Fwafwasyesr Yurin God—Ma Patpat A Ma Patpat
“A kut . . . fwa fwasr in En Jeova God lasr ma patpat, a ma patpat.”—MAIKA 4:5.
WANGIN mutamwauk lun God. El arulanu fwal in pangonyuk “Sie Su Muta Omeet Me,” meyen el oasr tari in pal meeta su wangin safla. (Daniel 7:9, 13) Jeova el ouyepa insemwomwo ke pal fwasru lal su wangin safla. El mukena pa “Togusra Ma Patpat.” (Fwakyuk 10:6; 15:3) A ye mutal, sie tausen yiu “oanu yukea ke somla, a oupanu sie pal in san ke fong.”—Sam 90:4.
2 Ke sripen Met sang moul inge tia ku in mise, paenang el ku in sang nu sin seanyen se meet, Edam a If, fwinsrak in moul ma patpat ke Paredais. Ke sripen seakos, Edam el sisla sumwos lal ke moul ma patpat, a el sang nu sin tulik nutul nu kemwa ma koluk a mise. (Rom 5:12) Aok, orekma in lain lal Edam tia kutongye akmwuk na paye lun God ke mutamwauk me. Jeova el lungse na paye la ke pal fwasru met nu kemwa su akos elos fwa moul ma patpat, a el e fwa akpayeye akmwuk lal inge. (Isaia 55:11) Ke ma inge, arulanu fwal, la kut filiye fwinsrak a plan lasr in kulansap nu sin Jeova ma patpat, a ma patpat. Fwinne kut tia mulkunla “len lun God,” tusruktu arulanu yok sripe in esam la nien sun lasr pa in fwafwasyesr yurin God ma patpat a ma patpat.—2 Piter 3:12.
Orekma lun Jeova ke Pal Pakiyuki Lal
3 Oanu met su fwafwasyesr yurin God, kut arulanu pwar na paye in akpayeye ma lungse lal. Kut etu la Jeova el sie Met Lulap Su Kurunganang Pal, a kut lalalfongi la el tia ku in tia oru akmwuk lal ke pal pakiyuki lal. Ke sie me pupulyuk, “A ke pal fwal tuku , God el supamu Mwen nutul.” (Galetia 4:4) Akkalemyeyuk nu sel met sap Jon la oasr “pal” in akpayeye lun kas palu nu kemwa su el liye ke arurumu. (Fwakyuk 1:1-3) Oasr “pal in nununku met mise.” (Fwakyuk 11:18) Pus liki yiu 1,900 somla, met sap Poul el mokleyuk sin ngun mutal in fwak la God “el pakiye tari sie len, ke el e fwa nununku fwalu in sumwosmwos.”—Orekma 17:31.
4 Jeova el e fwa aksafyela fwal koluk se inge, meyen fwalu se inge ke len lasr el akfokfokye el. Ma koluk arulanu kapkapek. (Sam 92:7) Ke kas a orekma lalos, elos pilesru God, a el pulakin ngal ke pal se el liye met kulansap lal su aksroksrokyeyuk a akkeokyeyuk. (Zekaraia 2:8) Tia me lut fwin Jeova el nununkeyuk tari la u lal Setan nu kemwa el e fwa aksafyela ke pal na futoto! God el pakiye tari pal inge, a akpayeyen kas palu nu kemwa lun Baibel akkalemye la kut moul misinge ke “pal safla.” (Daniel 12:4) Kitin pal lula el oru orekma lal in akinsemwomwoye met nu kemwa su lungse el.
5 Met kulansap lun Jeova in pal meeta elos lungse na paye in liye saflaiyen ma koluk. Met sumwosmwos inge Lot el “toasrlanu ke moul kosro lun met koluk.” (2 Piter 2:7) Meyen el arulanu asor ke ma sikyuk su raunella, met palu Hebakkuk el siyuk ke sie inse toasr: “O Jeova, Nga fwa tung putaka, a kom fwa tia long? Nga pang nu sum ke ma silolel, a kom fwa tia molela. Efu kom ku in fwakak nu sik ma koluk, a nget nu ke ma sesumwos? Tu kunausten a silolel on ye mutuk; a oasr amei, a akukuin sikyuk?”—Hebakkuk 1:2, 3.
6 Ke sie ipen topuk lal nu sel Hebakkuk, Jeova el fwak: “Tu arurumu se inge srakna on nu ke pal pakiyuki, a aksaye nu ke safla, a fwa tia kikiap, fwinne pat, sano nu ka, tu paye e fwa tuku, a fwa tia pat.” (Hebakkuk 2:3) Ke ma inge God el akkalemye meet la el e fwa oru orekma ke “pal pakiyuki.” Fwinne luman pat, tusruktu Jeova el e fwa oru akmwuk lal—tu paye e fwa tuku!—2 Piter 3:9.
Moniyuk in Kulansap Tia Totola
7 Ya etu lasr ke pal pakiyuki lun Jeova ke ma puspis su e fwa sikyuk sie ma enenu nu sesr tu kut in fwafwasyesr yurin God ke moniyuk? Mo, tia. Tuni kutu me srikasrak. Jisus el arulanu pwar in etu pal in orek lun ma lungse lun God, oanu in kosrao, ou inge fwin fwalu. Paye, Kraist el luti met tumal lutlut lal in pre: “Papa tumasr su in kosrao, Em in akmutalyeyuk. Togusrai lom in tuku. Ma lungse lom in orek, oanu in kosrao, ou inge fwin fwalu.” (Mattu 6:9, 10) Fwinne Jisus el etu la God el sang topuk nu ke ma el siyuk inge, tusruktu el tianu etu na paye nge ma inge el sikyuk. Ke kas palu lulap lal ke saflaiyen akmwuk koluk inge, el fwak: “A wanginu met etu ke len sa a aur sa, a tia lipufon in kosrao, ku Mwen, a Papa mukena.” (Mattu 24:36) Meyen Jisus Kraist pa key ke akpayeyen akmwuk lun God, paenang el wi ke orekma in kunausla met lokwalok nu kemwa lun Papa tumal in kosrao. Tusruktu, ke pal se ma Jisus el muta fwin fwalu, el tia etu nge God el oru orekma lal ke ma se inge. Ya ma inge oru lan tia moniyuk ke orekma lun Jeova? Mo na mo! Ke pal se ma elos liyel Jisus ke el aknasnasye tempel ke moniyuk, “met tumal lutlut elos esam tu ma simusla: ‘Moniyuk nu ke loom sum fwa kangyula.’ ” (Jon 2:17; Sam 69:9) Jisus el oru na paye moul lal in arulanu kafofo ke orekma su el supweyukla, a el oru ou inge ke moniyuk na paye. El ouyepa kulansap nu sin God ma patpat, a nunku in oru ou inge ma patpat.
8 Oiye se inge arulanu paye pa nu sin met tumal lutlut lal Kraist. Jisus el sunolos meet liki el somwak nu in kosrao. Me sramsram ke ma se inge el fwak: “Ke ma inge, ke elos tukeni nu sie elos siyuk sel, a fwak: ‘Leum, ye kom sifwil folokonak togusrai lun Israel in pal se inge?’ ” Oanu Leum lalos, elos arulanu lungse togusrai inge in tuku. Tusruktu, Jisus el topuk a fwak: “Tia ma lomwos in etu pal a pula, su Papa el filiye tari in mwal la; a komwos fwa eis ku, ke ngun mutal el tuku nu fwomwos, a komwos fwa met orek lo keik in Jerusalem, a in fwal Judea nu fon, a in Samaria, a nu ke yen loesilanu fwalu.””—Orekma 1:6-8.
9 Wangin kutena akul su akkalemye la met tumal lutlut elos supwar ke topuk lal inge. A, elos oru moul lalos in arulanu kafofo ke orekma in luti. Ke lusen wik na ekasr, elos nekla Jerusalem ke luti lalos. (Orekma 5:28) A ke lusen yiu 30, elos akyokye na paye orekma in luti lalos paenang Poul el ku in fwak la mwosasu lutiyuk tari “nu sin met e nu kemwa ye kosrao.” (Kolosse 1:23) Fwinne Togusrai lun Israel ‘tia sifwil folokunang’ oanu ma met tumal lutlut elos tafongla in nunku meet a tia pa oakiyuki in kosrao ke lusen moul lalos nu fon, tusruktu elos kaifweung in kulansap nu sin Jeova ke moniyuk a nunku in oru ou inge ma patpat.
Tuni Nunuk Lasr
10 Met kulansap lun Jeova ke len inge elos ouyepa lungse in liye saflaiyen akmwuk koluk inge. Tusruktu, tia molela lasr sifwanu a in som nu ke fwalu sasu lun God su el mwolela pa ma kut nunku yok. A, kut lungse in liye la en Jeova fwa akmutalyeyuk a kutena alollo ke sumwos lal in kol fwa wanginla. Ke sripe se inge, kut ku in engun meyen God el tia akkalemye nu sesr ‘len a aur’ lun kunanela lun akmwuk lal Setan. Ma inge sang pal mwo lasr in akpayeye la kut kaifweung na paye in fwafwasyesr yurin God ma patpat meyen kut lungse el a tia ke sripen kut oru na ou inge ke lusen sie pal na futoto, a oasr ma lane su kut ku in eis ka.
11 In srukye oaru lasr nu sin God ku in ouyepa kasru kut in akpayeye la Devil el sito ke pal se ma el kaskas lain met sumwos inge pangpang Job—a fwak la sie met oanu el—el kulansap nu sin God ke sripen oasr ma lane su el ku in eis. Tokin Jeova el akkalemye la met kulansap lal inge pangpang Job el sie met sumwos, mwo, a sangeng sin God, Setan el silaklak in akkalemye nunuk koluk lal: “Ya Job el sangeng sin God ke wangin? Ya kom tia oru sie kalkal raunella, a apunla loom sel, a apunla ma la nu kemwa, siske nu kemwa? Kom akinsemwomwoye orekma lun paul, a me kasrup lal yokelik in fwalu. A, inge, asroela poum, a kalye ma lal nu kemwa, a el fwa pilesre kom ye mutom.” (Job 1:8-11) Ke pal se ma el akkalemye oaru ye me srifwe inge, Job el sang me akpayeye la Setan el sito ke ma el fwak.
12 Kut fwin srukye na oaru oanu ou inge, kut ku in ouyepa akkalemye la Setan el kikiap ke kutena kas lal su akkalemye la kut kulansap nu sin God meyen kut etu la oasr ma lane su kut ku in eis na paye. Meyen kut tianu etu pal pakiyuki na paye lun God in kunausla met koluk paenang ma inge ase nu sesr pal mwo in akkalemye la kut lungse na paye Jeova a kut lungse na paye in fwafwasyesr ke inkanek lal ma patpat. Ma inge ouyepa akkalemye la kut oaru nu sin God a kut lalalfongi ke inkanek lal in liaung ke ma nu kemwa. Sayen ma inge, ke sripen kut tianu etu len a aur paenang ma inge kasru kut in akola pal nu kemwa a tia mutol in engun meyen kut etu la safla el ku in tuku ke kutena pal, oanu sie met pusrapasr ke fong. (Mattu 24:42-44) Kut fwin fwafwasyesr yurin Jeova len nu kemwa, kut oru insiel in engun a kut sang nu sel topuk lain Devil, su angnol.—Soakas 27:11.
Orala Plan Ma Patpat!
13 Elos nu kemwa su fwafwasyesr yurin God elos etu la sie inkanek lalmetmet in orala plan mwo ke pal fwasru. Meyen elos etu ma upa puspis a ma munas su oasr yurin met matou, paenang met puspis elos orekmakin na paye moul in fwusr a ku lalos tu in oasr mani lalos fwin elos matuo. A fuka pal fwasru lasr su yok liki moul lasr misinge? Soakas 21:5 el fwak: “Nunuk lun met alken kol na nu ke ma pus, a met e nu kemwa su sa, sa nu ke enenu mukena.” In orala plan ke pal fwasru wikin nunuk yok ke moul patpat arulanu yok sripe na paye. Ke sripen kut tianu etu na paye nge saflaiyen akmwuk koluk inge el tuku, paenang kut enenu in loang yok ke ma enenu lasr ke pal fwasru. Aok, ke kut oru ou inge lela kut in srukye nunuk sumwos a filiye ma lungse lun God in yok emeet ke moul lasr. Met nu kemwa su wangin lalalfongi saap elos ku in fwak la sie nunuk sesumwos fwin sie met el filiye meet nunuk lal ke ma lungse lun God. Ya paye kain in kas inge?
14 Jisus el sramsram ke sie me pupulyuk su arulanu akkalemye me sramsram inge. El fwak: “Fwal sin sie met kasrup isus fwako puspis. A el papu insiel, a fwak, ‘Mea Nga fwa oru, tu wangin an Ngan filiye fwako luk we?’ A el fwak, ‘Nga fwa oru ma inge: Nga fwa igruye imwen fwulma luk, a musai ma yok liki, a Nga fwa filiye fwako luk nu kemwa a ma luk we; a Nga fwa fwak nu sin ngunik: “Ngunik, ma puspis ma lom ilyuk ke yiu puspis; kom in mongle, mongo, nim, a engun.” ’ A God el fwak nu sel, ‘Kom met lalfon, fong se inge elos fwa siyuk ngunom sum; a ma lun su ma kom akoela tari? Ou inge el su elosak ma lal kel sifwanu, a tia kasrup nu sin God.”—Luk 12:16-21.
15 Ya Jisus el lungse in akkalemye la met kasrup se inge el tia enenu in kaifweung ke orekma tu in oasr moul mwo lal ke pal fwasru? Mo, meyen Ma Simusla el kaifwe kut in moniyuk ke orekma. (2 Tessalonika 3:10) Ma tafongla lun met kasrup pa el tia oru ma enenu sel in “kasrup nu sin God.” Fwinne el ku in engunkin me kasrup lal ke lusen yiu puspis, tusruktu ke saflaiye el e fwa mise. El tia nunku ke pal fwasru, el tia nunku ke pal fwasru su wangin saflaiye.
16 In fwafwasyesr yurin Jeova wikin fwinsrak ke sie pal su wangin saflaiye sie me kasru yok a sie nunuk mwo ke pal fwasru. Sie inkanek mwo in orala plan ke pal fwasru. Fwinne sie inkanek lalmetmet in orala plan mwo fwin ke lutlut ke loom lutlut, orekma, a kunokon ke sou, tusruktu lela kut in tia mulkunla la Jeova el tia likiye met kulansap oaru lal ke kutena pal. Togusra Devid el on: “Nga fwusr meet, a inge Nga matu, tusruktu Nga sumwena liye met sumwosmwos sisyukla, ku fute lal ngusr ma nelos.” (Sam 37:25) Jisus el ouyepa akkalemye la God el akola in sang ma enenu lun met nu kemwa su suk meet Togusrai a fwafwasyesr ke inkanek sumwos lun Jeova.—Mattu 6:33.
17 Fwinne kut kulansap nu sin God wikin nunuk yok ke pal fwasru ma patpat, tusruktu kut tia mulkunla len lulap lun Jeova su futotoeni. Akpayeyuk lun kas palu nu kemwa in Baibel akkalemye me akpayeye puspis ke futotoeni lun len inge. Century se inge ku in akilenyuk ke meun puspis, me lokwalok, kusrusr, a sral, wikin kolyai nu sin met Kristian paye a orekma in luti ke peng mwo lun Togusrai lun God fwin fwalu nu fon. Ma inge nu kemwa ipen akul ke saflaiyen akmwuk koluk inge. (Mattu 24:7-14; Luk 21:11) Fwalu misinge arulanu nenela ke met su “sifwanu lungselos, lungse mani, met konkun, fulang, wenteis, seakos papa a nine, met tia sang kulo, tia mutal, tia lungse met in sou lalos sifwanu, met silolel, met lesrik, tia sifwanu leum fwelos, met lemnak, met su tia lungse ma mwo, met tukak, met likkeke, met mwan, met lungse me akengun yok liki lungse God.” (2 Timote 3:1-5) Ke len in ma upa se inge, moul arulanu upa nu sesr oanu met kulansap lun Jeova. Paye kut ngetuk na paye ke pal fwasru ke pal se ma Togusrai lun Jeova el kunausla ma koluk nu kemwa! Ke pal inge, lela kut in kaifweung in fwafwasyesr yurin God wikin nunuk yok ke pal fwasru su wangin saflaiye.
Kulansap Wikin Nunuk ke Moul Su Wangin Safla
18 Ke kut fwafwasyesr yurin Jeova, lela kut in filiye ke nunuk lasr lalalfongi lal Ebel, Inuk, Noa, Ebream, a Sera. Tokin el sramsram ke met inge nu kemwa, Poul el simusla: “Elos inge nu kemwa mise in lalalfongi, ke elos sumwena eis me mwoleung, a elos liye a paing nu selos yen loesla, a elos fwakak tu elos metsa a met fwasr fwin fwalu.” (Hibru 11:13) Met oaru inge nu kemwa elos “kena sun sie fwal mwo liki, aok, sie su tuku kosrao me.” (Hibru 11:16, NW) Ke lalalfongi elos fwinsrak ke sie an su mwo liki ye koko lun Togusrai lun God ke Messaia. Kut ku in lalalfongi na paye la God el akinsemwomwoyelos ke sie moul ma patpat ke sie an mwo su mwo liki—Paredais fwin fwalu ye koko lun Togusrai.—Hibru 11:39, 40.
19 Met palu Maika el akkalemye kaifweung lun met kulansap lun Jeova in alu nu sin God ma patpat. El simusla: “Tu mutanfwal nu kemwa fwasr, kais sie in en god lal; a kut fwa fwasr in En Jeova God lasr ma patpat a ma patpat.” (Maika 4:5) Nu ke pal in mise lal, Maika el kulansap nu sin Jeova ke oaru. Wangin alollo ke pal in sifwil moulyuk lal ke fwalu sasu, met palu inge el tafwela in fwasfwasyesr yurin God ma patpat. El sie me srikasrak mwo na paye sesr kemwa su moul misinge ke saflaiyen len safla se inge!
20 Jeova el insemwomwo ke lungse su kut akkalemye ke El. (Hibru 6:10) El etu la arulanu upa sesr in srukye oaru lasr nu sel ke fwalu koluk se inge su muta ye koko lun Devil. Tusruktu “fwalu wanginla,” a, “el su oru ma lungse lun God fwa muta ma patpat.” (1 Jon 2:17; 5:19) Ke ma inge, ke kasru lun Jeova, lela kut in kaifweung in muteng ke me srifwe su kut osun ke len nu kemwa. Lela nunuk lasr a inkanek in moul lasr in oakiyuki nu ke me insemwomwo puspis su Papa tumasr in kosrao el mwolela. Ma inge nu kemwa ku in ma lasr ku fwin kaifweung in fwafwasryesr yurin God ma patpat a ma patpat.—Jud 20, 21.
Fuka Kom Topuk?
◻ Mea akmwuk lun God nu sin met nu kemwa su aksol?
◻ Efu Jeova el sonna orekma in aksafyela fwalu koluk se inge?
◻ Efu ku fwinne kut tia etu pal pakiyuki lun God ma inge tia akmunasye moniyuk lasr?
◻ Mea kutu ma lane ke fwafwasyesr yurin God ma patpat a ma patpat?
[Study Questions]
1. Efu fwal in pangpang Jeova “Togusra ma patpat”?
2. (a) Mea akmwuk lun God nu sin met nu kemwa su aksol? (b) Kut filiye fwinsrak a plan lasr nu ke mea?
3. Efu kut etu la oasr “pal pakiyuki” lun Jeova in akpayeye akmwuk lal?
4. Efu kut etu la Jeova el lungse in aksafyela akmwuk koluk inge nu kemwa?
5. Fuka nunuk lal Lot a Hebakkuk ke luma a ma sikyuk su raunelosla?
6. Mea Jeova el fwak in sang topuk nu ke pre lal Hebakkuk, a mea kut ku in lotela ke ma inge?
7. Fwinne Jisus el tia etu na paye nge len lun Jeova el tuku, tusruktu fuka el oru orekma lal?
8, 9. Ke pal se ma met tumal lutlut elos siyuk ke sifwil musaiyuk lun Togusrai, topuk fuka elos eis, a mea elos oru?
10. Meyen kut tianu etu pal lun God in kunanela akmwuk koluk lal Setan paenang ma inge sang pal mwo lasr in sang me akpayeye fuka?
11, 12. Ke inkanek fuka oaru lal Job srifweyuk, a fuka me srifwe inge nu sel el ouyepa sun kut?
13. Mea Baibel el akkalemye fwin ke plan ke pal fwasru?
14, 15. (a) Kain in me pupulyuk fuka Jisus el sromun fwin ke orala plan ke pal fwasru? (b) Efu ku met kasrup ke me pupulyuk lal Jisus el tia nunku ke pal fwasru?
16. Efu kut ku in filiye lalalfongi lasr na paye nu sin Jeova ke sie pal fwasru mwo?
17. Efu kut etu la safla arulanu apkurun?
18, 19. Mea ma inge su akkalemye la met oaru in pal meeta elos kulansap nu sin God wikin sie nunuk ke moul su wangin safla?
20. Mea kut sulela na paye in oru?
[Picture on page 15]
Fwafwasyesr yurin God el siyuk sesr in kulansap nu sel ke moniyuk oanu met kulansap lal Kraist in pal meeta elos oru