Kut Fwa Fwasr In En Jeova Ma Patpat!
“Kut . . . fwa fwasr in en Jeova God lasr ma patpat, a ma patpat.”—MAIKA 4:5.
1. Kain in me sramsram fuka akkalemyeyuk in Maika sapter 3 nu ke 5?
OASR ma Jeova el lungse in fwak nu sin met lal, a el orekmakin Maika oanu met palu lal. God el akmwuki in oru nununku lain met koluk. El akola in sang kai nu sin met Israel meyen el alu nu ke god kikiap. Tusruktu, sie me insemwomwo meyen Jeova el akinsemwomwoyelos nu kemwa su fwafwasryesr in el. Me sramsram inge e fwa akkalemyeyuk in sapter 3 nu ke 5 lun kas palu lal Maika.
2, 3. (a) Met kol nu kemwa lun Israel elos enenu in akkalemye kain in oiye fuka, tusruktu mea elos oru na paye? (b) Fuka kom ku in aketeye kas pupulyuk su orekmakinyuk in Maika 3:2, 3?
2 Kas palu lun God el fwak: “Long, Nga kaifwe nu sumwos, komwos sifwen Jekob, a leum lun loom sin Israel. Ya tia ma lomwos in etu nununku sumwos?” Aok, pa inge ma elos enenu in oru na paye, tusruktu mea elos oru? Maika el fwak: “Komwos su srunga ma mwo, a lungse ma koluk, su fwusla kololos lukelos, a ikwelos liki srelos; su kang pa ikwen met srak, a sukela kololos lukelos, a koteye srelos, a pakpakelosi, oanu nu ke iron pot, a oanu ikwe in sie pot lulap.”—Maika 3:1-3.
3 Aok, leum inge elos akkeokye met sikasrup, su wangin kasru yuro! Kas in pupulyuk inge arulanu kalem nu selos nu kemwa su long kas lal Maika. Ke pal se elos uniye sip a akola in boil, elos fwusla kololos lukelos meet a koteye srelos. Kutupal elos koteye srelos in eisla maro. A ikwe a sri elos kemwanu boil ke sie pot lulap oanu ma Maika el fwak. (Ezikiel 24:3-5, 10) Sie me pupulyuk fwal pa inge ke orekma koluk su metu elos sun in len lal Maika ye paon met kol koluk lalos!
Jeova El Lungse Kut In Akkalemye Nununku Sumwos
4. Mea ma tia oanu sie inmaslon Jeova a met kol lun Israel?
4 Oasr ma tia oanu sie inmaslon Met Seperd su lungse, Jeova, a met kol lun Israel. Meyen elos tia orekmakin nununku sumwos, paenang elos kofla in akpayeye kunokon lalos in kurunganang u lalos. A, ke inkanek lun rapku elos akkeokye met su luman sip, elos tia sang nu selos nununku sumwos a akpusisilyelos nu ke “orekma in aksurorye sra,” oanu ma akkalemyeyuk in Maika 3:10. Mea kut ku in lotela ke ma sikyuk inge?
5. Mea Jeova el siyuk sin met nu kemwa su kol met lal?
5 God el lungse met nu kemwa su kol inmaslon met lal in akkalemye nununku sumwos. Ma inge ku in liyeyuk na paye nu sin met kulansap lun Jeova in len inge. Sayen ma inge, fwal nu ke ma simusla in Isaia 32:1, ke fus inge kut ku in rid: “Liye! Sie togusra fwa leum in sumwosmwos; a met leum fwa leum in nununku sumwos.” Tusruktu, in len lal Maika mea kut ku in koneak? “Met su srunga ma mwo a lungse ma koluk” elos tafwela in akkolukye nununku sumwos.
Pre lun Su Eis Topuk?
6, 7. Kain in me lutlut yok fuka akkalemyeyuk in Maika 3:4?
6 Ya met koluk nu kemwa in len lal Maika elos ku in eis insemwomwo lun Jeova? Mo, elos tia ku! Maika 3:4 el fwak: “Na elos fwa pang nu sin Jeova, a el fwa tia tupkalos. Aok, el fwa mwukunla mutal lukelos in pal sa, oanu elos orekma koluk in orekma lalos.” Ma inge akkalemye sie me lutlut su arulanu yok sripe.
7 Jeova el tia sang topuk nu ke pre lasr kut fwin oru ma koluk. Ma inge arulanu paye kut fwin moulkin moul luo, kut okanla orekma koluk lasr a in pal se na kut orek luma la kut kulansap nu sin God ke oaru. Fwal nu ke Sam 26:4, Devid el on: “Nga tia muta yurin met kikiap; a Nga fwa tia utyuk nu yurin met kutasrik.” Aok, Jeova el tia sang topuk ke pre lun met nu kemwa su kunausla Kas Lal!
Akkeyeyuk ke Ngun Mutal
8. Met palu kikiap nu kemwa in len lal Maika elos eis kas in sensen fuka?
8 Arulanu pengpeng na paye orekma koluk inmaslon met kol lun alu lun an Israel! Met palu kikiap elos oru met kulansap lun God in sitoela ke ma lun ngun. Met kol rapku elos kaskas ke “Misla!” tusruktu ke ma paye elos akfulatye meun lain kutena met su tia sang nu selos kutena ma su elos ku in kang. “Ke ma inge,” Jeova el fwak, “e fwa fong nu sumwos, tu e fwa wangin arurumu yurumwos; a a fwa losr nu sumwos, tu komwos fwa tia liyaten. A fwatu fwa tili fwin met palu, a len fwa sralsral fwelos. A met palu fwa akmwekinyeyuk, a met liyaten toninfong. Aok elos nu kemwa fwa afwunye ngoasrolos ke alut.”—Maika 3:5-7a New World Translation.
9, 10. Mea kalmen ‘afwunye ngoasro ke alut,’ a efu Maika el tia enenu in oru ou inge?
9 Efu ku elos “afwunye ngoasrolos ke alut”? Pa inge ma met nu kemwa in len lal Maika elos oru ke sripen mwekin. A met koluk inge nu kemwa enenu na paye in mwekin. “Tu wangin topuk sin God,” nu sin met koluk inge. (Maika 3:7b) Jeova el tia loang nu ke pre lun kutena met inse fulat su arulanu koluk.
10 Maika el tia enenu in “afwunye ngoasrol ke alut.” Meyen el tia mwekin. Jeova el long pre lal. Loang akmwoye nu ke Maika 3:8, ke fus inge met palu oaru inge el fwak: “A fono keik, Nga sesesla ke ku ke ngunin Jeova, a nununku, a mwal.” Maika el sang kulo na paye meyen ke lusen pal in orekma lun forfor lal ke oaru, el “ku ke ngunin Jeova” pal nu kemwa! Ma inge sang nu sel ku “in fwakak nu sel Jekob ma koluk lal, a nu sel Israel ma sito lal.”
11. Fuka metu elos eis ku in sulkakin kas lun God?
11 Maika el enenu ku su yok liki ku lun met tu el an ku in sulkakin nununku upa lun God. Ngun mutal lun Jeova, ku ku lal, arulanu yok sripe. A fuka nu sesr? Orekma in luti lasr ku in akpayeye mukena fwin Jeova el akkeye kut ke inkanek lun ngun mutal lal. Kaifweung lasr in luti tia ku in kapkapek kut fwin oru ma koluk ke lungse lasr. Ke ma inge, God el tia long pre lasr a me siyuk lasr ke ku in oru orekma inge. Kut tia ku in sulkakin na paye nununku lun Papa tumasr in kosrao fwin “ngun mutal lun Jeova” tia kasre kut. Ke inkanek lun pre su God el long a ke kasru lun ngun mutal, kut ku in sramsram ke Kas lun God ke pulaik oanu Maika el oru meet.
12. Efu ku met tuma lutlut lun Jisus in pal meeta elos ku in ‘fwakak kas lun God ke pulaik’?
12 Saap kom esam me sramsram in Orekma 4:23-31. Lela kom in nunku la kom sie sin met tuma lutlut lun Jisus in century se meet. Met kolyai met elos suk in kutongye orekma in luti lun met tuma lutlut lun Jisus. Tusruktu, met oaru inge nu kemwa elos pre nu sin Leum Ku Liki Ku, a siyuk: “A inge, Jeova, kom liye me aksangeng lalos, a sang nu sin met kulansap lom in fwak kas lom ke pulaik nu kemwa.” Fwokin ma inge? Tokin elos pre, an se ma elos tukeni muta we kusrusryuk, a elos nu kemwa tingtinginu ke ngun mutal a elos mutamwauk in pulaik in fwakak kas lun God. Ke ma inge lela kut in pre nu sin Jeova pal nu kemwa a lalalfongi ke kasru lal ke inkanek lun ngun mutal ke kut oru orekma lun forfor lasr.
13. Mea sikyuk nu ke Jerusalem a Samaria, a efu?
13 Sifwil nunku ke len lal Maika. Fwal nu ke Maika 3:9-12, met kol nu kemwa su lungse akmas elos oru nununku ke inkanek lun me eyeinse koluk, met tol nu kemwa elos siyuk mani ke orekma lalos, a met palu kikiap elos palye ke mani. Tia me lut ke pal se God el oru nununku lal lain capital lun an Juda, Jerusalem, “fwa oanu sie eol lun ma musalla”! Ke sripen alu kikiap a moul fokfok arulanu fwasrelik pa fwin an Israel, paenang ke kasru lun God Maika el sang kas in sensen a fwak la an Samaria fwa ekla oanu sie “eol in kutkut.” (Maika 1:6, NW.) Paye, met palu Maika el moul in liye kunanela lun an Samaria ke paon met solse lun an Assyria in yiu 740 B.C.E. (2 Togusra 17:5, 6; 25:1-21) Arulanu kalem la me sramsram ku inge lain Jerusalem a Samaria ku in akkalemyeyuk mukena ke ku lun Jeova.
14. Fuka kas palu su akkalemyeyuk in Maika 3:12 akpayeyuk, a fuka ma inge purakak insiesr?
14 Juda el tia ku in kaeng ke nununku upa lun Jeova. In akpayeye kas palu su simusyukla in Maika 3:12, Saion e fwa “plauyuk oanu sie imae.” Ke century ak21 lasr inge, kut etu la ma inge sikyuk ke pal se mutanfwal Babulon el kunausla an Juda a Jerusalem in yiu 607 B.C.E. Ma inge sikyuk yiu siefok kutu tokin Maika el palye ka, aok, el etu la ma inge e fwa tuku na paye. Paye, kut lalalfongi la akmwuk koluk inge e fwa safla in “len lun Jeova” oanu kas palu el akkalemye.—2 Piter 3:11, 12.
Jeova El Aksumwosye Ma Nu Kemwa
15. Ke kas lom sifwanu, fuka kom ku in aketeye kas palu su simusyukla in Maika 4:1-4?
15 Kut fwin esam ma sikyuk in pal meeta, kut ku in liye la Maika el akkalemye tok sie me sramsram mwo ke fwinsrak. Sie kas mwomwo na paye kut ku in koneak in Maika 4:1-4! Maika el fwak: “A in len toka a fwa te oru, eol lun loom sin Jeova fwa oakiyuki fwin mangon eola, a fwa akfulatyeyuk liki toktoku; a mutanfwal nu kemwa fwa eel nu lu. . . . A el fwa nununku in maslon mutanfwal puspis, a fwa papu ke mutanfwal ku su loesla. A elos fwa tuktukye kutlas nutulos nu ke mwusra lun plau, a mwusra nutulos nu ke mitmit in pakpuk lesak. Mutanfwal fwa tia srukak kutlas lain mutanfwal, a elos fwa tia sifwil lutlut meun. A elos fwa muta, kais sie met ye fain lal a ye sak fig lal, a wangin sie fwa aksangengyelos; tu oalin Jeova lun un met meun el fwak.”
16, 17. Fuka Maika 4:1-4 el akpayeye ke len inge?
16 Su “met puspis” a “mutanfwal ku puspis” su sramsramkinyuk ke fus inge? Elos tia mutanfwal puspis a guferment puspis lun fwalu se inge. A, kas palu se inge el sramsram ke kais sie met su tuku ke mutanfwal puspis a forla nu ke kulansap mutal ke inse siefwunnu nu ke eol lun alu paye lun Jeova.
17 Fwal nu ke kas palu lal Maika, alu nasnas lun Jeova e fwa orekmakinyuk fwin fwalu nu fon. Ke len inge, met nu kemwa su “pakiyuki nu ke moul patpat” elos eis lutlut ke inkanek nu kemwa lun Jeova. (Orekma 13:48) Jeova el oru nununku lal a aksumwosye ma lun ngun nu kemwa nu sin met lalalfongi tu elos in ku in tu leyen Togusrai. Elos fwa moula liki “ongoiye lulap” oanu ipen “u lulap.” (Fwakyuk 7:9, 14) Meyen elos tukye tari kutlas nutulos nu ke mwusra lun plau, paenang fwinne ke pal inge elos muta in misla yurin met lili wielos su Met Lo lun Jeova a nu sin met ngie. Sie me insemwomwo na paye in welulos!
Elos Kaifweung In Fwasr in En Jeova
18. Mea kalmen ‘muta ye fain a sak fig’?
18 In len lasr misinge, ke pal se sangeng el afwunye fwalu nu fon oanu sie pukunyeng, kut arulanu engun meyen met puspis elos lutlut ke inkanek lun Jeova. Kut sano na paye ke sie pal su arulanu futotoeni ke pal se met nu kemwa su lungse God elos fwa tia sifwil lutlut meun, a elos muta na ye fain a ye sak fig lalos. Sak fig elos eokiye pal nu kemwa in nien grepu. (Luk 13:6) In muta ye fain a ye sak fig lal ku in kalmekin misla, insemwomwo ke ma puspis, a inse misla in ma nu kemwa. Fwinne misinge, moul futoto lasr nu sin Jeova ase nu sesr misla ke nunuk a inse misla ke ma lun ngun. Ke pal se ma inge nu kemwa ku in liyeyuk a sikyuk ye koko lun Togusrai, kut nu kemwa fwa tia sangeng a oasr inse misla na paye lasr.
19. Mea kalmen fwasr in en Jeova?
19 Kut fwin lungse in engunkin me insemwomwo mutal a ma mwomwo nu kemwa, kut enenu in fwafwasyesr in en Jeova. Ma inge akkalemyeyuk in Maika 4:5, ke fus inge met palu el fwak: “Tu mutanfwal nu kemwa fwasr, kais sie in en God lal; a kut fwa fwasr in en Jeova God lasr ma patpat a ma patpat.” In fwasr ke en Jeova ku in kalmekin la oasr ma saye su kut enenu in oru a tia in fwak mukena la el pa God lasr. Tia in wi mukena ke toeni lun met Kristian a orekma in luti ke Togusrai, fwinne orekma inge nu kemwa arulanu yok sripe. Aok, kut fwin fwasr in en Jeova, kut mwolela moul lasr nu sel a kaifweung in kulansapul ke oaru nu kemwa a lungse. (Mattu 22:37) A oanu met kulansap su alu nu sel, kut kaifweung na paye in fwasr in en Jeova God lasr ma patpat.
20. Mea Maika 4:6-13 el palye?
20 Inge, nunuk munas lela kom in loang nu ke kas palu in Maika 4:6-13. “An nutin Saion” el enenu in muta in an saye tia ke lungse lal sifwanu, “aok nu Babulon.” Pa inge ma sikyuk na paye nu sin met nu kemwa su muta in an Jerusalem in century akitkosr B.C.E. Fwinne ou inge, kas palu lal Maika akkalemye la oasr kutu met lula su fwa folokla nu Juda, a ke sifwil oakiyuki lun Saion Jeova el oru na paye met lokwalok lal nu kemwa in ekla oanu kutkut meyen el e kunauselosla.
21, 22. Fuka Maika 5:2 el akpayeye?
21 Kutupa ma sikyuk akkalemyeyuk in Maika sapter 5. Ke sie me pupulyuk, loang akmwoye ke ma akkalemyeyuk inge in Maika 5:2-4. Maika el palye in akkalemye la Met Kol su God el sulela—el su “illa lal ma meet”—e fwa tuku liki Betleem. El fwa kol oanu sie met seperd “in ku lun Jeova.” Sayen ma inge, Met Kol inge e fwa pengpeng, tia in an Israel mukena, a elos fwa pengpeng “nu tafwunyen fwalu.” Saap Met Kol inge akfosye fwalu nu fon meyen elos tia akilenyel, tusruktu kut akilenyel na paye.
22 Su met saok emeet su isusla in an Betleem? A su met inge su e fwa “pengpeng nu tafwunyen fwalu”? Met se inge pa Jisus Kraist, su Messaia! Ke pal se Herod Lulap el siyuk sin met tol fulat a met sim piye an Messaia el isusla we, elos fwak nu sel: “In an Betleem, lun Judia.” Elos srukak kas in Maika 5:2. (Mattu 2:3-6) Kutu sin met srisrik elos etu pa ma inge, meyen in Jon 7:42 el sramsram kelos oanu elos fwak: “Ya Ma Simusla tia fwak tu Kraist el tuku liki futel Devid, a Betleem me, yen Devid el muta we?”
Mongle Paye Nu Sin Metu
23. Mea sikyuk ke pal inge in akpayeye Maika 5:7?
23 Maika 5:5-15 el sramsram ke meun in kutangla lun an Assyria ke lusen pal na futoto a el akkalemye pa la God el fwa oru nununku lal lain mutanfwal seakos nu kemwa. Maika 5:7 el mwolela ke sifwil oakiyuki a foloko lun met Ju lula nu ke an selos, a kas inge nu kemwa fwal pa nu ke len lasr. Maika el fwak: “A met lula sel Jekob fwa muta in maslon mutanfwal, puspis oanu aunfong sin Jeova me, oanu af fwin maa.” Me pupulyuk mwomwo inge orekmakinyuk in akkalemye la met lula sel Jekob in ngun, ku Israel in ngun, elos ekla oanu me insemwomwo lun God nu sin metu. “Sip ngie” nu kemwa lun Jisus su oasr fwinsrak in moul fwin fwalu, elos arulanu insemwomwo in akesrui ke orekma yurin met lula akmusrala lun “Israel lun God,” elos kasru in sang mongle in ngun nu sin kutu met. (Jon 10:16; Galetia 6:16; Zefenaia 3:9) Ke ma inge, oasr me lutlut yok su kut enenu in nunku. Oanu met sulkakin Togusrai, kut nu kemwa enenu in aksaokye me sang yok nu sesr kemwa in sang mongle paye nu sin kutu met.
24. Me lutlut fuka in Maika sapter 3 nu ke 5 purakak insiom?
24 Me lutlut saok fuka kom lotela in sapter 3 nu ke 5 lun kas palu lal Maika? Saap kutu nu ke me lutlut inge pa: (1) God el lungse met nu kemwa su kol ke met lal in orekmakin nununku sumwos. (2) Jeova el tia long pre lasr kut fwin pala in oru ma koluk ke lungse lasr. (3) Orekma in luti lasr ku in akpayeye mukena fwin God el akkeye kut ke inkanek lun ngun mutal lal. (4) In eis me insemwomwo lun God, kut enenu in fwasr in en Jeova. (5) Oanu met sulkakin Togusrai, kut enenu in aksaokye me sang yok nu sesr in wis mongle paye nu sin metu. Kutupa me lutlut saap purakak na paye insiom. Mea pa kut ku in lotela ke buk inge su akkalemye kas palu lun Baibel? Me lutlut toko fwa kasre kut in eis me lutlut mwo ke sapter safla luo lun kas palu lal Maika su me akkeye na paye ke lalalfongi.
Fuka Kom Topuk?
• Mea God el siyuk nu selos nu kemwa su kol met lal?
• Efu ku pre a ngun mutal arulanu yok sripe ke orekma in kulansap lasr nu sin Jeova?
• Fuka met nu kemwa elos ‘fwasr in en Jeova’?
[Picture on page 11]
Ya kom ku in aketeye me pupulyuk lal Maika ke pot in orek mongo?
[Pictures on page 14]
Oanu Maika, kut oru orekma lun forfor lasr ke pulaik