Meac Se Inge Pioneer?

Kahs se inge “pioneer” kalmackihnyuck nuh ke mwet suc som nuh ke sie acn sasuc ac ikacslah inkacnek nuh sin mwet sahyac suc fahsr tohkohl uh. Jesus el sie pioneer, ke srihpen suhpweyuckme el nuh facluh in kuhlwacnsap ac ikacslah inkacnek in molwelah nuh ke moul luhn mwet uh. (Matthew 20:28) Ke pacl inge, mwet ma fahsr tohkohl uh etahel ke eltahl sang inkaiyen pacl laltahl in ‘orek mwet tuhma lutlut.’ (Matthew 28:19, 20) Kuhtuh seltahl wi pac ke orekma in pioneer.

Sie pioneer el sie mwet suc oruh orekma in luti ke inkaiyen pacl lal uh. Mwet Loh luhn Jeova nuhkewa eltahl mwet luti (publisher) ke pweng wo uh. Tuhsruhktuh, kuhtuh seltahl regular pioneer, kalmac pa eltahl oraclah oakwuck nuh ke ma pucspucs in moul laltahl tuh eltahl in oraclah ao 70 kuh yohk liki ke orekma in luti pweng wo ke kais sie mahlwem. In oruh kain in orekma se inge, puhs seltahl ahksrihkyelah pacl laltahl nuh ke kuhtwena orekma sahyac. Ac kuhtuh pac seltahl suc kuhlwacnsap oacna special pioneer ke acn ma yohk enenuh nuh ke mwet in luti ke Tohkohsrahi luhn God ac eltahl kwacfeacng in oraclah ao 130 kuh yohk liki ke orekma in luti laltahl ke kais sie mahlwem. Pioneer uh falkihn moul ma tiac nwacnwaclah ke mwe kahsruhp pucspucs, mweyen eltahl luhlahlfongi lah Jeova el ac fah kahsreltahl ke kuhtwena ma eltahl enenuh ke moul laltahl uh. (Matthew 6:31-33; Sie Timothy 6:6-8) Mwet suc tiac kuh in oruh orekma in pioneer ke inkaiyen pacl laltahl uh kuh in auxiliary pioneer eltahl fin kuh. Kalmac pa eltahl kwacfeacng in ahkyohkye ao ke orekma in luti pweng wo uh, ke ao 30 kuh 50 ke kais sie mahlwem.

Pioneer se oruh orekma inge ke srihpen luhngse lal nuh sin God ac nuh sin mwet uh. In oacna Jesus, kuht akihlen enenuh luhn mwet pucspucs ke pacl inge in etuh ke God ac ke oakwuck pucspucs lal uh. (Mark 6:34) Tuhsruhktuh, oasr etwacack yohrohsr ma ac kuh in kahsreltahl ke pacl inge in sang finsrak pwacye nuh seltahl nuh ke pacl fahsruh uh. Luhngse luhn pioneer se nuh sin mwet tuhlan lal uh pa moklacl in sang kewa pacl ac kuh lal in kahsruh mwet sahyac uh in fototoyang nuh sin God. (Matthew 22:39; Sie Thessalonica 2:8) Ke sahflahiyac uh, luhlahlfongi lal uh ac ahkkweyeyuck ke el fototoyang nuh sin God ac el engankihn mwe insewowo yohk.​—Orekma 20:35.

• Kom ac ahkuhtweyac fuhkah orekma luhn sie pioneer?

• Meac mokle kuhtuh sin mwet lili uh in pioneer ke inkaiyen pacl laltahl uh?