MWE LUTLUT 15
Mwet Elder uh Kahsruh Fuhkah Congregation uh?
Finland
Luti
Kahsruh ac ahkkweye
Sang ma loh
Ke u lasr uh, wacngihn sie mwet kol ma moul nuh se. A in oacna congregation luhn mwet Christian in pacl meet ah, srihsrngiyucki mwet kol ma ac fal in “mwet Sheperd nuh ke church [congregation] luhn God.” (Orekma 20:28) Mwet elder inge arlacna fototo nuh sin Jeova ac eltahl oakiyac mwe srihkasrak in liyacacng congregation uh ‘in tiac srahngesr, a eltahl in insewowo in oruh, mweyen ma God el luhngse. Eltahl oruh orekma laltahl uh, tiac tuh in moul nuh seltahl, a ke luhngse na laltahl in kuhlwacnsap.’ (Sie Peter 5:1-3) Orekma fuhkah eltahl kahsre kuht kac uh?
Eltahl nuhnkuh kacsr ac karihngihn kuht. Mwet elder uh sang kahsruh ke ma suhmuhslah uh ac karihngihn fototo luhn congregation uh nuh sin Jeova ke pacl nuhkewa. Ke eltahl etuh lah God pa sang kunohkohn na yohk se inge nuh seltahl uh, pwacnacng eltahl tiac srihke in kihfucs nuhnak luhn mwet lal uh. Mwet elder inge mwe kahsruh na nuh ke engan ac insewowo lasr uh. (Luo Corinth 1:24) In oacna ke sie mwet shepherd suc oaru in karihngihn kais soko sheep nahtuhl inge, mwet elder uh srihke in etwaclah kais sie mwet ke congregation uh.—Soakas 27:23.
Eltahl luti kuht in oruh ma luhngse luhn God. Ke wik nuhkewa, mwet elder uh kol toeni nuhkewa ke congregation uh in ahkkweye luhlahlfongi lasr uh. (Orekma 15:32) Mukul oaru inge eltahl kol kuht, oacyacpac oakiyac mwe srihkasrak na wo ke orekma in luti uh. Eltahl wi kuht ac ahkpahye kuht ke ip nuhkewa ke orekma in luti uh.
Eltahl use mwe ahkkweye nuh sin kais sie sesr. Oasr pacl ma mwet elder inge ac tuhkuh nuh ke lohm sesr uh kuh sramsram nuh sesr ke Lohm in Toeni in use kahs in kahsruh ac mwe ahkkweye ma tuhkuh in Bible. Eltahl oruh ma inge tuh in ahkkweye kais sie sesr ke fototo lasr nuh sin Jeova.—James 5:14, 15.
In wekuhnacng orekma nuhkewa laltahl ke congregation uh, inkaiyen mwet elder inge oasr orekma ac sucu laltahl ma eltahl enenuh pac in lohacng nuh se ac oraclah pacl laltahl nuh kac. Arlacna fal kuht in suhnakihn mukul lili suc arlacna kwacfeacng ke orekma upac inge.—Sie Thessalonica 5:12, 13.
Meac orekma luhn mwet elder ke congregation uh?
Ke inkacnek fuhkah mwet elder uh ahkkahlwemye lah eltahl nuhnkuh kacsr?