“Fwin God El Wi Kut, Su Ku In Lain Kut?”
“Na mea kut fwa fwak nu ke ma inge? God el fwin wi kut, su ku in lain kut?”—ROM 8:31.
1. Su som liki an Ijipt wi met Israel, a mea moklelos in oru ou inge?
KE pal se met Israel elos illa liki Ijipt a moul oanu sie met sukosok, tokin elos muta we ke lusen yiu 215, su yokiyen pal inge elos met sruo, “un metsa puspis ouyepa oelulos.” (Exodus 12:38) Un metsa inge su tia met Israel elos liye na paye a pulakin me keok siengoul su me aksangeng a sang me keok lulap nu fwin an Ijipt a orala god kikiap lalos in wangin sripe. In pal se na elos liye—yokna ke mutamwauk me keok akakosr nu ke safla—ku lun Jeova in kurunganang met lal. (Exodus 8:23, 24) Fwinne srik etauk lalos ke akmwuk lun Jeova, tusruktu elos etu na paye ma se: La, god nu kemwa lun met Ijipt elos kofla in kurunganang met lal, a, Jeova el akkalemye la el ku in kurunganang met Israel.
2. Efu Rehab el kasru met kalngeyuk lun met Israel, a efu lalalfongi lal nu sin God lalos tia som nu ke wangin sripe?
2 Tokin yiu angoul, meet liki met Israel elos sasla nu ke Fwal Mwolela, met su aulol Moses, pangpang Josua, el supwela met kalngeyuk luo nu ke an inge. Ke an se inge elos osun nu sel Rehab, sie met su muta in an Jericho. Fwal nu ke ma el long ke orekma sakuruk nu kemwa lun Jeova in kurunganang met Israel ke lusen yiu 40 tokin elos som liki Ijipt, el etu la el fwin lungse in eis insemwomwo lal, el enenu in sang kasru nu sin met lal. Ke sripen sulela lalmetmet lal, el a sou lal moliyukla ke pal se met Israel elos tuku in kunausla siti se inge. Inkanek in menmen ke molela lalos sie me akpayeye la God el welulos. Ke ma inge, lalalfongi lal Rehab nu sin God lun met Israel tia wangin sripe.—Josua 2:1, 9-13; 6:15-17, 25.
3. (a) Kain in menmen fuka Jisus el oru futoto nu ke siti lun Jericho su sifwil musaiyuk, a oiye fuka met kol lun alu lun met Ju elos akkalemye? (b) Mea kutu sin met Ju, a met su tia met Ju elos akilen tok?
3 Century siengoul limekosr toko, Jisus Kraist el akkeye la sie met ngusr kun su futoto nu ke siti lun Jericho su sifwil musaiyukyak. (Mark 10:46-52; Luk 18:35-43) Mokul se inge el siyuk sel Jisus in akkalemye nu sel pakoten, kalmen ma inge pa el akilen la God el welul Jisus. Tusruktu, met kol lun alu lun met Ju a met nu kemwa su welulos elos srunga in lalalfongi la menmen lal Jisus sie me akpayeye la el oru orekma lun God. A, elos suk ma tafongla lal a akkolukyel. (Mark 2:15, 16; 3:1-6; Luk 7:31-35) Fwinne tokin elos eis me akpayeye la Jisus el sifwil moulyuk tokin elos unilye, elos srunga in insese ka la orekma lun God pa inge. A, elos suk in sang kolyai nu sin met tuma lutlut lal Jisus, elos srike in tulokinye orekma in “sulkakin peng mwo lun Leum Jisus.” Aok, kutu sin met Ju, a tok met puspis su tia met Ju elos loang nu ke ma sikyuk inge a elos nunku ma inge ke inkanek sumwos. Nu selos su ou inge elos akilen la God el sisla met kol lun met Ju su nunku mu elos sumwosmwos a el wi met tuma lutlut fwokpap lun Jisus Kraist.—Orekma 11:19-21.
God El Wi Su ke Pal Inge?
4, 5. (a) Mea pulakin lun kutu met ke inkanek in sulela sie alu? (b) Ke pal se kut lungse in akilen alu paye, kain in kusensiyuk saok fuka kut ku in siyuk?
4 In kusensiyuk ka la su alu paye, sie met kol lun alu el kaskas ou inge ke sie interview lun TV: “Nga liksreni na in fwak la sie alu el paye el fwin ku in oru sie met in mwo a el fwin ku in tafwela na in moul ke kain in oiye se inge.” Paye, kut insese la alu paye el ku in oru na paye sie met in mwo. Tusruktu, ya kut ku in fwak la fwin sie alu el ku in orala sie met in mwo sie me akpayeye pa inge la God el welul? Ya pa na inge ma eneneyuk kut fwin lungse in akilen su alu paye?
5 Met nu kemwa elos insemwomwo meyen elos ku in oru sulela lalos sifwanu, wekunang sulela ke alu su elos lungse in wi. Tusruktu, sukosok in oru sulela tia sie me akpayeye la sie met el fwa oru sulela ke inkanek sumwos. Ke sie me pupulyuk, kutu met elos sulela alu lalos fwal nu ke lupa, ke me kasrup, luma mwomwo ke pal in alu, ku ke sripen sou lalos wi ke alu se inge. Wangin ma inge, ke kutena inkanek, akkalemye la sie alu el paye ku sito. Kusensiyuk yok ke ma inge pa: Kain in alu fuka kaifwe nu sin met lal in oru ma lungse lun God a sang me akpayeye fukoko ke me kasru mutal, oru met lal in ku in fwak ke lalalfongi, “God el wi kut”?
6. Kain in kas fuka lal Jisus sang kalem nu ke alu paye a alu sito?
6 Jisus el oakiye sie inkanek in akilen alu paye ke pal se el fwak: “Sismouke met palu kikiap, su tuku nu yuromwos in luman sipu, a elos wolf lemnak insielos. Komwos fwa etelos ke fwako lalos.” (Mattu 7:15, 16; Malakai 3:18) Lela kut in kalweni kutu “fwako,” ku akul lun alu paye, tu kut nu kemwa in ku in fwak ke paye la su oasr kasru su tuku sin God ke pal inge.
Akul Puspis Su Ku in Liyeyuk Sin Met nu Kemwa Su Oasr Kasre Sin God
7. Mea kalmen in luti mukena fwal nu ke ma Baibel el fwak?
7 Elos orekmakin Baibel oanu sropon me luti lalos. Jisus el fwak: “Me luti luk tia ma luk, a ma lal su supeyume. Kutena met fwin lungsel oru ma lungse lal, el fwa etu ke me luti fwin ma sin God me, ku Nga sifwanu kaskas.” A ouyepa: “El su ma sin God me, el long kas lun God.” (Jon 7:16, 17; 8:47) Ke sie inkanek lalmetmet, in engunkin kasru su tuku sin God, sie met el enenu in luti ma God el fwak ke Kas lal a fwasr liki me luti puspis su tuku ke lalmetmet lun met ku fasin lun met.—Isaia 29:13; Mattu 15:3-9; Kolosse 2:8.
8. Efu arulanu yok sripe in orekmakin en God ke alu?
8 Elos orekmakin a sulkakin en God, Jeova. Isaia el palye: “A in len sa komwos fwa fwak: ‘Sang kulo nu sin Jeova, pang nu ke el, fwakak orekma lal inmaslon mutanfwalu, a fwakak nu selos, tu el akfulatyeyuk. Komwos on nu sin Jeova, tu el orala ma mwo. Lela ma se inge in eteyuk in fwalu nu fon.’ ” (Isaia 12:4, 5) Jisus el luti nu sin met tuma lutlut lal in pre: “Papa tumasr su in kosrao, em in akmutalyeyuk.” (Mattu 6:9) Ke ma inge, fwinne sie met el met Ju ku tia, met Kristian nu kemwa elos enenu in kulansap oanu “sie mutanfwal in el [God] sifwanu.” (Orekma 15:14) God el arulanu insemwomwo in sang kasru nu selos nu kemwa su insemwomwo in ekla “sie met ke el sifwanu.”
9. (a) Efu insemwomwo ku in akilenyuk yurin met nu kemwa su wi ke alu paye? (b) Fuka Isaia el akkalemye ma tia oanu sie inmaslon alu paye a alu kikiap?
9 Elos akkalemye oiyen insemwomwo lun God. Oanu sropon “peng mwo,” Jeova el “God su insemwomwo.” (1 Timote 1:11) Ke ma inge, fuka met kulansap lal elos ku in supwar ku nunuk koluk ke pal fwasru? Fwinne oasr me keok fwin fwalu a ma upa lun kais sie met, tusruktu, met Kristian elos engun na pal nu kemwa meyen elos kofwo pal nu kemwa ke me mongo in ngun. Isaia el akkalemye la elos siena liki met su wi ke alu kikiap: “Ke ma inge Leum Jeova el fwak ou inge: “Liye, met kulansap fwa mongo, a komwos fwa musrensral. Liye! Met kulansap luk fwa nimnim, a komwos fwa mula. Liye! Met kulansap luk fwa engun a komwos fwa akmwekinyeyuk. Liye! Met kulansap luk fwa on ke engun inse, a komwos fwa tung ke toasr inse, a fwa wowoyuk ke inse musalla.’ ”—Isaia 65:13, 14.
10. Fuka met nu kemwa su wi ke alu paye elos fwasr liki akmwuk in lutlut ke inkanek in srike ma paye ku ma sito meet liki elos konaok ma paye?
10 Elos oru sulela a oiye lalos in fwal nu ke ma akmwuk lun Baibel. “Lalalfongi Jeova ke insiom kemwa, a tia fungla nu ke etauk lom sifwanu,” met sim lun Soakas el kai kut, “kom fwakulak inkanek lom nu kemwa, a el fwa akkalemye inkanek lom.” (Soakas 3:5, 6) God el kasru met nu kemwa su suk kas in luti lal liki na kas in luti lun met su arulanu fos a pilesru lalmetmet lun God. Fwin sie met el insemwomwo in akfwalye moul lal ke Kas lun God, na el ku in fwasr liki kain in lutlut su tuku ke me srike fwin tafongla ma se ku tia.—Sam 119:33; 1 Korint 1:19-21.
11. (a) Efu met nu kemwa ke alu paye elos tia kitakatelik ke un met kol lun alu a un met srisrik? (b) Kain in me srikasrak fuka met kol nu kemwa ke u lun God elos akkalemye ke u?
11 Elos oru orekma ke inkanek fwal a takla fwal nu ke akmwuk lun met Kristian ke century se meet. Jisus el oakiye akmwuk: “A nikmet pangon komwos Rabai, tu sie met luti lomwos a komwos nu kemwa met lili. A nikmet pangon kutena met fwin fwalu papa tumomwos, tu Sie el Papa tumomwos, el su in kosrao. A nikmet pangon komwos met leum, tu sie el met Leum lomwos, Kraist. A el su fulat liki nu kemwa in maslomwos fwa met kulansap lomwos.” (Mattu 23:8-11) Sie congregation lun met lili el tia lela sie un met kol inse fulat su akfulatyelos sifwanu ke kain in mwal puspis a oru elos in fulat liki met srisrik. (Job 32:21, 22) Elos nu kemwa su liaung u lun God elos oru ou inge tia “ke srungesr, a ke lungse; a tia pa insien mani in moli, a ke insemwomwo kena in oru; a tia pa akfulatyelos in leum fwin ma likiye nu selos; a elos in sifwanu oralos me srikasrak nu sin u.” (1 Piter 5:2, 3) Met liaung Kristian paye elos tia oralos sifwanu in leum fwin lalalfongi lun kutu met. Oanu met orekma yurin God, elos sifwanu oralos me srikasrak mwo.—2 Korint 1:24.
12. Kain in nunuk sumwos fuka ke guferment lun met God el siyuk sin met nu kemwa su lungse in eis kasru lal?
12 Elos pusisel ke guferment lun met tusruktu elos tia wi ke kutena u su amei ku lain sie sin sie. Elos nu kemwa su tia “pusisel nu ke ku su fulat lukelos” elos tia ku in lalalfongi ke kasru lun God. Efu? Meyen “ku su on ma God el lela su srik liki ku lal. Ke ma inge, el su lain ma ku, el lain akmwuk ma God el lela.” (Rom 13:1, 2 NW) Tusruktu, Jisus el akilen la oasr pal ku lun God a ku lun met tia insese paenang el fwak: “Sang nu sin Sisar ma lun Sisar, a nu sin God ma lun God.” (Mark 12:17) Elos nu kemwa su lungse in eis kasru lun God elos enenu in “suk meet . . . togusrai lal [God] a ma sumwosmwos lal,” a in pal se na elos akos ma sap lun an’u su fwal nu ke kunokon lalos nu sin God su fulatlanu. (Mattu 6:33; Orekma 5:29) Jisus el akkalemye sie kain in oiye sumwos in tia wi ke kutena u su amei a lain sie sin sie ke pal se el fwak nu sin met tuma lutlut lal: “Elos tia ma lun fwalu, aok oanu Nga tia ma lun fwalu.” Tok el fwak: “Togusrai luk tia ma lun fwal se inge.”—Jon 17:16; 18:36.
13. Mea ip lun lungse ke inkanek in akilen met lun God?
13 Elos tia srisri ke pal se elos orekma ke “ma mwo nu sin met nu kemwa.” (Galetia 6:10) Lungse lun met Kristian akkalemyeyuk nu sin met nu kemwa, elos eis kain in met nu kemwa su siena tun, siena lupan lutlut ku ma lalos, siena mutanfwal, ku siena kas. Orekma mwo nu sin met nu kemwa yokna nu selos su sou lalos in lalalfongi sang kasru nu sesr in akilen su met inge nu kemwa su God el kasru. Jisus el fwak: “Ke ma se inge met e nu kemwa fwa etu tu komwos met tumuk lutlut, komwos fwin lungsumwos sie sin sie.”—Jon 13:35; Orekma 10:34, 35.
14. Ya met nu kemwa su eis insemwomwo lun God elos konaok insemwomwo lun met nu kemwa fwin fwalu?
14 Elos mensis in sun kolyai ke sripen elos oru ma lungse lun God. Jisus el sang kas in sensen nu sin met tuma lutlut lal: “Elos fwin kolyai yu, elos fwa ouyepa kolyai komwos; elos fwin liaung kas luk, elos fwa ouyepa liaung kas lomwos.” (Jon 15:20; Mattu 5:11, 12; 2 Timote 3:12) Elos nu kemwa su eis kasru su tuku sin God elos ekla me srungeyuk, oanu Noa, su lusla fwalu ke sripen lalalfongi lal. (Hibru 11:7) Ke len inge, elos nu kemwa su lungse in eis kasru lun God enenu in taran in tia akkolukye Kas lun God ku kunausla Ma Sap lun God tu in kaengla liki kolyai. Elos etu la fwin elos kaifweung na in oaru nu sin God met puspis elos fwa “kaskas lain” elos.—1 Piter 2:12; 3:16; 4:4.
Pa Inge Pal in Tuni Me Akpayeye Puspis
15, 16. (a) Kain in kusensiyuk puspis fuka ku in kasru kut in akilen alu su eis kasru lun God? (b) Mea million puspis sin met elos akilen ke saflaiye, a efu?
15 Siyuk sum sifwanu, ‘Kain in alu fuka arulanu pengpeng ke akos lalos nu ke Kas lun God, fwinne me luti lun Baibel siena liki lalalfongi lun met puspis? Su akkalemye ma saok ke En God, a orekmakin ma inge in akilenyelos? Su kaifweung na in luti metu ke Togusrai lun God oanu pa inge top siefwunnu nu ke ma upa nu kemwa lun met? Su kaifweung na in akos akmwuk lun Baibel ke oiyen moul nasnas, fwinne kutupal elos nunkeyuk oanu met su tia fwal nu ke pal inge? Kain in u fuka arulanu pengpeng ke met luti lalos su tia eis me mol ke orekma lalos, a met nu kemwa lal oru orekma in luti? Su eis kaksak yok ke sripen akos lalos ke ma sap lun an, fwinne elos tia wi ke politic? Su orekmakin pal a mani lalos in kasru kutu met in lutlut ke God a ke akmwuk lal? A fwinne elos oru orekma mwo inge nu kemwa, su u se inge su pilesreyuk, akkolukyeyuk, a eis kolyai?’
16 Million puspis sin met fwin fwalu nu fon elos tuni me akpayeye puspis a ke saflaiye elos akilen a lalalfongi mu Met Lo lun Jeova mukefwunnu pa orekmakin alu paye. Elos akilen ma inge ke ma Met Lo lun Jeova elos luti a ke oiye su elos akkalemye, wekunang ma lane puspis su alu lalos ku in oru. (Isaia 48:17) Aok, million puspis sin met elos fwak oanu kas palu su oasr in Zekaraia 8:23: “Kut fwa wi kom som, tu kut long tu God el oasr yuromwos.”
17. Efu tia sie oiye lun inse fulat nu sin Met Lo lun Jeova in akkalemye la oasr yurolos alu paye?
17 Ya sie oiye lun inse fulat pa ke pal se Met Lo lun Jeova elos fwak la elos mukefwunnu fwa oasr kasru su tuku sin God? Ke ma paye, ma elos fwak inge oanu sie ke ma met Israel elos fwak la God el welulos fwinne met Ijipt elos tia lalalfongi ou inge, ku ke pal se met Kristian ke century se meet elos fwak la God el welulos a tia nu sin met kol lun alu lun met Ju. Me akpayeye puspis akkalemye la paye ma elos fwak. In an 235 Met Lo lun Jeova elos oru orekma su Jisus el palye meet su met tuma lutlut paye lal elos fwa oru ke len safla: “A mwosasu inge lun togusrai fwa sulkakinelik fwin fwalu nu fon tu in ma lo nu sin mutanfwal nu kemwa; a na safla e fwa tuku.”—Mattu 24:14.
18, 19. (a) Efu Met Lo lun Jeova elos tia enenu in fuleak ke orekma in luti lalos, fwinne oasr me lain nu selos? (b) Fuka Sam 41:11 sang kasru ke me akpayeye la oasr kasru lun God nu sin Met Lo?
18 Met Lo lun Jeova elos tafwela in oru kunokon lalos inge, elos tia lela kolyai ku me lain in kutongye orekma lalos. Orekma lun Jeova enenu in aksafyeyukla. Kutena kaifweung lun kutu met ke lusen century somla in kutongye Met Lo in aksafyela orekma lalos wangin sripe, meyen Jeova el mwolela: “Wangin me meun su lumeyuk lain kom fwa kapkapek, a loa nu kemwa su fwa tuyuk lain kom in nununku kom fwa lusla. Pa inge me usru lun met kulansap lun Jeova, sumwosmwos lalos su ma sik, Jeova el fwak.”—Isaia 54:17.
19 Ku a moniyuk lun Met Lo lun Jeova yok liki meeta—a pa inge me lain su orek fwin fwalu nu fon—sie me akpayeye la Jeova el insemwomwo ke ma elos oru. Togusra Devid el fwak: “Ke ma se inge Nga etu tu kom engun in Nga, meyen met lokwalok luk tia kutangyula.” (Sam 41:11; 56:9, 11) Met lokwalok lun God tia ku in kutangla met lun Jeova ke kutena pal, meyen Met Kol lalos, Jisus Kraist, el fwasr nu meet nu ke kutangla safla!
Ya Kom Ku In Topuk?
• Mea kutu me srikasrak in pal meeta ke met su oasr kasru sin God?
• Mea kutu akul lun alu paye?
• Efu kom lalalfongi na paye la God el kasru Met Lo lun Jeova?
[Picture on page 22]
Elos nu kemwa su lungse kasru lun God elos enenu in orekmakin Kas lun God oanu sropon me luti lalos
[Picture on page 23]
Met Kristian elder nu kemwa elos kulansap oanu sie me srikasrak ke u