Mwet Tuhma Lutlut Eltahl Eis Nguhn Muhtahl

Lwen singucul tukun Jesus el fohlohklac nuh inkuhsrao, mwet tuhma lutlut lal eltahl eis nguhn muhtahl. Ma inge sikyak in Pentecost yac 33, ac mwet uh tuhkuh nuh Jerusalem liki acn pucspucs in wi ke mwe ahkfuhlwact. Mwet tuhma lutlut 120 eltahl tuhkweni nuh sie ke infuckihl lucng ke sie lohm. Ke kihtin pacl ah na, oasr ma usrnguck se sikyak. Oasr ma oacna e ma sikyang fin sifen kais sie mwet tuhma lutlut, ac tukun ma inge eltahl kuh in kahskahskihn kain in kahs pucspucs. Puhsra luhlahp oacna eng na upac lohngyuck in lohm se.

Mwet suc tuhkuh liki acn sahyac nuh in Jerusalem eltahl lohng puhsra se inge, ac kahsruhsr nuh in lohm sac in liye lah meac sikyak ah. Eltahl arlacna lut ke eltahl lohng lah mwet tuhma lutlut kahskahskihn kahs pucspucs. Eltahl fahk: ‘Mwet inge eltahl mwet Galilee. Na fuhkah tuh eltahl kuh in sramsram ke kahs lasr sifacna?’

Tukun ma inge, Peter ac mwet sap sahyac uh tuyak ye muhtuhn mwet pucspucs inge. Peter el fahk nuh seltahl lah fuhkah acnwucki Jesus ac Jeova el ahkmoulyelack liki misac. Peter el fahk: ‘Jesus el oasr tari ingena in kuhsrao ke lacpo lacyot sin God, ac nguhn muhtahl ma el tuh wuhlelah el okoila nuh facsr. Pa inge srihpac pwacnacng komtacl liye ac lohng ke mwenmwen inge.’

Ke mwet uh lohng kahs lal Peter inge, arulacna fakihsyac insiacltahl, ac eltahl kihsen siyuck ohinge: “Meac kuht ac oruh uh?” El fahk nuh seltahl: ‘Komtacl in auliyak liki ma koluk lomtacl ac bacptaislac inen Jesus. Komtacl ac fah eis pac mwe kihte luhn nguhn muhtahl.’ In lwen sac, oasr mwet 3,000 bacptaislac. Muhtwacwacack in pacl sacn, puhseni na pwacye mwet tuhma lutlut in Jerusalem. Ke kahsruh luhn nguhn muhtahl, mwet sap eltahl oakiyac congregation pucspucs tuh eltahl in kuh in luti nuh sin mwet tuhma lutlut inge ma nuhkewa ma Jesus el sapkihn nuh seltahl.