MWE LUTLUT 8

Efuh Kuht Kwacfeacng in Nahweyucklac Wo nuh ke Toeni Lasr uh?

Pahpah se ac tuhlihk se nahtuhl inge nahweyucklac nuh ke toeni uh — Iceland

Ninac se ac tuhlihk muhtwacn se nahtuhl inge nahweyucklac nuh ke toeni uh — Mexico

Nahweyuck na kahto luhn Mwet Loh luhn Jeova fin acn Guinea-Bissau — Guinea-Bissau

Sucu se fin acn Philippine inge fahsr in som nuh ke toeni uh — Philippines

Yac kom nuh lohacng nuh ke petsac luhn mwet ke mwe rit se inge? Yac kom liye ke arlacna wo nahweyuck luhn Mwet Loh luhn Jeova inge ke eltahl ac wi ke toeni luhn congregation laltahl uh? Efuh kuh kuht arlac lohacng nuh ke nuknuk ac nahweyuck lasr uh?

In ahkkahlwemye suhnak nuh sin God lasr. Pwacye lah God el tiac liye muhkwena atacsr ac nahweyuck lasr uh. (Sie Samuel 16:7) Tuhsruhktuh, ke pacl se kuht tuhkweni in alu nuh sel kuht arlacna ke ahkkahlwemye suhnak nuh sel ac oacyacpac nuh sin mwet lili wiyacsr uh. Fin pa kuht etuh muh kuht ac tu ye muhtuhn mwet nuhnuhnkuh ke sie court, kuht ac arlacna ke lohacng nuh ke nahweyuck lasr uh tuh in ahkkahlwemye suhnak lasr nuh sel. Ke inkacnek se pacna inge, ke pacl se kuht som nuh ke toeni lasr uh atacsr ac nahweyuck lasr uh ahkkahlwemye suhnak nuh ke acn in alu lasr ac nuh sin Jeova God, “El suc nuhnuhnkuh facluh nohfohn.”—Genesis 18:25.

In ahkkahlwemye masap sacohk ma kuht moulkihn ke moul lasr. Bible uh ahkkweye mwet Christian se in nukum nuknuk ma “efahl ac in etuh ma wo nuh ke nahweyuck lalos” oacna mwet sahngweng sin Jeova. (Sie Timothy 2:9, 10) Kuht fin “efahl,” kalmac pa kuht ac tiac nukum kuhtwena nuknuk ma ac pwen muhtuhn mwet ke srihpen rahtrahtlac, mwe ahktihkuclkucl, kuh fototolac. Oacyacpac, kuht fin ‘etuh ma wo nuh ke nahweyuck lasr,’ ma inge ac kahsre kuht in sulaclah nuknuk na kahto ma tiac okahrkahr kuh upaclaclac. Kahs in kahsruh inge tiac sruok kuht liki sulaclah pucspucs nuh ke nahweyuck lasr. Kuht finne tiac fahk kuhtwena ma, nahweyuck wo ac kahto lasr uh kuht in “nahwelah mwe luti ke God, Mwet Lahngo lasr, in ma nuhkewa” ac sang ‘kaksak’ nuh sel. (Titus 2:10; Sie Peter 2:12) Ke kuht nahweyucklac wo nuh ke toeni lasr inge, kuht ahkkahlwemye nuh sin mwet sahyac uh mwe srihkasrak wo ke alu lasr nuh sin Jeova.

Tiac mwekihn in tuhkuh nuh ke Lohm in Toeni lasr uh ke srihpen kom nuhnkuh muh wacngihn nuknuk ma arlacna wo ac kahto lom. Nuknuk lasr uh tiac enenuh in yohk molo kuh ma sasuc. Ma yohk srihpac uh pa in fal, nwacsnwacs, ac los.

Efuh kuh yohk srihpen nahweyuck lasr uh ke pacl se kuht alu nuh sin God?
Kahs in kahsruh fuhkah kol sulaclah lasr nuh ke nuknuk ac nahweyuck lasr uh?