MWE LUTLUT 7

Fuhkah Toeni Lasr Uh?

Toeni luhn Mwet Loh luhn Jeova fin acn New Zealand — New Zealand

Toeni luhn Mwet Loh luhn Jeova fin acn Japan — Japan

Mwet fuhsr se inge sie Mwet Loh luhn Jeova ac el rit Bible ke kahs Uganda — Uganda

Mwet Loh luo inge oruh sie mwe luhmah ke atacn sie sramsram ke Bible — Lithuania

Ke toeni luhn mwet Christian in pacl meet ah, eltahl on, puhruhe, riti Ma Suhmuhslah uh ac sramsramkihn. (Sie Corinth 14:26) Kain in ohiyac inge pa kom ac kuh in liye ke toeni lasr uh.

Kahs in luti ma tuhkuh ke Bible uh arlacna fal ac wo in orekmakihnyuck. Ke Saturday ac Sunday, kais sie congregation toeni ac lohng Mwe sramsram se ma tuhkuh ke Bible ke lusen minit 30. Mwe sramsram inge ac kahsre kuht in liye lah fuhkah Ma Suhmuhslah uh kuh in kahsre kuht ke moul lasr ac ke pacl ma kuht oasr kac inge. Ahkkweyeyuck mwet nuhkewa in wi ukwe ke Bible nahtuhltahl sifacna. Tukun mwe sramsram inge, oasr Lutlut ke “Tower in San” ma ac fah orek ke lusen ao sie. Mwet nuhkewa suc wi ke toeni uh eltahl kuh in wi topuk kihsen siyuck ke mwe lutlut ke Tower in San sacn. Kihsen siyuck ac top inge kahsre kuht in orekmakihn kahs in kahsruh luhn Bible ke moul lasr uh. Mwe lutlut se inge pa orekmakihnyuck ke congregation nuhkewa fin facluh nohfohn suc puhs liki 115,000.

Kahsreyuck kuht in kapkapwack ke inkacnek in luti lasr uh. Kuht oacyacpac toeni nuh sie ke kais sie ekuh ke infulwacn wik in wi ke sie program ma oasr ip tolu kac pahngpahng Moul in Christian ac Orekma in Luti Lasr uh. Ma inge ac fah orek fal nuh ke mwe rit se inge Moul ac Orekma in Luti uh Oakwuck ke Toeni Inge ke kais sie mahlwem. Ip se meet ke toeni se inge, Ma Sacohk Ke Kahs luhn God ac kahsre kuht in etwaclah sie ip ke Bible ma oakiyucki nuh sin congregation uh in ritelah na meet. Ke ip se tohkoh an, Ahkolah In Wo nuh ke Orekma In Luti uh, oasr mwe luhmah ke inkacnek in sramsram nuh sin mwet sahyac ke Bible. Sie mwet in sang kahs in kahsruh el ac tuni inkacnek ma ac kuh in kahsre kuht in kapkapwack ke rit ac inkacnek in sramsram lasr uh. (Sie Timothy 4:13) Ke ip sahflah sacn, Moul luhn Mwet Christian, ac kahsre kuht in nuhnkuh ke inkacnek ma kuht kuh in orekmakihn kahs in kahsruh luhn Bible uh ke kais sie lwen ke moul lasr uh. Ma inge wekuhnacng kihsen siyuck ac top ma ac ahkyohkye kahlwem lasr ke Bible uh.

Ke pacl se kom wi ke toeni lasr inge, wacngihn ahlohloh kac lah kom ac fah arlacna fwefwelac ke woiyen lutlut ke Bible ma kom ac eis kac uh.—Isaiah 54:13.

Meac kom ac lohng kom fin wi ke toeni luhn Mwet Loh luhn Jeova uh?
Piyac kac sin toeni lasr ke wik nuhkewa ma kom luhngse in wi kac?