“Sie Ma Lo Nu Sin Mutanfwal Nukemwa”
“Komwos fwa met orek lo keik . . . nu ke yen loesilanu fwalu.”—OREKMA 1:8.
1. Nge a piye an se met tuma lutlut lun Jisus elos long ke pal se meet kas palu su oasr in Mattu 24:14?
KAS lun Jisus su simusyukla in Mattu 24:14 arulanu eteyuk paenang pus inmasrlosr esam fus inge. A sie kas palu mwomwo pa inge! Nunku ke ma met tuma lutlut elos nunku ke elos long kas palu inge ke pal se meet. Pal se inge oasr in yea 33 C.E. Met tuma lutlut elos welul Jisus ke lusen yea tolu, a inge elos welul tuku nu Jerusalem. Elos liye tari mwenmwen puspus lal a elos long tari me luti puspus lal. Fwinne elos engankin ma paye su arulanu saok ke me luti lal Jisus nu selos, elos arulanu etu la tia met nukemwa insemwomwo ka. Oasr met lokwalok puspus lun Jisus su ku a yok mwal lalos.
2. Me sensen a ma upa puspus fuka met tuma lutlut elos fwa sun?
2 Fwin Eol Olive, met tuma lutlut akosr elos muta welul Jisus, elos loang mwo ke el sramsramkin me sensen puspus su fwa tuku a ke ma upa puspus su elos fwa sun. Meet liki pal se inge, Jisus el fwak nu selos la el fwa anwuki. (Mattu 16:21) Inge el akkalemye la elos fwa sun pa me lain ku me kalyai upa. El fwak: “Na elos fwa eskomwosyung in akkeokye komwos, a fwa unikomwosi, a mutanfwal nukemwa fwa srungekomwos ke ek.” Tia pa inge nukemwa. Oayepa, met palu kikiap puspus fwa aktafongyela met puspus. A kutu met elos fwa tukulkul, a sie fwa tukakunak sie, a sie fwa srunga sie. Ke ma paye, srakna oasr “met puspus,” fwa lela lungse lalos nu sin God a nu ke Kas lal in eoula.—Mattu 24:9-12.
3. Efu ku kas lun Jisus su simusyukla in Mattu 24:14 el sie me lut yok?
3 Tokin Jisus el palye tari ma upa puspus inge el akkalemye sie kas mwomwo su oru met tuma lutlut puspus in arulanu lut. El fwak: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa; a na safla a fwa tuku.” (Mattu 24:14) Aok, orekma su Jisus el mutamwauk in oru in an Israel—orekma “in sang ma lo nu ke ma paye”—e fwa tafweyukla a fwa orek fwin fwalu nu fon. (Jon 18:37) Sie kas palu sakuruk a mwolana pa inge! In oru orekma inge nu sin “mutanfwal nukemwa” tia ma fusrasr se; a in oru orekma inge kut a sun ku pulakin “srunga lun mutanfwal nukemwa” el oana sie orekma su oasr mwenmwen ka. Akpayeyen orekma inge fwa tia akmutalyeyuk mukena sumwos lun Jeova in kol a ku lal, a orekma inge fwa akmutalye pa lungse, pakoten, a mongfusesr lal. Sayen ma inge, orekma inge fwa sang pal mwomwo nu sin met kulansap nukemwa lal in akkalemye lulalfongi a lungse paye lalos nu sin God.
4. Su sapkinyuk in orek orekma in sang ma lo, a me akkeye fuka Jisus el sang?
4 Jisus el akkalemye nu sin met tuma lutlut puspus la oasr sie orekma yok sripe su elos enenu in oru. Meet liki el somwak nu in kosrao, Jisus el sikme nu selos a fwak: “A komwos fwa eis ku, ke ngun mutal el tuku nu fwomwos, a komwos fwa met orek lo keik in Jerusalem, a in fwal Judia na fon, a in Samaria, a nu ke yen loesilanu fwalu.” (Orekma 1:8) Fwinne pisen met tuma lutlut elos supus, tusruktu tia pat met puspus fwa welulos. Sie me akkeye in etu la ngun mutal kulanu lun God fwa akkeyelos in akpayeye orekma inge su God el sang nu selos.
5. Mea met tuma lutlut puspus elos tia etu ke orekma in sang ma lo?
5 Met tuma lutlut puspus elos etu la sapkinyuk nu selos in sulkakin peng mwo a “oru met in mutanfwal nu kemwa tu elos in met tumal lutlut.” (Mattu 28:19, 20) Tusruktu elos tia etu lupan ma lo su fwa orek, a elos nukin nge safla fwa tuku. Kut tia pa etu. Ma lun Jeova mukena in etu ma puspus inge. (Mattu 24:36) Ke pal se Jeova el insemwomwokin lupan orekma in sang ma lo su orekla inge, el fwa kunausla akwuk koluk inge. Ke pal inge met Kristian elos ku in liye la orekma in luti peng mwo orekla ke lupa fwal nu ke ma Jeova el oakiya. Upa nu sin met tuma lutlut puspus in pal meeta in liye lupan ma lo su fwa orek ke pal safla inge.
Orekma Lo in Century Se Meet
6. Mea sikyak in len in Pentecost 33 C.E. a tia pat toko mea sikyuk?
6 In century se meet, orekma in luti peng mwo lun Togusrai a orekma in oru met tuma lutlut orala fwako mwomwo puspus. In len in Pentecost 33 C.E., met tuma lutlut 120 elos muta ke sie infwokil lung in an Jerusalem. Ngun mutal lun God tuku nu fwelos, a met sap Piter el orala sie me sramsram mwomwo su aketeye kalmeyen mwenwmen se inge, a met 3,000 elos ekla met lulalfongi a baptaisla. Pa inge pal se orekma lalos in luti peng mwo mutamwauk in oasr fwako ka. Fwinne oasr kaifweang yok lun met kol puspus lun alu in tulokinye orekma in luti peng mwo, “Jeova el esani nu selos su fwa moul pinganu len.” Tia pat, “pisen metu akurun limekosr tausen.” Tokin ma inge, “kutu pa met lalalfongi oeung nu sin Leum, met mokul a mutan puspus.”—Orekma 2:1-4, 8, 14, 41, 47; 4:4; 5:14.
7. Efu ku ke pal se Cornelius el ekla met Kristian el sie ma yok sripe?
7 In yea 36 C.E. oasr sie pa ma mwomwo sikyak—Cornelius sie met pegan, el ekla met Kristian a eis baptais. Ke el sapkin met sap Piter in tuku nu yurin mokul se inge su sangeng sin God, Jeova el akkalemye la masap lun Jisus in “oru met in mutanfwal nu kemwa tu elos in met tumal lutlut” tia nu sin met Ju mukena su muta in an puspus. (Orekma 10:44, 45) Oiya fuka akkalemyeyuk sin met tuma lutlut inge su kol orekma inge? Ke pal se met sap puspus a met matou in an Judia elos akilen la peng mwo enenu in akkalemyeyuk pa nu sin met pegan puspus—ku met puspus su tia met Ju—elos sang kaksak nu sin God. (Orekma 11:1, 18) Ke pal sapana, orekma in luti peng mwo tafweyukla a oasr fwako ka sikyuk inmasrlon met Ju. Tokin kutu yea, oasr ke yea 58 C.E., oasr met pegan puspus ekla met lulalfongi a wekunang nu ke ma inge oasr pa “tausen puspus sin met Ju elos lulalfongi.”—Orekma 21:20.
8. Peng mwo el sang kasru fuka nu sin met se met se?
8 Fwinne oasr pisen met puspus weang u lun met Kristian in century se meet, lela kut in tia mulkunla la pise puspus inge ma tuku ke met se met se. Peng mwo su tuku ke Baibel su elos long tari ka arulanu ku. (Hibru 4:12) El sang kasru yok in ekulla moul lun met puspus su sruokye ma inge. Met puspus elos mutamwauk in moulkin moul nasnas, elos nukomalosyang ke oiyen met sasu, a elos ekla futoto nu sin God. (Efesus 4:22, 23) Oiya inge akpayeyuk pa ke pal lasr inge. A elos nukemwa su eis peng mwo oasr fwinsrak mwolana lalos nu ke moul ma patpat.—Jon 3:16.
Met Orekma Yurin God
9. Met Kristian in pal meeta elos akilen la oasr yurolos kain in kunokon a orekma fuka?
9 Met Kristian in century se meet elos tia fwak mu kapkapek inge sikyak ke ku lalos sifwana. Elos akilen la oasr kasru ke “ku lun ngun mutal” ke orekma in luti lalos. (Rom 15:13, 19) Jeova el oru kapkapek inge in sikyak. Ke pal sepana, met Kristian puspus inge elos etu la oasr insemwomwo a orekma lalos oana “met orekma yurin God.” (1 Korint 3:6-9) Ke sripe inge, in fwal nu ke kas in akkeye lal Jisus, elos kaifweang na paye tu elos in ku ke inkanek nukemwa in oru orekma su sapkinyuk nu selos in oru.—Luk 13:24.
10. Orekma in kaifweang fuka met Kristian in pal meeta elos oru in sang ma lo nu sin mutanfwal nukemwa?
10 In oana “met sap nu sin met pegan,” Poul el oru fwufwasryesr lal ke lusen tausen puspus mail nu ke mwea a nu ke an u, a oakiye congregation puspus in an Asia, a in an Greece su oasr ye koko lun an Rom. (Rom 11:13) El oru pa fwufwasryesr lal nu Rom a saap el som pa nu an Spain. Ke pal sepana, met sap Piter, su oasr kunokon in fwakak “mwosasu . . . nu selos su kosroila,” el som nu in an Babulon, sie an su oasr met Ju puspus we in pal sa. (Galetia 2:7-9; 1 Piter 5:13) Kutu sin met puspus su orekma nu sin Leum pa mutan luo inge su pangpang Traifina a Traifosa. Siepa mutan, inel pa Persis, el “orekma yok in Leum.”—Rom 16:12.
11. Jeova el akinsemwomwoye fuka kaifweang lun met tuma lutlut puspus?
11 Jeova el akinsemwomwoye kaifweang lun met Kristian in pal ingo a lun kutupa met orekma moniyuk. Srik liki yea 30 tokin Jisus el palye la e fwa oasr ma lo su fwa orek nu sin mutanfwal nukemwa, Poul el simusla la “peng mwo” a fwa “lutiyuk nu sin met e nukemwa ye kosrao.” (Kolosse 1:23) Ya safla tuku in pal se ingo? Aok, in oana ke sie oiyen safla lun akwuk. Safla lun akwuk nu ke ma puspus lun met Ju sikyuk in yea 70 C.E. ke pal se met meun lun an Rom elos kunausla an Jerusalem wekunang temple we. Tusruktu, Jeova el lungse sie akwuk nu ke ma lo su yok liki ma orek tari in century se meet fwa orek meet liki el fwa kunausla akwuk koluk nukemwa lal Setan fwin fwalu nu fon.
Orekma Nu Ke Ma Lo Sulkakinyuk ke Pal Inge
12. Fuka Met Lutlut Baibel in pal meeta elos kalem ke masap in luti peng mwo?
12 Ke saflaiyen century ak 19, tokin sie pal loes su ke pal se inge me luti lun alu kikiap oasr tari yen nukemwa, ke pal san alu paye el sifwilpa oakiyuki. Bible Students, pa inge e se su Met Lo lun Jeova elos eteyuk ka in pal se inge, elos arulanu kalem ke masap su sapkinyuk in oru met tuma lutlut fwin fwalu nu fon. (Mattu 28:19, 20) In yea 1914, oasr met 5,100 su moniyuk ke orekma in luti peng mwo, a peng mwo el sun an 68 kutu. Tusruktu, Met Lutlut Baibel in pal se inge elos tia sruokye ku etu na paye kalmeyen Mattu 24:14. Ke saflaiyen century ak 19, Baibel su oasr peng mwo, ku gospel su oasr ka, el lungasyukla a orekla sin Bible societies nu ke kas puspus a kitakatla fwin fwalu nufon. Paenang, ke lusen yea puspus nu ke yea 1,920, Met Lutlut Baibel puspus inge elos lulalfongi mu oasr sie ma lo nu sin mutanfwal nukemwa orekla tari.
13, 14. Etauk ku kalem mwomwo fuka ke ma lungse lun God a akwuk lal akkalemyeyuk ke sie issue lun The Watch Tower in yea 1928?
13 Kais kutusrisrik, Jeova el sang nu sin met kulansap nukemwa lal kalem mwomwo ke ma lungse lal a akwuk lal. (Soakas 4:18) Me rid inge The Watch Tower ke December 1, 1928, el akkalemye: “Ya kut ku in fwak mu orekma inge in kitakat Baibel el akpayeyeyuk tari ke ma palyeyuk ke orekma in luti peng mwo lun togusrai? Arulanu kalem la tia, soenna! Fwinne oasr orekma in kitalik Baibel srakna eneneyuk nu sin u srisrik lun Met Lo lun Jeova in orala me rid su tuku ke Baibel in aketeye [akwuk] lun God a in som sramsram nu in loom sin met puspus su eis tari Baibel natulos. Fwin tia oinge metu fwa tia eis etauk ke Togusrai lun Messaia ke len lasr.”
14 Issue ke The Watch Tower inge el akkalemye pa: “In yea 1920, . . . Met Lutlut Baibel inge elos eis etauk sumwos ke kas palu lun Leum su oasr in Mattu 24:14. Elos akilen la ‘mwosasu inge’ su fwa sulkakinyukelik fwin fwalu nu fon in sang ma lo nu sin met Pegan ku nu sin mutanfwal nukemwa, el tia sie peng mwo ke sie togusrai su fwa tuku a sie peng mwo su akkalemye la Togusrai lun Messaia el mutamwauk tari ke kolyuk lal nu fwin fwalu.”
15. Fuka orekma in sang ma lo yokelik mutamwauk in yea 1920?
15 “U srisrik lun met lo” inge in yea 1920 elos puseni. Ke yea puspus tokin yea inge, “sie u lulap” lun “sip ngie” akilenyuk a mutamwauk in orekani. (Fwakyuk 7:9, 10; Jon 10:16, 17) Misenge, pisen met su oru orekma in luti peng mwo oasr ke 6,613,950 kutu in an 235. Sie me akpayeye mwolana ke kas palu! Wangin kutena pal in pal somla “peng mwo lun togusrai” el sulkakinyukelik ke inkanek yok oinge. Wangin kutena pal ke pal somla oasr met kulansap lun Jeova su arulanu pukanten oana ke pal inge fwin fwalu.
16. Mea akpayeyuk ke orekma in kulansap ke yea taria? (Liye chart in sra 13-16.)
16 U lulap inge lun Met Lo elos tukeni kafofo in oru orekma in luti peng mwo ke lusen orekma in kulansap ke yea 2005. Pus liki sie billion ao orekmakinyuk in sulkakin peng mwo in an 235. Million puspus ke return visit orekla, a tausen puspus ke lutlut Baibel orek. Orekma inge akpayeyuk sin Met Lo lun Jeova, su oasr inse mulala lalos in sang pal a ma saok lalos in fwakak kas lun God nu sin met puspus. (Mattu 10:8) Ke inkanek lun ngun mutal kulanu lal, Jeova el tafwela in akkeye met kulansap nukemwa lal in akpayeye ma lungse lal.—Zekaraia 4:6.
Moniyuk in Sang Sie Ma Lo
17. Oiya fuka met kulansap nukemwa lun Jeova akkalemye nu ke kas lun Jisus ke orekma in luti peng mwo?
17 Fwinne apkurun nu ke yea 2,000 somla su mutamwauk ke pal se Jisus el fwak la peng mwo fwa sulkakinyuk, oiyen moniyuk lun met kulansap puspus lun God tia na munasla. Kut etu la ke mongfusesr lasr in oru ma mwo, kut etawi oiya mwomwo lun Jeova ke lungse, pakoten, a mongfusesr. Oana el, kut tia lungse kutena met in tula a kut lungse metu in auliyuk a in akfutotoyelos sifwana nu sin Jeova. (2 Piter 3:9) Sesesla na ke ngun mutal lun God, Met Lo lun Jeova elos moniyuk in tafwela in sulkakin peng mwo nu in an loeslanu fwalu. (Rom 12:11) In oana fwako lun orekma inge, met puspus yen nukemwa elos eis ma paye a akfwalye moul lalos nu ke kolyuk mwolana lun Jeova. Nunku ke kutu me pupulyuk toku.
18, 19. Experience puspus fuka kom ku in srumon ke kutu met su long ke peng mwo?
18 In an Kenya oasr sie met imae su pangpang Charles. In yea 1998 el kukakunla tobacco su oasr ke paun 18,000 kutu a oasr sie certificate su itukyang nu sel akkalemye mu el pa Met Imae Mwo Se Emeet ke Tobacco. In pal sa, el mutamwauk in lutlut Baibel. Tia pat el lotela la sie met su wi orekma in eokiya a kukakin tobacco el kunausla masap lun Jisus in lungse sie sin sie. (Mattu 22:39) Ke pal se el lotela a insese ka la ‘met imae mwo se emeet ke tobacco’ el oana ‘sie met akmas emeet,’ Charles el kunausla tobacco nukemwa sunal. Tokin ma inge el kapkapek nu ke el mwolela moul lal a eis baptais a ingena el oru orekma lun regular pioneer a el kulansap pa oana sie ministerial sevant.
19 Wangin alolo ka la Jeova el mokle mutanfwal nukemwa ke inkanek in orekma in sang ma lo, paenang oasr ma saok puspus—kalme pa oasr met puspus—elos wi u lun Jeova. (Haggeai 2:7) Pedro, su muta in an Portugal, el sroang nu ke seminary ku loom lutlut su sang akpa nu sin mokul puspus in ekla met kol lun alu ke el yea 13 matu. Nien sun lal pa in ekla sie missionary a in luti met puspus ke Baibel. Tusruktu, tokin kutu pal, el som liki loom lutlut inge meyen Baibel el tia lutiyuk yok in class lal. Tokin yea onkosr el sroang nu ke sie university in an Lisbon in lutlut ke psychology. Ke pal sa, el muta yurin auntie se lal, su sie sin Met Lo lun Jeova, su akkeyel in lutlut ke Baibel. In pal sa, oasr nunak luo lal Pedro fwin oasr God ku wangin, a el kofla oru sulela lal fwin el oru lutlut Baibel ku tia. El srike in sramsram nu sin met luti lal ke psychology ke oiya inge su upa nu sel in oru sulela ka. Met luti lal el fwak mu psychology el luti mu met su tia ku in oru sulela arulanu sensen nu sel sifwana. Ma inge kasrel, paenang el oru sulela in oasr sie lutlut Baibel orek nu sel. El eis baptais tari a ke pal inge el luti pa kutu met ke Baibel.
20. Ke sripen orekma lo orek nu sin mutanfwal nukemwa fwin fwalu efu kut ku in engan ka?
20 Kut fwinne tia etu la lusaka pal lula nu ke orekma lo su fwa orek nu sin mutanfwal nukemwa, a kut nukin pa len a ao ke len safla fwa tuku. Ma sefwanna kut etu pa tia pat safla e fwa tuku. Kut etu la oasr akul puspus ke kas palu la apkurun me Togusrai lun God in aolla guferment nukemwa lun metu a kut engan ka la orekma in luti ke peng mwo su orek nu sin mutanfwal nukemwa el sie sin me akul puspus inge. (Daniel 2:44) Ke kais sie yea somla, oasr pal mwomwo nu sin million puspus sin met elos in long ke peng mwo, a ma inge ku in sang mwolana nu sin God lasr, Jeova. Lela kom in oru sulela lom sifwana in sruokye oaru lom pal nukemwa a wi met lili nukemwa wiyom fwin fwalu nufon ke orekma in sang ma lo nu sin mutanfwal nukemwa ke pal nukemwa. In oru ma inge, kut fwa sifwana molikutla a elos su long kut.—1 Timote 4:16.
Ya Kom Esam?
• Efu ku Mattu 24:14 el sie kas palu usrnguk a mwolana?
• Kain in kaifweang fuka met Kristian nukemwa in pal meeta elos oru ke orekma in luti peng mwo, a mea fwako mwo lun kaifweang lalos?
• Ke inkanek fuka Met Lutlut Baibel elos etu la oasr ma enenu in sang ma lo nu sin mutanfwal nukemwa?
• In nunku ke orekma lun met kulansap lun Jeova ke yea taria, mea akkeye kom?
[Chart on page 13-16]
REPORT KE OKEMA IN KULANSAP KE YEA 2005 LUN MET LO LUN JEOVA
(See bound volume)
[Petsa ke sra 11]
Poul el oru fwufwasryesr ke lusen tausen puspus mail fwin an puspus a in mwea in sulkakin peng mwo
[Petsa ke sra 10]
Jeova el sapkin Piter el an sang ma lo nu sel Cornelius a nu sin sou lal?