Jesus El Sulacllah Saul

Saul el sie mwet Rome, suc isuslac fin acn Tarsus. El sie mwet Pharisee suc yohk etwacack la ke Masap luhn mwet Jew, tuhsruhktuh el arlac kasrkuhsrak nuh sin mwet Christian. El amackuhnlah mukul ac muhtwacn liki lohm seltahl ac siselosyang nuh in presin. El liye ac wi ahkkweye mwet uh in tanglal Stephen nwe ke el misac.

Tiac mwet Christian in acn Jerusalem muhkwena pa el luhngse in sislah nuh in presin. El siyuck sin mwet tol fuhlwact in lwelah elan som nuhke siti luhn Damascus tuh elan kuh in sruokyac pac mwet Christian suc muhta we ac sislah nuh in presin. Ke Saul el apkuhran nuhke siti uh, sie kahlwem sarmelihk apnuhllah, ac el puhtatlac nuh infohk uh. Na el lohng sie puhsra fahk nuh sel: ‘Saul, efuh kom kuh kalyeiyuc?’ Saul el siyuck: ‘Suc kom an?’ Puhsra sac fahk nuh sel: ‘Nga Jesus. Kom som nuh Damascus, ac nga fah fahkot ma kom in oruh.’ In kihtin pacl na, Saul el tiac kuh in liye kuhtwena ma, mwet weluhl sruokyac paul ac pwenuhlack nuhke siti sac.

Oasr mukul Christian oaru se in acn Damascus pahngpahng Ananias. Jesus el fahk nuh sel in sie aruhruhma: ‘Kom som nuhke lohm sel Judas ma oasr ke inkacnek se pahngpahng Suwohs, ac kom siyuck ke sie mwet suc pahngpahng Saul.’ Ananias el fahk: ‘Leum, nga lohng tari sin mwet ke ma mwet se inge el oruh! El sruokyac ac sisilac mwet tuhma lutlut lom nuh in presin!’ Tuhsruhktuh Jesus el fahk: ‘Fahlac som nuh yohrohl. Nga sulacllah Saul elan fahkwack pweng wo nuh sin muhtuhnfacl pucspucs.’

Ohinge Ananias el sokol Saul ac el fahk: ‘Saul, ma lihk, Jesus el suhpweyucme tuh kom fah kuh in sifwil liye.’ In pacl sacna, Saul el kuh in sifwil liye. El lotwelah kacl Jesus ac el eklac mwet tuhma lutlut lal. Tukun el bacptaislac, Saul el muhtwacwacack in fahkwack pweng wo nuh in iwen lohlngohk wi mwet Christian wiyacl. Pwacye lah mwet Jew eltahl arlacna lut ke eltahl liye lah Saul el luti kacl Jesus. Eltahl fahk: ‘Kuh tiac el pa tuh sruokyac mwet tuhma lutlut lal Jesus ac sisuhltahlacng nuh in presin?’

Ke lusen yac tolu, Saul el fahkwack pweng wo nuh sin mwet in acn Damascus. Mwet Jew eltahl arlacna kasrkuhsrak ac pwacpa in unilyac Saul. Tuhsruhktuh, mwet lili etwaclah pwacpa sac ac eltahl kahsrel in kahinglac. Eltahl usaclwack nuh fin pot ke siti uh ac koellah nuh twen ke sie fohtoh luhlahp.

Ke pacl se Saul el sun acn Jerusalem, el srihke in weacng mwet lili suc muhta we. Tuhsruhktuh eltahl sahngweng sel. Na Barnabas, sie mwet tuhma lutlut na kuhlwacng, el pwacnuhllah Saul nuh yurin mwet sap, ac el ahkuhtweyac nuh seltahl lah Saul el eklac tari. Saul el arlacna moniyuck in fahkwack pweng wo wi mwet lili ke congregation in Jerusalem. Tukun kuhtuh pacl, etweyuck el oacna Paul.