Sie Mwe Solsol Yohk Srihpac
1. Ngac muhtwacwacack kihtakat luhn mwe solsol nuh ke toeni ke yac 2014?
1 Kom fwin ahko in oruh sie mongo nwacn kawuck kuh sucu lom, suc pacl ac mani yohk lom som nuh kac, kom ac arlacna engan in suhlwaclos. Ouinge, orekma yohk ituckyang in ahkolah mwe luti nuhkewa ma ac orek ke toeni luhlahp pucspucs lasr ke yac 2014. Wik tolu meet liki muhtwacwacack toeni lasr, ac oasr pacl wo nuh sesr in suli mwet sahyac nuh kac. Meac ac kahsre kuht in moniyuck ke kihtakat luhn mwe solsol inge?
2. Meac ac mokle kuht in sang kuhiyacsr nohfohn ke orekma in kihtakat sac?
2 Ac ahkkweye kuht in sang kuhiyacsr nohfohn ke orekma sac kuht fwin nuhnkuh yohk ke ma wo kuht ac eis ke kuhfa se Jeova el ahkoo nuh ke toeni luhlahp lasr uh. (Isaiah 65:13, 14) Kuht enenuh pac in esam lah oasr ma wo tuhkuh ke orekma in kihtakat lasr kais sie yac. Kuhtuh mwet ma kuht suli uh ac wi kuht ke toeni sac. Fwinne tiac mwet nuhkewa wi, orekma yohk lasr ke pacl in kihtakat sac ac sang kaksak nuh sin Jeova ac ahkkahlwemye kuhlwacng lal.—Psalm 145:3, 7; Fwackyuk 22:17.
3. Mwe solsol uh ac kihtakatlah fuhkah?
3 Un mwet elder enenuh in oakiyac lah fuhkah congregation uh kuh in kihtaclah mwe solsol nuh ke acn nuhkewa, ac lah elos ac fihliyac ke lohm ma wacngihn mwet kac kuh kihte ke acn in forfor ma oasr mwet pucspucs we. Ke Sactte ac Sacnri, mackuhsin uh enenuh in kihtakatlah wi mwe solsol ke pacl ma fal. Fwin orekma sac falyang nuh ke Sactte se meet ke mahlwem sac, ma yohk srihpac pa in kihtaclah mwe solsol liki na in muhtwacwacack lutlut Bible. Ke tari orekma sac, fuhkah luhpan engan lasr ke kuht etuh lah kuht sang kuhiyacsr nohfohn in suli mwet nuhkewa ma kuht kuh in suli nuh ke kuhfa se Jeova el ahkolah inge!