Lulalfongi Jeova, “God Lun Pwarak Nukewa”
“Kut in kaksakin God a Papa tumun Leum lasr Jisus Kraist, Papa tumun pakomuta a God lun pwarak nu kemwa.”—2 KORINT 1:3.
1. Mea met nukewa enenu?
MUTAMWAUK ke pal se kut isusla, kut enenu me akkeye. Sie awowo el tung tu kut in etu la el enenu me pwarak. Saap el enenu sie met in sruokilye, ku el musrinsral. Kut fwin matuo tari, kut srakna enenu sie met in akkeye kut. Ma inge sikyak yokna kut fwin sun ma upa puspus.
2. Kas in mwulela fuka Jeova el fwak nu selos su lulalfongi nu sel?
2 Met in sou lasr a met kawuk lasr ku in akkeye a akpwarye kut. Tusruktu elos tia ku in kasre kut ke oiya nukewa su oru kut in keok. Oasr pal puspus su God mukena ku in ase nu sesr me pwarak. Kas lal el mwulela nu sesr: “Jeova el apkuran nu selos nu kemwa su pang nu sel, . . . el a fwa ouyepa long tung lalos.” (Sam 145:18, 19) Aok, “mutun Jeova on nu sin met sumwosmwos, a srel igakla nu ke pang lalos.” (Sam 34:15) Tusruktu kut fwin lungse God in akkeye kut, kut enenu in lulalfongel. Devid el fwak: “Jeova el a fwa ouyepa sie tauer fulat nu selos su akkemkatuyeyuk, sie tauer fulat in pal in ongoiye. A elos su etu em fwa filiye lulalfongi lalos in kom, tu kom Jeova, tia fwasr lukelos su suk kom.”—Sam 9:9, 10.
3. Mea Jisus el fwak in kasre kut in kalem ke lupan lungse lun Jeova nu sesr?
3 Met nukewa su kulansap nu sin Jeova arlana saok nu sel. Jisus el fwak: “Ya tia kukakinyukla won sparrow limekosr ke cent luo? Ne ouinge a God El tiana mulkunla siefanna selos. Finne aunsifowos, oaoala nukewa tari. Ke ma inge, nik kowos sangeng; kais sie suwos arulana saok liki sparrow puspis.” (Luk 12:6-7, LSK) Jeova el fwak nu sin met Israel: “Nga lungse kom ke sie lungse ma patpat. Ke ma inge nga amakinkomme ke lungkulang.”—Jeremaia 31:3.
4. Efu kut ku in lulalfongi ke mwulela nukewa lun Jeova?
4 Kut fwin lulalfongi Jeova a ke mwulela nukewa lal, kut ku in eis me akkeye ke pal in me keok. Kut enenu pa in lulalfongi God oana ke ma Josua el akkalemye in pal meeta. El fwak: “Wangin ma tula liki ma mwo nu kemwa su Jeova God lomwos el fwak keyumwos. Ma nu kemwa akpayeyuk tari nu sumwos. Wangin sie ma tula ka.” (Josua 23:14) A kut ku in lulalfongi la fwinne kut keok ke sripen ma upa puspus ke pal inge, “God el oaru” a el fwa tia som liki met kulansap oaru nukewa lal.—Ridi 1 Korint 10:13.
5. Kut ku in akpwarye fuka met puspus saye?
5 Met sap Poul el pangon Jeova oana “God lun pwarak nukewa.” Kas inge “in akpwarye” kalmekin in sang misla ku me kasru nu sin sie met su pulakin keok. Kalmen ma inge pa in akwanginyela asor yok lun sie met. Aok Jeova el oru ma inge. (Ridi 2 Korint 1:3, 4.) Wangin kutena ma ku kutena met su ku in oru Papa tumasr su in kosrao in tia oru ma inge. Ke ma inge el ku in oru ma eneneyuk nukewa in akpwaryelos nukewa su lungse el. Ke sripen God el akpwarye kut, pasis kut ku in akpwarye ku akkeye pa met lili wiyesr su pulakin “kutena keok.” Wangin kutena met ku in akpwarye kut oana ke ma Jeova el ku in oru!
Sropon Me Keok
6. Mea kutu sripen me keok?
6 Kut enenu me pwarak ke oiya puspus lun moul. Sie sropon me asor yok pa mise lun sie met su kut lungse, yokna sie papa, nine, ku tulik. Kutu met saap elos enenu me pwarak meyen elos keok ke sripen srisri. Oayepa, mas, oiyen matou, moul sekasrup, a ma koluk puspus su sikyak fwin fwalu ku in oru kut in keok.
7. (a) Ke pal in ma upa, mea kut enenu? (b) Mea Jeova el ku in oru in akkeye sie inse “musalla a toasr”?
7 Ke pal in ma upa, kut keok ke inkanek puspus. Kut enenu me pwarak meyen insiesr, nunak lasr, pulakin lasr, manosr, a fwinne lulalfongi lasr ku in sun keok. Ke sie me pupulyuk, nunku ke inse. Kas lun God el akkalemye la insiesr ku in “musalla a toasr.” (Sam 51:17) Paye la Jeova el ku in kasre kut ke kain in oiya inge. El “akkeye inse su musalla, a puela kinet kelos.” (Sam 147:3, LSK) Fwinne ke oiya upa puspus, God el ku in akkeye insiesr su fosrnga a keok kut fwin pre nu sel, fwin oasr lulalfongi lasr nu sel, a akos masap nukewa lal.—Ridi 1 Jon 3:19-22; 5:14, 15.
8. Jeova el kasre kut fuka fwin nunak lasr enenu me akkeye?
8 Ke sripen kut sun kain in ma upa a me srufwe puspus, paenang nunak lasr enenu me pwarak kutupal. Kut enenu me kasru kut fwin sun kain in ma upa inge. Met sim lun sam el fwak: “Ke pal nga fosak ke nunak pus insiuk, kas in pwarak lom akengunye moul luk.” (Sam 94:19, NW) Oayepa, Poul el simusla: “Nik komwos nununkala in kutena ma, a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God; a misla lun God, su alukela ma eteyuk nu kemwa, fwa liaung insiomwos a nunkomwos in Kraist Jisus.” (Filippai 4:6, 7) Ke pal se nunak lasr enenu me pwarak, kut enenu in ridi Baibel a nunku yok ke ma el akkalemye. Ma inge fwa ase nu sesr me akkeye yok.—2 Timote 3:15-17.
9. Mea ku in kasre kut fwin oasr nunak a pulakin tia mwo lasr?
9 Kutupal, kut munasla na paye a oru kut sessesla ke kain in nunak a pulakin tia mwo. Saap kut nunku mu kut tia ku in oru ma se su Jeova el tupan kut in oru, ku kut nunku mu kut tia ku in akpayeye sie kunokon ke congregation. Ke oiya inge, Jeova el ku pa in akkeye a kasre kut. Ke sie me pupulyuk: Ke pal se Jeova el fwak nu sel Josua in kol met Israel in lain mutunfwal ku puspus, Moses el fwak nu sin metu: ‘Komwos in ku a pulaik na. Nikmet fosrnga, ku sangeng selos, tu Jeova God lomwos el pa wi komwos. El fwa tia siskomwosla, ku som liki komwos.’ (Duteronomi 31:6) Ke kasru lun Jeova, Josua el kol met Israel nu ke Fwal Mwulela a sruokye a kutangla liki met lokwalok lalos nukewa. Moses el eis pa kain in kasru ouinge sin Jeova, ke Mwea Srusra.—Exodus 14:13, 14, 29-31.
10. Fwin ma upa puspus akkolukye manosr, mea ku in kasre kut?
10 Ma upa puspus ku pa in akkolukye a akmunasye manosr. Aok, oasr me kasru fwin kut kang mongo mwomwo, oasr mongla fwal, asrosr pal nukewa, a in karungin loom a manosr in nasnas pal nukewa. Oayepa, kut fwin nunku ke ma Baibel el akkalemye ke pal fwasru, ma inge ku in kasre kut in ku pal nukewa. Ke ma inge kut fwin keok ke sripen sie me srufwe ku ma upa, mwo in esam la Poul el sun pa me keok a kut fwin nunku ke kas in akkeye lal ma inge ku in kasre kut pa. El fwak: “Kut eoikusyuk apunla, a tia ikulyuk; kut toninfong, a sumwena wanginla fwinsrak; kolyaiyuk kut, a kut tia fulela; puokyuk kut, a tia kunauskutla.”—2 Korint 4:8, 9.
11. Mea kut ku in oru kut fwin pula mu lulalfongi lasr munasla?
11 Kutu me srufwe ku in akmunasye lulalfongi lasr. Jeova el ku in kasre kut pa ka. Kas lal akkalemye kas in mwulela se inge: “Jeova el tulokunlosyuk nukemwa su igori, a sruoklulosyuk nu kemwa su sumwoli.” (Sam 145:14) Kut fwin pula mu lulalfongi lasr munasla, kut enenu in siyuk kasru sin met elder. (Jemes 5:14, 15) A kut fwin nunku pal nukewa ke fwinsrak lasr ke moul ma patpat, ma inge ku in akkeye kut ke pal se oasr me srufwe ke lulalfongi lasr.—Jon 17:3.
Me Pupulyuk Puspus ke Me Akkeye su Tuku Sin God
12. Ke inkanek fuka Jeova el akkeyel Ebream?
12 Met sim lun Sam 119 el fwak nu sin Jeova: “Esam kas lom nu sin met kulansap lom, su kom [Jeova] oru tu nga fwa fwinsrak ka. Pa inge pwarak luk in keok luk, tu kas lom moliyula.” (Sam 119:49, 50) Ke pal inge, oasr yurosr Kas lun Jeova, su oasr me pupulyuk puspus ke orekma lun God in akkeye met kulansap puspus lal in pal meeta. Ke sie me pupulyuk, Ebream el arlana fosrnga ke pal se el long la Jeova el fwa kunausla Sodom a Gomorra. El siyuk sin God: “Ya kom fwa kunausla met sumwosmwos wi met koluk?” Jeova el akkeyel Ebream ke el mwulela nu sel la el fwa tia kunausla Sodom fwin oasr met sumwosmwos 50 su muta we. Tusruktu Ebream el sifwilpa siyuk sin Jeova pal limekosr: Na fuka fwin oasr met sumwosmwos 45 we? met 40? met 30? met 20? met 10? Jeova el mongfusrasr a kulang nu sel Ebream ke el mwulela la el fwa tia kunausyukla Sodom fwin oasr met sumwosmwos siengoul na su ku in koneyukyak we. Fwinne tia sun met sumwosmwos siengoul su muta we, Jeova el molella Lot a tulik luo natul.—Genesis 18:22-32; 19:15, 16, 26.
13. Hanna el akkalemye fuka la el lulalfongi Jeova?
13 Hanna, mutan kiyel Elkena, el lungse na paye in oasr sie tulik natul. Tusruktu el tia ku in orek tulik, a ma inge aktoasryel na paye. El pre nu sin Jeova ka, a met Tol Fulat Ilai el fwak nu sel: “God lun Israel in asot me siyuk lom su kom siyuk sel ka.” Ma inge akkeyel Hanna, “a mutal tia sifwil toasr.” (1 Samuel 1:8, 17, 18) Hanna el lulalfongi la Jeova el fwa kasrel ke ma upa lal. Paye la el nukin ke ma a fwa sikyak, ne ouinge oasr inse misla lal. Tokin kutu pal, Jeova el topuk pre lal. El pututuyuk a oswela sie tulik mokul. El pangon el Samuel.—1 Samuel 1:20.
14. Efu ku Devid el enenu me akkeye? El siyuk me akkeye sin su?
14 Sie pa met su akkeyeyuk sin God pa Togusra Devid. Jeova el “liye inse.” Ke ma inge ke pal se el sulella Devid in kol oana sie togusra lun met Israel, el etu la Devid el lungse in oru ma sumwos a el lungse alu paye. (1 Samuel 16:7; 2 Samuel 5:10) Tusruktu tok, Devid el orek kosro nu sel Bat-siba a el srike in mwukunla ma koluk lal ke el orala akwuk tu mokul tumal Bat-siba in mise ke meun. Ke pal se oasr met palu lun God su kasrel in kalem la ma koluk su el orala arlana upa, el pre nu sin Jeova: “Fwal nu ke pakoten lulap lom ela ma koluk luk. Ouyula liki ku luk, a aknasnasyeyula liki ma koluk luk. Tu nga etu kuiyuk [“akilen tafongla luk,” LSK], a ma koluk luk on ye mutuk pal e nu kemwa.” (Sam 51:1-3) Devid el auliyuk na paye ke ma koluk lal, a Jeova el nunak munas nu sel. Ne ouinge Devid el srakna keok ke fwako lun ma koluk su el oru. (2 Samuel 12:9-12) Tusruktu pakoten lun Jeova akpwaryel Devid.
15. Me kasru fuka Jeova el sang nu sel Jisus meet liki el mise?
15 Ke pal se el oasr fwin fwalu, Jisus el sun kain in ma upa puspus. God el lela me srufwe puspus inge, tusruktu Jisus el sruokye oaru lal pal nukewa. El sie met sumwosmwos su lulalfongi nu sin Jeova pal nukewa a aksol oana Met Kol. Meet liki el tukakinyukyak a anwuki, Jisus el pre nu sin Jeova: “Tia ma lungse luk, a ma lungse lom, in orek.” Oasr sie lipufan sikyuk nu sel Jisus a akkeyel. (Luk 22:42, 43) God el sang me pwarak, ku a kasru su el enenu in pal san.
16. Jeova el ku in kasre kut fuka fwin moul lasr oasr ke sensen ke sripen lulalfongi lasr?
16 Jeova el ku a fwa kasre kut in oaru nu sel fwinne moul lasr oasr ke me sensen ke sripen lulalfongi lasr. Kut akkeyeyuk pa ke fwinsrak lun sifwil moulyuk. A kut tupan na paye len sa ke met lokwalok se tok “el fwa ella,” mise! (1 Korint 15:26) Met kulansap oaru lun Jeova su mise tari, wekunang met puspus su mise tari, elos oasr ke me esmakin lal. Paye la Jeova el fwa esam elos a tia ku in mwulkunla. El a fwa akmoulyelosyuk. (Jon 5:28, 29; Orekma 24:15) Lulalfongi lasr ke mwulela lun God ke sifwil moulyuk ase nu sesr me pwarak a fwinsrak fokoko ke pal se oasr me kalyai upa.
17. Fuka Jeova el ku in akkeye kut fwin sie met su kut lungse el mise?
17 Sie me akkeye yok in etu la met in sou lasr su mise tari a fwa akmoulyeyakyuk nu ke akwuk sasu mwolana. Sripen me keok nukewa a fwa wanginla. A sie me insemwomwo yok nu sin “u lulap” sin met kulansap lun Jeova su moliyukla liki saflaiyen akwuk se inge in paing a luti met nukewa su fwa akmoulyeyakyuk!—Fwakyuk 7:9, 10.
Ye Po lun God Su On Nu Tok
18, 19. God el akkeye fuka met kulansap puspus lal ke pal se elos sun me kalyai?
18 Met palu Moses el simusla soko on su oasr me akkeye a me pwarak yok nu sin met Israel. Ke on soko inge, el akkalemye ouinge: “God su on ma patpat el nien muta lomwos, a ye po su on nu tok.” (Duteronomi 33:27) Tok kutu, met palu Samuel el fwak nu sin met Israel: “Nik komwos kufla liki fwasr tukin Jeova, a komwos orekma nu sel ke insiomwos kemwa. . . . Jeova el a fwa tia som liki met sral ke sripen e fulat lal.” (1 Samuel 12:20-22, NW) Kut fwin oaru in kulansap nu sin God pal nukewa, el fwa tia som liki kut. El fwa ase nu sesr me kasru su kut enenu pal nukewa.
19 God el sang me kasru a me akkeye nu sin met kulansap lal ke pal safla inge su oasr ongoiye puspus. Ke pal inge, met lili puspus wiyesr fwin fwalu nufon elos kalyaiyuk a filiyuki nu in prison meyen elos kulansapu Jeova. Ma sikyak nu selos sang me akpayeye la Jeova el akkeye met kulansap nukewa lal ke pal in ma upa. Ke sie me pupulyuk, sie sin met lili wiyesr in an Soviet Union el muta in nien kalpous ke lusen yea 23 ke sripen lulalfongi lal. Tusruktu fwinne el muta in nien kalpous, el srakna eis me rid su tuku in Baibel su akkeyel a akpwaryel. El fwak: “Ke lusen yea puspus inge, nga lotela in fungyang nu sin Jeova a in eis me akkeye sel.”—Ridi 1 Piter 5:6, 7.
20. Efu ku kut ku in lulalfongi la Jeova el fwa tia som liki kut?
20 Ke kutena oiya su ku in sikyak nu sesr ke pal fwasru, mwo kut in esam kas in akkeye inge: “Jeova el fwa tia sisla met sral.” (Sam 94:14) Aok kais sie sesr enenu me akkeye, ne ouinge kut ku in akkeye pa met puspus saye. Ke me lutlut toko, kut fwa lutlut ke inkanek mwomwo su kut ku in akkeye met puspus su pulakin keok ke fwal koluk inge.
Kom E Topuk Fuka?
• Mea kutu ma su ku in oru kut in keok?
• Jeova el akkeye fuka met kulansap lal?
• Fwin moul lasr oasr ke sensen, mea ku in akkeye kut?
[Box/Petsac ke sra 13]
Fuka Kut Ku In Muteng Ke Ma Puspus Su Ku In Akkolukye . . .
▪ insiesr Sam 147:3; 1 Jon 3:19-22; 5:14, 15
▪ nunak lasr Sam 94:19, NW; Filippai 4:6, 7
▪ pulakin lasr Exodus 14:13, 14; Duteronomi 31:6
▪ manosr 2 Korint 4:8, 9
▪ lulalfongi lasr Sam 145:14; Jemes 5:14, 15