Esam Met Orekomla!
“Esam pa Met Orekomla in len inge . . . meet liki len koluk tuku.”—EKKLISIASTIS 12:1.
1. Fuka met fwusr su mwolela tari nu sin God elos lungse in orekmakin pal in fwusr a pal in ku lalos?
JEOVA el sang ku nu sin met kulansap lal in oru ma lungse lal. (Isaia 40:28-31) Ma inge arulanu paye ke matwe lalos su tia oanu sie. Yokna nu sin met fwusr su mwolela tari nu sin God elos enenu in orekmakin pal in fwusr a ku lalos ke lalmetmet. Ke ma inge elos filiye ke insielos kas in kai lun “met luti,” Togusra Solomon lun an Israel meeta. El fwak: “Esam pa Met Orekomla in len in fwusr lom, meet liki len koluk tuku, a yiu apkurun me, ke kom fwa fwak: ‘Wangin insemwomwo luk ka.’ ”—Ekklisiastis 1:1; 12:1.
2. Mea tulik nutin met Kristian su mwolela tari elos enenu in oru?
2 Kas in kaifwe lun Solomon in esam Met Orala ke pal in fwusr akkalemyeyuk meet nu sin mokul a mutan fwusr Israel meet. Elos isusla ke sie mutanfwal su mwoleyukla tari nu sin Jeova. A fuka tulik nutin met Kristian su mwolela tari ke pal inge? Paye, elos esam Met Orelosla ke nunuk lalos. Elos fwin oru ou inge, elos e fwa akfulatyel a elos fwa akinsemwomwoyelos sifwanu.—Isaiah 48:17, 18.
Me Srikasrak Mwo Puspis in Pal Meeta
3. Kain in me srikasrak fuka Josef, Samuel, a Devid elos akkalemye?
3 Met fwusr puspis ke me sramsram in Baibel elos orala me srikasrak mwo puspis fuka in esam Met su Oralosla. Ke el tulik me nu ke na el matu, mwen nutul Jekob pangpang Joseph el esam Met Orala. Ke pal se mutan kiel Potiphar el srifwel Joseph in oan yurol, el akkalemye srunga lal a fwak: “Na fuka Nga ku in oru ma koluk lulap inge, a oru ma sito lain God? (Genesis 39:9) Met Livai inge Samuel el esam Met Orala tia ke el srakna srik, a ke lusen moul lal nu fon. (1 Samuel 1:22-28; 2:18; 3:1-5) Mokul fwusr inge Devid lun an Bethlehem el esam na paye Met Orala. Lalalfongi lal nu sin God arulanu kalem ke pal se el osun nu sin met Filistia loeska pangpang Goliath a el fwak: “Kom tuku nu yurok ke kutlas, a ke mwusra, a ke me fwakfuk, a Nga fwasrot nu yurom in en Jeova lun un met meun, God lun un met meun lun Israel, su kom aksruksruke. Misinge Jeova el a fwa eskomme nu in pouk, a Nga fwa unikomi, a tala sifwom liki kom; . . . tu fwalu nu fon fwa etu tu oasr sie God in Israel. A tu mwalil se inge na fon fwa ku in etu tu Jeova el tia molela ke kutlas a mwusra, tu meun se inge ma lun Jeova, a el fwa eskomwosme nu in paosr.” Tia pat toko, Goliath el mise, a met Filistia elos kaeng.—1 Samuel 17:45-51.
4. (a) Mea ma inge su akkalemye la tulik mutan su muta in sruo fwin an Syria a Togusra Josia elos esam Met Orekutla? (b) Fuka Jisus su yiu 12 matwe el esam Met Orekutla?
4 Siepa met fwusr su esam Met Orala pa tulik mutan Israel su muta in sruo. El sang sie ma lo mwo nu sin mutan kien met solse lulap lun an Syria pangpang Neman, paenang Neman el som nu yurin met palu lun God, el kela ke leper lal, a el ekla met kulansap lun Jeova. (2 Togusra 5:1-19) Togusra fwusr inge Josia el pulaik in akkeye alu nasnas lun Jeova. (2 Togusra 22:1–23:25) Tusruktu, sie me srikasrak mwo emeet ke sie met su esam Met Orala ke el tulik me pa Jisus Kraist lun an Nazareth. Tuni akmwoye ma sikyuk ke pal se el yiu 12 matwe. Papa a nine kiel elos wisella nu Jerusalem ke akfulat lun Kofwen Alukela. Ke pal in foloko lalos, elos akilen la Jisus el tula; ke ma inge elos foloko in sukol. Ke len se aktolu, elos konoielak in tempel muta inmaslon met luti, in longolos a in siyuk selos ke Ma Simusla. Ke pal se el topuk ke kusensiyuk lun nine kiel, Jisus el siyuk: “Efu komtel ku suk yu? Ya komtel tia etu tu fwal nu sik in muta in loom sin Papa tumuk?” (Luk 2:49) Arulanu yok sripe nu sel Jisus in eis me lutlut saok ke ngun in tempel, ‘loom sin Papa tumal.’ Ke len inge, Kingdom Hall lun Met Lo lun Jeova pa sie an mwo emeet in eis etauk sumwos sin Met Orekutla.
Esam Jeova Ke Pal Inge!
5. Ke kas lom sifwanu, fuka kom ku in akkalemye ma met luti el fwak oanu ma simusla in Ekklisiastis 12:1?
5 Met su alu nu sin Jeova ke inse kemwa elos lungse in kulansap nu Sel ke pal sa a ke len in moul lalos nu fon. Tusruktu, mea fwinsrak lun sie met fwusr su orekmakin fwusr lalos ke wangin sripe meyen elos tia esam Met Orala? Ye koko lun ngun mutal met luti el fwak: “Esam pa Met Orekomla in len in fwusr lom, meet liki len koluk tuku, a yiu apkurun me, ke kom fwa fwak, wangin insemwomwo luk ka.’ ”—Ekklisiastis 12:1.
6. Mea me akpayeye su akkalemye la Simeon a Ana su arulanu matou elos esam Met Orala?
6 Wangin kutena met su insemwomwo ke “len in matuo koluk lal.” Tusruktu met matou su esam God ke pal nu kemwa elos insemwomwo. Ke sie me pupulyuk, met matou inge Simeon el kafsulak Jisus su awowo in paol ke tempel a insemwomwo in fwak: “Leum, lela met kulansap lom in som inge in misla, fwal nu ke kas lom; tu mutuk nu liye lango lom, su kom akoela ye mutun mutanfwal e nu kemwa, sie kalem in akkalemye met Pegan, a mwolanu lun met Israel met sram.” (Luk 2:25-32) Ana su alngoul akosr matwe el ouyepa esam Met Orala. El muta ke tempel pal e nu kemwa a el ouyepa oasr ke pal se awowo Jisus utukla nu we. “A ke el tuku in aur se na el sang kulo nu sin God, a kaskas kel nu selos nu kemwa su sano molela in Jerusalem.”—Luk 2:36-38.
7. Mea luma a ma sikyuk nu selos su kapek matou ke orekma lun God?
7 Met Lo lun Jeova ke len inge su kapek matou ke orekma lalos nu sin God, saap elos pulakin ngal a munas ke sripen matou lalos. Tusruktu, yok insemwomwo lalos, a kut arulanu engunkin na paye orekma oaru lalos. Oasr yurolos “insemwomwo lun Jeova,” meyen elos etu la el mutamwauk in orekmakin ku lal su tia ku in liyeyuk fwin fwalu se inge a el filiye tari Kraist ke tron lal oanu sie Togusra kulanu in kosrao (Niemaia 8:10) Pa inge pal mwo nu sin met fwusr a met matu in porongo nu ke kas in kaifwe inge: “Mokul fwusr a mutan fwusr, met matu a tulik. Lela elos in kaksakin En Jeova tu el mukena akfulatyeyuk. Mwolanu lal on yetun fwalu a kosrao.”—Sam 148:12, 13.
8, 9. (a) Nu sin su “len koluk” arulanu me akasor na paye, a efu ou inge? (b) Fuka kom ku in aketeye Ekklisiastis 12:2?
8 “Len koluk” lun moul matou wangin ma lane su tuku ka—sie me asor na paye—nu selos nu kemwa su tia nunku Met Orala a nu selos su wangin kalem ke akmwuk mwolanu lal. Wangin kalem lalos ke ma lun ngun su ku in kasrelos ke me srifwe lun moul matou a ke ma upa puspis su sun metu tokin Setan el sisila liki kosrao. (Fwakyuk 12:7-12) Ke ma inge, met luti el kaifwe kut in esam Met Orala “meet liki fwatu a kalem, a malem, a itue, losla, a pukunyengu foloko tokin afu.” (Ekklisiastis 12:2) Mea ma saok ke kas inge?
9 Solomon el pupulyukin moul in fwusr nu ke pulanpal summer lun an Palestine, ke pal se fwat, malem, a itue elos sang kalem in kosrao me su wangin pukunyeng kosroila. Ke pal inge ma nu kemwa arulanu kalem. Tusruktu, ke pal in matou, len lun sie met oanu sie pulanpal su musrisr, af, a tingtingi na ke asor. (Job 14:1) Fuka sie me asor na paye in etu Met Orala tusruktu kom tia kulansap nu sel ke pal in met fwusr lun moul lom! Ke pulanpal musrisr lun moul matuo, ma nu kemwa losr tari, yokna nu selos nu kemwa su tia orekmakin pal mwo lalos in kulansap nu sin Jeova ke sripen elos orekmakin pal in fwusr lalos ke ma wangin sripe. Tusruktu, kut su lula, lela kut in ‘fwasr tokin Jeova ke insiesr kemwa,’ oanu mokul oaru inge pangpang Keleb el oru, sie met asrouki oaru lun met palu Moses.—Josua 14:6-9.
Ma Sikyuk ke Pal in Matou
10. Mea ma inge su aoliyen (a) “met liang loomu”? (b) “met ku”?
10 Tokin ma inge Solomon el aketeye ma upa “in len se ke met liaung loomu fwa rarrar, a met ku fwa sifwanu sumwoli, a me ilil fwa tui meyen pu, a elos su ngetla in windo fwa losrla.” (Ekklisiastis 12:3) “Loom” el lumeyuk nu ke monin sie met. (Mattu 12:43-45; 2 Korint 5:1-8) “Met liaung” el lumeyuk nu ke po, su kurunganang mano a sang ma enenu lal. Ke pal in matou, pal nu kemwa ma inge rarrar ke sripen munasla, sangeng, a mas. “Met ku”—pa nie—tia sifwil fukoko oanu soko sru, a munas tari a tia sumwos paenang upa in fwasr. Aok, ya kom tia engun in liye met lili matou su lalalfongi ke meeting nu kemwa lun met Kristian?
11. Ke kas pupulyuk, mea “me ilil” a “elos su ngetla in windo”?
11 “Me ilil fwa tui meyen pu”—ke inkanek fuka? Saap wis kolukla ku etukla, paenang arulanu supus ma lula. In kang me mongo keke arulanu upa in ngalis ma nelos. “A elos su ngetla in windo fwa losrla”—mutasr su oasr kasru sin brain lasr paenang kut liye—losr tari.
12. (a) Efu ku “srungal fwa kauli inkanek”? (b) Mea kom nunku nu sin met sulkakin Togusrai su arulanu matou?
12 “A,” met luti el tafwela, “srungal fwa kauli inkaneku, ke pusren ilil srikeni, a sie fwa tukakek ke pusren sie mwon, a an nutin on nu kemwa fwa akpusisilyeyuk.” (Ekklisiastis 12:4) Srungal luo lun oalusr—ngoasro—tia ku in arle ikasla ku kofla in ikasla in akkalemye ma oasr ke “loom,” ku mano, lun met nu kemwa su matou a tia kulansap nu sin God. Wangin kutena ma elos elos ku in fwak ke “inkaneku.” Tusruktu, fuka met matou nu kemwa su moniyuk ke orekma in sulkakin Togusrai? (Job 41:14) Saap elos ku in fwasr kakasrisrik loom nu ke loom a saap kutu selos upa in kaskas, tusruktu elos kaksakin na paye Jeova!—Sam 113:1.
13. Fuka met luti el akkalemye kutu ma upa lun met matou, tusruktu mea ma inge su arulanu paye nu sin met Kristian matou?
13 Pusren me ilil srikeni meyen me mongo elos konteni ke oalu su wanginla wis. Met matou el tianu motul fulosumwos ke bed lal. Pusren sie won oaksalak ke motul lal. Arulanu supus on el ku in on kin, a kas lal su el orekmakin ke kutena on arulanu munas. “An nutin on nu kemwa”—pusren on—“akpusisilyeyuk.” Ku lun met matou in porongo on a ma kutu met elos onkin arulanu munas. Aok, met akmusrala su matou a met su welul, kutu selos matou pa tari, tusruktu elos tafwela in akyokye pusralos ke on in sang kaksak nu sin God ke meeting lun met Kristian. Kut arulanu engun na paye in liyelos muta siskasr, kaksakin Jeova ke congregation!—Sam 149:1.
14. Kain in me aksangeng fuka oanu me keok nu sin met matou?
14 Sie me asor na paye ma sikyuk sin met matou, yokna nu selos su pilesru Met Orelosla! Met Luti el fwak: “Aok elos fwa sangeng ke ma fulat, a me aksangeng fwa on inkaneku. A sak almond fwa fwarngelik, a sie kwot fwa me utuk, a kena fwa lalos wanginla, tu metu som nu yen sel ma patpat a met memelil fwasr inkaneku.” (Ekklisiastis 12:5) Ke sie me fwan fulat, pus sin met matou elos sangeng in putatla. Fwinne in ngetuk na ke sie ma fulat oru elos srui. Ke pal se elos som nu ke inkanek su nenela ke met a ma puspis, elos arulanu sangeng ke pal se elos nunku ke ongoiye ku orekma silolel lun met pusrapasr.
15. Fuka “sak almond fwa fwarngelik,” a fuka kwot el ‘fwa me utuk’?
15 Nu sin met matou, “sak almond fwa fwarngelik,” ma inge akkalemye la aunsifwel mutamwauk in fiyayae, ku fwasfwasrla oanu sno. Aunsifwel su arulanu fwasrfwasr putatla oanu fwarngelik lun sak almond. Ke el ‘srike in tu,’ saap el tia ku in tu sumwos, paol el tia pa lela in atat a el sang siyungya infwulwe, kapin paol tula nu tokol, oanu kwot se. Tusruktu, fwinne met puspis inmaslosr oanu ma inge, lela kutu met in esam la kut wi ke un met meun lun Jeova su oanu kwot ku lukust ku lal!—Srike liye The Watchtower, May 1, 1998, sra 8-13.
16. (a) Mea ‘fokoelik lun caper berry’ el lungse in akkalemye? (b) Mea “yen sel ma patpat,” lun met a mea akul la mise arulanu apkurun?
16 Ouyepa mongo lun met matou arulanu srik, fwinne me mongo su filiyuki ye mutal arulanu eu oanu caper berry. Fwokinsak inge pangpang caper berry orekmakinyuk tari meet in purakak kena lun met in mongo. ‘Musalla lun caper berry’ akkalemye la kena mongo lun met matou srekeni, fwokinsak ku mongo mwo inge tia ku in purakak kena lalos in mongo. Ma inge nu kemwa akkalemye la el apkurun nu ke “yen sel ma patpat,” kulyuk. Pa inge loom sel ma patpat el fwin tia esam Met Orala a el fwin oru orekma koluk paenang God el tia ku in esamul ke pal in sifwil moulyuk. Akul ke mise su apkurun in tuku arulanu kalem ke pusren asor a mongi ke torkaskas su tuku ke srungal lun oalin met matou.
17. Fuka “fwu silfer” foroti, a “alu gold” el lumeyuk nu ke mea?
17 Kut nu kemwa sapkinyuk in esam Met Orekutla “meet liki fwu silfer foroti, ku alu gold fokoelik, ku piter musalla sisken unon in kofu, ku ma forfor musalsala sisken nien kofu.” (Ekklisiastis 12:6) “Fwu silfer” pa spinal cord. Mise ku in tuku na paye fwin ip sakuruk inge lun mano su kapsreni nu ke brain musalla. “Alu gold” lumeyuk nu ke brain, su oasr ke sifwen met su oanu alu su spinal cord kapsreni nu ka. Saok na paye oanu gold, fwin brain el musalla ma inge kol nu ke mise.
18. Mea “unon in kof,” a mea sikyuk fwin ma inge musalla?
18 “Unon in kofu” pa heart, su eis sra a sifwil supwela in forfor nu ke monin met. Ke pal in mise heart el oanu sie unon in kof musalla, musalla ke unon meyen el tia ku in sifwil eis, ku srukye, a supwela sra nu ke laa puspis lun mano in akkeyel a in sang mongle. ‘Ma forfor musalsala sisken nien kofu’ kofla in mokuikui, sra su forfor ke mano in kasru met in moul tui. Ke ma inge Jeova el akkalemye tari nu sel Solomon forfor lun sra ke mano meet liki taktu se inge William Harvey el akkalemye ou inge ke century ak17.
19. Fuka kas in Ekklisiastis 12:7 ku in orekmakin ke mise?
19 Met Luti el tafwela in fwak: “A kutkut folokla nu in foko oanu meeta, a ngun folokla nu yurin God su sang.” (Ekklisiastis 12:7) Fwin “forfor” musalsalla tari, monin met, su orekla ke kutkut ke mutamwauk, folokla nu ke kutkut. (Genesis 2:7; 3:19) Ngunmoul el mise meyen momong, ku lun moul su God el sang el folokla a ma inge oasr yurin God.—Ezekiel 18:4, 20; Jemes 2:26.
Mea Fwinsrak lun Met nu Kemwa Su Esam Met Orelosla?
20. Mea Moses el siyuk ke pal se el pre ke ma akkalemyeyuk in Sam 90:12?
20 Solomon el arulanu sumat in akkalemye efu arulanu yok sripe in esam Met Orala. Paye, sie moul su futoto a tingtinginu ke asor tia pa inge moul paye nu selos nu kemwa su esam Jeova a oru ma lungse lal. Elos fwinne fwusr ku matu, oiye su elos akkalemye oanu ma oasr yurol Moses, su pre: “Ou inge kom luti nu sesr pisen len lasr, tu kut fwa eis inse lalmetmet.” Met palu fwokpap lun God el lungse na paye Jeova in akkalemye nu sel, in lotel, a met Israel nu kemwa in aksaokye ke lalmetmet ‘len in yiu’ lalos a orekmakin ma inge ke sie inkanek su oasr insemwomwo lun God ka.—Sam 90:10, 12.
21. Kut fwin oekla len lasr ke mwolanu lun Jeova, mea kut enenu in oru?
21 Yokna nu sin met Kristian fwusr elos enenu in kafweung in porongo kas in kaifwe lun met luti in esam Met Orekutla. Sie fwinsrak mwolanu pa inge su oasr yurolos in oru kulansap mutal nu sin God! Tusruktu, ke kutena matwe lasr, kut fwin lutlut in oekla len lasr ke mwolanu lun Jeova ke “len safla” se inge, saap kut ku in tafwela in oekla ma inge ma patpat. (Daniel 12:4; Jon 17:3) In oru ou inge, kut enenu in esam Met Orekutla. Kut enenu pa in oru orekma mwo kemwa lasr nu sin God.
Fuka Kom Topuk?
◻ Efu met fwusr nu kemwa akkeyeyuk in esam Met Orala?
◻ Mea kutu nu ke me srikasrak in Baibel lun met nu kemwa su esam Met Orelosla?
◻ Mea kutu nu ke fwokin moul matou su Solomon el akkalemye?
◻ Mea pal fwasru lun met nu kemwa su esam Jeova?
[Pictures on page 9]
Devid, tulik mutan Israel su muta in sruo, Ana, a Simeon elos esam Jeova
[Pictures on page 10]
Met Lo lun Jeova su matou elos engun in oru orekma mutal nu sin Met Orekutla