Lohng ac Lotelah
1. Efuh kuht ac enenuh in sahp kacfweacng na pwacye in lohng ac lotelah ke pacl in toeni luhlahp?
1 Pacl apkuhran toeni luhlahp luhn yac 2013 ac muhtwacwacack. Orekma yohk orek in ahkolah purokrwacm suc fal nuhke enenuh luhn mwet nuhkewa fin facluh. Kom oraclah tari oakwuck lom in wi lwen tolu ah nohfohn ke toeni luhlahp inge? Oasr ma pucspucs ma ac kuh in ahkkolukye toeni luhlahp, pwacnacng kom ac enenuh in kacfweacng na pwacye in lohacng ahkwoyac nuhke purokrwacm sac. Ke srihpen ma inge ac loes liki na pacl in miting luhn congregation, kom ac enenuh in kacfweacng kom in lohng ke pacl loeloes. Weacng ma inge, kahsruhsr yen loeloes ac ma sahyac sahp kuh in oruh kom in ullac. Meac ac kahsre kuht in ngetnget, kuht in muh kuh in lohng ac lotelah ke toeni luhlahp?—Deuteronomy 31:12.
2. Kuht kuh in ahkolah fuhkah insiacsr nuhke purokrwacm luhn toeni luhlahp se inge?
2 Meet Liki Toeni Luhlahp Muhtwacwacack: Website lasr pa www.jw.org. Ma inge ahkkahlwemye purokrwacm luhn toeni luhlahp wekuhnacng sifen sramsram nuhkewa ac sie kuh luo fuhs ma yohk srihpac ke kais sie sramsram. Fwin oasr Internet lasr, in liye ma inge ac kahsre kuht in ahkolah insiacsr nuhke ma ac orek in lwen sac. (Ezra 7:10) Ke pacl in Tuhkweni Lutlut luhn Sucu ke ekuh, yac kowos kuh in oraclah pacl in ahkkweye nohfohn sucu in ngetlah nuhke purokrwacm se inge ac engankihn na pwacye?
3. Meac ac kahsre kuht in lohng ahkwoyac?
3 Ke Pacl in Purokrwacm sac: Fwin kuh, som orekmakihn lohm fahsr meet liki toeni ah muhtwacwacack. Konelah cell phone lom in tiac ahkkolukye kom ke mwet uh pahngon kom kuh sihm nuh sum kuh oruh kom in ke sihm pac nuh sin mwet sahyac ke pacl in purokrwacm. Fwin enenuh se kom in tiac konelah cell phone lom an, urokyac kuh oraclah in tiac ahkkolukye mwet sahyac ke pacl se mwet uh ac pahngon kom. Kom fwin orekmakihn electronic tablet ke pacl in purokrwacm, orekmakihn ke ohiyac se ma ac tiac ahkkolukye lohng luhn mwet sahyac. Nikmet mongo kuh nim ke pacl in purokrwacm. (Ecclesiastes 3:1) Liye na mwet suc oruh sramsram. Ke pacl se sie fuhs ac ritiyuck, wi riti ma inge ke Bible nuhtum. Suhmuhslah kuhtuh ma kom lohng.
4. Pahpah ac ninac kuh in kahsruh fuhkah tuhlihk nahtuhlos in lohng ac lotelah ma uh?
4 Kuht luhngse pac tuhlihk nahtuhsr in lohng ac lotelah pac ma uh. Soakas 29:15 ahkkahlwemye lah tuhlihk se, “fin filfilla elan oru lungse lal sifacna, ac fah mwe mwekin nu sin nina kial.” Pwacnacng ac wo fwin sucu se tuhkweni muhta mweyen pahpah ac ninac in kuh in liyacng wo tuhlihk nahtuhlos in lohacng ahkwoyac nuhke purokrwacm ac tiac sramsram, sihm ke cell phone kuh forfor. Tuhlihk uh fwinne srihk ac tiac kuh in kahlwem ke ma nuhkewa suc sruhmuhnyuck, elos kuh in eis mwe ahkpah in pahlah in ngetnget ac muhtana ac tiac sramsram.
5. Efuh kuh yohk srihpac in kalweni purokrwacm sac, ac kuht kuh in oruh fuhkah ma inge?
5 Pacl Purokrwacm Sahflah ke Kais Sie Lwen: Nikmet muhta kuh oruh ma uh pahtlac ke fongeni tari. Mutul sa kom in monglac fal. Sifwil kalweni ma kom lohng ac kahsre kom in esam ma kom lohng ke pacl loes. Pwacnacng ac wo in orekmakihn kihtin pacl ac sramsram ke purokrwacm oacna sie sucu ke kais sie ekuh. Kom fwin wi kawuck lom som nuhke acn in mongo, kom te us ma kom suhmuhslah ah ac ahkkahlwemye sie kuh luo ma kom luhngse ke purokrwacm ah? Ke pacl se kowos fohlohk nuh in lohm suwos, sahp kowos kuh in orekmakihn pacl in Lutlut luhn Sucu ke Bible in sramsram ac ahkkahlwemye lah sucu lowos kuh in orekmakihn fuhkah meac kowos lohng tari. Kowos kuh pac in oraclah pacl ke kais sie wik in kalweni kais kuhtuh ip ke mwe rit kuh kuhtwena ma sasuc suc ituckyuc nuh sesr ke toeni ah.
6. Yac fal in wi na toeni ah? Ahkuhtweyac.
6 Ac wacngihn srihpen kuhfa se fwin mwet uh tiac kang mongo ah. Kuht kuh pac in fwahk ouinge nuhke mwe lutlut pucspucs ma ac orek ke lwen in toeni luhlahp sac. Kuht ac eis mwe insewowo ke kuht wi ip nuhkewa ke toeni luhlahp uh, ac ke kuht lohng ahkwoyac mwe sramsram ah, ac ke kuht orekmakihn meac kuht lotelah.