Sang Nu Sin Kutu Met Me Pwarak Su Jeova El Wise
“A fwinsrak lasr keyumwos kuna, kut etu tu oanu komwos met epeis lun keok komwos fwa ouyepa met ipeis lun pwarak.”—2 KORINT 1:7.
MET puspis su ridi The Watchtower misinge elos nukin ma paye lun God meet ke elos kapek. Saap ma inge paye pa nu sum. Fwin paye, esam mea pulakin lom ke pal se ma mutun insiom mutamwauk in ikakla. Ke sie me pupulyuk, ya kom tia pulakin insemwomwo ke pal se ma kom akilen la met mise elos tia sun keok a wangin etauk lalos? Ya kom tia akpwaryeyuk, ke pal se ma kom lotela fwinsrak lun met mise, su akkalemye la billion selos e fwa sifwil moulyuk ke fwalu sasu lun God?—Ekklisiastis 9:5, 10; Jon 5:28, 29.
2 A fuka mwolela lun God in aksafyela ma koluk a in ekulla fwalu nu fon ke sie paredais? Tukun kom lotela ma inge, ya ma inge tia akpwarye kom a pulakin ma inge in silaklak in tuku? Mea pulakin lom ke pal se ma kom lotela oasr fwinsrak nu sum in tianu mise a in moul sumwos nu ke sie paredais fwin fwalu? Wangin alolo la kom arulanu engun. Aok, kom sie sin met su eis kas in akpwarye lun God su ingenu lutiyuk fwin fwalu nu fon sin Met Lo lun Jeova.—Sam 37:9-11, 29; Jon 11:26; Fwakyuk 21:3-5.
3 Tusruktu, ke pal se ma kom srike in epeis kas lun Baibel nu sin kutu met, kom ouyepa akilen la “tia met nu e kemwa lalalfongi.” (2 Tessalonika 3:2) Saap kutu sin kamwuk lom meet elos akkolukye kom ke pal se ma kom akkalemye nu selos mwolela lun Baibel. Saap kom sun kolyai ke kom tafwela in lutlut ke Baibel a asrouki nu sin Met Lo lun Jeova. Kolyai se inge yokyokelik ke kom mutamwauk in ekulla moul lom tu in fwal nu ke akmwuk lun Baibel. Kom mutamwauk in pulakin ongoiye su Setan a fwalu lal elos sang nu sin met nu kemwa su eis me pwarak lun God.
4 Sie me asor, oanu Jisus el palye tari, ongoiye se inge ku in oru kutu met in tukulkul a in tui ke asrouki lalos ke congregation lun met Kristian. (Mattu 13:5, 6, 20, 21) Kutu met elos ku in muteng ke ongoiye ke pal se ma elos filiye nunuk lalos ke mwolela lun me pwarak su elos lotela tari. Ke saflaiye elos mwolela moul lalos nu sin Jeova a baptaisla oanu met tumal lutlut lun Mwen nutul, Jisus Kraist. (Mattu 28:19, 20; Mark 8:34) Paye, ongoiye el tia tui tukun sie met el baptaisla. Ke sie me pupulyuk, in muta na nasnas, kaifweung eneneyuk nu sin sie met su moulkin moul fokfok meet liki el ekla met Kristian. Kutu sin met elos enenu in kaifweung a muteng ke me lain su tuku ke sou lalos su tia lalalfongi. Ke kutena ongoiye, elos nu kemwa su tafwela in oaru ke moul mwolela lalos nu sin God elos ku in lalalfongi na paye ke ma se. Elos e pulakin na paye me kasru a me pwarak lun God.
“God lun Pwarak nu Kemwa”
5 Sie sin met su arulanu engunkin me pwarak su God el wise pa met sap Poul. Tukun me srifwe yok su sunol fwin an Asia a Macedonia, el arulanu pulakin insemwomwo ke pal se ma el long la congregation fwin an Korint elos akkalemye inse pusisel ke leta in kai lal. Ma inge moklel in simusla leta akluo, su oasr kain in kas in kaksak inge: “Kut in kaksakin God a Papa tumun Leum Jisus Kraist, Papa tumun pakomuta a God lun pwarak nu kemwa, su akpwarye kut in keok lasr nu kemwa.”—2 Korint 1:3, 4.
6 Kas inge su etuku sin God el ase nu sesr me lutlut yok. Lela kut in tuni ma inge. Ke pal se ma Poul el akkalemye kas in kaksak ku kulo nu sin God ku ke el siyuk ma se ke leta lal, pal nu kemwa kut ku in konaok la el akkalemye pa kulo lal nu sel Jisus, Sifwen congregation lun met Kristian. (Rom 1:8; 7:25; Efesus 1:3; Hibru 13:20, 21) Ke ma inge, Poul akkalemye kas in kaksak inge nu sin “God a Papa tuman Leum lasr Jisus Kraist.” Na, pal se meet ke leta lal, el orekmakin sie kas Grik su langasyukla “pakomuta.” Kas se inge su tuku ke siepa kas orekmakinyuk in akkalemye asor ke keok lun met saye. Ke ma inge Poul el akkalemye palakin lun God nu sin kutena met kulansap oaru Lal su sun ongoiye—in nunku pulakin lun kutu met pa mokle God in akkalemye pakoten kelos. Ke saflaiye, Poul el ngetuk nu sin Jeova oanu sropon oiye mwomowo inge ke el pangnol “Papa tuman pakomuta.”
7 “Pakoten” lun God oswela insemwomwo nu sin sie met su keok ke sripen ongoiye. Ke ma inge Poul el akkalemye Jeova oanu “God lun pwarak nu kemwa.” Ke ma inge, kutena me pwarak su kut pulakin su tuku nu sin met lili wiesr in lalalfongi, kut ku in ngetuk nu sin Jeova oanu sropun ma inge. Wangin me pwarak na paye su ku in oan ma patpat su tia tuku sin God. Sayen ma inge, el pa orala met in lumal sifwanu, ke ma inge oru kut in sang pa me pwarak nu sin kutu met. A ngun mutal lun God pa mokle met kulansap lal in akkalemye pakoten nu selos nu kemwa su enenu me pwarak.
Eis Lutlut Tu Elos in Met Epeis ke Me Pwarak
8 Fwinne Jeova God el lela kain in me srifwe puspis in tuku nu sin met kulansap lal, tusruktu el tia sropun kutena me srifwe inge. (Jemes 1:13) Tusruktu, me pwarak su el ase nu sesr ke pal se ma kut muteng ke pal in ongoiye ku in kasru kut in nunku yok ke ma enenu lun met saye. Mea fwokin ma inge? “Tu kut fwa ku in akpwaryelos su muta in kutena keok ke me pwarak su kut sifwanu akpwaryeyuk ka sin God me.” (2 Korint 1:4) Ke ma inge Jeova el sang akpa nu sesr tu kut in ekla met usrnguk ke orekma in epeis me pwarak nu sin met lili wiesr a nu selos su kut osun nu se ke orekma lun forfor ke kut etawi Kraist a “akpwaryelos nu kemwa su asor.”—Isaia 61:2; Mattu 5:4.
9 Poul el muteng nu ke me keok puspis lal kulo nu ke me pwarak yok lun God su el eis ke inkanek lal Kraist. (2 Korint 1:5) Kut ku in ouyepa pulakin me pwarak puspis ke kut kalweni ke nunuk lasr mwolela saok lun God, ke kut pre ke kasru lun ngun mutal lal, a ke kut pulakin topuk lun God ke pre lasr. Ke ma inge kut nu kemwa akkeyeyuk in tafwela in tu ku liyen kolyuk lun Jeova a akpayeye la Devil el kikiap. (Job 2:4; Soakas 27:11) Ke pal se ma kut muteng ke kutena ongoiye, kut nu kemwa, oanu Poul, enenu in sang mwolanu nu sin Jeova, su ke me pwarak lal oru met Kristian nu kemwa in muteng ye me srifwe. Muteng lun met Kristian oaru sie me pwarak nu sin met lili nu kemwa, mokle kutu met in kaifweung in “akmutengye keok sana.”—2 Korint 1:6.
10 Met Korint elos wi epeis pa ke me keok su tuku nu sin met Kristian paye nu kemwa. Sayen ma inge, elos enenu in eis kai tu elos in sisila met kosro su srunga in auliyuk. (1 Korint 5:1, 2, 11, 13) Fwin elos tia oru ou inge a tia aksafyela kitakatelik lun met Kristian we ma inge ku in sang meta nu ke congregation. Tusruktu ke saflaiye elos orekmakin kai lal Poul a akkalemye auliyuk na paye. Ke ma inge, el sang kas in kaksak nu selos a el fwak la topuk mwomwo lalos ke leta lal arulanu akpwaryel. (2 Korint 7:8, 10, 11, 13) Luman, met su sisila el ouyepa auliyuk. Ke ma inge Poul el kaifwe nu selos in ‘nunuk munas nu sel a akpwaryel, saap, ke kutena ma el su ou inge fwa okomla ke asor lulap lal.’—2 Korint 2:7.
11 Arulanu kalem la leta akluo lal Poul arulanu akpwarye congregation fwin an Korint. A pa inge nien sun lal na paye. El aketeye: “A fwinsrak lasr keyumwos ku na, kut etu tu oanu komwos met epeis lun keok, komwos fwa ouyepa met epeis lun pwarak.” (2 Korint 1:7) Ke saflaiyen leta lal, Poul el kaifwe: “Tafwela . . . komwos in pwarak, . . . a God lun lung a misla el fwa muta yuromwos.”—2 Korint 13:11.
12 Mea lutlut na yok se kut ku in lotela ke ma se inge! Met nu kemwa in congregation lun met Kristian enenu in “epeis me pwarak” su God el sang nu selos ke inkanek lun Kas Lal, ngun mutal, a u lal fwin fwalu. Fwinne met su sisila saap elos enenu me pwarak fwin elos auliyuk a aksumwosye inkanek koluk lalos. Ke ma inge, “met kulansap oaru a lalmetmet” elos oakiye sie akmwuk kulang in kasrelos. Pal se ke yiu se met elder luo elos muteta nu sin met sisila. Met inge su sisila elos tia sifwil akkalemye sie oiye koluk in lain ku sremla ke orekma koluk upa a saap enenu kasru tu elos in ku in sifwil foloko.—Mattu 24:45; Ezekiel 34:16.
Ongooiye lal Poul Fwin an Asia
13 Kain in ongoiye nu kemwa su congregation lun an Korint el sun tia ku in srikeyuk nu ke ongoiye puspis su Poul el sun a muteng. Ke ma inge el ku in akismakinyelos: “Tu kut tia lungse tu komwos in nunukin, met lili, ke keok lasr su tuku nu yurosr in Asia, tu arulanu yok, aok yok liki ku lasr, a wanginla fwinsrak ke moul lasr. Aok kut sifwanu nunku insiesr tu kut met mise, tu kut in tia sifwanu lalalfongi kut, a God su akmoulyeyuk met mise. Su molikutla liki mise lulap ingo, a el fwa molikutla; ke El kut fwinsrak tu el fwa ouyepa molikutla.”—2 Korint 1:8-10.
14 Kutu scholar lun Baibel elos lalalfongi la Poul el sramsram ke me fos lulap fwin an Efesus, su Poul a met Macedonia luo su wilul fwafwasyesr pangpang, Gaius a Aristarchus apkurun in mise. Met Kristian luo inge wisella nu ke imwen sritel su nenela ke met koluk su “wowoyuk ke lusen aur luo a fwak: ‘Daiana [god mutan ] lun Efesus el yokna!” Ke saflaiye, sie met kol ke siti se inge el akmisye un met inge. Me sensen inge ke moul lal Gaius a Aristarchus arulanu akfosrye Poul, Ke ma paye, el lungse pa in utyuk ke imwen sritel in sramsram nu sin un met koluk, tusruktu elos tia lela lan filiye moul la ke me sensen ke sripe se inge.—Orekma 19:26-41.
15 Tusruktu, Poul el sramsram ke sie ongoiye su upa liki ma inge. Ke leta se meet lal nu sin met Korint, Poul el siyuk: “Nga fwin anwuk yurin kosro lemnak in Efesus oanu met, piye sripe nu sik.” (1 Korint 15:32) Kalmen ma inge pa, moul lal Poul filiyuki nu ke me sensen tia ke me sensen lun met su oiyen kosro lemnak a el sramsram ke kosro na paye ke imwen sritel fwin an Efesus. Met sololel in pal meeta filiyuki nu ke nien sritel oanu kai nu selos tu lan anwuk ke kosro lemnak ye mutun met puspis su lungse in liye sra. Fwin Poul el osun na paye ke kosro lemnak, el moleyukla na paye ke inkanek lun menmen tu lan tia mise ke inkanek upa, oanu Daniel su moliyukla liki oalin laion na paye.—Daniel 6:22.
Me Srikasrak ke Len Lasr
16 Ma upa su met Kristian elos sun misinge ku in oanu sie ke ma upa su sikyuk nu sel Poul. (2 Korint 11:23-27) Ke len inge, met Kristian elos “keok arulanu yok, aok yok liki ku lalos,” a pus selos sun ma upa su oru elos in oanu ‘wanginla fwinsrak ke moul lalos.’ (2 Korint 1:8) Pus selos anwuki sin met koluk su uniye met puspis a met kolyai silolel. Kut ku in lalalfongi na paye la ku lun God in akpwaryelos moklelos in muteng a insielos a nunuk lalos ke pal se ma elos mise oakiyuki nu ke akpayeyen fwinsrak lalos, kutu selos in kosrao a kutu fwin fwalu. (1 Korint 10:13; Filippai 4:13; Fwakyuk 2:10) Ke ma sikyuk saye, Jeova el sang inkanek in molela, a met lili wiesr tia mise. Wanghin alolo la elos nu kemwa su eis molela inge elos akyokye lalalfongi lalos nu sin “God su akmoulyeak met mise.” (2 Korint 1:9) Tukun ma inge, elos ku in sramsram ke pulaik ke pal se ma elos epeis nu sin kutu met peng mwo ke me pwarak lun God.—Mattu 24:14.
17 Ke sie pal su tufwanu somla met lili kulu lasr fwin an Rwanda elos sun experience oanu ma Poul a kutu met fwafwasyesr wiel elos sun. Pus selos tula moul lalos, tusruktu kaifweung lal Setan in kunausla lalalfongi lalos tia kutangla. A, met lili wiesr in an inge elos pulakin me pwarak lun God ke inkanek puspis. Ke lusen pal in akmas yok inmaslon Tutsi a Hutu fwin an Rwanda, oasr Hutu su filiye moul lal ke me sensen tu lan ku in kurunganang Tutsi a Tutsi el filiye moul lal ke me sensen in kurungnang Hutu. Kutu selos anwuki sin met koluk ke sripen elos kurunganang met lili wielos in lalalfongi. Ke sie me pupulyuk, sie Met Lo Hutu su el Gahizi el mise tukun el okanla sie met lili Tutsi wiel su e Chantal. Mokul tumal Chantal su Tutsi pa, el pa Jean, okanyukla ke siepa an sin sie met lili mutan Hutu pangpang Chalotte. Ke lusen len 40 Jean a siepa met lili mokul elos muta na mwokla ke sie chimney lulap an se ma kulas lun e sasla nu we, a elos topoki na ke lusen pal futoto ke eku. Ke lusen pal inge nu kemwa, Chrlotte el sang nu selos me mongo a kurungin, fwinne el muta futoto nu ke army camp lun Hutu. Ke sra se inge kom ku in liye pitse lal Jean a Chantal su sifwil toeni, elos arulanu sang kulo meyen met lili Hutu wielos elos ‘likiye kaiwelos sifwanu’ ke eltal, oanu Prisca a aquila elos oru pa nu sel Poul.—Rom 16:3, 4.
18 Siepa Met Lo Hutu pangpang, Rwakabubu, kaksakinyuk sin newspaper se inge Intaremara ke sripen el kurunganang met lili Tutsi wiel.a El fwak: “Oasr pa met inge pangpang Rwakabubu, sie sin Met Lo lun Jeova, su tia tui in okanla met lili wiel in lalalfongi ke an puspis (pa inge inkanek in pangpang lun kais sie met su muta in alu siefwunnu). El orekmakin len fon se in wis me mongo a kof nu sin met lili wiel fwinne el met mongtulak se. Tusruktu God el oru lan arulanu fukoko liki.”
19 Nunku pa, Baibel study luo inge sin met Hutu pangpang Nicodeme a Athanasie. Meet liki mutamweyen akmas lulap we, seanyen se inge elos lutlut Baibel nu sin sie Met Lo Tutsi pangpang Alphonse. Fwinne oasr me sensen lulap ke moul lalos, elos okanla Alphonse in loom selos. Tokun sie pal elos akilen la loom selos tia fwal na paye in okanla sie met meyen met tulan Hutu lalos elos etu kamwuk lalos inge su Tutsi. Ke ma inge, Nicodeme a Athanasie elos okanla Alfonse ke sie luf likinum. Arulanu mwo ma elos oru inge meyen met tulan lalos mutamwauk in tuku ke len nu kemwa in sukok Alphonse. Ke el oan ke luf ke lusen len 28, Alphonse el kalweni ke nunuk lal me sramsram in Baibel oanu me sramsram ke Rehab su okanla met Israel luo nu fwin fwasu in loom sel fwin an Jericho. (Josua 6:17) Ke len inge Alphonse el tafwela ke orekma lal fwin an Rwanda oanu sie met luti lun mwosasu, a arulanu sang kulu meyen tulik lutlut nutul ke Baibel elos filiye ke me sensen moul lalos kel. A mea sikyuk nu sel Nicodeme a Athanasie? Elos inge ekla Met Lo lun Jeova su baptais tari a elos wi pa lutlut nu sin Baibel study 20.
20 Ke pal in mutamwauk lun akmas lulap fwin an Rwanda, oasr met fwakelik 2,500 ke peng mwo ke an se inge. Fwinne fokofoko selos anwuki ku ekla met kaeng a som nu ke an saye, tusruktu pisen Met Lo fwin an we kapkapek nu ke 3,000. Ma inge sie me akpayeye la God el akpwarye met lili wiesr. Fuka met makaimtal a mutan katinmas puspis inmaslon Met Lo lun Jeova? Aok, elos inge srakna pulakin keok a enenu me pwarak pal nu kemwa. (Jemes 1:27) Sroninmutalos ku in ela na paye ma patpat ke pal se ma sifwil moulyuk lun met mise mutamwauk ke fwalu sasu lun God. Aok, kulu nu ke kasru lun met lili wielos a meyen elos met su alu nu sin “God lun me pwarak nu kemwa,” paenang elos ku in muteng ke ma upa lun moul.
21 In an puspis, oanu an Eritrea, Singapore, a an su pangonyuk meet Yugoslavia, met lili wiesr we elos tafwela in kulansap nu sin Jeova ke oaru ye me srifwe. Lela kut in kasru met lili wiesr inge ke kut tafwela in siyuk ke pre pal nu kemwa tu elos in eis me pwarak. (2 Korint 1:11) A lela kut in muteng ke oaru nu ke pal se ma God ke inkanek lal Jisus Kraist el “ela na paye sroninmutasr nu kemwa.” Ke pal inge kut ku in pulakin na paye ke inkanek yok me pwarak lun Jeova su el akola in sang ke fwalu sasu sumwosmwos lal.—Fwakyuk 7:17; 21:4; 2 Piter 3:13.
[Footnote]
a Ke The Watchtower, January 1, 1995, sra 26, el akkalemye experience lun tulik mutan nutul Rwakabubu, su pre lal purakak insien un met Hutu paenang elos tia uniye sou se inge.
Ya Kom Etu?
◻ Efu ku Jeova el pangpang “God lun me pwarak nu kemwa”?
◻ Nunuk fuka kut enenu in akkalemye ke ongoiye?
◻ Nu sin su kut ku in epeis me pwarak?
◻ Fuka enenu lasr ke me pwarak ku in akfwalyeyuk na paye?
[Study Questions]
1, 2. Mea experience lun met puspis su ekla met Kristian misinge?
3. Efu ku elos su epeis me pwarak lun God nu sin kutu met elos ouyepa sun ongoiye?
4. Inkanek puspis fuka sie met sasu el ku in oru fwin ongoiye el sunol?
5. Wikin me srifwe puspis su Poul el sun, mea pa kutu experience su el sun?
6. Mea kut ku in lotela ke kas lal Poul su ku in konoiyukyuk in 2 Korint 1:3, 4?
7. Efu kut ku in fwak la Jeova el “God lun me pwarak nu kemwa?
8. Fwinne God el tia srupon me srifwe, tusruktu ma lane fuka muteng nu ke ongoiye el ku in wise nu sesr?
9. (a) Mea ma inge su ku in kasru kut in muteng nu ke ongoiye? (b) Fuka met saye ku in akkeyeyuk kut fwin oaru in muteng ke ongoiye?
10, 11. (a) Mea kutu ma sikyuk su orala congregation fwin an Korint meet in keok? (b) Fuka Poul el akpwarye congregation lun met Kristian fwin an Korint, a fwinsrak fuka el akkalemye?
12. Mea ma enenu se inge su met Kristian nu kemwa eneneyuk?
13, 14. (a) Fuka Poul el akkalemye sie pal in ma upa yok su el pula fwin an Asia? (b) Kain in ma sikyuk fuka oasr ke nunuk lal Poul?
15. Kain in ma upa yok fuka akkalemyeyuk in 1 Korint 15:32?
16. (a) Efu ku ongoiye lun Met Lo lun Jeova puspis ku in oanu sie ke ongoiye su Poul el sun? (b) Mea ma inge su kut ku in lalalfongi na paye kut fwin sramsram ke met su mise ke sripen lalalfongi lalos? (c) Orekma mwo fuka ku in sikyuk ke pal se ma sie met Kristian el pulakin molela ke me sensen lun mise?
17-19. Experience fuka akkalemye la met lili wiesr fwin an Rwanda elos met epeis ke me pwarak lun God?
20. Ke inkanek fuka Jeova el akpwarye met lili wiesr fwin an Rwanda, tusruktu mea ma inge su enenu in tafwela in oru nu sin met puspis selos?
21. (a) Piye kutu an su oasr met lili wiesr su enenu me pwarak, a mea sie inkanek su kut ku in oru tu in kasrelos? (b) Nge enenu lasr ke me pwarak ku in akfwalye na paye?
[Picture on page 15]
Jean a Chantal, fwinne elos Met Lo Tutsi, elos inge mwokinyukla sin Met Lo Hutu in an luo ke lusen pal in akmas na upa fwin an Rwanda
[Picture on page 15]
Met Lo lun Jeova elos tafwela in epeis peng mwo ke me pwarak lun God nu sin met tulan lalos fwin an Rwanda