MWE LUTLUT 18

Kuht ac Kahsruh Fuhkah Mwet Lili Wiyacsr Suc Sun Ma Upac?

Mwet Loh luhn Jeova inge sang kahsruh ke mwe enenuh luhn mwet fin acn Dominican Republic — Dominican Republic

Mwet orekma inge sang kahsruh in sifwil muhsahi Lohm in Toeni fin acn Japan — Japan

Sie sin Mwet Loh luhn Jeova el ahkkweye sie mwet suc sun mwe ongaiyac fin acn Haiti — Haiti

Ke pacl se ongaiyac uh sikyak, Mwet Loh luhn Jeova uh sa na muhtwacwacack orekma in sang kahsruh nuh sin mwet lili wiyacltahl suc sun ma upac inge. Kwacfeacng laltahl inge ahkkahlwemye luhngse pwacye laltahl nuh sin sie sin sie. (John 13:34, 35; Sie John 3:17, 18) Inkacnek pucspucs fuhkah kuht sang kahsruh lasr nuh kac?

Kuht sang mwe kahsruh ke mani. Ke pacl se sie sracl luhlahp sikyak fin acn Judea, mwet Christian in pacl meet ah ma muhta fin acn Antioch suhpwaclah mwe kahsruh ke mani nuh yurin mwet lili wiyacltahl inge. (Orekma 11:27-30) In oacpacna, ke pacl se kuht etwacack lah oasr ma na upac ma sikyak nuh sin mwet lili wiyacsr ke sie pacna acn, congregation lasr uh suhpweyuck mani in sang kahsruh mwet inge.—Luo Corinth 8:13-15.

Kuht sang mwe kahsruh nuh ke mwe enenuh. Mwet elder nuhkewa suc oasr ke acn ma mwe ongaiyac inge sikyak we uh enenuh in liye lah pwacye mwet lili nuhkewa ke congregation laltahl uh konweyuckyak ac eltahl wona. Sie relief committee pa ac oraclah oakwuck nuh ke kihteyacn mwe mongo, kof in nihmnihm ma nwacsnwacs, nuknuk, lohm ac mwe kahsruh nuh ke ono. Puhs sin Mwet Loh luhn Jeova ma oasr etwacack yohroh sang pacl ac kuh laltahl in som ac wi ke orekma in muhsah kuh ahkwoye lohm ac Lohm in Toeni pucspucs ma muhsahllah uh. Ke srihpen inse sefanna ac etwacack ma kuht eis ke kuht wi mwet sahyac ke u lasr uh orekma, ma inge kahsre kuht in sa na som ac sang kahsruh ke ma enenweyuck uh. Kuht sang kahsruh nuh sin “mwet wiyacsr in luhlahlfongi” ac oacyacpac nuh sin mwet sahyac ke pacl nuhkewa kuht kuh, finne alu laltahl uh siena.—Galatia 6:10.

Kuht sang mwe ahkkweye ke Bible ac kahsreltahl in muhtweng ke ma eltahl puhla uh. Mwet suc sun mwe ongaiyac uh pa enenuh yohk mwe ahkkweye uh. Ke pacl upac inge, kuht eis mwe ahkkweye sin Jeova, “God suc kahsre kuht ac ahkwoye kuht.” (Luo Corinth 1:3, 4) Kuht engan in sruhmuhn wuhlelah luhn Bible uh nuh sin mwet suc ahsor ac inse toasr, ac in sang kahs in ahkkweye luhlahlfongi laltahl uh lah ke pacl na sa Tohkohsrahi luhn God ac fah ahkwacngihnyelah ma upac nuhkewa ma oruh kuht in ngal ac kweok inge.—Fwackyuk 21:4.

Efuh kuh Mwet Loh luhn Jeova uh kuh in sa na sang kahsruh ke pacl ma mwe ongaiyac uh sikyak?
Mwe ahkkweye fuhkah ma tuhkuh ke Bible kuht kuh in ahkkahlwemye nuh sin mwet suc sun ongaiyac?