Orekmakihn Mwe Srihkasrak luhn Mwet Pahluh Oacna Micah
1. Kihsen siyuck fuhkah Micah el acna nuhnkuh kac? Ac efuh oasr srihpen orekma in fahkwack lal?
1 ‘Ngac sahflahiyen facl kuluk se inge?’ Ke mwet pahluh Micah el fahkwack kahs in nuhnuhnkuh luhn Jeova nuh sin tohkohsrahi luhn Israel ac Judah, sahp el nuhnkuh ke kihsen siyuck se pacna inge. Fwinne ouinge, tiac kalmac pa wacngihn srihpen orekma in fahkwack lal. Ke puhluhn pacl lal Micah, in yac 740, kahs lal Jeova nuh sin Samaria ahkpwacyeyuck. (Micah 1:6, 7) Tok, acn Jerusalem kuhnanuclac ke yac 607. (Micah 3:12) Kuht kuh in etahwi Micah fuhkah ke kuht sano nuhnuhnkuh luhn Jeova ke pacl lasr uh in ahkfahsryeyuck?
2. Kuht ahkkahlwemye fuhkah lah kuht mongfihsracsr in sano lwen luhn Jeova? Ac Efuh?
2 Mongfihsracsr: Micah el suhmuhslah: “Nga fah tawi na LEUM GOD; nga fah tupan God, mweyen nga lulalfongi lah El ac moliyula.” (Micah 7:7) Pwacye lah, Micah el te muhta na sano nuhnuhnkuh luhn Jeova. El kacfweacng ac kahfofo oacna sie mwet pahluh lal. Ke kuht tuhpan lwen luhn Jeova, kuht enenuh pac in “mutal ac kisakinyukyang nu sin God.” (2 Peter 3:11, 12) Mongfihsracsr luhn Jeova uh sang pacl nuh sin kais sie in forlah. (2 Peter 3:9) Pwacnacng kuht ukwe kahs in kai ke Bible in etahi mongfihsracsr luhn mwet pahluh pucspucs.—James 5:10.
3. Efuh kuht enenuh in siyuck sin Jeova ke ngun muhtahl lal?
3 Fungyang nuh ke Kuh luhn Jeova: Fwinne upac kunohkohn se lal Micah ah, el ngwetack nuh sin Jeova in eis kuh in ahksahfyelah. (Micah 3:8) Jeova el etuh lah kuht enenuh kuh lal, pwacnacng ke inkacnek luhn Kahs Lal, Jeova el kwacfe nuh se sesr in siyuck sel ke kuh lal. El sang yohk kuh nuh selos suc muhnahs ac tohtohlah tuh elos in kuh in oruh kunohkohn lalos nuh sel. (Psalm 84:5, 7; Isaiah 40:28-31) Kom nuh puhla tari ma inge ke moul in kuhlwacnsap lom nuh sin Jeova? Yac kom siyuck kahsruh pacl nuhkewa sin Jeova ke kuh luhn ngun muhtahl lal?—Luke 11:13.
4. Fuhkah moul lal Micah sie mwe srihkasrak wo nuh sesr mihsenge?
4 Ke lusen moul lal nohfohn, Micah el likiyac ma luhngse luhn Jeova in pa ma se meet pacl nuhkewa. El kacfweacng in oaru pacl nuhkewa fwinne ma kuluk raunellah. Oacna Micah, oaru lasr uh srifweyuck lwen nuhkewa. Pwacnacng lwelah kuht in tu kuh ke wuhlelah lasr in “alu ac akos LEUM GOD lasr nwe tok ma pahtpat.”—Micah 4:5.