Kas Palu Ke Pal Fwasru Lasr Su Apkurun

KE PAL se el akuteye ke pal fwasru lun metu a fwalu, met sap Poul el simusla: “A, oana mwuleung lal [God], kut sano kosrao sasu a fwal sasu, yen sumwosmwos on we.” (2 Piter 3:13) Kas palu se meet ke “kosrao sasu a fwalu sasu” simusyukla ke buk lal Isaia. (Isaia 65:17; 66:22) Ke el orekmakin kas palu inge, Piter el akkalemye la ke pal lal soenna akpayeyeyuk kas palu inge.

Tok, apkurun in yea 96 C.E., ke aruruma ku Fwakyuk su itukyang nu sel Jon met sap el sramsramkin pa ke “fwalu sasu” su oasr me insemwomwo yok ka ye koko lun Togusrai lun God. (Fwakyuk 21:1-4) Kas lal Jisus wekunang kas lal met sap Poul ke ma puspus su fwa sikyuk fwin fwalu meet liki tuku lun Togusrai lun God el akpayeyuk ke pal inge. Ke ma inge, kut ku in lulalfongi la Togusrai inge tia pat fwa orala fwal sasu. Fwal sasu inge fwa oana mea? In Baibel ke buk se inge su pangpang Isaia el akkalemye nu sesr arulanu kalem.

Me Insemwomwo ke Fwalu Sasu

Misla Fwin Fwalu Nufon a Inse Sefwanna ke Alu. “Elos fwa tukye kutlas natulos nu ke plau, a mwusra natulos nu ke me pakpuk lesak. Mutanfwal fwa tia srukak kutlas lain mutanfwal, a elos fwa tia sifwil lutlut meun.”​—Isaia 2:2-4.

Misla Inmasrlon Metu a Kosro u. “A kosro wolf fwa muta yurin lamu, a lepard fwa on yurin goat fwusr, a kao fwusr a laion fwusr a kao fat; a sie tulik fwusr fwa kololos. A kao a bear fwa mongo; ma natulos fwa tukeni on. A laion fwa mongo maa pao oana oxu. . . . Elos fwa tia akkeokye ku kunausla in eol mutal Luk nufon; tu fwalu fwa sesesla ke etu Jeova, oana kofu afwunla mwea.”​—Isaia 11:6-9.

Mongo Puspus Nu Sin Met Nukewa. “A fwin eol soko inge Jeova lun un met meun El fwa oru nu sin mutanfwal nu kemwa sie kofwo in ma fat, sie kofwo lun wain fwin mes, in ma fat sesesla ke maro, lun wain fwin mee arulanu aknasnasyeyuk.”​—Isaia 25:6.

Wanginla Mise. “[God] El nuna okomla mise nu tok, a Leum Jeova El fwa ela sroninmet liki muta nukewa. A angonkas lun met sral el fwa wisla liki fwalu na fon, tu Jeova el fwak.”​—Isaia 25:8.

Met Mise Sifwilpa Akmoulyeyukyak. “Met mise fwa moul, manolos fwa sifwil tukakek. Elos su motul inkulyuku fwa ngetalik a engun ke pusra lulap . . . Fwalu fwa sifwil oswela met mise.”​—Isaia 26:19, The New English Bible.

Messaia el sie Met Nununku Sumwosmwos. “El fwa tia nununku ke ma mutal liye, ku papu ke ma srel long. A ke sumwosmwos el fwa nununku met sekasrup, a papu ke sumwos ke met fwokpap lun fwalu.”​—Isaia 11:3, 4.

Met Kun a Met Silongkas Akkeyeyukla. “Na mutun met kun fwa ikakla, a sren met silongkas fwa patla.”​—Isaia 35:5.

Yen Mesis Fwa Oasr Fwako Mwomwo We. “Yen mesis a fwal pao fwa insemwomwo; a an musrasra fwa engun, a fwarngelik oana ros. A fwa arulana fwarngelik, a engun, aok ke engun a on.”​—Isaia 35:1, 2

Sie Fwalu Sasu. “Nga orekla kosrao sasu [sie guferment sasu in kosrao] a fwal sasu [u sasu lun met sumwosmwos nukewa]; a ma meeta fwa tia esamyuk, ku nunkauk ka. A komwos insemwomwo a engun ma patpat in ma Nga orekla. . . . A elos [met nukewa su muta ke fwal sasu su God el mwulela ka] fwa musai loomu, a muta we; elos fwa eoki nien grepu, a mongo fwako ka. Elos fwa tia musai, a siepa muta we; elos fwa tia eoki, a siepa kangla. Tu oana len lun soko sak oinge fwa len lun met srak; a met sulela luk fwa engun pat ke orekma lun paulos. Elos fwa tia orekma ke wangin sripe, ku isus nu ke ongoiye; tu elos futen met insemwomwo lun Jeova, a tulik natulos oelulos. A a fwa te oru, meet liki elos pang, Nga fwa long.” “‘Tu oana kosrao sasu a fwal sasu, su Nga fwa orala, fwa on ye mutuk,’ Jeova el fwak, ‘ou inge fute lom a em fwa on.’”​—Isaia 65:17-25; 66:22.

Sie Kas Palu ke Mwolanu lun Pal Fwasru

Sayen buk lal Isaia, oasr pa buk saye lun Baibel su palye ke me insemwomwo puspus ke pal fwasru. Baibel el tingtingi ke kas palu su akkalemye ke ma mwolana puspus su God el fwa akpayeye ke inkanek lun Togusrai lal ye koko lun Kraist.a Ya kom lungse in muta ke kain in akwuk mwomwo oana paredais? Kom ku! Tusruktu kom enenu in suk a lutlut la mea Baibel el luti na paye ke akwuk mwomwo puspus lun God nu ke pal fwasru, a in lutlut la fuka kom ku in wi ka. Met Lo lun Jeova elos fwa insemwomwo in kasre kom.

[Footnote]

[Picture on page 4]

Oasr misla lun metu nu sin sie sin sie a nu sin ma mwurakrak

[Picture on page 5]

Met mise fwa sifwil moulyuk

[Picture on page 6]

Fwalu nufon fwa sie paredais