Ngetuk Nu Sin Jeova Ke Me Pwarak

“Inge God lun mongfwusesr a parak lan sot nu sumwos tu komwos fwa nunuk siefwunnu nu sin sie sin sie in Kraist Jisus.”—ROM 15:5.

KAIS sie len ma enenu ke parak yokyokelik. Oanu met sim lun Baibel el tuni 1,900 yiu somla, “ma orekla nu kemwa sao a tukeni ngalnu nu ke pal inge.” (Rom 8:​22) Ke len lasr inge “sao” a “ngal” arulanu yok liki meet. Mutamwauk Meun Lulap I, metu sun ma upa nu ke siepa ma upa ke inkanek lun meun, orekma silolel, ongoiye a pal nu kemwa ma inge sikyuk ke sripen orekma sufwal lun met ke fwalu se inge.​—Fwakyuk 11:18.

² Efu oasr me keok puspis ke len lasr? Ke el akkalemye sisila lal Setan nu fwalu tukun isusla lun Togusrai ke 1914, Baibel el sang topuk lal: “We nu sin fwalu a mwea, tu Devil el oatuwot nu yuromwos, a el mulat ma lulap, tu el etu tu pal lal futoto.” (Fwakyuk 12:12) Kalmen me akpayeye kalem lun kas palu inge pa kut apkurun in sun saflaiyen kolyuk koluk lal Setan. Fuka sie me insemwomwo in etu la moul fwin fwalu apkurun in sifwil folokla nu ke misla na paye oanu meet, meet liki Setan el purakak papa a nine se meet lasr in lain God!

³ Ke mutamwauk, Met su Orala ma nu kemwa el sang imae kato in oanu loom sin seanyen se meet. Ma inge ku in liyeyuk ke sie an pangpang Eden, kalmen kas inge pa “insemwomwo” ku “engun.” (Genesis 2:8, footnote) Sayen ma inge, Edam a If elos engunkin sie moul sumwosmwos, su oasr fwinsrak in moul ma patpat. Nunku ke inkanek puspis fuka elos ku in akmwoye a orekmakin ma elos etu​—⁠elos ku in orek imae, sroal, musa, on. Nunku pa, ke ma orekla nu kemwa su elos ku in lutlutkin ke elos akpayeye kunokon lalos in kutangla fwalu a orella sie paredais. (Genesis 1:​28) Paye, moul lal Edam a If arulanu nenela, tia ke sao a ngal, a ke insemwomwo. Arulanu kalem, elos tia enenu meet me parak.

⁴ Tusruktu, ma Edam a If elos enenu in oru pa in akkapye lungse na paye a insemwomwo nu sin Papa lungkulang lalos in Kosrao. Kain in lungse inge ku in moklelos in akos God ye kain in luma a ma sikyuk nu kemwa. (Srike liye Jon 14:31.) Sie me asor meyen, papa a nine se meet lasr elos seakos nu sin Jeova, El su oasr sumwos in Kol ke ma nu kemwa. Ouyepa, elos lela moul lalos in muta ye koko koluk lun sie lipufon su putatla, Setan su Devil. Setan pa srifweyuk If tu lan oru ma koluk a mongo fwokinsak soko. Na tok Edam el oru pa ma koluk ke pal se ma el wilul in mongo ke fwokinsak su God sapkin nu selos in tia mongo: “Tu in len se kom mongo ka paye kom fwa mise.”​—Genesis 2:​17.

⁵ Ke inkanek se inge, seanyen se meet su oru ma koluk elos mutamwauk in mise. Ke pal se ma el sang nununku in mise lal, God el ouyepa fwak kas inge nu sel Edam: “Selngaweyuk foko keyum, in asor kom fwa mongo ka len nu kemwa in moul lom. El fwa ouyepa akkapye kokol a otunme nu sum, a kom fwa mongo maasrik in imae.” (Genesis 3:​17, 18) Ke ma inge Edam a If elos tula pal mwo lalos in orala fwalu nu fon sie paredais. Tukun elos sisila liki Eden, elos enenu in kaifweung in orekmakin ku lalos in suk me mongo ke fok’u su God el selngaweyuk tari. Tulik nutulos nu kemwa, meyen elos usrui ma koluk, a mise, paenang elos enenu me parak lulap.​—Rom 5:​12.

Sie Mwolela ke Me Parak Akpayeyuk

⁶ Ke pal se ma el akkalemye nununku lal lain met su lainul, Jeova el akpayeye la el sie ‘God lun me pwarak.’ (Rom 15:5) El oru ou inge ke pal se ma el mwolela in supwela sie “fute” su e fwa aksukosokye tulik nutul Edam nu kemwa liki fwako koluk lun seakos lal. (Genesis 3:​15) Tia pat toko, God el ouyepa akkalemye inkanek in molela inge. Ke sie me pupulyuk, el sang ngun mutal lal nu sel Lamech, sie sou lal Edam su tuku sin tulik nutul pangpang Seth, in palye ke mea tulik nutul Lamech el akola in oru: “El inge e fwa akpwarye kut ke orekma lasr a ke orekma upa lun paosr, meyen God el selngawi foko.” (Genesis 5:​29) Fwal nu ke mwolela se inge, tulik se inge fwa pangonyuk el Noa, su kalmekin “Mongle” ku “Me Pwarak.

⁷ In pal se na nge, Setan el mutamwauk in eis met su fwasr tokol inmaslon lipufon in kosrao. Elos inge orekmakin monin met a eis mutan kato su tuku sel Edam in ekla mutan kielos. Kain in asrouki inge lun lipufon a met arulanu akkolukye oiyen metu a oswela sie fwil lun Nephilim su tia sangeng sin God, “met ku,” su oru fwalu in sesesla ke orekma silolel.” (Genesis 6:​1, 2, 4, 11; Jud 6) “A Jeova el liye tu yok ma koluk lun met fwin fwalu . . . A Jeova el auliyuk insiel tu el orala met, a toasr insiel ka.”​—Genesis 6:​5, 6.

⁸ Jeova el akmwuki in kunausla fwalu koluk ke inkanek lun sie sronot su akola in afwunye fwalu nu fon, tusruktu ma se meet el sapkin nu sel Noa in orala oaku in molela ma moul. Ke ma inge, metu a kain in kosro nu kemwa moliyukla. Fuka sie insemwomwo lulap Noa a sou lal elos pula tukun sronot ke elos illa liki oaku a srola nu ke sie fwalu su aknasnasyeyuk tari! Fuka sie me insemwomwo in etu la selangawi ke foko etukla liki tari, paenang orekma in imae arulanu fwusesr! Paye na paye, kas palu lal Lamech arulanu paye, a Noa el moul fwal nu ke kalmen e lal. (Genesis 8:​21) Oanu sie met kulansap oaru lun God, God el orekmakunal in wis “me pwarak” nu sin metu. Tusruktu, orekma koluk lal Setan a demon lal tia aksafyeyukla ke pal in sronot, a metu elos tafwela in sao ye me toasr lun ma koluk, mas a mise.

Sie Su Yok Liki Noa

⁹ Na, ke saflaiyen 4,000 tausen yiu me sramsram lun fwalu, fute se inge su mwoleyukla sin God el tuku. Ke sripen lungse yok lal nu sin metu, Jeova God el supwela Mwen kulu nutul nu fwalu tu in mise a ekla met lango lun met koluk nu kemwa. (Jon 3:​16) Jisus Kraist el sang mongle lulap nu sin met koluk su auliyuk a akkalemye lalalfongi ke me kise lal. Elos nu kemwa su mwolela moul lalos nu sin Jeova a ekla met tumal lutlut baptais lun Mwen nutul elos pulakin mongle ma patpat a me pwarak. (Mattu 11:28-​30; 16:24) Fwinne elos met sesumwos, elos konaok insemwomwo lulap ke kulansap lalos nu sin God ke sie ella nasnas. Fuka sie me insemwomwo nu selos in etu la fwin elos tafwela in akkalemye lalalfongi nu sel Jisus, na elos fwa eis moul ma patpat! (Jon 3:​36; Hibru 5:9) Fwin elos oru ma koluk upa ke sripen munas, oasr met kasru lalos, met pwarak, ke inkanek lal Jisus Kraist. (1 Jon 2:​1, 2) Ke inkanek in fwakak ke ma koluk lalos a in akos ma sap lun Baibel tu elos in tia met pala in oru ma koluk, elos ku in eis mongle, meyen elos etu la ‘God el oaru a sumwosmwos in nunuk munas nu sesr ke ma koluk lasr.’​—1 Jon 1:9; 3:6; Soakas 28:13.

¹⁰ Ke pal se ma el muta fwin fwalu, Jisus el ouyepa sang mongle ke pal se ma el aksokosokyelos su muta ye koko lun demon, ke el akkeye kain in mas nu kemwa, a ke el akmoulyeyuk met mise su met puspis elos lungse. Paye, ma lane ke kain in menmen tia oan na tok ma patpat, meyen elos nu kemwa eis kasru lal elos sifwil mas, matu a mise. Tusruktu, Jisus el srusrngiye ke sie pal su me insemwomwo ma patpat e fwa sang nu sin met nu kemwa. Ke pal inge oanu sie Togusra mwolanu in kosrao el fwa oru yok liki aksukosokye mukena met ye koko lal demon. A el akola in sisilosla nu in abyss wikin met kol lalos, Setan, a elos tia ku in oru kutena ma. Tukun ma inge Tausen Yiu Kolyuk lal Kraist in mwolanu fwa mutamwauk.​—Luk 8:​30, 31; Fwakyuk 20:​1, 2, 6.

¹¹ Jisus el fwak la el “Leum lun Sabbath,” a pus ke menmen lal in akkeye met mas el oru ke len Sabbath. (Mattu 12:​8-​13; Luk 13:14-​17; Jon 5:​15, 16; 9:​14) Efu el oru ou inge? Esam, Sabbath el sie ipen Ma Sap lun God nu sin met Israel a ke ma inge el “oanu ngunin ma mwo su e fwa tuku.” (Hibru 10:1) Orekma ke len onkosr akismakinye kut ke muta lun met ye koko koluk lal Setan ke lusen 6,000 tausen yiu. Len Sabbath ke saflaiyen wik se akismakinye kut ke me pwarak a mongle lun metu su elos akola in pulakin ke lusen Tausen Yiu Kolyuk lal Noa Lulap, Jisus Kraist.​—Srike liye 2 Piter 3:8.

¹² Fuka sie me insemwomwo lulap lun met fwin fwalu su muta ye koko lal Kraist elos pulakin fwin, ke saflaiye, elos konaok la elos sukosok tari liki orekma koluk lal Setan! Me pwarak yok e fwa tuku fwin elos pulakin la mas lalos ke mano, pulakin, a mas in nunuk akkeyeyuk. (Isaia 65:17) Na, nunku ke insemwomwo lalos elos fwin mutamwauk in osun nu sin sou lalos su arulanu lungse ke sifwil moulyuk! Ke inkanek se inge “God el fwa ela soninmutalos.” (Fwakyuk 21:4) Ke sripen ma lane su tuku ke me kise lal Kraist orekmakinyuk ke inkanek yok, paenang met pusisel nu kemwa ye koko lun Togusrai lun God elos fwa kapkapek nu ke na elos sun moul sumwosmwos, sukosokla liki ma koluk nu kemwa su tuku ke ma koluk lal Edam. (Fwakyuk 22:​1-5) Tukun yiu inge Setan el fwa taltalla “kiten pal.” (Fwakyuk 20:​3, 7) Met nu kemwa su akkalemye oaru ke kolyuk lun Jeova elos fwa eis moul ma patpat oanu me sang nu selos. Nunku ke insemwomwo lulap a mongle ke sripen sie met el “taltalla liki sruo lun ma kalamwi nu ke sukosok lun mwolanu lun tulik nutin God.”​—Rom 8:​21.

¹³ Ke pal inge, kut enenu in tafwela in muta pulakin sao a ngal oanu met nu kemwa su muta ye koko lal Setan elos pula. Kapkapek lun mas ke mano a pulakin akkeokye kain in met nu kemwa, wekunang met Kristian oaru. (Filippai 2:​25-​27; 1 Tessalonika 5:​14) Sayen ma inge, oanu met Kristian pal nu kemwa kut pulakin keok ke sripen kolyai, me asroksrok koluk su Setan el filiye nu selos nu kemwa ‘su akos God yok liki metu.’ (Orekma 5:​29) Ke ma inge, kut fwin lungse in muteng in oru ma lungse lun God nu ke saflaiyen fwal koluk lal Setan, na kut enenu me pwarak, kasru, a ku su El ase nu sesr.

Piye Kut Ku In Konaok Me Pwarak

¹⁴ Ke fong se meet liki el mise, Jisus el akkalemye nu sin met sap oaru lal la el akola in likiye elos a folokla nu in Papa tumal. Ma inge akasoryelos. (Jon 13:33, 36; 14:27-​31) Meyen el akilen enenu lalos ke me pwarak paenang Jisus el mwolela nu selos: “A Nga fwa pre nu sin Papa, a el fwa sot nu sumwos siepa akmwoyeyuk, tu lan wi komwos ma patpat.” (Jon 14:16, footnote) Ke fus se inge Jisus el sramsram ke ngun mutal, su ma inge etukyung nu sin met tumal lutlut lal len 50 tukun sifwil moulyuk lal.a Aok, ngun mutal akpwaryelos ke pal in me srifwe a akkeyelos in tafwela in oru ma lungse lun God. (Orekma 4:​31) Tusruktu, lela kais sie met in tia nunku la kain in me kasru se inge el tuku fwinne kut tia siyuk. Tu in eis ma lane su tuku nu ke me kasru inge, kais sie met Kristian enenu in tafwela in pre ke me pwarak su God el sang ke inkanek lun ngun mutal lal.​—Luk 11:13.

¹⁵ Siepa inkanek lun God in sang me pwarak pa ke inkanek lun Kas Lal, Baibel. Poul el simusla: “Tu ma nu kemwa su simusla meet simla in luti kut, tu ke mongfwusesr a pwarak lun ma simusla fwa oasr fwinsrak lasr.” (Rom 15:4) Kalmen ma inge pa kut enenu in lutlut a kalweni ke nunuk lasr ma simusla in Baibel a kutu me rid su tuku ke Baibel. Kut enenu pa wi pal nu kemwa ke meeting lun met Kristian, an se ma kas in akpwarye su tuku ke Kas lun God akkalemyeyuk nu sin met nu kemwa. Sie nien sun na paye ke kain in toeni inge pa in akkeye sie sin sie.​—Hibru 10:25.

¹⁶ Ke leta lal Poul nu sin met Rom el akkalemye fwako mwomwo su kut ku in eis su tuku ke orekmakinyen me pwarak lun God. “Inge God lun mongfwusesr a pwarak,” Poul el simusla, “lan sot nu sumwos tu komwos fwa nunuk siefwunnu nu sin sie sin sie in Kraist Jisus, tu ke inse siefwunnu a ke oalu siefwunnu komwos in akmwoye God a Papa tuman Leum lasr Jisus Kraist.” (Rom 15:​5, 6) Aok, ke kut orekmakin me sang lun God ke me pwarak, kut ku in ekla oanu met kol pulaik lasr, Jisus Kraist. Ma inge ku in mokle kut in tafwela in orekmakin oalusr in kaksakin God ke orekma lun forfor lasr, ke pal in meeting lasr, ke sramsram lasr nu sin met lili wiesr, a ke pre lasr.

Ke Pal In Me Srifwe Yok

¹⁷ Jisus el “arulanu asor” a “toasrlanu” ke fong se meet liki el mise. (Mattu 26:37, 38) Ke ma inge el fwasr kutu na meet sin met tumal lutlut lal a el pre nu sin Papa tumal ke kasru. “Longyuk tari el ke sangeng sin God lal.” (Hibru 5:7) Baibel el reporti la “sie lipufon sikme nu yurol in kosrao me, a akkeyella.” (Luk 22:43) Pulaik lal Jisus in osun nu sin met lokwalok lal me akpayeye yok la inkanek lun God in akpwarye Mwen nutul pa mwo emeet.​—Jon 18:​3-8, 33-​38.

¹⁸ Met sap Poul el ouyepa sun kain in me srifwe yok puspis. Ke sie me pupulyuk, orekma lun forfor lal fwin an Efesus kol nu ke “sroninmet a me keok su sikyuk [nu sel] ke sripen elaksramwunak lun met Ju.” (Orekma 20:​17-20) Ke saflaiye, Poul el som liki Efesus tukun met su alu nu sel Artemis sie god mutan elos orala me fos lulap ke siti se inge ke sripen orekma lun forfor lal.” (Orekma 19:23-29; 20:1) Ke pal se ma Poul el fwafwasyesr nu Eir ke siti lun Troas, oasr me fosrnga yok ke nunuk lal. Meet liki me fos lulap fwin an Efesus, el eis sie report koluk. Congregation sasu fwin an Korint arulanu akkolukyeyuk ke kitakatelik lun met lili, a elos tianu aksumwosye met su oru orekma lun kosro. Ke ma inge ke pal se ma el muta in Efesus Poul el simusla sie leta nu selos in sang kai upa a in pal se na el fwinsrak la elos e fwa aksumwosye ma upa se inge. Ma inge tia fwusesr nu sel in oru. “Tu ke keoklanu a asor insiuk Nga sim nu sumwos ke sroninmet puspis,” ma inge el akkalemye ke leta akluo lal. (2 Korint 2:4) Oanu Poul, met elder pakoten elos konaok la tia fwusesr in sang kai upa, meyen elos akilen pa munas lalos sifwanu. (Galetia 6:1) Ke ma inge, lela kut nu kemwa in ekla me pwarak nu selos nu kemwa su kol kut ke kut akola pal nu kemwa in akos kas in kai ke lungse su tuku ke Baibel.​—Hibru 13:17.

¹⁹ Ke el muta fwin an Efesus, el tia sim leta mukena nu sin met lili fwin an Korint, a el ouyepa supwela Taitus tu lan kasrelos, a sang kunokon nu sel in reporti mea met Korint elos pulakin ke kai lal. Poul el lalalfongi la el osun nu sel Taitus fwin an Troas. Fwin an we Poul el akinsemwomwoyeyuk in eis pal mwo in oru met tumal lutlut puspis. Tusruktu ma inge tia eisla lukel fosrnga lal meyen Taitus el sonna tuku. (2 Korint 2:​12, 13) Ke ma inge el som nu Macedonia, a lalalfongi la el e fwa osun nu sel Taitus we. Fosrnga lal Poul akyokyelik ke sripen me lain ke orekma lun forfor lal. “Ke kut tuku nu Macedonia,” el fwak, “ikwesr tia liye mongle, a kut akkeokyeyuk yen nu kemwa​—⁠oasr anwuk saye, oasr sangeng lu. Tusruktu El su akpwarye met pusisel, aok God, el akpaye kut ke tuku lal Taitus.” (2 Korint 7:​5, 6) Fuka sie me insemwomwo lulap ke pal se ma Taitus el tuku in akkalemye nu sel Poul topuk mwomwo lun met Korint ke leta lal!

²⁰ Experience lal Poul sie me pwarak nu sin met kulansap lun God ke len lasr, su pus selos ouyepa sun me srifwe su oru elos in “toasr,” ku “asor.” (Phillips) Aok, ‘God su ase nu sesr me pwarak’ el etu ma enenu lun kais sie sesr a el ku in orekmakin kai sie sesr in akpwarye sie sin sie, oanu Poul el eis me pwarak lal ke inkanek lun report lal Taitus ke oiye pusisel lun met Korint. (2 Korint 7:​11-​13) Ke me lutlut lasr toko, kut akola in sramsramkin topuk mwomwo lal Poul nu sin met Korint a fuka ma inge ku in kasru kut tu kut in ekla sie met su usnguk in sang nu sin kutu met ke len inge me pwarak su tuku sin God.

[Footnote]

Ya Kom Ku In Topuk?

◻ Mea sikyuk efu oasr enenu yok lun metu ke me pwarak?

◻ Fuka Jisus el akkalemye la el yok liki Noa?

◻ Efu Jisus el pangnol sifwanu “Leum lun Sabbath”?

◻ Fuka God el sang me pwarak nu sin met ke len lasr?

[Study Questions]

1. Efu oasr enenu yok ke me pwarak ke kais sie len?

2. (a) Su kut ku in sis ke ma koluk su metu elos pulakin misinge? (b) Mea ma paye su wise fwinsrak nu sesr ke me pwarak?

3. Nge metu elos tia enenu me pwarak?

4, 5. (a) Efu Edam a If elos putatla ke me srike in akos? (b) Fuka metu elos tuku nu ke enenu lun met pwarak?

6. (a) Mwolela fuka su wise pwarak su God el orala tukun metu elos putatla nu ke ma koluk? (b) Kas in palu fuka ke me pwarak Lamech el akkalemye?

7, 8. (a) Mea ma sikyuk su oru Jeova el pulakin auliyuk ke el orala metu, a mea el akmwuki in oru ke ma inge? (b) Fuka Noa el moul fwal nu ke kalmeyen enel?

9. Fuka Jisus Kraist el akpayeye la el sie met kasru a me pwarak nu sin met su auliyuk?

10. Mea kut ku in lotela ke mwenmwen su Jisus el akkalemye ke pal se ma el muta fwin fwalu?

11. Efu Jisus el pangnol sifwanu “Leum lun Sabbath”?

12. Kain in experience fuka su akpwar su kut ku in ngetla nu meet?

13. Efu met Kristian paye nu kemwa elos enenu me pwarak su tuku sin God?

14. (a) Mwolela fuka Jisus el oru ke fong se meet liki el mise? (b) Mea enenu tu kut in ku in eis insemwomwo yok ke me pwarak lun ngun mutal lun God?

15. Mea kutu inkanek su Jeova el ase nu sesr ke me pwarak?

16. Mea me kasru su me pwarak lun God el mokle kut in oru?

17. Fuka Jeova el akpwarye Mwen nutul, a mea sikyuk?

18. (a) Pal su ke moul lal met sap Poul sie me srike ke upa? (b) Fuka kut ku in ekla sie me pwarak nu sin met su oru orekma upa, met elder su pakomuta?

19. Efu Poul el som liki Troas nu Macedonia, a fuka el eis insmwomwo tok?

20. (a) Oanu ma sikyuk nu sel Poul, mea pa kutu inkanek saok su Jeova el orekmakin in sang me pwarak? (b) Mea kut akola in lutlutkin ke me lutlut toko

[Map/Picture on page 9]

Poul el pulakin me pwarak lulap ke inkanek lun report lal Taitus ke ma sikyuk fwin an Korint

MACEDONIA

Philippi

GREECE

Corinth

ASIA

Troas

Ephesus