Mwet Fuhsr Kom ac Ahkolah Fuhkah nuh ke Bacptais?

1, 2. (a) Ahkuhtweyac lah efuh bacptais uh sie sulaclah na yohk. (b) Meac sie mwet el enenuh in etuh na pwacye meet liki el eis bacptais, ac efuh?

YAC kom sie mwet fuhsr suc nuhnkuh in eis bacptais? Fin ohingacn, sie kunohkohn na sacohk pa inge ma kom kuh in oruh. Tuhsruhktuh, in oacna ke mwe lutlut se tari ac ahkuhtweyac, bacptais uh sie sulaclah na yohk. Ma inge ahkkahlwemye wuhlelah lom nuh sin Jeova in kuhlwacnsuhpwacl ma pahtpaht ac orekma se inge pa ma se ma yohk srihpac emeet ke moul lom an. Ke srihpen wuhlelah se lom nuh sin God inge arlacna yohk srihpac, pwacnacng wo kom in bacptais kom fin mahtuh tari ke nuhnak. Ac kom sifacna luhngse in oruh ma inge ac kom kahlwem kac lah meac kalmac in wuhlelah moul lom nuh sin God.

² Tuhsruhktuh sahp, kom puhla muh kom soenna ahkolah in eis bacptais. Kuh sahp kom puhla muh kom ahkolah tuhsruhktuh, pahpah ac ninac kiyom an eltahl nuhnkuh muh wo kom in sano nwe ke kom mahtuhlah kuhtuh ac etuh na pwacye ke ohiyen moul uh. Meac kom enenuh in oruh? Nik kom fuhleack. A orekmakihn pacl se inge in kapkapack tuh kom in kuh in eis bacptais. Ke kom nuhnkuh ma inge, oakiyac finsrak lom ke inkacnek tolu inge: (1)luhlahlfongi lom, (2)orekma lom, ac (3)srui lom.

LUHLAHLFONGI LOM

3, 4. Mwe lutlut fuhkah mwet fuhsr uh kuh in lotwelah ke mwe srihkasrak lal Timothy?

³ Srihke nuhnkuh lah kom ac topuk fuhkah kihsen siyuck inge nuhkewa: Efuh kuh nga luhlahlfongi lah oasr God? Nga etuh fuhkah lah Bible uh ma tuhkuh sin God me? Efuh kuh nga ahkos masap luhn God uh liki na in etahi oakwuck kuh ohiyen moul luhn facluh? Kihsen siyuck inge ac kuh in kahsre kom in ukwe kahs in kahsruh lal mwet sap Paul inge: “Na kowos fah kuh in etuh ma luhngse luhn God, ma suc wo, ac mwe ahkinsewowoyacl, ac suwohswohslacna.” (Rome 12:2) Efuh kuh kom enenuh in oruh ma inge?

⁴ Mwe srihkasrak lal Timothy uh ac kuh in kahsre kom. El etuh na pwacye koanon ma suhmuhslah uh ke srihpen ninac ac ninac mahtuh kiyacl uh lotwel ke ma suhmuhslah uh. Oacyacpac, Paul el fahk nuh sel Timothy: “Muhtana in ma pwacye suc lutiyuck kom kac ac kom arulacna luhlahlfongi kuh kac.” (Luo Timothy 3:14, 15) Pwacnacng, enenuh in ahkpwacyeyuck nuh sel Timothy lah ma pwacye uh ac kuh in konweyuckyak ke ma suhmuhslah uh. El sruokyac ma inge, tiac ke srihpen ninac ac ninac mahtuh kiyacl uh fahk elan oruh, tuhsruhktuh el nuhnkuh yohk ke ma el lotwelah inge ac ma inge oruh elan luhlahlfongi.​—Read Hebrew 5:14.

5, 6. Efuh kuh yohk srihpac kom in etwaclah in orekmakihn “kuh lom in nuhnkaclah ahkwoyac” ke pacl se kom srackna fuhsr?

⁵ Fuhkah nuh sum? Sahp, kom etuh ma pwacye uh ke lusen pacl na loeloes. Fin ohinge, oraclah sie finsrak ah lom in nuhnkuh ke srihpen luhlahlfongi lom uh. Ma inge ac fah kahsre kom in ahkkweye luhlahlfongi lom an. Ac fah oacyacpac kahsre kom in tiac tahfonglac ke kuhtwena sulaclah ma kom ac fah oruh, ke srihpen mwet ke matwom eltahl srihfe kom, nuhnak luhn facluh kuh sahp puhlakihn lom sifacna.

⁶ Kom fin etwaclah in orekmakihn “kuh lom in nuhnkaclah ahkwoyac” ke pacl se kom srackna fuhsr, kom ac kuh in topuk kuhtwena kihsen siyuck luhn mwet ke matwom, oacna: ‘Kom etuh fuhkah lah oasr na pwacye God? God el fin luhngse kuht, efuh kuh el lwelah ma kuluk in sikyak? Efuh kuht kuh in luhlahlfongi lah God el nuh oasr na emeet me?’ Kom fin ahkolah, kihsen siyuck inge ac tiac oruh kom in ahlohloh, a ac fah mokle kom in ahkyohkye lutlut lom ke Bible uh.

7-9. Ahkuhtweyac lah fuhkah mwe kahsruh ke mwe lutlut pucspucs ke “Mea Baibel el Luti Na Pwacye?” ke online ac fah kahsre kom in ahkkweye luhlahlfongi lom an.

⁷ Ke kom sifacna oruh lutlut lom ahkwoyac, ma inge ac kuh in kahsre kom in topuk kihsen siyuck pucspucs, in eislah kuhtwena nuhnak in ahlohloh lom ac in ahkkweye luhlahlfongi lom an. (Orekma 17:11) Oasr mwe rit ma ac kuh in kahsre kom in oruh ma inge. Puhs mwet ma konwacack mwe kahsruh ke eltahl lutlutkihn mwe rit nahtuhsr ma ahkutweyac ke God lasr ac ke ma nuhkewa el oraclah uh. Oacyacpac, mwet fuhsr pucspucs eltahl engankihn ma wo ke mwe lutlut nuhkewa ke “Mea Baibel el Luti Na Paye?” ma oasr ke jw.org. Kom kuh in konwacack ye sifac se inge BIBLE TEACHINGS. Kais sie mwe kahsruh nuh ke mwe lutlut inge oreklac in kahsre kom ac in ahkkweye luhlahlfongi lom ke sie sifac in Bible uh.

⁸ Kom sie mwet lutlut ke Bible pwacnacng sahp, kom etuh tari top nuh ke kuhtuh kihsen siyuck ma oasr ke mwe kahsruh nuh ke mwe lutlut inge. Tuhsruhktuh, yac kom etuh na pwacye fin pa ingacn top nuh kac uh? Mwe kahsruh nuh ke mwe lutlut inge ac fah kahsre kom in nuhnkaclah ahkwoyac ke kain in fuhs pucspucs, ac ma inge ac ahkkweye kom pac in suhmuhslah srihpen luhlahlfongi lom ke ma inge. Ma inge ac fah kahsre kom in etuh lah kom ac ahkuhtweyac fuhkah luhlahlfongi lom uh nuh sin mwet sahyac. Kom fin kuh in som nuh ke mwe lutlut pucspucs ke “Mea Baibel el Luti Na Pwacye?” ke online, na kom ac kuh in orekmakihn pac ke lutlut lom sifacna in ahkkweye luhlahlfongi lom an.

⁹ Kom enenuh in ahkpwacyeye nuh sum sifacna lah pa inge ma pwacye uh. Pa inge ma ac ahkoekomlac in eis bacptais. Sie muhtwacn lili fuhsr el fahk: “Meet liki nga sulaclah in eis bacptais, nga lutlut Bible ac lotwelah lah pa inge alu pwacye uh. Ac ke kais sie lwen ke moul luhk, luhlahlfongi se inge yohkyohkwelihk.”

OREKMA LOM

10. Efuh kuh fal in motkoeyuck muh sie mwet Christian suc bacptaislac tari el enenuh in moul fal nuh ke luhlahlfongi lal uh?

¹⁰ Bible uh fahk: “Luhlahlfongi uh el fin muhkwena ac wacngihn orekma wi, na luhlahlfongi sac misac.” (James 2:17) Luhlahlfongi lom an fin kuh, ma inge ac kahlwem ke orekma lom an. Kom ac fah oacna ma Bible uh fahk inge, “moul lowos enenuh in muhtahl ac kihsackihnyuckyang nuh sin God.”​—Riti Luo Peter 3:11.

11. Ahkuhtweyac kalmen kahs inge “moul lowos enenuh in muhtahl.”

¹¹ Meac kalmen, “moul lowos enenuh in muhtahl”? Orekma lom uh fin muhtahl, kalmac pa kom nwacsnwacs. Ke sie mwe puhpuhlyuck, nuhnkuh ke mahlwem ohnkohsr somlah ah. Ke pacl se srihfeyuck kom in oruh sie ma kuluk, yac kom nuhnkaclah ahkwoyac ke ma wo ac ma kuluk kac uh? (Hebrew 5:14) Yac kom esam kais kuhtuh pacl ma kom tiac fuhleack nuh ke mwe srihfe kuh ma mwet ke matwom pahtok kom in oruh? Ke lohm lutlut ac, yac kom sie mwe srihkasrak wo nuh sin mwet sahyac? Yac kom sruokyacna oaru lom nuh sin Jeova, kuh kom srihke in oacna tuhlihk lutlut wiyom an tuh eltahl in tiac isrucn kom? (Sie Peter 4:3, 4) Pwacye lah wacngihn mwet suwohswohs. Oasr pacl ma finne mwet suc kuhlwacnsuhpuh Jeova ke lusen yac pucspucs eltahl mwekihn ac puhla muh upac nuh seltahl in luti nuh sin mwet sahyac. Tuhsruhktuh, sie mwet suc wuhlelah moul lal nuh sin God el ac fah engan in oacna sie sin Mwet Loh luhn Jeova ac el ac fah ahkkahlwemye ma inge ke orekma ac ohiyac nwacsnwacs lal.

12. Meac kuhtuh sin orekma ma “kihsackihnyuckyang nuh sin God” inge, ac meac kom enenuh in nuhnkuh kac?

¹² Meac kuhtuh sin orekma ma “kihsackihnyuckyang nuh sin God” inge? Ma inge wekuhnacng orekma lom ke congregation uh, oacna in wi miting ac orekma in luti uh. Sahyen ma inge, oasr pac kuhtuh orekma ma mwet sahyac uh tiac liye, oacna puhruhe lom sifacna nuh sin Jeova ac lutlut lom sifacna uh. Sie mwet suc wuhlelah tari moul lal nuh sin Jeova el ac tiac nuhnkuh muh orekma inge nuhkewa mwe ahktoasr. El ac puhla oacna ma Tohkohsrah David el fahk inge: “Nga arlacna luhngse in oruh ma luhngse lom, God luhk! Nga sruokyac mwe luti lom insiuck.”​—Psalm 40:8.

13, 14. Meac ac kuh in kahsre kom in oruh orekma ma “kihsackihnyuckyang nuh sin God”? Mwe kahsruh fuhkah kuhtuh sin mwet fuhsr uh eis kac?

¹³ In kahsre kom in oraclah finsrak inge, oasr worksheet se ke sra 308 ac 309 ke puk se inge Questions Young People Ask—Answers That Work, Volume 2. Ke worksheet se inge, kom ac kuh in suhmuhslah top lom nuh ke kihsen siyuck inge: “Fuhkah kahlwemiyen puhruhe lom uh? Meac puhruhe lom inge ahkkahlwemye ke luhngse lom nuh sin Jeova?” “Meac kom sang in wi ke lutlut lom sifacna uh?” “Yac kom wi ke orekma in luti uh finne pahpah ac ninac kiyom an tiac wi?” Oasr pac acn mwesahs ke worksheet se inge ma kom ac kuh in suhmuhslah kuhtwena finsrak ma kom luhngse in oakiyac nuh sum sifacna ke inkacnek in puhruhe lom, lutlut lom sifacna ac ke orekma in luti uh.

¹⁴ Mwet fuhsr pucspucs suc nuhnkuh in eis bacptais eltahl liye lah worksheet se inge sie kuhfwen orekma na sacohk. Tilda, sie muhtwacn lili fuhsr el fahk: “Nga orekmakihn worksheet se inge in oakiyac finsrak luhk uh. Nga kais kuhtuh na sun finsrak luhk inge, ac tukun yac se nga ahkolah in eis bacptais.” Patrick, sie mukul lili fuhsr el puhla pac ma inge. El fahk, “Nga etuh tari lah meac finsrak luhk uh, tuhsruhktuh ke nga suhmuhslah uh, ma inge kahsreyuc in kwacfeacng ac orekma nuh kac.”

15. Ahkuhtweyac lah efuh kuh wuhlelah lom uh enenuh in ma kom sifacna sulaclah in oruh.

¹⁵ Sie kihsen siyuck ke worksheet se inge pa: “Yac kom ac srackna kuhlwacnsuhpuh Jeova finne pahpah ac ninac kiyom ac kawuck lom an tui ac tilac kuhlwacnsuhpwacl?” Ke pacl se kom wuhlelah moul lom nuh sin Jeova ac eis bacptais, kom ac enenuh in sifacna ahkkweye fototo wo lom nuh sel. Ke srihpac se inge, ma kom oruh nuh sin Jeova uh tiac kuh in wi na ma pahpah ac ninac kiyom kuh kuhtwena mwet sahyac uh fahk kuh oruh. Moul muhtahl lom ac orekma in kihsac lom nuh sin God uh ahkkahlwemye lah kom luhlahlfongi lah ma pwacye uh oasr yurum ac kom luhngse in ukwe oakwuck nuhkewa luhn God uh. Ke pacl na sa, kom ac kuh in eis bacptais.

SRUI LOM

16, 17. (a) Meac ac mokle sie mwet elan eklac sie mwet Christian? (b) Srui lom nuh ke mwe molwelah uh ac luhmweyucklac fuhkah?

¹⁶ Sie lwen ah, mukul se suc etuh na pwacye ke masap lal Moses uh el siyuck sel Jesus: “Piyac ma sap se ma yohk emeet ke masap uh?” Jesus el topkuhl ac fahk: “Kom fah luhngse Leum God lom ke insiom kewa, ke nguhnum kewa, ac ke nuhnkom kewa.” (Matthew 22:35-37) Jesus el ahkkahlwemye lah luhngse luhn sie mwet nuh sin Jeova pa srihpac yohk se ma enenuh in mokle sie mwet elan eis bacptais ac eklac sie mwet Christian. Sie inkacnek wo ma kom kuh in ahkkweye luhngse lom nuh sin Jeova uh pa ke kom nuhnkuh ahkwoyac ke mwe sang se ma yohk emeet lal nuh sesr ke mwe kihsac ke moul luhn wen nahtuhl. (Riti Luo Corinth 5:14, 15; Sie John 4:9, 19.) Kom fin oruh ohingacn, kom ac fah ahkkahlwemye srui lom nuh ke mwe sang na sacohk se inge.

¹⁷ Srui lom nuh ke mwe molwelah uh ac kuh in ahkuhtweyucki ke inkacnek se inge: Srihke luhmahlah ke nuhnak lom an muh kom ac walomlah ac mwet se molikomlac. Yac kom ac fohlohk nuh lohm sum ac, ahkpahoyekomlac ac muhlkuhnlah kahsruh luhn mwet se ingacn nuh sum ac? Moh! Kom ac arlacna kuloh nuh sin mwet se ma molikomlac an! Ke inkacnek se pacna inge, kuht enenuh in ahkkahlwemye kuloh ac srui lasr nuh sin Jeova ac Jesus ke mwe molwelah uh. Kuht soemoul nuh seltahl, mweyen eltahl molikuhtlac liki ma kuluk ac misac. Ke srihpen luhngse laltahl nuh sesr, ingena oasr finsrak lasr in moul ma pahtpaht ke sie Paradise fin facluh!

18, 19. (a) Efuh kuh kom tiac enenuh in sahngweng in wuhlelah moul lom nuh sin Jeova? (b) Kuhlwacnsap lom nuh sin Jeova uh ac oruh fuhkah moul lom an in wo liki na meet ah?

¹⁸ Yac kom srui ke ma Jeova el oraclah nuh sum inge? Fin ohingacn, na ma wo kom in oruh uh pa in wuhlelah moul lom ac eis bacptais. Ke kom wuhlelah moul lom nuh sin God, kom oraclah sulaclah kuh se muh kom ac oruh ma luhngse lal uh ne tok ma pahtpaht. Yac kom enenuh in sahngweng in oruh wuhlelah se inge? Moh! Jeova el luhngse ma ac wo emeet nuh sum uh ac el fah ahkinsewowoye mwet suc oruh ma luhngse lal uh. (Hebrew 11:6) Ke kom wuhlelah moul lom nuh sin God ac eis bacptais, moul lom an ac tiac upaclah kuh kuluklac tuhsruhktuh ac fah wolac! Sie mukul lili suc yac 24 ac el eis bacptais ke el srackna fuhsr, el fahk: “Etwacack ac kahlwem luhk ke ma pwacye uh ac kuh in loal kuhtuh nga fuhnuh mahtuh kuhtuh ke pacl se nga bacptaislac. Tuhsruhktuh, ke nga sulaclah in wuhlelah moul luhk nuh sin Jeova, ma inge karihngihnyuc liki ma pucspucs luhn facluh.”

¹⁹ Jeova el luhngse ma ac wo emeet nuh sum uh. Tuhsruhktuh, Satan el nuhnkuh kacl sifacna ac el tiac nuhnkuh keim. El tiac kuh in usot kuhtwena ma wo kom fin fahsr tohkohl. El ac usot fuhkah sie ma ma wacngihn yohrohl? Wacngihn na pweng wo yohrohl ac wacngihn pac finsrak lal. El kuh na in usot sie moul kuluk ke pacl fahsruh uh, mweyen pa inge ma ac sikyak nuh sel uh!​—Fwackyuk 20:10.

20. Meac sie mwet fuhsr el enenuh in oruh tuh elan kapkapack, wuhlelah moul lal ac eis bacptais? (Liye pac pohk se inge “Mwe Kahsruh Nuh Sum In Kapkapack, Wuhlelah Moul Lom Ac Eis Bacptais.”)

²⁰ Sulaclah se ma wo emeet kom in oruh uh pa in wuhlelah moul lom nuh sin Jeova. Yac kom ahkolah in oruh ma inge? Fin ahok, nik kom sahngweng in oruh wuhlelah se inge. Tuhsruhktuh, kom fin puhla muh kom soenna ahkolah, orekmakihn kahs in kahsruh ke mwe lutlut se inge kom in tahfwelah na kapkapack. Paul el fahk nuh sin mwet lili fin acn Philippi inge in tahfwelah na kapkapack. (Philippi 3:16) Kom fin ukwe kahs in kahsruh inge, ke pacl na sa kom ac luhngse in wuhlelah moul lom nuh sin Jeova ac eis bacptais.