Paing Kom nu ke Inkanek Mwo Emeet lun Moul!
“Kut fwin moul, ku mise, kut ma lun Jeova.”—ROM 14:8, NW.
1. Mea Jisus el luti ke inkanek mwo emeet lun moul?
JEOVA el lungse kut in engunkin inkanek mwo emeet lun moul. Metu elos ku in moulkin moul ke inkanek puspus, tusruktu oasr inkanek sefwanna su mwo emeet. Inkanek mwo emeet kut ku in moulkin moul lasr pa in akfwalye moul lasr nu ke Kas lun God a in lutlut ke Mwen natul, Jisus Kraist. Jisus el luti nu sin met tuma lutlut lal in alu nu sin God in ngun a paye, a el sapkinelos in oru met tuma lutlut. (Mattu 28:19, 20; Jon 4:24) Kut fwin moulkin moul fwal nu ke masap lun Jisus, kut akinsemwomwoye Jeova a kut ku in engunkin me insemwomwo lal.
2. Oiya fuka met puspus elos akkalemye nu ke peng mwo lun Togusrai in century se meet? A mea kalmen in wi ke “Inkanek Sa”?
2 Ke pal se ‘met puspus su paye insielos nu ke moul ma patpat’ elos ekla met lulalfongi a baptaisla, oasr sripe mwomwo lasr in fwak nu selos, “Kut paing komwos nu ke inkanek mwo emeet lun moul!” (Orekma 13:48) In century se meet, oasr tausan puspus sin met tuku liki mutunfwal puspus elos lulalfongi ke ma paye a elos akkalemye nu sin met nukewa lungse paye lalos nu sin God ke elos eis baptais. (Orekma 2:41) Met tuma lutlut inge in pal meeta elos wi pa ke “Inkanek Sa.” (Orekma 9:2; 19:23) Kas inge arlana fwal meyen elos nukewa su ekla oana met tuma lutlut lun Kraist elos moulkin oiyen moul su oasr lulalfongi yok nu sin Jisus Kraist a kafweang in etawi me srikasrak lal.—1 Piter 2:21.
3. Efu ku met lun Jeova elos eis baptais? A ma mwomwo fuka sikyak in yea puspus somla?
3 Orekma in oru met tuma lutlut el akpisrpisryeyuk in len safla inge a sulkakinyuk in an 230 kutu. Ke lusen yea sengoul somla, oasr met 2,700,000 kutu elos mwulela moul lalos in kulansap nu sin Jeova a baptaisla oana me akul lun mwulela lalos nu sel. Kalmen ma inge pa oasr met 5,000 kutu eis baptais kais sie wik! Sulela lun kais sie met in eis baptais el fwal nu ke lungse lalos nu sin God, ke etauk ke ma Simusla, a lulalfongi ke ma elos luti. Baptais el arlana yok sripe ke moul lasr, meyen pa inge me akul nu ke mutaweyen fototo mwomwo lasr nu sin Jeova. Ma inge el me akpayeye pa la kut lulalfongi la el fwa kasre kut in kulansap nu sel ke oaru a paye, oana ke el kasru met kulansap nukewa lal in pal meeta in fwufwasryesr ke inkanek lal.—Isaia 30:21.
Efu ku Kom Enenu in Baptaisla?
4, 5. Akkalemye kutu me insemwomwo kom fwa pulakin kom fwin eis baptais.
4 Saap kom mutawauk in eis etauk ke God, kom ekulla oiya puspus ke moul lom, a kom kulansap ke pal inge fwal tari oana sie met fwakak peng mwo su soenna baptais. Kapkapek lom inge fwal in kaksakinyuk. Tusruktu ya kom orala tari mwulela nu sin God ke pre, a ya kom lungse in eis baptais? Kalem la lutlut lom ke Baibel kasre kom in etu la kom enenu in orekmakin moul lom in sang kaksak nu sin Jeova, a in tia akinsemwomwoye kom sifwana a in tia nunku in eis ma mwomwo puspus lun fwalu. (Ridi Sam 148:11-13; Luk 12:15) Ke ma inge, mea kutu me insemwomwo a ma lane kut fwin eis baptais?
5 Oana sie met Kristian su mwulela tari moul lom nu sin God, oasr na paye akwuk mwo emeet ke moul lom. Kom fwa pulakin engun yok meyen kom oru ma lungse lun God. (Rom 12:1, 2) Ngun mutal lun Jeova fwa kasre kom in akkeye oiya mwomwo oana ke oiyen misla a lulalfongi. (Galetia 5:22, 23) God el fwa topuk pre lom a akinsemwomwoye kafweang lom in akfwalye moul lom nu ke Kas lal. Orekma lom in sulkakin peng mwo fwa oru kom in insemwomwo yok, a kafweang lom in moulkin moul ke inkanek su God el insemwomwo ka fwa akkeye fwinsrak lom ke moul ma patpat. Sayen ma inge, orekma lom in mwulela moul lom nu sin God a in eis baptais fwa akkalemye la kom lungse na paye in eteyuk oana sie sin Met Lo lun Jeova.—Isaia 43:10-12.
6. Mea baptais lasr el akkalemye?
6 Kut fwin mwulela moul lasr nu sin God a eis baptais, kut akkalemye nu sin met puspus la kut ma lun Jeova. “Tu wangin sie sesr moul nu sel sifwana, a wangin sie mise nu sel sifwana,” Poul el simusla, “tu kut fwin moul, kut moul nu sin Jeova, ku kut fwin mise, nu sin Jeova kut mise. Ke ma inge kut fwin moul, ku mise, kut ma lun Jeova.” (Rom 14:7, 8, NW) God el akkalemye la el aksaokye kut nukewa ke el ase nu sesr oiyen sukosok in oru sulela lasr sifwana. Kut fwin lungse na paye in akpayeye sulela lasr in moulkin inkanek lun moul inge meyen kut lungse God, kut ku in akengunye insiel. (Soakas 27:11) Baptais lasr el me akul ke mwulela lasr nu sin God a kut akkalemye nu sin met puspus la Jeova pa Leum lasr. Ma inge akkalemye la kut tu na ku in sang kasru a me top mwomwo nu ke kas in lain ke kolyuk lal. (Orekma 5:29, 32) Ke sripe se inge, Jeova el fwa wi kut. (Ridi Sam 118:6.) Baptais el ikasla pa inkanek nu sesr in eis me insemwomwo puspus ke orekma in kulansap lasr nu sin God ke pal inge a ke pal fwasru.
Akinsemwomwoyeyuk Ke Sie U lun Met Lili
7-9. (a) Mwulela fuka Jisus el fwak nu selos su filiye ma nukewa lalos a fwasr tokol? (b) Fuka mwulela lal Jisus simusyukla in Mark 10:29, 30 el akpayeyuk?
7 Met sap Piter el fwak nu sel Jisus: “Liye! Kut filiye ma nu kemwa a fwasr tukum; na mea kut fwa eis?” (Mattu 19:27) Piter el lungse in etu la mea e fwa sikyak nu sel ke pal fwasru a nu sin met tuma lutlut puspus saye lun Jisus. Elos lafwekunelos sifwana ke elos orekmakin pal nukewa a ku lalos in sulkakin peng mwo lun Togusrai. (Mattu 4:18-22) Kain in mwulela fuka Jisus el sang nu selos?
8 In fwal nu ke ma simusla lal Mark, Jisus el akkalemye la met tuma lutlut nukewa lal e fwa wi ke u lun met lili. El fwak: “Tu wangin met su filiye loom, ku ma lel, ku ma loul, ku nine, ku papa, ku tulik, ku fwal, keik, a ke mwosasu el fwa [tia] eis pal siefok in pal se inge, loomu, a ma lel, a ma loul, a nine, a tulik, a fwal, wi kolya, a in fwal se su a fwa tuku moul ma patpat.” (Mark 10:29, 30) Met Kristian in century se meet oana Lydia, Aquila, Priscilla, a Gaius, pa kutu met lili su sang “loom” selos a elos ekla “ma lel a ma loul a nine” nu sin met lili puspus, oana Jisus el mwulela.—Orekma 16:14, 15; 18:2-4; 3 Jon 1, 5-8.
9 Ma Jisus el fwak inge el akpayeye ke inkanek yok ke pal inge. “Fwal” su met tuma lutlut elos in likiye tokolos el kalmekin nu ke kain in orekma ku business su met lili puspus elos fuleak ku likiye, wekunang missionary puspus, met lili su orekma ke Bethel, international servants, a kutupa met lili saye, tu elos in sang kasru yok nu ke orekma in sulkakin peng mwo in an puspus. Brother a sister puspus elos likiye ku som liki loom selos in akfusrasrye moul lalos. A pal nukewa kut long ke experience puspus ke inkanek mwo su Jeova el karunginelos ke insemwomwo yok su elos pulakin ke orekma in kulansap lalos ku in oru kut pa in arlana engun ka. (Orekma 20:35) Sayen ma inge, met kulansap nukewa lun Jeova su baptais tari elos ku in engunkin ma lane nukewa su tuku ke orekma in “suk meet togusrai lal, a ma sumwosmwos lun [God]” ke elos wi ke u lun met lili fwin fwalu nufon.—Mattu 6:33.
Wangin Me Sensen ke “An in Lukma”
10, 11. Mea se inge “an in lukma sin el su Fulatlana,” a fuka kut ku in muta in an se inge?
10 Mwulela a baptais el orala siepa me insemwomwo, meyen oasr pal mwomwo lasr in muta in “an in lukma sin el su Fulatlana.” (Ridi Sam 91:1.) Ma inge el lumeyuk nu ke oiyen misla a oiya mwomwo, ku me loeyuk nu ke fototo lasr nu sin God. Ma inge el oana “an in lukma” meyen ma inge tia eteyuk sin met nukewa su wangin nunak lun God yurolos a tia lulalfongel. Kut fwin moulkin moul fwal nu ke mwulela lasr, a kut fwin akkalemye lulalfongi yok nu sin Jeova, kut akkalemye pa kas inge nu sel: “[Kom] me loeyuk luk a seng luk, God luk, su nga lalalfongi.” (Sam 91:2) Aok Jeova God pa niyen muta lasr a me loeyuk lasr su wangin kutena me sensen ka. (Sam 91:9) Aok wangin pa an ku kutena ma saye su mwo liki ma inge, meyen Jeova God pa an in muta lasr.
11 Ke sripen kut ku in muta ke “an in lukma” lun Jeova, ma inge akkalemye la God el akinsemwomwoye kut ke sie kunokon na mwomwo in akkeye fototo mwomwo lasr nu sel. Fototo lasr nu sin God mutawauk in oasr ke pal kut mwulela moul lasr a eis baptais. Tokin ma inge, kut akkeye fototo lasr nu sin God ke kut kafweang in fototo nu sel ke inkanek lun lutlut Baibel, pre su tuku ke insiesr, a akosten mwomwo lasr. (Jemes 4:8) Wangin kutena met su arlana fototo nu sin Jeova sayen Jisus, a lulalfongi lal nu sin God el tia munasla ke kutena pal. (Jon 8:29) Ke ma inge, lela kut in tia nunak luo ke ku lun Jeova a ke lungse lal in kasre kut in akpayeye mwulela lasr nu sel. (Ekklisiastis 5:4) Akwuk nukewa su God el orala nu sin met kulansap lal in akkeye lulalfongi lalos el me akpayeye la el lungse kut na paye a el lungse kut in kapkapek ke orekma lasr in kulansap nu sel.
Aksaokye Fototo Mwomwo Lasr nu sin God
12, 13. (a) Oiya fuka sikyak ke u lasr su oana paredais? (b) Fuka kut ku in kasru met sasu ke congregation?
12 Mwulela a baptais ikasla pa inkanek nu sesr in muta inmasrlon u lun met lili su oasr fwin fwalu nufon. Oasr misla a oiya mwomwo su akkalemyeyuk sin met lili nukewa, su kafweang in orek misla nu sin God a nu sin sie sin sie. (Sam 29:11; Isaia 54:13) Wangin kutena ma ke akwuk lun fwalu su ku in srikeyuk nu ke oiya mwomwo su oasr inmasrlon u lasr. Oiya mwomwo inge arlana kalem ke toeni lulap lasr, su brother a sister wiyesr tuku ke mutunfwal puspus, kas puspus, a sruf puspus, a elos tukeni muta oasr misla, inse sefwanna, a lungse nu sin sie sin sie oana met lili.
13 Oiyen misla a lungse nu sin sie sin sie su kut pula ke pal inge ke u lasr el siena liki oiya koluk nukewa su sikyak ke fwalu ke pal inge. (Ridi Isaia 65:13, 14.) Ke inkanek lun orekma lasr in sulkakin peng mwo lun Togusrai, oasr kunokon mwomwo lasr in akkalemye nu sin met puspus me solsol in wi nu ke u lasr su oasr misla a oiya mwomwo oana paredais. Siepa orekma na mwomwo in sang kasru nu selos nukewa su tufwana wi ke congregation oana met lili wiyesr meyen elos ku in eis ma lane yok ke me akpa ke orekma in luti. Fwin met elder elos orala akwuk kut in sang kasru nu sin met sasu ke congregation, ma inge el sie kunokon na mwomwo, oana Aquila a Priscilla ke elos “akkalemye sumwos inkanek lun Leum” nu sel Apollos.—Orekma 18:24-26.
Kafweang in Lutlut Kel Jisus
14, 15. Sripe mwomwo fuka oasr yurosr in kafweang in lutlut kel Jisus?
14 Oasr sripe mwomwo lasr in kafweang in lutlut kel Jisus. Meet liki el moul fwin fwalu oana sie met, Jisus el wi Papa tumal orekma ke lusen tausan puspus yea. (Soakas 8:22, 30) El etu la inkanek mwo emeet lun moul pa in orekmakin yok nu ke orekma in kulansap nu sin God a in sang ma lo ke ma paye. (Jon 18:37) Arlana kalem nu sin Jisus la oiya saye ke moul el tia mwo a ma na ke kitin pal. El etu la el fwa srufweyuk upa a anwuki. (Mattu 20:18, 19; Hibru 4:15) Oana me Srikasrak mwomwo lasr, el luti kut la fuka kut ku in sruokye oiyen oaru a paye lasr.
15 Tia pat tokin Jisus el baptaisla, Setan el srufwel tu elan som liki inkanek mwo emeet lun moul, tusruktu Setan el tia kutangla. (Mattu 4:1-11) Ma inge luti kut la fwinne Setan el kafweang in srufwe kut, kut ku in sruokye oiyen oaru lasr. Kalem la el nunku a suk akmwoye in srufwe met lili nukewa su lungse in eis baptais a met lili su tufwana eis baptais lalos. (1 Piter 5:8) Met ke sou lasr elos ku in lain kut meyen oasr ma elos long ke Met Lo lun Jeova mu tia mwo a ke elos oru ma inge elos nunku mu elos karungin kut a kasre kut. Tusruktu, kain in me srufwe inge orala pal mwomwo nu sesr in akkalemye oiya mwomwo lasr oana met Kristian, oana in akkalemye sunak nu sin met a in akuteye mwo, ke pal se kut sang me top nu ke kusensiyuk puspus lalos a sang sie ma lo mwomwo nu selos. (1 Piter 3:15) Ke ma inge, oiya nukewa inge su sikyak nu sesr ku in sang kasru yok nu selos nukewa su long kut.—1 Timote 4:16.
Kafweang in Moulkin Inkanek Mwo Emeet lun Moul!
16, 17. (a) Ma eneneyuk tolu fuka nu ke moul oasr in Duteronomi 30:19, 20? (b) Jisus, Jon, a Poul elos orekmakin fuka ma Moses el simusla?
16 Yea 1,500 kutu meet liki Jisus el moul fwin fwalu, Moses el kaifwe met Israel nukewa elos in sulela inkanek mwo emeet lun moul in pal lalos. El fwak: “Nga pangon kosrao a fwalu in orek lo lain kom misenge, tu nga filiye tari ye mutom moul a mise, me insemwomwo a me selnga; ke ma inge sulela moul, tu kom fwa ku in moul, kom a fute lom, in lungse Jeova God lom, in akos pusral, a in fulyung nu sel.” (Duteronomi 30:19, 20) Met Israel elos akkalemye la elos tia oaru nu sin God, tusruktu ma eneneyuk tolu nu ke moul su Moses el akkalemye el tia ekyek. Jisus a met tuma lutlut lal elos kalweni ma tolu inge.
17 Ma se meet, ‘kut in lungse Jeova God lasr.’ Kut akkalemye la kut lungse God kut fwin orekma fwal nu ke inkanek sumwosmwos lal. (Mattu 22:37) Ma se akluo, ‘kut enenu in porongo pusran Jeova’ ke inkanek in lutlutkin Kas lun God a akos masap nukewa lal. (1 Jon 5:3) Paenang oasr ma eneneyuk nu sesr in wi ke meeting nukewa lun congregation, meyen kut lutlutkin Baibel ke pal in tukeni lasr. (Hibru 10:23-25) Ma se aktolu, ‘kut in fungfung nu sin Jeova.’ Fwinne kut sun kain in me srufwe puspus, lela kut in akkalemye lulalfongi nu sin God a in fwasr tokin Mwen natul.—2 Korint 4:16-18.
18. (a) In yea 1914, Tauer in San el akuteye fuka ke ma paye? (b) Mea nunak lasr nu ke kalem lun ma paye ke pal inge?
18 Sie me insemwomwo yok nu sesr in moulkin moul fwal nu ke ma paye lun Baibel! In yea 1914, kas yok sripe inge akkalemyeyuk in me rid se inge Tauer in San: “Ya kut tia met engun a akinsemwomwoyeyuk? Ya God lasr el tia oaru? Fwin oasr kutena met su etu ke ma mwo liki, lela elan eis ma inge. Fwin komwos koneak kutena ma su mwo liki, kut fwinsrak la kom fwa fwak ma inge nu sesr. Aok, wangin kutena ma su mwo liki ma kut koneak in Kas lun God. . . . Tia ku in akuteyuki ku akkalemye ke misla, ke me insemwomwo a engun su etauk mwomwo ke God paye oru nu ke insiesr a moul lasr. Me Sramsram ke Lalmetmet, Nununku Sumwos, Ku, a Lungse lun God el akinsemwomwoye ma enenu lasr ke nunak a pulakin lasr. Ke ma inge kut tia suk ke kutupa ma saye. Kut tia lungse ma saye a kut lungse in kapkapek ke etauk lasr ke God.” (Tauer in San, December 15, 1914, sra 377-378 ke kas English) Kulo wi kas in kaksak lasr nu ke etauk lun God a ke ma paye el tia ekyek. Paye la, oasr sripe mwomwo lasr ke pal inge in engun a insemwomwo na paye meyen kut ku in “fwasr in kalem lun Jeova.”—Isaia 2:5; Sam 43:3; Soakas 4:18.
19. Efu ku nu selos su fwal in eis baptais elos enenu in akpayeye step se inge ke pal na sa?
19 Kom fwin lungse in “fwasr in kalem lun Jeova” tusruktu kom soenna mwulela moul lom nu sin God, a soenna baptais, nik kom patla. Kom in kafweang in oru ma eneneyuk nukewa su akkalemyeyuk in Baibel ke baptais, meyen pa inge inkanek mwo in akkalemye kulo nu ke ma nukewa su God a Kraist el oru nu sesr. Sang nu sin Jeova ma saok emeet lom, aok moul lom. Kom in akkalemye la kom lungse in oru ma lungse lun God ke kom fwasr tokin Mwen natul. (2 Korint 5:14, 15) Paye la, pa inge inkanek mwo emeet lun moul!
Kom E Topuk Fuka?
• Efu ku arlana yok sripe in lutlut kel Jisus?
• Mea kalmen baptais lasr?
• Mwulela nu sin God a baptais el orala kain in me insemwomwo fuka?
• Mea e fwa kasre kut in fungfung nu ke inkanek mwo emeet lun moul?
[Siasing el ngar er a page 29]
Baptais lom el akkalemye la kom sulela inkanek mwo emeet lun moul
[Siasing el ngar er a page 30]
Ya kom pulakin misla, wangin me sensen in “an in lukma”?