Oasr Fwinsrak Paye Lun Met Kulansap Lun Jeova
“A met lula sel Jekob fwa muta in maslon mutanfwal puspis oanu aunfong sin Jeova me . . . su tia tupan metu.”—MAIKA 5:7.
1. Fuka Israel in ngun sropon mongle in ngun?
JEOVA el sie Met Orala mwolanu lun af a aunfong. Sie ma losrongten in tupan metu ke aunfong ku af. Met palu Maika el simusla: “A met lula sel Jekob fwa muta inmaslon mutanfwal puspis oanu aunfong sin Jeova me, oanu af fwin maa, su tia tupan metu, ku sano nu sin met.” (Maika 5:7) Su “met lula sel Jekob” ke len inge”? Elos inge pa met Israel in ngun, ma lula sin “Israel lun God.” (Galetia 6:16) Nu sin “mutanfwal puspis” fwin fwalu, elos oanu “aunfong sin Jeova me” a “af fwin maa” su sang eou. Aok, met akmusrala Kristian nu kemwa su srakna moul fwin fwalu ke pal inge elos me insemwomwo su tuku sin God me nu sin met kulansap lal. Oanu met sulkakin Togusrai, elos inge orekmakinyuk sin Jeova in sang kas lun fwinsrak paye nu sin met.
2. Efu ku oasr fwinsrak paye lasr fwinne kut muta ke fwal koluk inge?
2 Tia me lut in etu la wangin fwinsrak paye lun fwal se inge. Munas lun akmwuk lun politic, moul fokfok, orekma silolel, ma upa ke mani, orekma lun terrorist, meun—ma inge nu kemwa kut etu la e sikyuk ke sie fwal su muta ye koko lal Setan su Devil. (1 Jon 5:19) Met puspis elos sangeng a alollo ke ma e sikyuk ke pal fwasru. Tusruktu, oanu met su alu nu sin Jeova, kut tia sangeng, meyen oasr fwinsrak paye lasr ke pal fwasru su arulanu ku. Sie kain in fwinsrak paye pa inge meyen el tuku ke Kas lun God. Kut lalalfongi Jeova a Kas lal meyen kutena ma el fwak pal nu kemwa el e fwa akpayeye.
3. (a) Efu ku Jeova el oru nununku lain Israel a Juda? (b) Efu ku kas lal Maika fwal nu ke len inge?
3 Kas palu lal Maika su etuku ke ngun lun God akkeye kut in fwafwasyesr in en Jeova a ma inge ase nu sesr lalalfongi ke fwinsrak paye. In century akalkosr B.C.E., ke pal se Maika el palye, met lun God su muta in mwoleaung lal elos kitakatelik nu ke mutanfwal luo—mutanfwal Israel a Juda—a elos kemwa pilesru mwoleaung lun God nu selos. Fwokin ma inge, moul fokfok, alu nu ke me srulela, a lungse yok ke ma lun fwalu. Ke ma inge, Jeova el sang kas in sensen a akkalemye nu selos la el e fwa oru nununku in lainelos. Paye, kas in sensen lun God akkalemyeyuk nu sin met nu kemwa in len lal Maika. Aok, luma a ma sikyuk ke len inge oanu sie ke ma sikyuk in len lal Maika paenang kas lal nu kemwa fwal pa ke len inge. Ma inge kut ku in akilen ke kut oru lutlut yok ke sapter itkosr lun buk lun Maika.
Mea Lutlut Futoto El Akkalemye
4. Maika sapter 1 nu ke 3 el aketeye ke me lutlut fuka?
4 Lela kut in liye ke lusen pal futoto koanon buk lun Maika. In sapter 1, Jeova el tukakunla orekma in lain lun Israel a Juda. Ke sripen orekma koluk lalos, Israel e fwa musalla a kai lain Juda fwa sun mutunoaoa lun Jerusalem. Sapter 2 el akkalemye la met kasrup a met ku nu kemwa elos akkeokye met munas elos su wangin kasru yuro. Aok, fwinne ou inge, oasr mwolela mutal su tuku sin God. Met lun God elos fwa esani nu sie ke inse siefwunnu. Sapter 3 el akkalemye kas lun Jeova lain met kol lun mutanfwalu a met palu koluk nu kemwa. Met kol elos oru nununku sesumwos, a met palu elos kaskas ma kikiap. Ye ma sikyuk inge nu kemwa, Maika el eis kasru sin ngun mutal in sulkakin nununku lun Jeova su apkurun in tuku.
5. Mea koanon Maika sapter 4 a 5?
5 Sapter 4 el palye la in len safla, mutanfwal nu kemwa elos fwa tuku nu ke eol fulat lun loom sin Jeova in eis lutlut sel. Meet liki ma inge sikyuk, Juda fwa ekla sruo in an Babulon, tusruktu, Jeova el e fwa molella. Sapter 5 el akkalemye la Messaia el e fwa isusla in an Betleem lun Juda. El e fwa kurunganang met lal oanu met seperd a el molelosla liki mutanfwal koluk puspis.
6, 7. Kain in me lutlut yok fuka akkalemyeyuk in sapter 6 a 7 lun kas palu lal Maika?
6 Maika sapter 6 el akkalemye kas in akukuin lun Jeova lain met lal oanu sie akukuin ke court. Mea el oru nu selos paenang elos lainul? Wangin. Ke ma paye, me siyuk lal nu selos arulanu sumwos. El lungse met nu kemwa su alu nu sel in orekmakin nununku sumwos, in lungse kulang, a in fwasr wi inse fwokpap yurol. Met Israel a Juda elos tia fwasr tokin ma inge, a elos lain God paenang elos fwa keok ke ma koluk lalos.
7 Ke sapter safla lun kas palu lal, Maika el tukakin orekma koluk lun met nu kemwa su moul in pal lal. Tusruktu, el tia supwar ku munasla, meyen el kaifweung in “sano” Jeova. (Maika 7:7) Buk inge aksafyeyukla ke kas in lalalfongi la Jeova el fwa akkalemye pakoten nu sin met lal. Me sramsram lun fwalu akkalemye la fwinsrak a lalalfongi lal inge akpayeyeuk. In yiu 537 B.C.E., ke pal se Jeova el aksafyela kai nu sin met kulansap lal, el pakomuta paenang el sifwil oakiyuki met lal nu fwin an selos sifwanu.
8. Fuka kom ku in aketeye ke inkanek futoto koanon buk lun Maika?
8 Sie me lutlut mwomwo na paye ma Jeova el akkalemye ke inkanek lal Maika! Buk inge su etuku ke ngun lun God el sang me srikasrak su oupanu kas in sensen lun God nu selos nu kemwa su fwakak mu elos kulansapul tusruktu tia oswela fwako mwo. El palye ke ma sikyuk puspis su ku in liyeyuk ke pal inge. A el sang kai mutal ke oiye su kut enenu in akkalemye ke lusen pal in ma upa tu kut in oru fwinsrak lasr in arulanu ku.
Leum Jeova Su Ku Liki Ku El Sramsram
9. Fwal nu ke Maika 1:2, mea Jeova el akola in oru?
9 Inge lela kut in tuni a lutlut ke buk lal Maika ke inkanek takla. In Maika 1:2, kut ku in rid: “Long, komwos mutanwafwalu, komwos nu kemwa; porongo, O fwalu a ma nu kemwa su on lu, a lela Leum Jeova in orek lo lain komwos, Jeova liki tempel mutal lal.” Kom fwin moul in len lal Maika, wangin alollo la kas inge el purakak nunuk lom. Paye, ma inge ku in oru kom in loang akmwoye meyen Jeova el sramsram liki tempel mutal lal a el sramsram tia nu sin met Israel a met Juda mukena, a el sramsram nu sin met nu kemwa iun mutanfwal nu kemwa. In len lal Maika, metu elos pilesru Leum Jeova Ku Liki Ku ke lusen pal loes. Tusruktu, ke lusen pal na futoto ma inge e fwa ekla. Jeova el sulela tari in aksumwosye ma inge.
10. Efu ku kas lun Maika 1:2 arulanu yok sripe nu sesr?
10 Ma inge sikyuk pa in len lasr. Fwakyuk 14:18-20 el akkalemye la Jeova el sulpa sramsram liki tempel mutal lal. Ke lusen pal futoto, oasr aksumwos su Jeova el akola in oru, a ma sakuruk puspis su e fwa sikyuk fwa sifwil mokle mutanfwal nu kemwa. Ke pal inge, “fain lun fwalu” su arulanu koluk e fwa sisila nu ke nien futfut wain lulap in mulat lun God, su ku in kol nu ke kunanela nu fon lun akmwuk lal Setan.
11. Mea kalmen kas lun Maika in Maika 1:3, 4?
11 Loang nu ke ma Jeova el akola in oru. Maika 1:3, 4 el fwak: “Tu, liye! el illa liki an sel, a fwa oatui, a longye yen fulat lun fwalu. A eol fwa kofelik yel, a infwalfwalu fwa mulpelik, oanu wax mutun e, oanu kof su okwokla yen oatu.” Ya Jeova el enenu in som liki an in muta lal in kosrao in longye eol puspis a yen tupasrpasr lun Fwal Mwolela? Mo. El tia enenu in oru ou inge. El enenu na in loang fwin fwalu a ma lungse lal fwa akpayeye. Sayen ma inge, tia fwalu na paye pa enenu in keok ke ma upa inge, a metu. Ke pal se Jeova el akpayeye ma lungse lal, fwokin ma inge pa ongoiye nu sin met seakos nu kemwa—oanu eol puspis su kofelik oanu wax a yen tupasrpasr nu kemwa fwa mulpelik ke sripen kusrusr se.
12, 13. Fwal nu ke 2 Piter 3:10-12, mea oru fwinsrak lasr in paye?
12 Saap kas palu lun Maika 1:3, 4 el akismakinye kom ke siepa kas palu lun God su sramsramkin ongoiye lulap fwin fwalu. Oanu ma oasr ke record lun 2 Piter 3:10, met sap Piter el simusla: “A len lun Jeova a tuku oanu met pusrapasr, in su kosrao a fwa wanginla wikin ngurngur lulap, a ma in kosrao a fwa kofelik ke fwol lulap, a fwalu a fwa fururyuk a ma su on lu.” Oanu kas palu lal Maika, kas lal Piter tia orekmakinyuk nu ke kosrao a fwalu nu paye. A ma inge el sramsram ke ongoiye lulap su e fwa tuku nu ke fwal koluk inge.
13 Fwinne oasr kain in ongoiye se inge su e fwa tuku, tusruktu met Kristian paye elos lalalfongi mwo ke pal fwasru, oanu ma Maika el oru in pal meeta. Ke inkanek fuka? Ke inkanek in akos lalos ke kutu fus toko su ku in konoiyukyuk ke leta lal Piter. Met sap se inge el fwak: “Yen met su fwa fwal nu sumwos in muta in moul mutal a sumwosmwos, in sano a tawi ke tuku lun len lun Jeova!” (2 Piter 3:11, 12) Fwinsrak lasr ke pal fwasru e fwa tuku na paye kut fwin akkapye sie kain in inse su akola in akos a kaifweung in srukye sie oiye mutal a moul su sesesla ke orekma lun God. Kut fwin lungse fwinsrak lasr in ku, kut enenu pa in esam pal nu kemwa la len lun Jeova e fwa tuku na paye.
14. Efu ku Israel a Juda elos fwal in eis kai?
14 Jeova el aketeye efu ku met lal in pal meeta enenu in eis kai. Maika 1:5 el fwak: “Ke ma koluk lal Jekob ma inge nu kemwa sikyuk, a ke ma sito lun loom sel Israel. Mea ma koluk lal Jekob? Ya tia Samaria? A mea an fulat lun Juda? Ya tia Jerusalem?” Met Israel a Juda elos moul ke sripen Jeova. Fwinne ou inge, elos oru ma koluk in lainul, a ma koluk lalos sikyuk ke capital siti lun Israel pangpang Samaria a capital siti lun Juda pangpang Jerusalem.
Orekma Koluk Arulanu Yok
15, 16. Met puspis su moul in len lal Maika oasr meta lalos ke kain in orekma koluk fuka?
15 Sie me srikasrak ke orekma koluk lun met nu kemwa in len lal Maika akkalemyeyuk in Maika 2:1, 2: “We nu selos su kineuk ma koluk a orek sito fwin me on kielos! Ke lenelik, elos orala, tu in ku lun paulos. A elos rapkue imae, a srukye; a loom, a esla, a elos akkemkatuye sie met ku a loom sel, aok sie met a me usru lal.”
16 Met rapku nu kemwa elos tia motul ke fong meyen elos kineuk fuka elos ku in eisla loom a imae lun met tulan lalos. Ke lututeng, elos silaklak in akpayeye ma koluk su elos keneuk. Elos tia oru ma koluk inge elos fwin esam mwoleaung lun Jeova. Ma Sap lal Moses akkalemye sie akmwuk in kurunganang met sikasrup. Ye Ma Sap lal Moses wangin kutena sou su ku in tula lukelos me usru lalos. Tusruktu, met rapku inge nu kemwa elos tia loang ka. Elos pilesru kas in Livitikus 19:18, su fwak: “A kom fwa lungsum met tulan lom oanu kom sifwanu.”
17. Mea ku in sikyuk fwin sie met su fwak mu el kulansap nu sin God tusruktu el suk meet ma lun fwalu ke moul lal?
17 Ma inge el akkalemye ma e fwa sikyuk nu sin sie met su fwakak mu el kulansap nu sin God tusruktu el pilesru nien sun lal ke ma lun ngun a suk meet ma lun fwalu. Poul el sang kas in sensen nu sin met Kristian in len lal: “A elos su lungse tu elos in kasrup, elos putatyung nu in me sruf a me kaisrip a lung in ikwe puspis su lalfon a me fosrnga, su akmwalomye met in kunausten a nien tula.” (1 Timote 6:9) Fwin met se el oru mani in yok emeet ke moul lal, el oanu alu nu sin god kikiap—Mammon, ku me kasrup. God kikiap inge tia ku in sang nu sel fwinsrak mwo ke pal fwasru.—Mattu 6:24, footnote.
18. Mea sikyuk nu sin met nu kemwa su lungse ma lun fwalu in len lal Maika?
18 Met puspis in len lal Maika elos lotela ke inkanek upa la lalalfongi ke ma lun fwalu el sie ma losrongten. Fwal nu ke Maika 2:4, Jeova el fwak: “In len sa elos fwa srukak sie kas in pupulyuk lain komwos, a eoksra ke sie eoksra upa. A fwak: Kut arulanu kunausyukla! El ekulla ip lun met srak. El wisla liki yu fuka! El kitelik imae lasr nu sin met tunyuna.’ ” Aok, met pusrapasr loom a imae inge nu kemwa, elos fwa tula lukelos me usru lun sou lalos. Elos fwa ekla met sruo in an saye, a ma lalos nu kemwa fwa ma lun “met tunyuna,” ku ma lun met pegan. Fwinsrak mwomwo nu kemwa ke pal fwasru fwa kunausyukla.
19, 20. Mea sikyuk nu sin met Ju nu kemwa su filiye lalalfongi lalos nu sin Jeova?
19 Tusruktu, fwinsrak mwomwo lun met nu kemwa su lalalfongi Jeova tia som nu ke wangin sripe. Jeova el oaru ke mwoleaung lal nu sel Ebream a Devid, a el pakomuta nu selos nu kemwa su, oanu Maika, su lungse God a arulanu asor ke orekma koluk lun met lal sifwanu. In akinsemwomwoye met sumwos, oasr sifwil akmwoye nu selos ke pal pakiyuki lun God.
20 Ma inge sikyuk in yiu 537 B.C.E., tokin ikori lun Babulon a met lula lun met Ju elos folokla nu ke an selos. Ke pal inge, kas lun Maika 2:12 el akpayeye ke pal se meet. Jeova el fwak: “Paye, Nga fwa eskomwoseni nu kemwa, O Jekob; paye Nga fwa esani met lula lun Israel. Nga fwa esaloseni nu sie oanu sip lun Bosra, oanu sie un kosro inmaslon imae lun me mongo nelos; elos fwa orek mwomwon lulap ke pusien metu.” Jeova el sie God lun lungse na paye! Tokin el sang kai nu sin met lal, el lela nu sin met lula selos in foloko a kulansap nu sel ke an su el sang nu sin papa matu tumalos.
Ma Oanu Sie Su Arulanu Sakuruk in Len Lasr
21. Fuka ma sikyuk puspis in len lasr ku in srikeye nu ke ma sikyuk in len lal Maika?
21 Ke kut lutlut tari ke sapter luo meet lun Maika, ya kom tia lut ke ma sikyuk in pal meeta su ku in liyeyuk pa in len lasr? Oanu ma sikyuk in len lal Maika, met puspis elos fwakak mu elos kulansap nu sin God. Tusruktu, oanu Juda a Israel, elos kitakatelik a meuni sie sin sie. Met kasrup puspis ke Kristendom ku alu nu kemwa su ekin Kristian elos akeokye met sikasrup. Met kol puspis lun alu elos insese ke orekma puspis su kunausla ma sap lun Baibel. Tia me lut Kristian kikip nu kemwa su pangpang Kristendom elos fwa sun safla lal wikin “Babulon Lulap,” ku alu kikiap nu kemwa! (Fwakyuk 18:1-5) Tusruktu, oanu ma sikyuk in len lal Maika, oasr met kulansap oaru lun Jeova su e fwa lula fwin fwalu.
22. Kain in u luo fuka elos filiye fwinsrak lalos nu ke Togusrai lun God?
22 In yiu 1919, met Kristian akmusrala oaru nu kemwa elos illa liki Kristendom a kaifweung in sulkakin peng mwo lun Togusrai in mutanfwal nu kemwa. (Mattu 24:14) Orekma se meet su elos oru pa, elos suk meet ma lula ke Israel in ngun. Na, elos esani “sip ngie, a u luo inge elos ekla “u siefwunnu, su oasr met sropu siefwunnu.” (Jon 10:16) Elos fwinne kulansap nu sin God in an 234 ke pal inge, tusruktu met inge nu kemwa su kulansap nu sin Jeova ke oaru elos muta ke “inse siefwunnu.” Ke pal inge, kalkal lun sip arulanu “mwowon ke pusien metu,” wekunang mutan a tulik srisrik. Fwinsrak lalos tia oakiyuki nu ke akmwuk koluk se inge, a ke Togusrai lun God, su ku in kol nu ke paredais fwin fwalu ke lusen pal na futoto.
23. Efu ku kom ku in lalalfongi la arulanu paye fwinsrak lom?
23 Nu sin met nu kemwa su alu nu sin Jeova ke oaru, fus safla lun Maika sapter 2 el fwak: “A togusra lalos alukela ye mutalos, a Jeova el muta ye mutalos in kololosla.” Ya kom ku in liye ke arurumu la kom wi ke fwasr in kutangla inge, oanu kom fwasr tokin Togusra lom, Jisus Kraist, a Jeova el muta in kol komwos? Fwin aok, kom ku in lalalfongi na paye ke kutangla a fwinsrak lom arulanu paye. Ma inge e fwa akkalemyeyuk ke kut akyokye lutlut lasr ke kas palu lal Maika.
Fuka Kom Topuk?
• Efu Jeova el oru nununku lal lain Juda a Israel in len lal Maika?
• Mea sikyuk fwin met nu kemwa su fwakak mu elos kulansap nu sin God elos suk meet ma lun fwalu ke moul lalos?
• Tokin kut sramsramkin Maika sapter 1 a 2, efu kom ku in lalalfongi la fwinsrak lom paye?
[Picture on page 5]
Kas palu lal Maika ku in akkeye kut in ngun
[Pictures on page 6]
Oanu met Ju lula in yiu 537 B.C.E., met Israel in ngun a met su welulos elos akkeye alu paye