Mwet Fuhsr Yac Kom Ahkolah in Eis Bacptais?

1, 2. (a) Meac ahkenganye mwet luhn God ke pacl inge? (b) Pahpah ac ninac ke congregation ac mwet elder uh ac kahsruh fuhkah mwet fuhsr uh in kahlwem ke kalmeyacn bacptais?

SIE mwet elder el fahk nuh sel Christopher, suc yac 12, “Nga nuh etwekom na e ke pacl se kom isuslac ah, ac nga engan in lohng lah kom ke eis bacptais. Tuh nga ke siyuck sum, ‘Efuh kuh kom luhngse in eis bacptais?’” Kihsen siyuck se luhn mwet elder se inge arlacna yohk srihpac. Ma inge arlacna ahkenganye kuht in liye lah ke yac nuhkewa tausin sin mwet fuhsr fin facluh nohfohn eltahl eis bacptais. (Ecclesiastes 12:1) Ke pacl se pacna inge, pahpah ac ninac ke congregation ac mwet elder ke congregation uh luhngse in etuh na pwacye lah mwet fuhsr inge sifacna oraclah sulaclah laltahl ac kahlwem kac lah meac kalmac in bacptaislac.

² Bible uh ahkkahlwemye lah ke pacl se sie mwet el wuhlelah moul lal ac eis bacptais, pa inge muhtwacwacyen moul in Christian lal uh. Ke moul sasuc se inge, el ac kuh in puhla mwe insewowo pucspucs luhn Jeova wekuhnacng mwe lain lal Satan. (Soakas 10:22; Sie Peter 5:8) Pwacnacng, pahpah ac ninac ke congregation uh enenuh in luti tuhlihk nahtuhltahl uh lah meac kalmac in sie mwet tuhma lutlut luhn Christ. Nuh sin mwet fuhsr suc pahpah kuh ninac kiyacltahl uh tiac wi ke ma pwacye uh, mwet elder ke congregation uh kahsreltahl ke inkacnek kuhlwacng in etuh lah meac kalmac in wuhlelah moul laltahl ac bacptaislac. (Riti Luke 14:28-30.) In oacna ke enenuh in oasr ahkolah ma oreklac in sang ahksahfyelah sie muhsah, sie mwet el enenuh in ahkolah, na el tuhfah kuh in kuhlwacnsuhpuh Jeova ke ohiyen oaru “nwe ke sahflah.” (Matthew 24:13) Tuhsruhktuh, meac ac kuh in kahsruh mwet fuhsr uh in oruh sulaclah laltahl in kuhlwacnsuhpuh Jeova ma pahtpaht? Lwelah kuht in liye.

3. (a) Meac kahs lal Jesus ac Peter uh luti kuht ke yohk srihpaciyen bacptais uh? (Matthew 28:19, 20; Sie Peter 3:21) (b) Kihsen siyuck fuhkah kuht ac fah tuni ingena ac efuh?

³ Yac kom sie mwet fuhsr suc nuhnkuh in eis bacptais? Fin ohingacn, finsrak na wowo se pa inge! Kunohkohn na yohk se pa in bacptaislac oacna sie Mwet Loh luhn Jeova. Yohk liki ma inge, bacptais uh sie ma enenweyuck nuh sin mwet Christian ac pa inge sie ma yohk srihpac ma eltahl enenuh in oruh in eis molwelah ke lwen in ongaiyac luhlahp uh. (Matthew 28:19, 20; Sie Peter 3:21) Ke pacl se kom bacptaislac uh, kom ahkkahlwemye lah kom wuhlelah muh kom ac kuhlwacnsuhpuh Jeova ma pahtpaht. Pa inge sie wuhlelah ma kom ac luhngse in ahkpwacyeye. Pwacnacng, wo kom in nuhnkuh ke kihsen siyuck tolu inge in kahsre kom in liye fin kom ahkolah in eis bacptais: (1) Yac nga mahtuh ke nuhnak tuh nga kuh in oruh sulaclah inge? (2) Yac nga pa luhngse in oruh ma inge uh? (3) Yac nga kahlwem kac lah meac kalmac in wuhlelah moul luhk uh nuh sin Jeova? Kuht srihke tuni kais sie kihsen siyuck inge ahkwoyac.

KE KOM MAHTUH KE NUHNAK

4, 5. (a) Efuh kuh bacptais el tiac ma nuh sin mwet mahtuh muhkwena? (b) Meac kalmac nuh sin sie mwet lili elan mahtuh ke nuhnak lal?

⁴ Bible uh tiac fahk muh mwet mahtuh muhkwena kuh mwet suc sun matwac fal pa ac kuh in eis bacptais uh. Kuht fin riti Soakas 20:11: “Finne tuhlihk srihsrihk se, ac kahlwem ohiyacl ke ma el oruh uh fin elah lal an suwohs ac wo.” Sie mwet suc srackna fuhsr el kuh in etuh lah meac kalmac in oruh ma wo ac suwohs ac in wuhlelah moul lal nuh sin el suc orekuhtlac. Pwacnacng, bacptais uh ma na yohk srihpac se ac fal nuh sin sie mwet fuhsr suc ahkpwacyeye lah el etuh in oruh sulaclah lal ac el wuhlelah tari moul lal nuh sin Jeova.​—Soakas 20:7.

⁵ Meac kalmen mahtuh ke nuhnak? Kain in ohiyac inge tiac pacl nuhkewa kalmackihn nuh ke matwac kuh kap luhn mwet se. Bible uh fahk lah mwet suc mahtuh tari ke nuhnak eltahl “kuh in akihlen inmahsrlon ma wo ac ma kuluk.” (Hebrew 5:14) Sie mwet suc mahtuh ke nuhnak el etuh ma wo uh ac el sulaclah tari ke insiacl in oruh. Pwacnacng, el ac tiac fihsracsr in kihfucsyucklac in oruh ma kuluk. El ac tiac pac enenuh sie mwet in fahk nuh sel lah meac wo ac suwohs uh pacl nuhkewa. Arlacna fal in luhlahlfongi lah sie mwet fuhsr suc eis bacptais tari ac fah oruh ma wo finne pahpah ac ninac kiyacl kuh mwet mahtuh sahyac tiac weluhl.—Liye nuh ke Philippi 2:12.

6, 7. (a) Ahkuhtweyac ma upac ma Daniel el sun ke el muhta fin acn Babylon. (b) Daniel el ahkpwacyeye fuhkah lah el mahtuh ke nuhnak?

⁶ Yac mwet fuhsr se kuh in ahkkahlwemye kain in ohiyac se inge? Nuhnkuh ke mwe srihkasrak lal Daniel uh. El sie mwet fuhsr suc utucklac liki pahpah ac ninac kiyacl uh ac suhpweyucklac nuh Babylon. Daniel el tuh muhta inmahsrlon mwet suc tiac ahkos masap luhn God. Tuhsruhktuh, kuht srihke tuni ahkwoyac ma sikyak nuh sel Daniel inge. Fin acn Babylon, mwet fin acn we arlacna wo nuh sel. El sie sin mwet fuhsr na ekahsr ma sollac in kuhlwacnsuhpwacl tohkohsrah. (Daniel 1:3-5, 13) Oacna in ma sikyak nuh sel Daniel fin acn Babylon inge wo liki kuhtwena moul ma el puhla fin acn Israel.

⁷ Pwacnacng meac Daniel el oruh? Yac el lwelah mwet Babylon inge in ekuhluhllah kuh ahkmuhnahsye luhlahlfongi lal uh? Moh, el tiacna! Bible uh fahk lah ke pacl se Daniel el muhta fin acn Babylon, “el tuh sulaclah elan tiac ahkfohkfohkye mahnol sifacna,” lah el ac fahsr liki kuhtwena ma ma kuhpahsr nuh ke alu kikiacp. (Daniel 1:8) Pa inge na pwacye ahkkahlwemyeyacn sie mwet suc mahtuh ke nuhnak!

8. Meac kom kuh in lotwelah ke mwe srihkasrak lal Daniel uh?

⁸ Meac kom kuh in lotwelah ke mwe srihkasrak lal Daniel uh? Sie mwet fuhsr suc mahtuh ke nuhnak lal el kuh in tu na kuh ke luhlahlfongi lal uh, finne ke pacl upac. El tiac oacna koet (octopus) se, ma sa in ekuhllah tuhnal in fal nuh ke ma raunellah uh. El ac tiac oraclah muh el sie kawuck luhn God ke Lohm in Toeni uh, a el sie kawuck luhn mwet facluh ke lohm lutlut ac. Tuhsruhktuh, el ac sruokyacna oaru lal uh finne ke pacl ma srihkeyuck el.​—Riti Ephesus 4:14, 15.

9, 10. (a) Mwe kahsruh fuhkah mwet fuhsr se ac kuh in eis el fin nuhnkaclah lah fuhkah ohiyacl ke kuhtuh mwe srihfe nuh ke luhlahlfongi lal ma el sun ke kuhtuh pacl somlah ah? (b) Meac kalmen bacptais?

⁹ Pwacye lah wacngihn mwet suwohswohs. Kuhtuh pacl uh, mwet fuhsr wekuhnacng mwet mahtuh uh oruh ma tahfonglac. (Ecclesiastes 7:20) Tuhsruhktuh, kom fin luhngse in bacptaislac, wo kom in konwacack kuhiyacn sulaclah lom in tu na kuh ac ahkos masap luhn Jeova uh. Siyuck sum sifacna, ‘Yac nga ahkos Jeova ke lusen pacl loeloes se?’ Nuhnkuh ke ma kom oruh ke pacl sahflah se ma srihfeyuck luhlahlfongi lom an. Ke pacl sacn, yac kom kuh in sulaclah ma suwohs kom in oruh? In oacna Daniel, yac oasr mwet suc ahkkweye kom in orekmakihn etwacack lom ke facl lal Satan uh? Ke pacl se ma srihfeyuck kom, yac kom kuh in kahlwem ke ma luhngse luhn Jeova uh?​—Ephesus 5:17.

¹⁰ Efuh kuh yohk srihpac in etuh top nuh ke kihsen siyuck inge nuhkewa? Mweyen ma inge ac kuh in kahsre kom in liye lah fuhkah yohk srihpaciyen bacptais uh. Bacptais uh ahkkahlwemye nuh sin mwet sahyac lah kom oraclah wuhlelah na yohk srihpac se nuh sin Jeova. Kom wuhlelah muh kom ac luhngse el ac kuhlwacnsuhpwacl ma pahtpaht ke insiom kewa. (Mark 12:30) Mwet nuhkewa suc bacptaislac tari enenuh in tu na kuh ac ahkpwacyeye wuhlelah laltahl nuh sin Jeova.​—Riti Ecclesiastes 5:4, 5.

YAC PA INGE MA KOM LUHNGSE NA PWACYE IN ORUH UH?

11, 12. (a) Meac sie mwet suc nuhnkuh in eis bacptais el enenuh in etuh na pwacye? (b) Meac ac kuh in kahsre kom in oacna Jeova ke nuhnak lal nuh ke oakwuck ke bacptais uh?

¹¹ Bible uh fahk lah mwet nuhkewa luhn Jeova, finne mwet fuhsr “ac fah engan in sifacna eisaclosyang” in kuhlwacnsuhpwacl. (Psalm 110:3) Pwacnacng, sie mwet suc nuhnkuh in eis bacptais el enenuh in etuh na pwacye fin pa inge ma el luhngse in oruh uh. Sahp, kom ac enenuh in tuni ahkwoyac luhngse se lom inge, yohkna kom fin mahtuhlah kuh kapkapack ke ma pwacye uh.

¹² Ke kom mahtuhlah uh, sahp kom liye lah puhs mwet bacptais, sahp kuhtuh seltahl kawuck lom ac ma wiyom. Tuhsruhktuh, taran kom in tiac muhtwacwacack in nuhnkuh muh kom enenuh pac in bacptais ke na srihpen kom sun matwac fal kuh ke srihpen mwet nuhkewa sahyac bacptais pac. Kom ac oruh fuhkah kom in oacna Jeova ke nuhnak lal nuh ke oakwuck ke bacptais uh? Oraclah pacl lom in muhta nuhnkuh lah efuh yohk srihpen bacptais uh. Kom ac konwacack srihpac wowo pucspucs ke mwe lutlut se inge ac ke mwe lutlut se tok uh.

13. Kom ac etuh fuhkah lah sulaclah lom in eis bacptais ma tuhkuh ke insiom kewa?

¹³ Sie inkacnek ma kom ac kuh in etuh lah sulaclah lom in eis bacptais ma tuhkuh ke insiom na pwacye pa ke kom tuni puhruhe lom an. Fuhkah fususiyen puhruhe lom nuh sin Jeova uh? Fuhkah koano ac loaliyen ma kom siyuck ke puhruhe lom an? Top lom nuh ke kihsen siyuck inge ac kuh in ahkkahlwemye fototo lom nuh sin Jeova uh. (Psalm 25:4) Ke pacl puhs, Jeova el sang top nuh ke puhruhe lasr uh ke inkacnek luhn Bible. Pwacnacng, sie pac inkacnek ma kom kuh in etuh lah kom luhngse na pwacye in fototoyang nuh sin Jeova ac in kuhlwacnsuhpwacl ke insiom kewa pa, ke kom tuni oakwuck in lutlut lom an. (Joshua 1:8) Siyuck sum sifacna: ‘Yac nga ahkfalye in oruh lutlut luhk sifacna ke Bible pacl nuhkewa? Yac nga luhngse in wi ke lutlut luhn sucu lasr uh?’ Top lom nuh ke kihsen siyuck inge ac kuh in kahsre kom in etuh fin sulaclah lom in eis bacptais pa ma kom luhngse na pwacye in oruh uh.

KALMEYACN WUHLELAH LOM UH

14. Ahkuhtweyac lah meac tiac oacna sie ke wuhlelah ac bacptais.

¹⁴ Sahp, kuhtuh mwet fuhsr uh tiac etuh na pwacye ma tiac oacna sie ke wuhlelah ac bacptais. Sahp, kuhtuh seltahl ac kuh in fahk muh eltahl wuhlelah tari moul laltahl nuh sin Jeova, tuhsruhktuh eltahl soenna ahkolah in eis bacptais. Yac ma inge ac kuh in sikyak? Ke pacl se kom wuhlelah moul lom an, kom puhruhe nuh sin Jeova ac fahk nuh sel lah kom ahkolah in kuhlwacnsuhpwacl ke lusen moul lom nohfohn. Ke pacl se kom bacptaislac uh, kom ahkkahlwemye nuh sin mwet sahyac lah kom oraclah tari wuhlelah lom nuh sin Jeova. Ke srihpac se inge, meet liki kom eis bacptais kom enenuh in kahlwem kac lah meac kalmac in wuhlelah moul lom nuh sin God.

15. Meac kalmen wuhlelah?

¹⁵ Ke pacl se kom wuhlelah moul lom nuh sin Jeova, kom fahk nuh sel lah ingena kom ma lal. Kom wuhlelah nuh sel lah orekma in kuhlwacnsap lom nuh sel uh pa ma se ma yohk srihpac emeet ke moul lom an. (Matthew 16:24) Kain in wuhlelah se nuh sin God inge arlacna yohk srihpac! (Matthew 5:33) Pwacnacng, kom ac ahkkahlwemye fuhkah lah kom etuh lah tilac ma lom sifacna pa moul lom an, a ingena ma luhn Jeova?​—Rome 14:8.

16, 17. (a) Sang sie mwe puhpuhlyuck an nuh kac lah meac kalmac in lahfwekihn kom sifacna. (b) Meac kalmac sie mwet el fin oruh wuhlelah lal?

¹⁶ Kuht srihke nuhnkuh ke mwe puhpuhlyuck se inge, fin pa kawuck se lom usot stosah soko okom. El usot pwepuh nuhkewa nuh kac an ac fahk: “Ma okom pa stosah soko inge.” Tuhsruhktuh, el oacyacpac fahk: “Nga ac sruokyacna key uh. Ac nga muhkwena pa ac kahsruhsrkihn uh, tiac kom.” Meac kom ac puhla ke mwe sang se inge? Meac kom ac puhla sin kawuck se lom ma usot stosah soko an?

¹⁷ Ke pacl se sie mwet el wuhlelah moul lal nuh sin Jeova, ac oacpacna elan fahk nuh sin God: “Nga usot moul luhk nuh sum. Nga ma lom.” Oasr suwohs luhn Jeova in liye lah mwet sacn ac ahkpwacyeye wuhlelah se lal inge. Tuhsruhktuh, ac fuhkah fin mwet se muhtwacwacack in seahkos Jeova ac el muhtwacwacack in ahko nuh sin sie mwet ke lukmac suc tiac kuhlwacnsuhpuh God? Kuh fin pa el sruokyac sie orekma ma ahksrihkyelah pacl lal nuh ke orekma in luti uh kuh oruh elan tiac wi miting ke pacl puhs? Kahlwem lah el tiacna sruokyac wuhlelah lal nuh sin Jeova. Ac oacpacna ke el sruokyacna key nuh ke stosah soko. Ke pacl se kuht wuhlelah moul lasr uh nuh sin Jeova, kuht fahk nuh sel, “Moul luhk uh ma lom, tiac ma luhk.” Pwacnacng, kuht ac oruh ma Jeova el luhngse uh pacl nuhkewa finne tiac pa inge na pwacye ma kuht luhngse in oruh uh. Lwelah kuht in etahi Jesus, suc fahk ma inge: “Nga oactui inkuhsrao me, tiac in oruh luhngse luhk sifacna, a ma luhngse lal suc suhpweyucme.”​—John 6:38.

18, 19. (a) Puhlakihn lal Rose ac Christopher ke bacptais laltahl uh ahkkahlwemye fuhkah lah bacptais uh ma na sacohk se ma kol nuh ke mwe insewowo pucspucs? (b) Meac puhlakihn lom ke bacptais?

¹⁸ Arlac kahlwem lah bacptais uh sie sulaclah na yohk. Ma na sacohk se in wuhlelah moul lom nuh sin Jeova ac in bacptaislac. Mwet fuhsr suc luhngse Jeova ac kahlwem kac lah meac kalmac in wuhlelah moul laltahl nuh sin Jeova ac tiac ahlohloh in wuhlelah moul lal nuh sel ac bacptaislac. Eltahl tiac auli ke sulaclah se laltahl inge. Rose, sie muhtwacn fuhsr suc bacptaislac tari el fahk: “Nga luhngse Jeova ac wacngihn kuhtwena ma nga ac kuh in insewowo kac liki na in kuhlwacnsuhpwacl. Sulaclah se ma nga etuh muh wo emeet nga in oruh ke moul luhk uh pa in eis bacptais.”

¹⁹ Ac fuhkah nuh sel Christopher, suc kuht sruhmuhn ke muhtwacwacyen mwe lutlut se inge? Meac puhlakihn lal ke el sulaclah in eis bacptais ke el yac 12? El fahk muh el arlacna engan lah el oraclah sulaclah se inge. El muhtwacwacack in kuhlwacnsap oacna sie regular pioneer ke el sun yac 17, el eklac sie mwet suc kahsruh mwet elder ke el yac 18. Ke pacl inge el kuhlwacnsap ke Bethel. El fahk: “Bacptais luhk uh pa sulaclah se ma nga puhla muh wo emeet uh. Moul luhk uh nwacnwaclah ke kain in orekma ma nga engan in oruh nuh sin Jeova ac nuh ke u lal uh.” Kom fin luhngse in eis bacptais, kom ac ahkolah fuhkah nuh kac? Mwe lutlut se lasr tok uh ac fah tohpohklah kihsen siyuck se ingacn.