Report Lun Met Orekma Lun Togusrai

Elos inge “Long” Kas lun Togusrai In An Brazil

TU IN fwakelik peng mwo lun Togusrai nu sin met Silongkas, pus sin Met Lo lun Jeova fwin an Brazil elos eis kunokon yok in lutlut Brazilian Sign Language ku sramsram ke inkanek in srisrsrisr ke kas Brazil. Orekma lalos oswela fwako mwomwo, oanu experience toko inge el akkalemye.

Eva,a sie mutan silongkas fwin an São Paulo, el mutamwauk in lutlut sign language tokin na el a tulik tolu nutul som liki an seltal a tukeni muta yurin sie mokul silongkas. Ke sie shopping mall, Eva a boyfriend se lal elos osun nu sin sie un met silongkas lun Met Lo a suliyuk elos nu ke meeting in Kingdom Hall. Elos insese in wi nu ke me solsol, meyen elos pangon na mu oasr kofwo.

Ke sripen srakna srik etu lal ke sign language, Eva el kalem na kutu srisrik ke me sramsram su orek ke meeting. Tia pat toko, Met Lo ekasr sulel in loom selos ke sie mongo mulala. Orekmakinyen pitse ke buk srisrik inge Moul Insemwomwo Fwin Fwalu Ma Patpat!, elos aketeye mwolela lun God nu ke sie paredais fwin fwalu. Eva el lungse mea el lotela a mutamwauk in wi meeting nu kemwa pal nu kemwa.

Tia pat tokin ma inge, Eva el som liki boyfriend se lal in moulkin moul fwal nu ke akmwuk lun Baibel. Fwinne ye me lain upa tuku sin sou lal, el kaifweung in kapkapek in ngun a baptaisla ke yiu 1995. Tokin malem onkosr, Eva el sroang nu ke orekma lun pioneer, ku fulltime oanu sie met fwakak ke Togusrai. Mutamwauk nu ke pal inge el kasru met silongkas akosr nu ke inkanek in mwolela a baptais.

Carlos el silongkas na ke pal in isusla me. Ke el tulik me el wi orekmakinye ono koluk, orekma lun kosro, a pusrapasr. Ke sripen aksangengyeyuk el sin un met koluk ngie su lain u lal, paenang el kaengla nu São Paulo a muta yurol João ke lusen kitin pal. João, el oanu Carlos, el silongkas a moulkin moul koluk a fokfok.

Tokin yiu ekasr, Carlos el longak kas lun Togusrai, su moklel in aknasnasye moul lal a aksumwosye moul in payuk lal. Tokin el sun me enenu ke Ma Simusla, Carlos el baptaisla oanu akul ke mwolela lal nu sin Jeova. In pal se na, Carlos el tia pa etu, la João el ouyepa longak peng mwo, a el ekulla pa oiyen moul lal. Tokin el etu la Jeova el tia insese ke orekmakinyen me srulela, João el sisla me srulela puspis lal pangpang “saints.” Tokin el som liki moul lal meeta, João el ouyepa baptaisla.

Fuka yokiyen insemwomwo lal Carlos a João ke pal se elos osun ke Kingdom Hall a liye ekla lulap su elos kemwa oru! Ke pal inge elos kemwa sifwen sou mwomwo a met kulansap moniyuk lun Togusrai.

In an Brazil, oasr congregation 30 a u 154 su orekmakin sign-language, a oasr 2,500 met orekma su wi ka, inmaslon met orekma inge oasr 1,500 met su silongkas. In yiu 2001 “Met Luti Ke Kas lun God” Toeni Lulap lun District lun met silongkas, pus liki 3,000 met elos wi, a 36 met baptaisla. Ke insemwomwo lun Jeova, kut fwinsrak la srakna oasr met silongkas pukanten akola in eis peng mwo lun Togusrai.

[Footnote]