwa su tuku in akfulatye kofwo lun Pentecost? Aok, oasr kalme yok. Meyen mise lun Jisus ikasla nu selos inkanek in eis nunuk munas nu ke ma koluk lalos a in eis “me sang lun ngun mutal” fwin elos akkalemye lalalfongi nu sel. (Orekma 2:22-24, 32, 33, 38) Ke ma inge oiye fuka met inge nu kemwa elos akkalemye ke pal se elos long “orekma sakuruk lun God? A fuka me sramsram inge ku in kasre kut in tuni orekma in kulansap lasr nu sin Jeova?

Mokleyuk in Orekma!

4. Kain in kas palu fuka lal Joel akpayeye in len in Pentecost 33 C.E.?

⁴ Tokin elos eis ngun mutal, met tuma lutlut lun Jisus fwin an Jerusalem elos silaklak in sulkakin peng mwo lun molela nu sin kutu met, elos mutamwauk ke u lulap su tukeni nu sie ke lututeng lun Pentecost 33 C.E. Orekma in luti lalos akpayeye sie kas palu sakuruk, su simusyukla ke century alkosr somla, sel Joel, mwen nutul Petuel: “A a fwa te oru tok, Nga fwa okoila Ngunik fwin ikwe nu kemwa, a mwen nutumwos a an nutumwos fwa palye, met matu lomwos fwa memei meme, met fwusr lomwos fwa liye arurumu. A nga fwa okoila pa Ngunik in len ingo nu fwin met kulansap a nu fwin mutan kulansap . . . meet liki len lulap a me aksangeng lun Jeova.”​—Joel 1:1; 2:28, 29, 31; Orekma 2:17, 18, 20.

5. Ke inkanek fuka met Kristian ke century se meet elos palye? (Srike liye footnote.)

⁵ Ya kalmen ma inge pa God el akola in orala sie fwil lun met palu, mokul a mutan, oanu David, Joel, a Debora, a orekmakinelos in palye ke ma e sikyuk ke pal fwasru? Mo. kalmen orekma in palye lun met Kristian ‘mwen a an, mokul kulansap a mutan kulansap’ inge pa elos nu kemwa fwa mokleyuk ke inkanek lun ngun mutal lun Jeova in sulkakin “orekma sakuruk lun Jeova” su el orala tari meet a ma el akola in oru ke pal fwasru. Ke ma inge elos fwa ekla met kaskas lun El Su Fulat Liki Nu Kemwa.a Ke ma inge, oiye fuka u lulap inge elos akkalemye?​—Hibru 1:1, 2.

6. Tokin elos long me sramsram lal Piter, mea met puspis su long ma inge mokleyuk in oru?

⁶ Tokin u lulap inge elos long aketeye lal Piter, pus selos mokleyuk in orekma. Elos “eis kas ke insielos” a “baptaisla, a in len se akurun tolu tausen met toeni nu selos.” (Orekma 2:41) Oanu sie met Ju a met Ju proselytes, oasr tari lupan etauk lalos ke Ma Simusla. Etauk se inge, wikin lalalfongi ke ma elos lotela sel Piter, kasrelos in eis baptais “in en Papa, a Mwen, a ngun mutal.” (Mattu 28:19) Tokin baptais lalos “elos muta ku in luti lun met sap.” In pal se na, elos mutamwauk in akkalemye nu sin kutu met lalalfongi sasu lalos. Aok, “len nu len, ke elos muta ku ke inse siefwunnu in tempel, . . . kaksakin God, a oi yurin met e nu kemwa.” Ke sripen orekma lo lalos inge, “Jeova el esani nu selos elos su fwa moul pinganu len.” (Orekma 2:42, 46, 47) Congregation lun met Kristian arulanu sa in sikyuk ke an puspis su met lalalfongi inge nu kemwa muta we. Wangin alollo kapkapek, a lupan kapkapek inge, sikyuk ke sripen moniyuk lalos in luti ke “peng mwo” tokin elos foloko nu in loom selos.​—Kolosse 1:23.

Kas lun God Ku

7. (a) Mea me purakak nu sin met puspis ke mutanfwal nu kemwa in ilyuk nu ke u lun Jeova ke len inge? (b) Kain in fwinsrak mwomwo fuka ke kapkapek kom ku in liye fwin fwalu nu fon a ke an sum? (Srike liye footnote.)

⁷ A fuka nu selos nu kemwa su lungse in ekla met kulansap lun God ke pal inge? Elos enenu pa lutlut mwo ke Kas lun God. Ke pal se elos oru ou inge, elos e fwa etu Jeova oanu sie God “pakomuta a kulang, tia sa in mulat, a yoklanu lungkulang a paye lal.” (Exodus 34:6; Orekma 13:48) Elos lotela me sang lun Jeova ke lango ke inkanek lun Jisus Kraist, su sral su surorla liki manol ku in aknasnasye ma koluk nu kemwa. (1 Jon 1:7) Elos insemwomwo pa in etu ke akmwuk lun God in oasr “sifwil moulyuk nu sin met sumwos a met sesumwos.” (Orekma 24:15) Lungse nu sin Met su Sropon “orekma mwolanu” inge nu kemwa sesesla insielos, a elos mokleyuk in luti ma paye saok inge. Ke ma inge elos ekla sie met su mwolela tari, met kulansap lun God su baptais, a elos tafwela in “kapek in etu God.”b​—Kolosse 1:10b; 2 Korint 5:14.

8-10. (a) Fuka me srikasrak lun sie mutan Kristian akkalemye la Kas lun God el “ku”? (b) Mea experience se inge el luti kom kel Jeova a ke orekma lal nu sin met kulansap lal? (Exodus 4:12)

⁸ Etauk su met kulansap lun God elos eis ke lutlut Baibel tia ma na srisrik. Kain in etauk inge purakak insielos, ekulla inkanek in nunuk lalos, a ma inge oan ke insielos. (Hibru 4:12) Ke sie me pupulyuk, sie mutan su pangpang Camille el orekma oanu sie met liaung lun met matuo. Sie sin met su muta ye kurungin lal pa Martha, el sie sin Met Lo lun Jeova. Meyen Martha el arulanu mas ke dementia, paenang el enenu sie met in liyel pal nu kemwa. Enenu sie met in akismakinyel in mongo​—a in okomye ma el kang. Tusruktu, oasr ma se su martha el tia ku in mulkunla, kut e fwa liye ma inge.

⁹ Sie len, Martha el liye Camille ke el tung ke sripen asor lulap ke ma upa ke moul lal. Martha el filiye paol fwin pisel Camille a sulel in welul lutlut ke Baibel. Tusruktu, ya sie met mas oanu Martha el ku in oru Baibel study? Aok, el ku! El fwinne mulkunla tari ma pukanten, tusruktu Martha el tia mulkunla God mwolanu lal; ku el mulkunla ma paye saok su el lotela tari ke Baibel. Ke lusen pal in lutlut, Martha el kaifwe nu sel Camille in ridi kais sie paragraph, liye kais sie fus in Baibel, rid kusensiyuk su oasr ten, a sang topuk ke kusensiyuk inge. Pa inge akmwuk in lutlut laltal ke lusen sie pal, a fwinne Martha el mas, Camille el kapkapek in eis etauk ke Baibel. Martha el akilen la Camille el enenu in asrouki nu sin kutu met su lungse pa in kulansap nu sin God. Meyen el nunku ou inge, paenang el sang nu sin tulik lutlut lal sie nuknuk a faluk, in kasrel Camille el an ku in nukomang nuknuk fwal el fwin wi ke meeting se meet lal in Kingdom Hall.

¹⁰ Arulanu purakak na paye insiel Camille ke lungkulang lal Martha, ke me srikarak lal, a ke moniyuk lal. Ke saflaiye el fwak la ma Martha el kaifweung na paye in luti nu sel ke Baibel arulanu yok sripe, meyen Martha el apkurun in mulkunla tari ma nu kemwa tusruktu, el tia mulkunla ma el lotela tari ke Ma Simusla. Ke sie pal toko, Camille el enenu in orekma ke nien orekma saye su pakiyuki nu sel, ke pal inge el akilen la pal lal in orekmakin ma el lotela tari tuku tari. Ke pal se meet, el fwasr som nu ke sie Kingdom Hall, el orekmakin nuknuk a faluk su Martha sang nu sel, a el siyuk el fwin ku in Baibel study. Camille el kapkapek a tok el baptaisla.

Mokleyuk in Akkalemye Akmwuk Puspis lun Jeova

11. Sayen moniyuk nu ke orekma in luti, fuka kut ku in akkalemye la kut nu kemwa mokleyuk ke peng mwo lun Togusrai?

¹¹ Ke len inge, pus liki million onkosr sin Met Lo lun Jeova elos oanu Martha a Camille, elos luti ke “peng mwo lun togusrai” fwin fwalu nu fon. (Mattu 24:14; 28:19, 20) Oanu met Kristian ke century se meet, elos nu kemwa mokleyuk ke “orekma sakuruk lun God.” Elos arulanu sang kulo meyen oasr pal mwo lalos in akkalemye en Jeova a el okoila nu selos ngun mutal lal. Pal nu kemwa, elos kaifweung in “fwafwasryesr fwal nu sin Jeova, nu ke akinsemwomwo nu kemwa,” elos orekmakin ma sap lal ke inkanek in moul lalos nu kemwa. Sayen ma inge nu kemwa, elos orekmakin pa akmwuk lun God ke nuknuk su elos nukom a ke me yun lalos.​—Kolosse 1:10a; Taitus 2:10.

12. Kain in kas in kai fuka ke nuknuk a ke me yan kut ku in koneak in 1 Timote 2:9, 10?

¹² Aok, Jeova el oakiye akmwuk puspis ke luma a me yun lasr. Met sap Poul el akkalemye kutu nu ke akmwuk lun God ke ma se inge. “A ouyepa tu mutan elos in nukomang nuknuk fwal a tia ratrat, wi tonong a efwal, a tia yunala purak in sifwelos, ke gold ku mwek, ku nuknuk su yok molo, a oanu ma fwal nu sin mutan su fwakak lalalfongi lalos ke orekma mwo.”c Mea kut ku in lotela ke kas lal inge?​—1 Timote 2:9, 10.

13. (a) Mea kalmen “nuknuk fwal”? (b) Efu kut ku in fwak la tia upa nu sesr in fwasr tokin akmwuk lun Jeova?

¹³ Kas lal Poul akkalemye la met Kristian nu kemwa enenu in “nukomang nuknuk fwal a tia ratrat.” Elos tia enenu in nukomang nuknuk sufwal, fokfok, ku tia mwo. Met nu kemwa, wekunang met sikasrup, elos ku in sun me enenu inge ke pal se elos oru nuknuk lalos su elos nukom in fwal, nasnas, a mwo. Ke sie me pupulyuk, yiu nu kemwa, Met Lo lun Jeova ke sie an fwin an South America elos fwafwasyesr ke lusen mail puspis ke insak a tokin ma inge elos sulpa orekmakin oak ten ke lusen aur puspis meyen elos lungse in wi ke toeni lulap lun district. Pal nu kemwa kutu selos putatla nu ke infwal ku sremla a musalla nuknuk lalos ke fwafwawsyesr lalos ke insak. Ke sripe se inge, ke pal se elos tuku nu ke an in toeni lumalos tianu arle mwo. Tusruktu, elos silaklak in pakiye pal in tata ma musalla ke nuknuk lalos, sang button, sifwil orala zipper, a ola a iron nuknuk lalos su elos akola in orekmakin ke toeni lulap. Elos arulanu aksaokye me solsol nu selos in mongo ke tebu lun Jeova, paenang elos tuku nukomang nuknuk fwal.

14. (a) Mea kalmen in nukomang nuknuk tonong a efwal”? (b) Mea kalmen kut nukomang ‘ma fwal nu sin met su fwakak lalalfongi lalos nu sin God’?

¹⁴ Poul el tafwela in akkalemyela kut enenu in nukomang wi “tonong a efwal.” Kalmen ma inge pa me yun lasr enenu in tia orek ke fulang, sakuruk, me purakak ke kosro, akkalemye laan manosr su kut enenu in afwunye, ku kut orek style alukela ma fwal. In toeni nu ke ma inge, kut enenu in nukomang nuknuk su akkalemye ‘akfulat nu sin God.’ Ma inge nu kemwa kasre kut in tuni moul lasr, paye? Aok, kut tia nukomang nuknuk fwal ku me yun fwal mukena kut fwin wi meeting, a pal nu kemwa kut oru ou inge. Me yun lasr pal nu kemwa akkalemye akfulat, oiye sunak meyen kut nu kemwa met Kristian a met kulansap lun God ke lusen aur 24 ke len nu kemwa. Kut kalem ka la nuknuk su kut nukom ke loom lutlut a ke nien orekma fwal nu ke enenu. Fwinne ou inge kut srakna enenu in nukomang fwal wi tonong a akfulat. Fwin nuknuk su kut nukom akkalemye pal nu kemwa ke lalalfongi lasr nu sin God, kut fwa tia alollo in sang ma lo ke inkanek lun informal meyen kut tia mwekin ke lumasr.​—1 Piter 3:15.

‘Nik Kom Lungse Fwal Se inge’

15, 16. (a) Efu arulanu yok sripe nu sesr in fwasr liki akmwuk lun fwal se inge ke nuknuk a me yun? (1 Jon 5:19) (b) Ke sripe saok fuka paenang kut tia enenu in fwasr liki style lun fwal se inge ke nuknuk a me yun?

¹⁵ Kas in kai su simusyukla in 1 Jon 2:15, 16 el akkalemye pa me kasru ke sulela lasr ke nuknuk a me yun. Kut ku in rid: “Komwos in tia lungse fwalu, ku ma su on in fwalu. Kutena met fwin lungse fwalu, lungse lun God tia on in el; tu ma nu kemwa su on in fwalu​—lung lun ikwe, a lung lun muta a mwolanu losrongten lun moul—​tia ma sin Papa me, a ma sin fwalu me.”

¹⁶ Kas in kai inge fwal nu ke pal! Ke pal inge su arulanu upa me purakak lun kutu met, kut enenu in tia lela fwal se inge in sapkin nu sesr ma kut enenu in nukom ku me yun lasr. Yokyokelik ma sufwal ke style ke nuknuk a ke me yun lun met ke lusen yiu ekasr somla. Fwinne akmwuk ke nuknuk lun met business a met lutlut tia ku in ase nu sesr kasru pal nu kemwa kut fwin srikeye nu ke akmwuk su fwal nu sin met Kristian. Pa inge sripe se efu kut enenu in nunku pal nu kemwa ke me enenu nu sesr in “tia oanu luman met fwal se inge” kut fwin lungse in moul fwal nu ke akmwuk lun God a ke ma inge kut “yunala luti lun God.”​—Rom 12:2; Taitus 2:10.

17. (a) WKain in kusensiyuk fuka kut enenu in siyuk sesr sifwanu ke pal se kut moli nuknuk ku sulela sie style ke nuknuk? (b) Efu sifwen sou nu kemwa enenu in loang akmwoye nu ke luma a me yun lun sou lalos?

¹⁷ Meet liki kom oru sulela in moli sie kain in nuknuk, arulanu mwo kom fwin siyuk sum sifwanu meet: ‘Efu ku style ke nuknuk inge arulanu purakak insiuk? Ya ma inge orekmakinyuk sin kutu met pengpeng ke me akengun​—kutu selos su Nga arulanu kaksakin? Ya ma inge orekmakinyen sin street gang ku kutu un met fwin fwal se inge su lungse in akkeye moul sukosok, ku ngunin lain?’ Kut enenu in loang akmwoye ke nuknuk se. Fwin sie nuknuk pa inge ku sie skirt, ya el arulanu futoto ku loes? A fuka atel? Ya nuknuk inge fwal, mwo, a eis sunak, ku el arulanu tingting, me purakak ke kosro, ku koluk atel? Siyuk sum sifwanu, ‘Ya Nga ku in aktukulkulye met saye fwin Nga orekmakin nuknuk se inge?’ (2 Korint 6:3, 4) Efu kut enenu in nunku yok ke ma inge? Meyen Baibel el fwak: “Tu Kraist ouyepa el tia akinsemwomwoyel sifwanu.” (Rom 15:3) Sifwen sou nu kemwa enenu in nunku yok ke aten sou lal. Meyen elos akfulatye God mwolanu su elos alu, paenang sifwen sou nu kemwa enenu in tia alollo in sang kai, a aksumwos fwal fwin ma inge eneneyuk.​—Jemes 3:13.

18. Mea me purakak nu sum paenang kom loang nu ke nuknuk su kom nukom a ke me yun lom?

¹⁸ Peng mwo su kut sulkakin tuku sin Jeova me, el su sropon ma fulat nu kemwa a ma mutal nu kemwa. (Isaia 6:3) Baibel el akkeye kut in etawi el “oanu tulik kulu.” (Efesus 5:1) Nuknuk su kut nukom a me yun lasr ku in sang mwolanu ku el ku in akkolukye Papa tumasr su in kosrao. Paye kut lungse na paye insiel in engun!​—Soakas 27:11.

19. Ma lane fuka ku in tuku kut fwin sulkakin “orekma sakuruk lun God” nu sin kutu met?

¹⁹ Mea pulakin lom ke “orekma sakuruk nu kemwa lun God” su kom lotela tari? Paye, sie me insemwomwo na paye sesr meyen kut lotela ma paye! Meyen kut lalalfongi ke sran Jisus Kraist su surorla liki manol, paenang ma koluk lasr nu kemwa eis nunuk munas. (Orekma 2:38) Ke sripe se inge, oasr sukosok lasr in sramsram nu sin God. Kut tia sangeng ke mise tia oanu kutu met su wangin fwinsrak. A, oasr yurosr kas paye lun Jisus su akkalemye la sie len “elos nu kemwa su muta in kalyuku su el esam fwa long pusral a fwa tuku liki.” (Jon 5:28, 29, NW.) Jeova el arulanu kulang meyen el akkalemye ma inge nu kemwa nu sesr. Sayen ma inge, el okoila ngun mutal lal nu sesr. Ke ma inge, insemwomwo lasr ke me sang inge nu kemwa enenu in mokle kut in akfulatye akmwuk fulat lal a kaksakunal ke moniyuk, in sulkakin “orekma sakuruk” inge nu kemwa nu sin kutu met.

[Footnotes]

Fuka Kom Topuk?

• Kain in “ma sakuruk” fuka met puspis elos long ke Pentecost 33 C.E., a oiye fuka elos akkalemye?

• Fuka sie met el ku in ekla met tuma lutlut lun Jisus Kraist, a mea ku in weang nu ke moul lun met tuma lutlut?

• Efu arulanu yok sripe nu sesr in loang nu ke nuknuk su kut nukom a ke me yan lasr?

• Mea ma puspis su kut enenu in tuni ke pal se kut oru sulela fwin fwal ku tia nuknuk su kut akola in nukom?

[Picture on page 25]

Piter el sulkakin la Jisus el moulyuk liki mise

[Pictures on page 27]

Ya me yan lom a nuknuk su kom nukom sang mwolanu nu sin God su kom alu?

[Pictures on page 28]

Papa a nine Kristian enenu in loang akmwoye ke luma a me yan lun sou lalos