Fwalu Sasu​—Ya Kom Fwa Muta We?

“Wangin sie ma mwo nu selos, liki in engun, a in oru ma mwo lusen pal elos moul; a ouyepa tu kais sie met fwa mongo a nim, a engun ke ma mwo in orekma lal nu kemwa. Pa inge me sang lun God.”​—EKKLISIASTIS 3:12, 13.

1. Efu kut ku in srukye nunuk sumwos ke pal fwasru?

MET puspis elos nunku ke God Ku Liki Ku oanu sie met su arulanu upa in ma nu kemwa. Tusruktu, fus lung inge sie me akpayeye su kom ku in konaok ke Kas lal. Ma inge fwal nu ke oiyel oanu “God su insemwomwo” a el su filiye papa a nine se meet kiesr ke sie paredais fwin fwalu. (1 Timote 1:11; Genesis 2:7-9) In suk etauk ke ma God el mwolela ka nu sin met lal ke pal fwasru, kut tia enenu in lut ke luma puspis su kut lotela su ku in use nu sesr insemwomo ma patpat.

2. Mea kutu ma puspis su kom ku in ngetuk nu ke pal fwasru?

² Ke me lutlut tari kut lotela ma tolu ke luma akosr su Baibel el palye ke “kosrao sasu a fwalu sasu.” (Isaia 65:17) Sie sin kas palu inge su kut ku in lalalfongi na paye simusyukla in Fwakyuk 21:1. Kutu sin fus tok inge sramsramkin ke pal se God Ku Liki Ku el e fwa ekulla ma nu kemwa fwin fwalu nu ke ma mwo. El fwa ela sroninmuta nukemwa liki asor. Wangin la met ku in mise ke sripen matuo, mas, ku ongoiye. Asor, tung, a ngal fwa wanginla. Sie fwinsrak na mwomwo pa inge! Tusruktu, ya kut ku in lalalfongi na paye la pal inge e fwa tuku, a mea fwinsrak inge ku in oru nu sesr ke pal inge?

Sripen Lalalfongi

3. Efu kut ku in lalalfongi ke mwolela lun Baibel ke pal fwasru?

³ Tuni akmwoye Fwakyuk 21:5 ke el tafwela: “Liye! Nga oru ma nu kemwa sasu.” Mwolela na mutal se inge mwo liki kutena kain in akmwuk sukosok lun met, ku kutena bill of rights ke len lasr, ku kutena nien sun lulap lun met ke pal fwasru. Aok, kas paye pa inge su tuku sin Sie Met su Baibel el fwak la “tia ku in kikiap.” (Taitus 1:2) Saap kom e nunku mu fwal kut ku in tui na inse, wanginla ma kut enenu, engunkin fwinsrak mwo inge ke pal fwasru a filiye lalalfongi nu sin God. Tusruktu, kut tia enenu in tui. Srakna oasr ma puspis kut ku in etu ke pal fwasru.

4, 5. Kain in kas palu fuka lun Baibel su sramsramkinyuk tari ku in akkeye lalalfongi lasr ke ma oasr ke pal fwasru?

⁴ Nunku ke me lutlut tari’a el oakiye ke mwolela lun Baibel ke kosrao sasu a fwal sasu. Isaia el palye ke kain in akmwuk sasu, a kas palu lal inge akpayeyuk ke pal se met Ju elos folokla nu in an selos a sifwil oakiye alu paye. (Ezra 1:1-3; 2:1, 2; 3:12, 13) Tusruktu, ya kas palu lal Isaia srusrngiye ma inge mukena? Mo na mo! Ma puspis su el palye e fwa akpayeyuk ke inkanek mwolanu ke pal fwasru. Efu kut ku in fwak ou inge? Meyen ke ma kut ridi tari in 2 Piter 3:13 a Fwakyuk 21:1-5. Me sramsram ke fus inge nu kemwa srusrngi nu ke kosrao sasu a fwalu sasu su akola in me akinsemwomwoye met Kristian nu kemwa fwin fwalu nu fon.

⁵ Oanu ma kut liye tari, Baibel el orekmakin kas inge “kosrao sasu a fwalu sasu” pal akosr. Kut sramsram tari ke ma tulo a ma inge nu kemwa me akengunye inse na paye. Aok, Baibel el fwakak tari in kas in palu la God el akola in kunausla ma koluk nu kemwa wi pa me akkeok nu kemwa a tokin ma inge el fwa akinsemwomwoye met nu kemwa ke sie akmwuk sasu su el mwolela ka.

6. Mea kas palu akakosr su sramsramkin a palye “kosrao sasu a fwalu sasu”?

⁶ Lela kut in tuni ingenu ma lula ke kas se inge “kosrao sasu a fwalu sasu,” In Isaia 66:22-24: “ ‘Tu oanu kosrao sasu a fwal sasu, su Nga fwa orala, fwa on ye mutuk,’ Jeova el fwak, ‘ou inge fute lom a em fwa on. A a fwa te oru, liki sie malem sasu nu ke siepa malem, a liki sie Sabat nu ke siepa, ikwe nu kemwa fwa tuku in alu ye mutuk, Jeova el fwak. ‘A elos fwa illa, a suiye monin mise lun met su orek ma koluk lain yu; tu met lalos fwa tia mise, ku e lalos kunla; a elos fwa me srungeyuk nu sin ikwe nu kemwa.’ ”

7. Efu kut ku in fwak la Isaia 66:22-24 e fwa akpayeye ke pal fwasru?

⁷ Kas in palu se inge akpayeyuk pa tari nu sin met su sifwil foloko nu in an selos, tusruktu e fwa oasr siepa akpayeyen ma inge. Tokin yiu puspis, Piter el simusla leta akluo lal a ouyepa Fwakyuk el simla, meyen buk luo inge srusrngiye ‘kosrao sasu a fwalu sasu.’ Kut ku in ngetla tupan akpayeyen me insemwomwo nu kemwa ke akmwuk sasu. Tuni akmwoye kutu luma su kut akola in engunkin ke pal fwasru.

8, 9. (a) Ke inkanek fuka met lun God elos fwa “tu ma patpat”? (b) Mea ma yok ke kas palu su akkalemye la met kulansap lun Jeova elos fwa alu “malem sasu nu ke malem sasu a ke Sabat sasu nu ke siepa”?

⁸ Fwakyuk 21:4 akkalemye la wangin la mise. Kas in Isaia sapter 66 insese nu ke ma inge. Kut ku in liye in fus 22 la Jeova el etu la kosrao sasu a fwalu sasu inge fwa on ne tok a fwa tia kitin pal na. Sayen ma inge, met lal fwa tu na ku; elos fwa “tu ma patpat” ye mutal. Ma Jeova el oru tari nu sin met sulosola lal ase nu sesr sripe na mwomwo in lalalfongi. Met Kristian paye elos sun kolyai upa, a oasr pa kutu met elos kaifweung in kunauselosla nu kemwa ke sripen moniyuk lalos ke alu. (Jon 16:2; Orekma 8:1) Tusruktu, met lokwalok pengpeng su oanu Emperor lun Rom pangpang Nero a Adolf Hitler arulanu koase met lun God, elos tia ku in kunausla met oaru nu kemwa lun God, su orekmakin in el. Jeova el kurunganang congregation lun met lal, a kut ku in lalalfongi na paye la el oru ma inge in on ma patpat.

⁹ In oupanu ma inge, elos nu kemwa su oaru nu sin God oanu ipen fwalu sasu, akmwuk sasu lun met sasu su wi alu paye ke fwalu sasu, fwa kais sie tu ma patpat meyen elos orekmakin alu nasnas nu sin Met Su Orala ma nu kemwa. Akmwuk lalos in wi alu tia ke kais kutu pal na. Ke Ma Sap lun God, su etukyung nu sin met Israel kel Moses, oakiye nu selos in alu pal puspis ke kais sie malem, ke mutamweyen malem nu kemwa, a ke kais sie wik, ke len lun Sabat. (Livitikus 24:5-9; Oekyuk 10:10; 28:9, 10; 2 Kronikel 2:4) Ke ma inge Isaia 66:23 el sramsramkin pal nu kemwa in, alu nu sin God pal nu kemwa, wik nu kemwa a malem nu kemwa. Atheism ku tia alu nu sin God a orek luma ke alu tia ku in liyeyuk in pal meeta. “Ikwe nu kemwa fwa tuku in alu ye mutun” Jeova.

10. Efu kom ku in lalalfongi la fwalu sasu e fwa tia akkolukyeyuk ma patpat sin met koluk?

¹⁰ Isaia 66:24 akkalemye na paye nu sesr la misla a sumwosmwos lun fwalu sasu fwa tia sun kutena me sensen ke kutena pal. Met koluk fwa tia ku in kunausla ma inge. Esam la 2 Piter 3:7 el fwak la ke pal fwasru “len nununku a kunausla lun met koluk” fwa tuku. Elos nu kemwa su orekma koluk fwa mise. Wangin kutena ma koluk ku in sikyuk nu sin met su wangin meta, tia oanu ma sikyuk pal nu kemwa ke pal in meun, met mise yurin met su wangin meta pus liki met meun. Met Nununku Lulap el akkalemye na paye nu sesr la len lal fwa len in kunausla lun met koluk nu kemwa.

11. Mea sikyuk ke pal fwasru nu sin met nu kemwa su lain God a alu lal oanu Isaia el akkalemye?

¹¹ Met sumwos su tia mise elos fwa liye la kas palu lun God arulanu paye. Fus 24 el palye la “monin mise lun met su orek ma koluk lain” Jeova pa me akpayeye ke nununku lal. Kas upa su Isaia el orekmakin orala me lut na paye. Aok, ma inge arulanu fwal nu ke sie me sramsram. Likin kalkal lun Jerusalem in pal meeta pa nien sisi kutkut, a kais kutu pal, monin met mise ke orekma koluk lalos su tia fwal in pakpuki sisila nu we.a Nu in an inge, oasr wit a e fururur we in furreak kutkut nu kemwa a monin met mise inge. Arulanu kalem, ma Isaia el fwak, in akkalemye saflaiyen nununku lun Jeova nu sin met koluk inge nu kemwa su lainul.

Mea Ma El Mwolela Meet

12. Isaia el sang aketeye saye fuka ke moul ke fwalu sasu?

¹² Fwakyuk 21:4 aketeye nu sesr ke kutu ma su e fwa wanginla ke akmwuk sasu su e fwa tuku. Tusruktu, mea e fwa oasr in pal ingo? Fuka luman moul in pal ingo Ya kut ku in eis kutena aketeye mwomwo? Aok. In Isaia sapter 65 el aketeye kas in palu ke luma su kut fwa engunkin fwin Jeova el insemwomwo in lela kut in moul, in pal se safla, ke el orala kosrao sasu a fwalu sasu. Elos nu kemwa su akinsemwomwoyeyuk in eis usru ma patpat ke fwal sasu fwa tia sifwil matuo a ke saflaiye mise. Isaia 65:20 akkalemye na paye sesr: “A elos fwa tia sifwil wisla liki an ingo sie tulik fwusr su len pu na la, ku sie met matu su tia tingtingi ke len; tu tulik sa fwa mise ke yiu siefok matwel, a met koluk su yiu siefok matwel fwa selngaweyuk.”

13. Fuka Isaia 65:20 el akkalemye na paye sesr la met lun God elos fwa engunkin misla a wangin sangeng?

¹³ Ke pal se ma inge akpayeyuk nu sin met in len lal Isaia ke pal se meet, ma inge kalmekin la wangin kutena me sensen nu sin tulik srisrik sikyuk in an ingo. Wangin met lokwalok ilyuk in oanu met Babulon elos oru meet, in wisla tulik srisrik ku in uniye mokul su sun pal in ku lalos. (2 Kronikel 36:17, 20) Fwin fwalu sasu el akmwuki, e fwa wangin me sensen nu sin met, elos fwa muta in misla, a ku in engunkin moul lalos. Fwin sie met el sulela in lain God, el fwa mise. God el fwa kunausella. A fuka fwin met kol inge yiu siefok matwe? El fwa mise oanu “tulik srisrik” fwin srikeyuk nu selos su ku in moul ma patpat.​—1 Timote 1:19, 20; 2 Timote 2:16-19.

14, 15. Fwal nu ke Isaia 65:21, 22, ke kain in orekma mwo fuka kom ku in ngetuk nu ke pal fwasru?

¹⁴ Isaia el loang yok nu ke luman moul su ku in liyeyuk ke fwalu sasu, a tia ke kunanela lun met koluk su lain God. Srike in lumala mu kom oasr tari ke luma inge. Saap ma se meet su sikyuk in nunuk lom an pa ma puspis su futoto nu in loom. Isaia el akkalemye ma inge in fus 21 a 22: “A elos fwa musai loomu, a muta we, a elos fwa eoki nien grepu, a mongo fwako ka. Elos fwa tia musai, a siepa muta we; elos fwa tia eoki, a siepa kangla. Tu oanu len lun soko sak ou inge len lun met srak, a met sulela luk fwa engun pat ke orekma lun paulos.”

¹⁵ Kom fwin soenna eis experience ke orekma in musa ku orekma in imae, kas in palu lal Isaia akkalemye la lutlut nu ke ma inge srakna sano kom. Ya kom akola in wi lutlut ke kasru lun met luti fwal, saap sie sin met atalani kulang lom su akola in kasru kom? Isaia el tia fwak mu loom sum fwa oasr glass yok ke windo in loom sum tusruktu in oasr blinds ka tu kom in engunkin engyeng srik, ku saap oasr glass ke windo loom tu kom in liye ekla lun pulanpal puspis. Ya kom oru fwasu ke loom sum in ilyuk tu in tia sremla kof in af a sno ka? Ku kom oru fwasu in loom sum in tupasrpasr fwal nu ke pulanpal in an sum​—oanu ma orek fwin an Middle East—​sie fwasu su kom ku in oru sou lom in toeni ka pal in mongo ku sramsram?​—Duteronomi 22:8; Niemaia 8:16.

16. Efu kom ku in lalalfongi na paye la fwalu sasu ku in wise insemwomwo ma patpat?

¹⁶ Oasr nien muta lom, pa inge ma yok emeet liki na in etu ma inge nu kemwa. E fwa ma lom ke pal fwasru​—tia oanu misinge saap kom orekma upa in musai sie loom tusruktu kutena met pa eis insemwomwo ka. Isaia 65:21 el ouyepa fwakak la kom taknelik a mongo fwako ka. Arulanu kalem, ma inge orala me aketeye futoto nu ke luma nu kemwa su oasr we. Kom ku in konaok insemwomwo lulap ke kaifweung lom, ke fwokin orekma lom. Kom ku in oru ou inge ke lusen moul lom​—“oanu len lun soko sak.” Paye, ma inge nu kemwa fwal nu ke kas inge “ma nu kemwa sasu”!​—Sam 92:12-14.

17. Papa a nine elos fwa ku in konaok mwolela fuka su me akkeye na paye inse?

¹⁷ Kom fwin sie papa ku nine, kas se inge ku in purakak insiom: “Elos fwa tia orekma ke wangin sripe, ku isus nu ke ongoiye; tu elos futen met insemwomwo lun Jeova, a tulik nutulos welulos. A a fwa te oru, meet liki elos pang, Nga fwa topuk; a ke elos srakna kaskas, Nga fwa long.” (Isaia 65:23, 24) Ya kom etu ke experience la fuka ngal su tuku ke ‘isus nu ke ongoiye’? Kut tia enenu in simusla ma upa nu kemwa su tulik el ku in sang nu sin papa a nine a kutupa met. Sayen ma inge, kut nu kemwa liye la papa a nine puspis elos kafofo ke orekma lalos, ku me akengun, paenang arulanu srik pal elos orekmakin nu sin tulik nutulos. Tia oanu ma Jeova el akola in oru, el akkalemye na paye la el akola in sang top nu ke me enenu lasr, a sano kut in fwakak ma inge.

18. Efu kom ku in lalalfongi la kom ku in engunkin kosro nu kemwa ke fwalu sasu?

¹⁸ Ke kom nunku ke ma kom fwa engunkin ke fwalu sasu, srike tuni akmwoye luma su kas palu lun God el aketeye: “ ‘Kosro wolf a lam fwa tukeni mongo, a laion fwa mongo sruun maa oanu oxu; a kutkut fwa ma nun serpent. Elos fwa tia akkeokye ku kunaus in eol mutal sik na fon,’ Jeova el fwak.” (Isaia 65:25) Met sroal elos srike in sroalela luma se inge, tusruktu tia pitse pa inge ke nunuk na lun sie met. Misla oasr yurin met nu kemwa a oasr pa misla inmaslon kosro nu kemwa. Met biologist puspis a met su lungse ma mwurakrak elos orekmakin moul lalos nu fon in lutlut ke kutu kain in kosro ku kais soko na kosro. Aok, tia ou inge ke akmwuk sasu, nunku ke ma kom ku in lotela ke pal se kain in kosro nu kemwa elos tia sifwil akkolukyeyuk ke sripen sangeng sin met. Ke ma inge kom fwa ku in futoto sin kain in kosro nu kemwa fwinne mwon srisrik ku ma mwurakrak srisrik nu kemwa su muta ke insak​—aok, tuni mwo, lutlut mwo, a engunkin ma inge nu kemwa. (Job 12:7-9) Kom ku in oru ou inge ke inkanek fwusesr, tia fosrnga sin met a kosro. Jeova el fwak: “Elos fwa tia akkeokye ku kunaus in eol mutal sik na fon.” Oasr sie ekla yok pa inge nu ke ma kut liye a pula misinge!

19, 20. Efu met lun God siena liki met nu kemwa ke len inge?

¹⁹ Oanu ke ma akkalemyeyuk ke mutamwauk’a, metu tia ku in fwakak ma e sikyuk ke pal fwasru ke inkanek sumwos, fwinne oasr sramsram yok nu ke millenium sasu. Ma inge me akasorye met puspis, me akfosyelos, a me akngalye insielos. Peter Emberley, sie director lun Canadian university, el simusla: “Met matu puspis elos srukak kusensiyuk puspis ke moul lalos. Su Nga u? Mea na paye Nga kaifweung nu ka? Mea me usru Nga ku in sang nu sin fwil sasu tok u? Elos arulanu kaifweung ke elos sun matwelos in ku in aksumwosye moul lalos a in sang kalme nu ka.”

²⁰ Kom ku in akilen la efu ku met puspis oru ou inge. Saap elos suk in akinsemwomwoye moul lalos ke inkanek lun hobbies ku me akengun su arulanu purakak insielos. Fwinne ou inge, elos tia etu na paye la mea e fwa sikyuk ke pal fwasru, ke ma inge elos pulakin in moul lalos la tia arulanu yok sripe, sufwal, a wangin kalme. Ke ma inge, srike lumala ma inge ke nunuk lom, la fwal nu ke ma kut tuni tari. Kom etu tari la ke kosrao sasu a fwalu sasu su Jeova el mwolela ka kut e fwa liye ma nu kemwa su raunikutla a kut fwa ku in fwak ke insiesr, ‘Paye, God el orala ma nu kemwa sasu! Kut arulanu engunkin na paye ma inge!

21. Mea ma oanu sie kut ku in konaok in Isaia 65:25 a Isaia 11:9?

²¹ Tia me lumeyuk sena pa in nunku ke moul ke fwalu sasu lun God. El suli kut, a kaifwe kut, in alu nu sel in paye ke pal inge a in moul sumwos nu ke pal se ‘elos fwa tia akkeokye ku kunaus in eol mutal.’ (Isaia 65:25) Ya kom etu la, ke pal se Isaia el sramsramkin panu kas inge a la el toeni pa kutu ma su arulanu yok sripe nu ke insemwomwo lasr na paye ke fwalu sasu? Isaia 11:9 el fwak: “Elos fwa tia akkeokye ku kunausla in eol mutal luk na fon; tu fwalu fwa sesesla ke etu Jeova, oanu kofu afwunla mwea.”

22. Lutlut lasr ke kas palu akosr lun Baibel enenu in akkeye kaifweung lasr in oru mea?

²² “Etauk lun Jeova.” Ke pal se God el orala ma nu kemwa sasu, met nu kemwa su moulla fwin fwalu fwa eis etauk paye kel a ke ma lungse lal. Etauk inge yok liki etauk su tuku ke lutlutkinyen moul lun kosro. Wikin ma inge pa Kas mutal Lal. Ke sie me pupulyuk, fwin kom nunku ke lupan ma kut lotela tari ke oiye akosr in kas palu su sramsramkin ke “kosrao sasu a fwalu sasu.” (Isaia 65:17; 66:22; 2 Piter 3:13; Fwakyuk 21:1) Oasr sripe mwomwo nu sum in ridi Baibel len nu kemwa. Ya ma inge sie ipen orekma lom ke len nu kemwa? Fwin tia, na kain in aksumwos fuka ke moul lom kom enenu in oru in ku in ridi kutu ma God el lungse in fwak nu sum? Kom ku in konaok la sayen nunuk lom, in ngetla liye me insemwomwo su fwa sikyuk ke fwal sasu, kom ku in eis panu me insemwomwo yok in pal inge, oanu ma met sim lun Sam el pulakin meet.​—Sam 1:1, 2.

[Footnote]

Fuka Kom Topuk?

• Efu kut ku in fwak la Isaia 66:22-24 el palye ke ma e sikyuk ke pal fwasru

• Mea kom ngetuk na paye ke pal fwasru inmaslon ma sromonyuk ke kas palu in Isaia 66:22-24 a Isaia 65:20-25?

• Sripe puspis fuka oasr yurom in lalalfongi ke pal fwasru lom?

Pictures on page 15]

Isaia, Piter, a Jon elos palye ke luman “kosrao sasu a fwalu sasu”