Wacngihn Ma Kuh In Tulohkohnuhltahl uh

Oasr sie mukul ul niac muhta ac nguhsr mani lwen nuhkewa ke sruhnguhl luhlahp ke tempuhl uh. Sie lwen ah, el liyacl Peter ac John ac som nuhke tempuhl. El fahk: ‘Nuhnak muhnahs use kuhtuh mani lomtacl.’ Peter el fahk: ‘Oasr ma nga ac sot nuh sum ma yohk srihpac liki mani. Ke inen Jesus, nga sap kom in tuyak ac fahsr!’ Peter el kahsruh mukul sac in tuyak, ac el muhtwacwacack in fahsr! Mwet uh arlacna engan ke mwenmwen se inge, oruh mwet pucspucs in wi pac luhlahlfongi.

Tuhsruhktuh, mwet tol ac mwet Sadducee eltahl arlacna muhlat. Eltahl sruokyac mwet sap inge, ac usacltahllah nuh yurin mwet nuhnuhnkuh ac siyuck seltahl: ‘Suc sot kuh nuh sumtacl in ahkkweye mukul se inge?’ Peter el fahk: ‘Jesus Christ suc komtacl tuh uniyac, el acse nuh sesr kuh inge.’ Mwet kol luhn alu inge eltahl wowoyak: ‘Nimet sifwil luti kuh kahskahs kacl Jesus!’ Tuhsruhktuh mwet sap inge eltahl fahk: ‘Kuht enenuh in luti kacl Jesus. Kuht ac tiac tui.’

Tukun na ahksukohsohkyeyucklac Peter ac John, eltahl som nuh yurin mwet tuhma lutlut sahyac ac fahk nuh seltahl ma sikyak ac. Eltahl nuhkewa tuhkweni ac puhruhe nuh sin Jeova ac fahk: ‘Kahsre kuht in puhlaik tuh kuht kuh in tahfwelah in oruh orekma ma kom sapkihn nuh sesr.’ Jeova el sang nuh seltahl nguhn muhtahl, ac eltahl tahfwelah in fahkwack pweng wo ac in ahkkweye mwet mas uh. Puhseni mwet suc eklac mwet Christian. Mwet Sadducee eltahl arlacna sok kac, pwacnacng eltahl sapkihn in sruokyac mwet sap uh ac sisuhltahllah nuh in kaclpous. Tuhsruhktuh in fong sac, Jeova el sap lipufacn se lal in ikacslah sruhnguhl ke presin uh ac fahk nuh sin mwet sap: ‘Komtacl in fohlohklac nuh in tempuhl ac luti mwet we.’

Ke lwen tok ah, pa inge ma fwack nuh sin Sanhedrin, kuh acn in nuhnuhnkuh luhn mwet kol ke alu: ‘Nien presin kaul, tuhsruhktuh mwet suc komtacl fihliyac in presin ah wacngihnlac we! Eltahl oasr in tempuhl ingena, ac luti mwet uh!’ Eltahl sifwil sruokyac mwet sap uh ac itucklac eltahl nuh yurin un mwet pwacpa fuhlwact uh. Mwet tol fuhlwact eltahl fahk: ‘Kuht fahkot na kahlwem nuh sumtacl komtacl in tiac sifwil luti kacl Jesus!’ Tuhsruhktuh Peter el topuk: “Kuht enenuh in ahkos God, ac tiac mwet uh.”

Mwet kol luhn alu inge arlacna kasrkuhsrak, pwacnacng eltahl luhngse in uniyac mwet sap inge. Tuhsruhktuh Gamaliel, sie mwet Pharisee el fahk: ‘Liyacacng ma komtacl ac oruh nuh sin mwet inge! Sahp God el weluhltahl. Yac komtacl luhngse na pwacye in lain God?’ Eltahl porongo kahs lal inge. Tukun srihngsrihng mwet sap, eltahl sap in tiac sifwil luti kacl Jesus, na fihlfihlac eltahl. Tuhsruhktuh mwet sap eltahl tiac tui in luti. Eltahl tahfwelah in fahkwack pweng wo, in tempuhl ac sie lohm nuhke sie lohm.