Orekma in Solsol suc Oasr Fahko Wo Kac

Wik tolu meet liki toeni luhlahp ac muhtwacwacack, congregation uh ac sifwil pac oruh orekma in suli elos suc luhngse in lohng ke acn in forfor lalos in wi ke ma inge. Oasr ma yohk srihpac ke orekma in solsol se inge suc orek yac nuhkewa. Inkaiyen pacl uh, elos suc eis mwe solsol ac wi toeni, elos arlacna lut ac luhngse ma inge. Elos luhngse sramsram suc tuhkuh ke Bible, ac oakwucki wo luhn mwet orekma suc tiac eis molo, ac ohiyac wo ac inse sefanna suc ahkkahlwemyeyuck sin mwet nuhkewa. (Psalm 110:3; 133:1; Isaiah 65:13, 14) Ne ouinge, yac oasr fahko luhn orekma in solsol lasr, yohk na ke acn suc oasr mwet luhngse lohng suc enenuh in tuhkuh liki acn loes in wi toeni luhlahp inge?

Tokin toeni luhlahp luhn yac 2011, sie ohfuhs lasr eis lwacta se sin sie muhtwacn suc konacack mwe solsol se ke sruhnguhl lal ah. El kwacna wihklac ke pacl se Mwet Loh luhn Jeova som nuh yohrohl. El sihm fwahk: “Oasr lohm na wo se sik, oasr mokul wo se kiyuck, ac nga nuhnkuh muh oasr ma nuhkewa luhk ma ac oruh ngan engan. Mwe ahsor mweyen nga tiac engan, ac oacna in wacngihn kalmacn moul luhk. Pwacnacng nga otelah in kahsruhsr ke mael 200 ngan wi purokrwacm ke Sactte sac.” El luhngse na pwacye toeni sac pwacnacng el pang nuh yurin mokul se tuhmwacl ah ac fwahk nuh sel lah elac muhta pac sie fong ac wi pac alu ke Sacnri sac. El fwahk: “Nga lohng sramsram ah nohfohn, nga ohsun nuh sin mwet Loh luhn Jeova puhkantwen, ac nga sulaclah muh nga sruhnga tui liki ma inge.” Tokin el fohlohk nuh lohm sel ah, el muhtwacwacack lutlut ac tokin mahlwem ahkosr el oraclah sie mwet forfor suc soenna pacptais. Na el fwahk: “Nga engan na pwacye lah nga konacack mwe solsol sac ke sruhnguhl luhk ah, mweyen ingena nga puhla lah oasr na pwacye kalmacn moul luhk!”

Kuhtuh mwet suc eis mwe solsol fwah wi. Pwacnacng, moniyuck ke orekma yohk srihpac in solsol inge. Us ma luhlah ke mwe solsol ma oasr yurum nuhke acn in toeni, ac orekmakihn in fahkwack pweng wo yen ac pacl nuhkewa.

[Pohk ke sra 5]

Kuht ac Kihtaclah Fuhkah Mwe Solsol sac?

In ahksahfyelah acn in forfor lasr, enenuh in fototo sramsram lasr. Sahp, kuht kuh in fwahk ouinge: “Lwen wo. Kuht wi oruh orekma se fin facluh nohfohn in kihtaclah mwe solsol se inge. Pa inge ma nuhtum uh. Kom ac liye mwe ahkuhtweyac pucspucs ke mwe solsol se inge.” Ahkkahlwemye engan lom ke kom sramsram. Ke kuht wi orekma inge ke Sactte ac Sacnri, kuht enenuh in kihtaclah pac mackuhsin ke pacl ma fal.