Insemwomwo Elos Su Akola Pal Nu Kemwa!
“Liye! Nga tuku oanu met pusrapasr. Insemwomwo el su sano a liaung nuknuk lal.”—FWAKYUK 16:15.
LEN lulap lun Jeova apkurun, a kalmen ma inge pa meun! Ke sie arurumu, met sap Jon el liye “ngun lun demon” oanu frog su sumwot nu yurin “togusra” ku met kol lun fwalu nu kemwa. In oru mea? “Tu elos in tukeni nu sie nu ke meun lun len lulap lun God Ku Liki Ku”! Jon el tafwela: “A elos tukeni nu sie in sie an su pangpang in kas Hibru Armagedun.”—Fwakyuk 16:13-16.
2 Tia pat toko, Jeova el e fwa mokle akmwuk lun politic in kunausla Babulon Lulap, alu kikiap nu kemwa. (Fwakyuk 17:1-5, 15-17) Na Gog lun Magog, Setan su Devil su sisila tari fwin fwalu el oreni nu fon met kulansap lal tu lan ku in meun lain met lun Jeova su muta in misla, a luman wangin me loeyuk. (Ezekiel 38:1-12) Tusruktu God el orekma in kurunganang met lal. Pa inge mutamweyen “len lulap a me aksangeng lun Jeova.”—Joel 2:31; Ezekiel 38:18-20.
3 Aok, Jeova el molela met lal a el kunausla ipen akmwuk nu kemwa lal Setan ke pal se ma kut sun pal lun Har–Magedon, ku Armagedun. Rid kas palu lun Ezekiel 38:21-23, a nunku ke ma e sikyuk na paye. Jeova el orekmakin ku lal tu lan ku in supwema sie af su sronot, a eot lulap in af upa, e, brimston, a me lokwalok. Fos na upa sikyuk fwin fwalu nu fon meyen u lal Gog arulanu fos, elos uniye sie sin sie. Kutena ma lula ke met lokwalok lun God e fwa anwuki meyen Jeova el orekmakin ma sakuruk in molela met kulansap lal. Ke saflaiyen “ongoiye lulap” inge su fwakyuk tari, wangin kutena ma lula ke akmwuk koluk lal Setan. (Mattu 24:21) Fwinne ke pal in keok lalos meyen elos apkurun in mise, met koluk elos fwa akilen su sang ongoiye nu selos. God lasr su kutangla el fwak: “A elos fwa etu tu Nga Jeova.” Ma sakuruk inge e fwa orek ke len lasr, ke lusen pal in oasr tari lal Jisus.
El Tuku Oanu Met Pusrapasr
4 Jisus Kraist su muta in mwolanu lal el fwak: “Liye! Nga tuku oanu met pusrapasr.” Tuku lun met pusrapasr wangin met ku in etu, ke pal se ma kom tia nunku, ke pal se ma met nu kemwa elos mutol. Ke pal se ma Jisus el tuku oanu met pusrapasr in kunausla fwal koluk se inge, el tia kunausla elos su akola na paye. El fwak nu sel Jon: “Insemwomwo el su sano, a liaung nuknuk lal, tu lan tia fwasr koflufol.” (Fwakyuk 16:15) Mea ma saok ke kas se inge? A fuka kut ku in akola na pal nu kemwa in ngun?
5 Pal nu kemwa kut etu la, sie met topang tia etukla lukel nuknuk lal el fwinne motul ke pal in topang lal. Tusruktu ma inge sikyuk na paye ke tempel fwin an Jerusalem ke pal se ma Jisus el muta fwin fwalu a un met tol a met Livai elos kulansap ke tempel. Ke century 11 B.C.E. Togusra Devid el oakiye foko foko lun met tol a tausen puspis lun met Livai ke sie u su kitakatelik nu ke u 24. (1 Kronikel 24:1-18) Kais sie u inge su pisen met ka oasr ke tausen kutu elos kulansap ke tempel pal luo ke yiu se ke lusen wik se. Ke Akfulat lun Loom Orek ke Lesak, u 24 inge orekma nu fon. Ouyepa kutu kasru eneneyuk ke pal in akfulat lun Kofwen Alukela.
6 Ke pal se ma Jisus el fwak: “Insemwomwo el su sano, a liaung nuknuk lal,” saap el nunku ke akmwuk in orek topang ke tempel ke pal lal. Jewish Mishna el fwak: “Met tol puspis elos topang ke an tulo ke tempel: ke Infokil lal Abtinas, infokil lun E, a ke Infwokil futoto nu ke E su Furur; a met Livai elos topang ke an longoul sie” limekosr ke mutunoaoa limekosr lun Temple Mount, ma akosr ke sroasrik akosr lu, limekosr ke mutunoaoa limekosr lun Temple Court, ma akosr ke sroasrik akosr lik a sie ke Infwokil lun Me Kise, a sie ke Infwokil lun Me Lusrlusr, a sie ke an lun Mercy Seat [likin sinke fwintokon Infwokil Mutal na Mutal]. Met lulap ke Temple Mount el wis lam forfor raun a liye kais sie met topang inge, a fwin oasr kutena met topang su tia tuyuk el fwin tuku a fwak nu sel, ‘O met lulap ke Temple Mount, lela misla in oasr yurom!’ Na kalem la el mutul, ke ma inge el unel ke sak, a oasr sumwos lal in isukak nuknuk lal.”—The Mishnah, Middoth (“Measurements”), 1, sra 1-2, langasla Herbert Danby.
7 Met Livai a met tol nu kemwa su kulansap ke u se inge elos enenu in tia mutul fong fon se tu elos in ku in liaung a tia lela kutena ma fokfok in utyuk nu ke inkul lun Tempel. Ke sripen “met lulap ke Temple Mount,” ku kapten lun tempel, el forfor raun ke nien topang 24 ke lusen pal in topang ke eku, paenang kais sie met topang enenu in tia mutul ke nien topang lal el fwin srunga kapten in tempel liyel tia akola.—Orekma 4:1.
8 Met akmusrala Kristian a met kulansap wilul elos enenu in ngetelik pal nu kemwa in ngun a kaifweung na in nukom nuknuk lalos oanu kas pupulyuk. Ma inge sie akul su akkalemye la kut pakiyuki ke sie orekma lun forfor ke tempel lun Jeova in ngun. Ke sripen kut akilen ma inge, paenang oasr yurosr ngun mutal lun God, ku ku lal, in kasru kut in akpayeye kunokon lasr a in tafwela in oru me sang nu sesr oanu met sulkakin Togusrai. In mutul nu ke nien topang lasr oanu met orekma lun God ku in filiye moul lasr ke me sensen in konoiyuk sel Jisus Kraist, Kapten lun tempel lulap in ngun. Kut fwin mutol in ngun ke pal inge, nuknuk lasr e fwa sarukla liki kut ke kas pupulyuk tu kut in koflofol a nuknuk lasr inge e furreak. Ke ma inge fuka kut ku in akola pal nu kemwa in ngun?
Fuka Kut ku in Akola Pal nu Kemwa
9 Moniyuk in lutlut ke Ma Simusla ke kasru lun me rid lun met Kristian pa sie me purakak tu kut in ngetelik pal nu kemwa in ngun. Kain in lutlut inge kasru kut ke orekma lun forfor, kasru kut fwin oasr ma upa, a ma inge akkalemye nu sesr inkanek nu ke insemwomwo ma patpat. (Soakas 8:34, 35; Jemes 1:5-8) Lutlut lasr enenu in oasr kaifweung a ke inkanek takla. (Hibru 5:14–6:3) Me mongo mwo su kut mongo ke len nu kemwa ku in kasru kut in tia mutol a in akola pal nu kemwa. Ma inge ku in kasru sie met in tia alsrungesr su ma inge kutupal sie akul lun srik mongo. Kut tia enenu in musrensral in ngun ku mwetkal, meyen God el ase nu sesr me mongo yok in ngun ke inkanek lun “met kulansap oaru a lalmetmet.” (Mattu 24:45-47) In mongo me mongo in ngun pal nu kemwa ke inkanek lun lutlut lom sifwanu a lutlut lun sou pa sie inkanek in kasru kut tu kut in akola pal nu kemwa a “sumwos in lalalfongi.”—Taitus 1:13.
10 Meeting nu kemwa lun met Kristianm a toeni lulap kasru kut in tia motul in ngun pal nu kemwa. Ma inge ase nu sesr me akkeye a pal mwo in ‘akkeye kut nu ke lungse a orekma mwo.’ Yokna kut enenu in tukeni pal nu kemwa ke kut “liye tu len apkurun.” Paye len se inge arulanu apkurun ke pal inge. Pa inge “len lun Jeova,” el sifwil akfulatye sumwos lal in kol in ma nu kemwa. Fwin len se inge arulanu saok sesr—su enenu na paye in ou inge—kut fwa ‘tia likiye tukeni lasr.’—Hibru 10:24, 25; 2 Piter 3:10.
11 Akesrui ke insiesr kemwa ke orekma lun met Kristian yok sripe tu kut in ngetelik pal nu kemwa ke ma lun ngun. Akesrui pal nu kemwa a moniyuk in luti ke peng mwo ku in kasru kut in tia mutol. Orekma lun forfor lasr kasru kut in eis pal mwo puspis in sramsram nu sin met ke Kas lun God, Togusrai lal, a ke akmwuk lal. Sie me insemwomwo na paye in orek lo sie loom nu ke sie loom, in oru return visit, a in luti met ke Baibel ke inkanek lun buk inge Etauk Su Kol Nu Ke Moul Ma Patpat. Met elder fwin an Efesus elos ku in akpayeye la met sap Poul el luti nu selos “lemtulaik, a liki sie loom nu ke sie loom.” (Orekma 20:20, 21) Paye, kutu sin Met Lo lun Jeova su oaru elos mas ku oasr ma upa ke mano su kutongyelos ke orekma lun forfor, tusruktu elos suk inkanek tu elos in ku in fwakak nu sin kutu met kel Jeova a ke kolyuk lal oanu sie Togusra a elos eis me insemwomwo lulap ke elos oru ou inge.—Sam 145:10-14.
12 Fwasr liki orekma su alukela ma fwal ku in kasru kut in tia mutol in ngun. Ke pal se ma el sramsram ke oasr tari lal, Jisus el sapkin nu sin met sap lal: “A komwos in sifwanu sismuok, saap insiomwos sesesla ke oasras, a srui, a nunkala lun fwal se inge, a len sa sa tuku nu fwomwos oanu sie me kaisrip. Tu ou inge a fwa tuku nu fwelos nu kemwa su muta fwin mutanfwalu nu fon.” (Luk 21:7, 34, 35) Kainmongo a srui tia fwal nu ke ma sap lun Baibel. (Duteronomi 21:18-21) Soakas 23:20, 21 el fwak: “Nik kom muta in maslon met nim wain, in maslon met kainmongo ke ikwe. Tu met srui a met kainmongo fwa tuku nu ke sikasrup, a metkel fwa nukomang sie met ke nuknuk musasa.—Soakas 28:7.
13 Fwinne sie met su kainmongo a met nimnim yok sonna sun kain in oiye se inge, tusruktu, kainmongo a nimnim yok, ku in orala sie met in metkel, alsrungesr a pilesru in oru ma lungse lun God. Aok, ma upa ke moul in sou, ke mano, a ma puspis ku in sikyuk ke sripe se inge. Aok, kut fwa insemwomwo kut fwin suk meet Togusrai lun God ke moul lasr a lalalfongi la Papa tumasr in kosrao el fwa ase nu sesr me enenu lasr. (Mattu 6:25-34) Kut fwin tia oru ou inge, “len ingo” e fwa tuku nu sesr oanu “me kaisrip,” oanu sie me sruf lukma su kut tia akilen a ku in srukuti ke kut nukin ku sie me sruf su oasr pa ka, oanu me sruf su srukye kosro ke sripen nukin lalos. Ma inge tia ku in sikyuk nu sesr kut fwin ngetilik pal nu kemwa, a akilen na paye la kut moul ke “len safla.”—Daniel 12:4.
14 Sekalani in pre ouyepa sie me kasru tu kut in ngetelik pal nu kemwa ke ma lun ngun. Ke kas palu lulap lal, Jisus el tafwela in kaifwe: “A komwos in sano pal e nu kemwa, a pre, tu komwos in ku in kaengla liki ma inge nu kemwa su fwa sikyuk, a in tu ye mutun Mwen nutin Met.” (Luk 21:36) Aok, lela kut in pre tu kut in muta na pal nu kemwa liyen Jeova a in engunkin insemwomwo lal, fwin Jisus Mwen nutin Met, el tuku in kunausla fwal koluk se inge. Ke insemwomwo lasr sifwanu a ke insemwomwo lun met lili wiesr in lalalfongi su ma inge kut siyuk ke pre, kut enenu in ‘sikalani in pre, a sano ka wi sang kulo.’—Kolosse 4:2; Efesus 6:18-20.
Pal Futotoeni
15 Ke kut sano len lulap lun Jeova, wangin alollo la kut lungse in oru ma nu kemwa ke orekma lal. Kut fwin sikalani in pre nu sel ke ma se inge saap, “ikakla tari nu sesr sie srungal lulap su oasr sripe.” (1 Korint 16:8, 9) Ke pal pakiyuki lun God, Jisus el oru nununku lal a srela “sip” sumwosmwos su fwal nu ke moul ma patpat liki ‘goat” su fwal nu ke mise ma patpat. (Jon 5:22) Tia orekma lasr in srela goat liki sip. Tusruktu orekma lasr oanu met luti lun sumwosmwos ke pal inge sang pal mwo nu sin met nu kemwa in oru sulela lalos ke sie moul in orekma nu sin God a ke ma inge oasr fwinsrak lalos tu elos in suleyukla nu ke moul ke pal se ma Jisus el “tuku in mwolanu lal.” Pal futotoeni lun akmwuk se inge arulanu purakak me enenu nu sesr in oru orekma ke insiesr kemwa ke kut suk elos su “pakiyuki nu ke moul ma patpat.”—Mattu 25:31-46; Orekma 13:48.
16 Fwalu ke len lal Noa sun tari pal safla lal, a akmwuk se inge apkurun pa in sun pal lal. Ke ma inge lela kut in akkalemye moniyuk oanu met sulkakin Togusrai. Orekma lun forfor lasr arulanu kapkapek, meyen ke kais sie yiu foko foko lun tausen sin met baptaisla a sang akul nu ke mwolela lalos nu sin God. Elos ekla ipen u lun Jeova su arulanu akinsemwomwoyeyuk—“met sral, a sip lun imae lal.” (Sam 100:3) Fuka sie me insemwomwo yok in wi ipeis nu ke orekma in luti ke Togusrai su ku in sang fwinsrak nu sin met puspis meet liki “len lulap a me aksangeng lun Jeova” tuku!
17 Oanu Noa, oasr yurosr kasru sin God a kurungin. Aok, metu, lipufon su ekula manolos nu ke ikwe, a met ku in pal meeta elos akkolukye kas lal Noa, tusruktu ma inge kutongyel. Ke len inge, met puspis elos pilesru ke pal se ma kut fwakak me akpayeye puspis su akkalemye la kut moul ke “len safla.” (2 Timote 3:1-5) Kain in aksruksruk koluk inge sie me akpayeye ke kas palu lun Baibel ke oasr tari lal Kraist, meyen Piter el fwak: “Tu in len safla met aksruksruk e fwa tuku in aksruksruke, a fwafwasyesr oanu lung kulok lalos sifwanu a fwak: ‘Piye mwuleung lun oasr tari lal? Tu in len ingo me ke papa tumasr elos mise, ma nu kemwa on oanu ke mutamwauk ke ma orekla.’ ”—2 Piter 1:16; 3:3, 4.
18 Met aksruksruk ke len inge saap elos nunku: ‘Wangin ma ekla oanu ke mutamwauk ke ma orekla. Moul el tafwela na, metu elos mongo, nim, payuk, a orala sou. Fwinne Jisus el oasr tari, el tia oru nununku lul ke len inge.’ Fuka sie tafongla lulap lalos pa inge! Elos fwin tia mise ke kutu sripe ke len inge, len in aksangeng lun Jeova e fwa kunauselosla na paye, oanu ongoiye lulap ke pal lun Sronot su aksafyela fwil koluk ke len lal Noa.—Mattu 24:34.
Kut Enenu Na Paye in Tia Mutol!
19 Kut fwin mwolela tari moul lasr nu sin Jeova, lela kut in tia mutol ke ma lun ngun ke sripen nunuk sesumwos. Pa inge pal in akola pal nu kemwa, pal in akkalemye lalalfongi ke kas palu mutal, a in oru kunokon lasr in “orala met tumal lutlut in mutanfwal nu kemwa.” (Mattu 28:19, 20) Ke sripen akmwuk se inge apkurun in sun safla lal, paenang wangin me sang su yok liki kulansap lasr nu sin Jeova God ye koko lal Jisus Kraist a in wi ipeis ke orekma fwin fwalu nu fon in luti ke “peng mwo lun Togusrai” meet liki safla tuku.—Mattu 24:14; Mark 13:10.
20 Pus sin met lun Jeova elos kulansap nu sel ke lusen yiu puspis, saap ke moul lalos nu fon. A fwinne oasr yurosr met sasu puspis su tufwanu srukye ma paye, lela kut in oanu met Israel inge pangpang Caleb, su “fwasr tukun Jeova ke insiel kemwa.” (Duteronomi 1:34-36) El a Josua elos kemwa akola in ilyuk nu ke Fwal Mwolela tukun tulala lun met Israel liki an Ijipt. Tusruktu, apkurun met Israel matu nu kemwa wangin lalalfongi lalos paenang elos fwafwasyesr ke yen mwesis ke lusen yiu 40, an we elos mise. Caleb a Josua elos muteng nu ke ma upa puspis ke sripen eltal wilulos pal nu kemwa, tusruktu ke saflaiye mokul luo inge elos ilyuk nu ke fwal mwolela. (Oekyuk 14:30-34; Josua 14:6-15) Kut fwin ‘fwasr tukun Jeova ke insiesr kemwa’ kut fwa insemwomwo in ilyuk nu ke fwalu sasu lun God su el mwolela.
21 Me akpayeye akkalemye la kut moul na paye ke len safla a len lulap lun Jeova apkurun. Tia pa inge pal in metkel a pilesru orekma mutal. Kut nu kemwa akinsemwomwoyeyuk kut fwin tia motul in ngun a kaifweung in nukomang nuknuk lasr oanu sie akul lun met kulansap Kristian a met orekma lun Jeova. Lela kais sie sesr in kaifweung in “sano, tu ku in lalalfongi, in mwatmwen oanu met mokul, in ku.” (1 Korint 16:13) Oanu met kulansap lun Jeova, lela kais sie sesr in kaifweung a pulaik. Ke ma inge kut ku in wi selos su akola fwin len lulap lun Jeova el tuku, oaru in kulansap wikin met insemwomwo su muta na a tia mutol.
Fuka Kom Topuk?
◻ Fuka kom ku in aketeye nuknuk lasr ke kas pupulyuk, a fuka kut ku in nukom ma inge pal nu kemwa?
◻ Mea inkanek puspis su ku in kasru kut tu kut in tia mutol in ngun?
◻ Efu kut ku in lalalfongi la oasr met aksruksruk na paye, a nunuk fuka kut akkalemye nu selos?
◻ Nunuk fuka kut akkalemye ke orekma lasr in oru met tumal lutlut ke len inge?
[Study Questions]
1. Ke sripen len lun Jeova apkurun, paenang mea ma inge su kut enenu in sano?
2. Su Gog lun Magog, a mea sikyuk el fwin mutamwauk in meuni met lun Jeova?
3. Fuka kom ku in aketeye luman ma sikyuk su akkalemyeyuk in Ezekiel 38:21-23?
4. Ke oiye fuka Jisus el e kunausla akmwuk koluk se inge?
5. Kain in akmwuk fuka oasr ke tempel ke pal se ma Jisus el muta fwin fwalu?
6. Jisus el nunku ke mea ke pal se ma el fwak, “Insemwomwo el su sano, a liuang nuknuk lal”?
7. Efu met tol a met Livai su oru orekma oanu met topang ke tempel enenu in tia mutol?
8. Mea nuknuk lun met Kristian ke kas pupulyuk?
9. Efu ku lutlut ke Baibel ke kasru lun me rid Kristian arulanu yok sripe?
10. Fuka meeting lun met Kristian, toeni lulap, ku in kasru kut in tia mutol in ngun?
11. Efu kut ku in fwak la orekma lun forfor lun met Kristian arulanu yok sripe ke ngetilik pal nu kemwa ke ma lun ngun?
12, 13. Mea sripe paenang kut arulanu taran in tia mongo a nim alukela ma fwal?
14. Efu kut enenu in kaifweung ke pre?
15. Mea ma inge su akpayeye ke sripen orekma lasr oanu met luti lun sumwosmwos?
16. Efu kut enenu in moniyuk oanu met sulkakin Togusrai?
17, 18. (a) Ke kut luti, kain in oiye fuka kut ku in liye na paye nu sin kutu met? (b) Mea ma inge su sun na paye met aksruksruk koluk?
19. Nunuk fuka kut enenu in akkalemye ke orekma lasr in orala met tumal lutlut
20. Kain in me srikasrak fuka Caleb a Josua elos oru, a mea inkanek inge su elos sulela el lungse in akkalemye nu sesr?
21. Mea ma inge su kut ku in pula ke pal fwasru kut fwin tia mutol in ngun?
[Blurb on page 16]
Oasr ngun mutal lun God nu sin met Kristian in kasrelos in tia mutol a in akpayeye kunokon lalos
[Picture on page 14]
Ya kom kaifweung na paye in tia mutol in ngun a srukye nuknuk lom ke kas pupulyuk?