Ya Kom Oru Orekma Mwo Kemwa Lom Nu Sin God?
“Tu God el fwa wise orekma nu kemwa nu in nununku, wi ma lukma nu kemwa, fwinne mwo ku fwinne koluk.”—EKKLISIASTIS 12:14.
1. Kain in me sang fuka Jeova el sang nu sin met lal?
JEOVA el kasrelos su kaifweung in esamul oanu Met Orelosla. Kas lal sang nu selos etauk su eneneyuk tu in akinsemwomwoyel na paye. Ngun mutal lun God kasrelos in oru orekma mutal a in “isus fwako in orekma mwo nu kemwa.” (Kolosse 1:9, 10) Sayen ma inge, Jeova el kitelos me mongo in ngun a kolyuk lal ke inkanek lun Met kulansap oaru a lalmetmet. (Mattu 24:45-47) Ke ma inge, ke inkanek puspis, met lun God eis me insemwomwo su tuku in kosrao me ke elos tafwela in kulansap nu sin Jeova a in oru orekma saok in luti ke peng mwo lun Togusrai.—Mark 13:10.
2. Fwin ke orekma nu sin Jeova, kain in kusensiyuk fuka sikyuk?
2 Met Kristian paye elos insemwomwo in kafofo ke orekma mutal nu sin Jeova. Tusruktu, kutu sin met elos munasla a nunku la kaifweung lalos wangin sripe. Ke sie me pupulyuk, saap kutu pal, sie met Kristian su mwolela tari elos mutamwauk in alollo fwin kaifweung lalos ke orekma yok sripe na paye. Ke pal se el nunku ke lutlut lun sou a kutupa orekma, kain in kusensiyuk inge ku in sikyuk ke nunuk lun sie sifwen sou: ‘Ya Jeova el insemwomwo na paye ke ma kut oru? Ya kut oru orekma mwo kemwa lasr nu sin God?’ Kas lalmetmet lun met luti ku in sang kasru in sang topuk nu ke kusensiyuk inge.
Ya Ma Nu Kemwa Ma Losrongten?
3. In akos Ekklisiastis 12:8, mea ma lusrongten yok emeet?
3 Saap kutu met elos ku in nunku la kas lun met lalmetmet tia me akkeye nu sin kutena met—met fwusr a met matou. “ ‘Lusrongten lun ma lusrongten!’ Met luti el fwak, ‘Ma nu kemwa ma lusrongten.’ ” (Ekklisiastis 12:8) Ke ma paye, sie ma lusrongten yok emeet in pilesru Met Orekutla ke len in fwusr lasr, in kapek matou a tia kulansap nu sel, in moul matou in akkalemye na la loes moul lom. Ma nu kemwa ma lusrongten, wangin sripe, ke kain in met inge, el fwinne kasrup ke pal se el mise a pengpeng ke fwalu se inge su on yurin sie met koluk, Setan su Devil.—1 Jon 5:19.
4. Efu kut ku in fwak la tia ma nu kemwa ma lusrongten?
4 Tia ma nu kemwa ma lusrongten nu selos kemwa su elosak ma saok in kosrao oanu met kulansap oaru lun Jeova. (Mattu 6:19, 20) Pukanten ma elos ku in oru ke orekma saok lun Leum, a kain in orekma inge nu kemwa tia som nu ke wangin sripe na paye. (1 Korint 15:58) Tusruktu kut fwin sie met Kristian su mwolela tari, ya kut kafofo pal nu kemwa ke orekma su God el pakiye nu sesr ke len safla se inge? (2 Timote 3:1) Ku, kut moulkin sie kain in moul su apkurun in oanu sie ke moul lun met tulan lasr nu kemwa? Saap elos wi ke kain in alu nu kemwa a elos moniyuk ka, elos wi ke alu lalos pal nu kemwa a srike in oru akmwuk nu kemwa ma alu lalos siyuk selos in oru. Aok, elos tia met fwakelik ke peng mwo lun Togusrai. Wangin etauk sumwos lalos su akkalemye la pa inge “len safla” a elos tia akilen oiyen silaklak ke len lasr misinge su kut moul ka.—Daniel 12:4.
5. Fwin me fosrnga lun moul pa kut nunku yok pal nu kemwa, mea kut enenu in oru?
5 Jisus Kraist el fwak ou inge ke pal in ma upa lasr inge: “A oanu in len lal Noa, a fwa ou inge ke Mwen nutin met el tuku. Tu oanu in len ingo meet liki sronot elos mongo a nim, elos mari a sang in mari, nu ke len se ke Noa el sroak nu fwin oaku; a elos tia etu nu ke pal se sronot tuku, a wiselosla nu kemwa, a fwa ou inge ke Mwen nutin met el tuku.” (Mattu 24:37-39) Fwin orek ke inkanek fwal, wangin kutena ma koluk ke mongo a nim, a mari sie akmwuk lun God pa inge ke mutamwauk me. (Genesis 2:20-24) Fwinne ou inge, kut fwin akilen la me fosrnga lun moul pa kut nunku pal nu kemwa, efu kom tia pre nu sin God ke ma se inge? Jeova el ku in kasru kut in suk meet Togusrai, in oru ma sumwos, a in akpayeye orekma mwo kemwa lasr nu sel.—Mattu 6:33; Rom 12:12; 2 Korint 13:7.
Mwolela a Kunokon Lasr nu Sin God
6. Ke inkanek saok fuka kutu sin met su baptais tari elos tia oru kunokon lalos nu sin God?
6 Kutu sin met Kristian su baptais tari elos enenu in pre ke insielos kemwa meyen elos tia moul fwal nu ke kunokon lalos in oru orekma nu sin God su elos insese in oru ke pal se elos mwolela moul lalos nu sin God. Yiu nu ke yiu, pus liki 300,000 met baptaisla ke lusen yiu ekasr somla, tusruktu pisen met orekma lun Met Lo lun Jeova tianu kapek. Kutu sin met su ekla met orekma lun Togusrai elos tui in sulkakin peng mwo. Aok, kais sie met enenu in wi pal nu kemwa ke orekma lun forfor lun met Kristian meet liki elos eis baptais. Ke ma inge elos etu tari kunokon su Jisus el sang nu sin met kulansap lal nu kemwa: “Komwos som . . . a oru met in mutanfwal nu kemwa, baptaiselosla in en Papa, a Mwen, a ngun mutal, luti nu selos in liaung ma nu kemwa Nga sapkin nu sumwos.” (Mattu 28:19, 20) Fwin wangin kutena ma ilya na yok selos su tuku ke munas na paye lun mano ku kutupa me kutong su wangin ku lalos ka, sie met su baptais tari su tia oru orekma oanu sie Met Lo lun Jeova a Kraist el tia moul fwal nu ke orekma mwo kemwa su elos enenu in oru ye mutun Met Orala.—Isaia 43:10-12.
7. Efu kut enenu in tukeni nu sie pal nu kemwa in alu?
7 Israel in pal meeta el sie mutanfwal su mwolela tari nu sin God, a muta ye Ma Sap lun mwoleaung, paenang met nu kemwa lal oasr kunokon ye mutun Jeova. Ke sie me pupulyuk, mokul nu kemwa elos enenu in toeni nu sie ke kofwo tulo su orek ke yiu nu kemwa, a kutena met su tia wi akfulatye Kofwen Alukela ke lungse lal fwa “mwotla liki.” (Oekyuk 9:13; Livitikus 23:1-43; Duteronomi 16:16) In akpayeye kunokon lalos nu sin God oanu met su mwoleyukla tari nu sel, met Israel elos enenu in tukeni nu sie in alu. (Duteronomi 31:10-13) Ma Sap el tianu fwak, ‘Oru ma inge kom fwin mwesas.’ Nu selos nu kemwa su mwoleyukla tari moul lalos nu sin Jeova ke pal inge, ma sap inge in tukeni nu sie akkeye kas lal Poul: “A lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oanu lia lun kutena, a kut in kaifwe sie sin sie, a akyokye, oanu komwos liye tu len apkurun me.” (Hibru 10:24, 25) Aok, tukeni nu sie yurin met lili wiesr in lalalfongi, sie kunokon lun met Kristian su mwoleyukla tari nu sin God.
Srikeye Mwo Sulela Lom!
8. Efu sie met fwusr su mwolela tari el enenu in pre a tuni orekma mutal?
8 Saap kom sie met fwusr su mwolela tari nu sin Jeova. Me insemwomwo lulap ku in ma lom fwin kom suk meet Togusrai in moul lom. (Soakas 10:22) Ke inkanek lun pre a plan mwo, saap kom ku in orekmakin pal in fwusr lom ke kutu akmwuk lun orekma lun forfor pal nu kemwa—sie inkanek mwo pa inge in akkalemye la kom esam Met su Orekomla. Meyen kom fwin tia oru ou inge, pwar ke ma lun fwalu ku in mutamwauk in eisla pal yok lom a nunuk lom. Oanu ma sikyuk nu sin met puspis, saap kom lungse in payuk ke pal in fwusr lom a kafofo in suk ma puspis lun fwalu. Ku orekma in eis mani yok ka ku in eisla pal a ku lom. Fwin oasr tulik nutum, kom enenu in oru kunokon yok in sou ke lusen yiu puspis. (1 Timote 5:8) Saap kom tia mulkunla Met Orekomla, tusruktu, sie inkanek lalmetmet in akilen la plan lom ke pal inge, ku fwin wangin plan lom ke pal inge, ma inge ku in oakiye inkanek lun moul matou lom. Ke yiu ekasr lula lun moul lom, saap kom ku in ngetnget nu tok a pulakin la arulanu mwo kom fwin orekmakin pal in fwusr lom ke orekma mutal lun Met Orekutla. Efu kom tia pre a nunku ke pal mwo lom ke pal inge, tu kom in ku in konaok insemwomwo ke orekma mutal lom nu sin Jeova ke pal in fwusr lom?
9. Mea sie met su matou tari su oasr kunokon yok in congregation ke sie pal elos ku in oru?
9 Tuni akmwoye siepa luma a ma sikyuk—mokul nu kemwa su kulansapu oanu met seperd ke “u lun God” ke sie pal. (1 Piter 5:2, 3) Ke kutu sripe, elos sifwanu srola liki kunokon inge. Paye, elos matou ke pal inge, a saap upa nu selos in oru orekma lun God. Tusruktu, ya elos ku in sifwil suk kutu orekma lun God? Me insemwomwo lulap na paye mokul inge nu kemwa elos ku in kasru kutu met elos fwin eis kutu kunokon in congregation! A meyen wangin kutena met su ku in moul kel sifwanu, paenang met kamwuk a met su el lungse elos nu kemwa ku in insemwomwo el fwin akyokye orekma lal, ke mwolanu lun God. (Rom 14:7, 8) Yok liki nu kemwa, Jeova el fwa tia mulkunla kutena met su oru orekma lal. (Hibru 6:10-12) Ke ma inge, mea ma inge su ku in kasru kut in esam Met Orekutla?
Me Kasru in Esam Met Orekutla
10. Efu oasr pal mwo lun met luti in ase nu sesr kas in kai ke orekma in esam Met Orekutla?
10 Oasr pal mwo yok emeet lun met luti in ase nu sesr kas in kasru in esam Met Orekutla. Jeova el topuk me siyuk lal ke pre su tuku ke insiel ke pal se el sang nu sel lalmetmet lulap. (1 Togusra 3:6-12) Solomon el tuni na paye mokuikui nu kemwa lun met. Sayen ma inge, el eis kasru sin ngun mutal lun God tu lan ku in simusla ma el konaok in akinsemwomwoye kutu met. El simusla: “A ouyepa, met luti lalmetmet, el srakna luti metu etauk, aok el nunku, a suk, takunla soakas puspis. Met luti el suk in konoiyuk kas mwo, a ma simla sumwos, aok, kas paye.”—Ekklisiastis 12:9, 10.
11. Efu kut enenu in eis kai lalmetmet lal Solomon?
11 Leng lun Greek Septuagint ke kas inge pa: “A ouyepa, meyen met luti el lalmetmet, meyen el luti metu ke lalmetmet; tu in oru insren met konaok mea ma mwo su tuku ke me pupulyuk, met luti el kaifweung na paye in suk kas mwomwo a simla sumwos—kas paye.” (The Septuagint Bible, lengla sel Charles Thomson) Solomon el kaifweung in sun insien met rid ke kas mwo a me sramsram mwo. Ke sripen kas lal su ku in konoiyukyuk in Ma Simusla etuku ke ngun mutal, paenang kut akola in eis ma el konaok a kai lalmetmet lal.—2 Timote 3:16, 17.
12. Ke kas lom sifwanu, fuka kom akkalemye ma Solomon el fwak su simusyukla in Ekklisiastis 12:11, 12?
12 Fwinne wangin engin in sim in len lal oanu ma oasr in len inge, tusruktu oasr buk pukanten in len lal Solomon. Nunuk fuka enenu in akkalemye ke me rid inge nu kemwa? El fwak: “Kas lun met lalmetmet oanu me lullul kosro, a oanu mwusra su kaseki ku kas lun met leum lun mwalilu; su etukyung nu sin met sropu siefwunnu. A siepa mwen nutik, kom in lutlut: Wangin saflaiyen orek buk puspis, a lutlut pukanten me aktotoye ikwe.”—Ekklisiastis 12:11, 12.
13. Fuka kas lun met nu kemwa su oasr lalmetmet lun God ku in pupulyukin nu ke me lullul kosro, a oanu “mwusra su kasiki”?
13 Kas lun met su oasr lalmetmet lun God oanu me lullul kosro. Ke inkanek fuka? El lullul met rid ku met long in oru kapkapek fwal nu ke kas lalmetmet su el rid ku long. Sayen ma inge, elos nu kemwa su akkafofoye moul lalos ke “kas lun leum lun mwalilu,” ku kas lalmetmet su yok sripe, elos inge oanu “mwusra su kasiki,” ku oakiyuki na paye. Ma inge arulanu paye meyen kas mwo lun met inge nu kemwa akkalemye lalmetmet lun Jeova a ke ma inge el ku in akmwoye, a akkeye met rid ku met long. Kom fwin sie papa ku nine su sangeng sin God, ya kom tia kaifweung na paye in filiye kain in lalmetmet inge ke nunuk a insien tulik nutum?—Duteronomi 6:4-9.
14. (a) Ke kain in buk puspis fuka tia fwal nu sesr in tia sisla “pal yok” lasr ka? (b) Nu ke me rid fuka kut enenu in loang yok, a efu?
14 Ke ma inge, efu Solomon el fwak ma el nunku meet ke buk puspis? Aok, kut fwin srikeye nu ke Kas lun Jeova, koanon volume puspis lun buk lun fwalu se inge pa lalmetmet lun met. Pus ke lalmetmet inge akkalemye nunuk lal Setan su Devil. (2 Korint 4:4) Ke ma inge, “lutlut pukanten” ke kain in me rid inge nu kemwa oswela na sripe srisrik. Ke ma paye, pus ke me rid inge ku in akkolukye ku lun met in ngun. Oanu Solomon, lela kut in nunku ke ma Kas lun God el fwak ke moul. Ma inge ku in akkeye lalalfongi lasr a oru kut in futoto nu sin Jeova. Lutlut pukanten ke kain in buk puspis ku ke kain in me lutlut puspis ku in oru kut in totola. Yokna fwin me rid inge tuku ke lalmetmet lun met su lain lalmetmet lun God, ma inge tia mwo a ku in akkolukye lalalfongi lun sie met nu sin God a ke akmwuk lal. Ke ma inge, lela kut in esam la ma saok emeet su Solomon el simusla in len lal a ke ma simusla in len lasr pa ma simusla su akkalemye lalmetmet lun “met sropu siefwunnu,” Jeova God. El ase nu sesr buk 66 lun Ma Simusla mutal, a ke ma inge kut enenu in loang yok nu ka. Baibel a kutu me rid su orekla sin ‘met kulansap oaru’ ku in kasru kut in eis “etauk lun God.”—Soakas 2:1-6.
Orekma Mwo Kemwa Lasr nu Sin God
15. (a) Fuka kom akkalemye kas lal Solomon ke “orekma mwo kemwa lun metu”? (b) Mea kut enenu in oru kut fwin lungse in akpayeye kunokon lasr nu sin God?
15 In aksafyela kas lal ke ma nu kemwa su el tuni, met luti, Solomon el fwak: “Pa inge saflaiyen mao, longyuk tari ma nu kemwa: Sangeng sin God a liaung ma sap lal. Tu pa inge orekma mwo kemwa lun metu. Tu God el fwa wise orekma nu kemwa nu in nununku, wi ma lukma nu kemwa, fwinne mwo ku fwinne koluk.” (Ekklisiastis 12:13, 14) Sangeng sumwos, ku akfulat, nu sin Met Orekutla ku in kurungin kut, a kut fwinsrak la ku in kurunganang pa sou lasr, in tia suk sie inkanek koluk lun moul su ku in wise ma upa a me asor lulap nu sesr sifwanu a nu sin met su kut lungse. Sangeng sumwos nu sin God arulanu nasnas a pa inge mutamweyen lalmetmet a etauk. (Sam 19:9; Soakas 1:7) Kut fwin srukye lalmetmet su tuku ke Kas lun God su etuku ke ngun a orekmakin kai lal ke ma nu kemwa, na kut akpayeye “orekma mwo kemwa lasr” nu sin God. Tia in simusla na kunokon nu kemwa lasr. A, ma enenu pa, kut in loang ke Ma Simusla ke pal se kut aksumwosye ma upa lun moul a pal nu kemwa oru ma nu kemwa ke inkanek lun God.
16. Fwin ke nununku, mea Jeova el akola in oru ke pal fwasru?
16 Kut enenu in akilen la wangin kutena ma lukma sin Met Orekutla. (Soakas 15:3) El “fwa wise orekma nu kemwa nu in nununku.” Aok, El Su Ku Liki Ku el fwa nununku ma nu kemwa, wekunang ma nu kemwa su oasr in lukma. Meyen kut etu ou inge paenang ma inge sie me purakak nu sesr in liaung ma sap lal. Tusruktu, lungse nu sin Papa tumasr in kosrao pa enenu in pa yok emeet, meyen met sap Jon el simusla: “Tu pa inge lungse lun God, tu kut in liaung ma sap lal, a ma sap lal tia toasr.” (1 Jon 5:3) Ke sripen ma sap lun God orekla in akkeye me insemwomwo ma patpat lasr, paenang tia fwal mukena, a ouyepa lalmetmet in liaung ma inge. Ma inge tia me toasr nu sin met nu kemwa su lungse Met Orekutla. Elos lungse kunokon lalos nu sel.
Akpayeye Kunokon Lom
17. Mea kut enenu in oru kut fwin lungse na paye in akpayeye kunokon lasr nu sin God?
17 Kut fwin lalmetmet a lungse na paye in akpayeye kunokon lasr nu sin God, sayen akos ma sap lal, kut akkalemye na paye sangeng lasr in tia aktoasryel. Paye “sangeng sin Jeova mutamweyen lalmetmet,” a elos nu kemwa su liaung ma sap lal “mwo etauk yurolos.” (Sam 111:10; Soakas 1:7) Ke ma inge lela kut in orekmakin lalmetmet a akos Jeova in ma nu kemwa. Ke pal inge ma inge arulanu yok sripe, meyen Togusra Jisus el oasr tari, a len in nununku lal oanu sie Met Nununku su God el pakiye arulanu apkurun.—Mattu 24:3; 25:31, 32.
18. Mea pal fwasru lasr kut fwin akpayeye kunokon lasr nu kemwa nu sin Jeova God?
18 God el tuni kais sie sesr ke pal inge. Ya kut lungse ma lun ngun, ku kut lela me purakak lun fwalu se inge in akmunasye futoto lasr nu sin God? (1 Korint 2:10-16; 1 Jon 2:15-17) Fwinne kom fwusr ku matu, lela kut in oru ma nu kemwa in akinsemwomwoye Met Orekutla. Kut fwin akos Jeova a liaung ma sap lal, kut tia eis ma wangin sripe su oasr ke fwal matu se inge su e fwa wanginla. Na kut ku in lalalfongi ke moul ma patpat ke akmwuk sasu lun God su el mwolela. (2 Piter 3:13) Sie fwinsrak mwolanu pa inge nu sin met nu kemwa su oru kunokon lalos nu sin God!
Fuka Kom Topuk?
◻ Efu kom ku in fwak la tia ma nu kemwa ma lusrongten?
◻ Efu sie met Kristian fwusr el enenu in pre a tuni akmwoye orekma mutal lal?
◻ Ke kain in buk puspis fuka kut tia enenu in sisla “pal yok” lasr ka?
◻ Mea “orekma mwo kemwa lun metu”?
[Picture on page 14]
Tia ma nu kemwa ma lusrongten nu selos nu kemwa su kulansap nu sin Jeova
[Picture on page 17]
Tia oanu buk puspis lun fwalu, Kas lun God sang mongle a yok sripe