Kom Ac Sang Kahsruh Fuhkah in Ahkkweye Inse Sefanna Lasr Oacna Mwet Christian?

1. Ke muhtwacwacackiyac ah, meac akihlenyac orekma luhn God uh?

JEOVA ac Jesus eltahl tuhkweni orekma e ke muhtwacwacyen ma oreklac nuhkewa. Jeova el oracllah Jesus meet liki ma nuhkewa sahyac. Tukun ma inge, Jesus suc “oacna sie mwet orekma usrnguck” el weluhl Jeova in oraclah ma nuhkewa. (Soakas 8:30, BMK) Mwet kuhlwacnsap luhn Jeova uh oacyacpac akacsruhi ke orekma ma eltahl oruh uh. Ke sie mwe puhpuhlyuck, Noah ac sucu lal ah tuhkweni muhsahelah oak soko. Tok, mwet Israel nuhkewa tuhkweni orekma in muhsahelah lohm nuknuk muhtahl, in tuhleyac ac sifwil tulohkuhnwack ke sie acn nuh ke sie acn. Ke tempuhl uh, eltahl tuhkweni on ac sritaclkihn kuhfwen mwe on na kahto in sang kaksak nuh sin Jeova. Mwet luhn Jeova uh kuh in oruh ma inge nuhkewa mweyen eltahl akacsruhi.​—Genesis 6:14-16, 22; Oekyuk 4:4-32; Sie Chronicle 25:1-8.

2. (a) Meac sie ma wo na pwacye ke congregation luhn mwet Christian in pacl meet ah? (b) Kihsen siyuck fuhkah ac fah topukyucklac ke pacl inge?

² Mwet Christian in pacl meet ah oacyacpac akacsruhi nuh sin sie sin sie. Mwet sap Paul el ahkuhtweyac lah finne tiac oacna sie kuh ac kunohkohn laltahl uh, eltahl nohfohn tuhkweni orekma. Eltahl nohfohn fahsr tukun mwet kol laltahl uh, Jesus Christ. Paul el luhmahloslac nuh ke sie monin mwet ma ip nuhkewa kac uh tuhkweni orekma. (Riti Sie Corinth 12:4-6, 12.) Tuhsruhktuh, fuhkah nuh sesr ke pacl inge? Kuht ac akacsruhi fuhkah ke orekma in luti, ke congregation, ac ke sucu lasr uh?

AKACSRUHI KE OREKMA IN LUTI UH

3. Meac mwet sap John el liye ke sie aruhruhma lal?

³ Ke pacl luhn mwet sap ah, mwet sap John el liye sie aruhruhma ke lipufacn itkohsr suc uk mwe ukuk. Ke pacl se lipufacn se ahklimekohsr inge uk mwe ukuk nahtuhl uh, John el liye “itu se puhtatlac nuh facluh.” Itu se inge orekmakihn sie key in ikacslah sruhnguhl nuh ke sie luhf na lohsr. Ma se meet, kuhlahsr tuhkuh liki luhf sac, na tohkoh un locust se sohklah liki kuhlahsr uh. Locust inge tiac ahkkulukye sahk kuh kuhtwena ma kap, a eltahl lain mwet suc “wacngihn mwe akucl ke sil luhn God fin motonsrolos.” (Fwackyuk 9:1-4) John el etuh lah un locust inge ac kuh in oraclah mwe sensen yohk, in oacna ma sikyak ke pacl lal Moses fin acn Egypt. (Exodus 10:12-15) Locust ma John el liye inge luhmweyuck nuh ke mwet Christian akmuhsralah suc som luti ke sie pweng kuh ma lain alu kikiacp uh. Ac oasr million sin mwet pucspucs sahyac suc oasr finsrak la in moul fin facluh ma weluhltahl. Ke eltahl tuhkweni inge, eltahl inse sefanna ke orekma in luti se inge. Orekma se inge kahsruh mwet pucspucs in som liki alu kikiacp ac in sukohsohklah liki kuh lal Satan.

4. Orekma fuhkah mwet luhn God uh enenuh in oruh ac piyac inkacnek sefanna ma eltahl kuh in oruh ma inge?

⁴ Utuckuh nuh sesr sie kunohkohn in som fahkwack ke “pweng wo” nuh sin mwet nuhkewa fin facluh nohfohn meet liki sahflah uh. Orekma na yohk se pa inge! (Matthew 24:14; 28:19, 20) Kuht enenuh in suli mwet nuhkewa “suc maluh” in nihm “kof in moul,” kalmac pa kuht enenuh in luti ma pwacye ke Bible uh nuh sin mwet nuhkewa suc luhngse in eis kahlwem kac. (Fwackyuk 22:17) Tuhsruhktuh, kuht kuh in oruh ma inge muhkwena kuht fin “kuhpahsreni wo” kuh akacsruhi nuh sin mwet nuhkewa ke congregation uh.​—Ephesus 4:16.

5, 6. Ke inkacnek fuhkah kuht inse sefanna ke kuht fahkwack ke pweng wo?

⁵ Kuht enenuh in oakiyac in wo orekma in luti lasr uh, tuh kuht in kuh in sun mwet pucspucs. Kahs in kahsruh ma kuht eis ke congregation uh ac kuh in kahsre kuht in oruh ma inge. Tukun kuht oruh toeni nuh ke forfor uh, kuht som ac sramsram nuh sin mwet ke pweng wo ke Tohkohsrahi uh. Kuht oacyacpac sang nahtuhltahl mwe rit ma tuhkuh ke Bible. Kuht kihtaclah million ke mwe rit inge fin facluh nohfohn. Kuhtuh pacl uh siyuckyuck sesr in wi ke orekma in kihtakat na sacohk inge. Ke pacl se kom wi ke orekma inge, kom wi million sin mwet sahyac fin facluh nohfohn suc luti ke pweng se pacna inge! Kom oacyacpac wi lipufacn pucspucs, suc kahsruh mwet luhn God in fahkwack ke pweng wo inge.​—Fwackyuk 14:6.

⁶ Kuht arlacna engan in riti ma wowo pucspucs ke orekma in luti lasr fin facluh nohfohn ma sihmlac ke Yearbook uh. Nuhnkuh pac ke inse sefanna lasr fin facluh nohfohn ke kuht suli mwet nuh ke toeni luhlahp lasr uh. Ke kain in pacl inge, mwe sramsram ma kuht nuhkewa lohng uh oacna sie. Mwe sramsram, drama ac mwe luhmah pucspucs inge ahkkweye kuht in sang insiacsr ac kuhiyacsr kewa nuh sin Jeova. Kuht oacyacpac wi mwet lili wiyacsr fin facluh nohfohn ke pacl ma kuht wi nuh ke Mwe Acsmakihn ke misac lal Jesus ke kais sie yac. (Sie Corinth 11:23-26) Kuht oruh toeni lasr uh ke lwen sefanna, Nisan 14, tukun faht uh tili in ahkkahlwemye srui lasr ke ma Jeova el oruh nuh sesr uh ac in ahkos masap lal Jesus uh. Ac ke wik ekahsr meet liki lwen in Mwe Acsmakihn uh, kuht tuhkweni orekma in suli mwet pucspucs in wi kuht ke pacl na yohk srihpac se inge.

7. Ke kuht tuhkweni orekma, meac kuht kuh in oruh?

⁷ Tiac arlacna yohk ma locust sefanna ac kuh in oraclah. In oacpacna, mwet sefanna tiac kuh in muhkwena fahkwack nuh sin mwet nuhkewa. Pwacnacng, ke srihpen kuht tuhkweni orekma, kuht kuh in fahkwack nuh sin million pucspucs sin mwet kacl Jeova ac kahsruh kuhtuh mwet inge in kaksakuhnuhl ac sang wolacna nuh sel.

AKACSRUHI KE CONGREGATION UH

8, 9. (a) Kahs in puhpuhlyuck fuhkah Paul el orekmakihn in luti mwet Christian uh in sruokyacna inse sefanna laltahl uh? (b) Kuht ac ahkkahlwemye fuhkah akacsruhi lasr nuh ke congregation uh?

⁸ Paul el ahkuhtweyac nuh sin mwet lili fin acn Ephesus oakwuck ke congregation uh, ac el fahk lah eltahl enenuh in tahfwelah na “kapkapack in ohiyac nuhkewa.” (Riti Ephesus 4:15, 16.) Paul el orekmakihn mwe puhpuhlyuck ke sie mahno in ahkuhtweyac lah, kais sie mwet Christian ac kuh in kahsruh congregation in sruokyacna inse sefanna ac fahsr tohkohl Jesus, suc mwet kol ke congregation uh. El fahk muh “lah nuhkewa kac uh kuhpahsreni wo . . . ke kais sie lah in mahno el oruh ma kunacl in fal.” Pwacnacng, kuht finne fuhsr kuh mahtuh, fokoko kuh tiac, meac kais sie sesr enenuh in oruh?

⁹ Jesus el srihsrngiyac mwet elder in kol congregation uh, ac el ke kuht in suhnakuhnuhltahl ac ahkos kahs in kahsruh laltahl nuh sesr uh. (Hebrew 13:7, 17) Ma inge tiac fihsracsr in oruh pacl nuhkewa. Tuhsruhktuh, kuht kuh in siyuck kahsruh sin Jeova. Nguhn muhtahl lal uh ac kuh in kahsre kuht in ahkos kuhtwena kahs in kahsruh ma mwet elder inge use nuh sesr uh. Srihke nuhnkuh pac ke luhpan kahsruh ma kuht ac kuh in sang nuh ke congregation uh kuht fin inse puhsisacl ac akacsruhi nuh sin mwet elder uh. Congregation lasr uh ac fah inse sefanna, ac luhngse lasr nuh sin sie sin sie ac fah yohkyohkwelihk.

10. Mukul lili suc kahsruh mwet elder uh kahsruh congregation uh fuhkah in inse sefanna?

¹⁰ Mukul lili suc kahsruh mwet elder uh sang pac kahsruh in sruokyacna inse sefanna luhn congregation uh. Eltahl orekma upac in kahsruh mwet elder uh ac kuht arlacna srui ke ma eltahl oruh inge. Ke sie mwe puhpuhlyuck, mukul lili suc kahsruh mwet elder inge eltahl oruh in oasr mwe rit nahtuhsr pacl nuhkewa nuh ke orekma in luti uh ac eltahl paing mwet nuhkewa suc tuhkuh nuh ke toeni uh. Eltahl oacyacpac orekma upac in ahkwoye Lohm in Toeni lasr uh ac in ahknwacsnwacsye. Ke pacl se kuht akacsruhi nuh sin mukul lili inge, kuht inse sefanna ac kuhlwacnsuhpuh Jeova ke inkacnek ma oasr oakwuck wo kac.​—Liye nuh ke Orekma 6:3-6.

11. Meac mwet fuhsr uh kuh in oruh in kahsruh inse sefanna luhn congregation uh?

¹¹ Kuhtuh sin mwet elder inge eltahl orekma upac ke congregation uh ke lusen yac pucspucs. Tuhsruhktuh sahp, eltahl tiac kuh in oruh oacna meet ah ke srihpen eltahl mahtuhoh. Mukul lili fuhsr uh ac kuh in kahsreltahl. Eltahl fin ahkpahyeyuck, eltahl kuh in karihngihn kuhtuh pac kunohkohn ke congregation uh. Ac ke pacl se mukul lili suc kahsruh mwet elder inge eltahl orekma upac, eltahl kuh pac in kuhlwacnsap oacna mwet elder ke pacl fahsruh uh. (Sie Timothy 3:1, 10) Kuhtuh sin mwet elder suc srackna fuhsr inge kapkapack liki na meet ah. Ingena, eltahl kuhlwacnsap oacna mwet fuhfahsryucsr nuh ke congregation pucspucs ac eltahl kahsruh mwet lili ke congregation pucspucs. Kuht arlacna engan ke pacl se mwet fuhsr inge luhngse in kuhlwacnsuhpuh mwet lili uh.​—Riti Psalm 110:3; Ecclesiastes 12:1.

AKACSRUHI KE SUCU UH

12, 13. Meac ac kuh in kahsruh mwet nuhkewa ke sie sucu in akacsruhi?

¹² Kuht ac kahsruh fuhkah mwet ke sucu lasr uh eltahl in akacsruhi nuh sin sie sin sie? Lutlut luhn sucu ke kais sie wik ac kuh in kahsruh. Ke pacl se pahpah, ninac ac tuhlihk uh oraclah pacl in tuhkweni lutlut kacl Jeova, luhngse laltahl nuh sin sie sin sie uh yohkwelihk. Ke kain in pacl inge, eltahl kuh in oruh ahkpah laltahl nuh ke ma eltahl ac fah sramsramkihn ke orekma in luti uh. Ma inge ac kuh pac in kahsreltahl nohfohn in ahkolah in wo. Ac ke pacl se eltahl lohng ke kais sie seltahl sramsramkihn ma pwacye uh ac liye lah mwet nuhkewa ke sucu uh luhngse Jeova ac luhngse in ahkinsewowoyacl, ma inge ac ahkfototoye inmahsrloltahl.

¹³ Mukul tuhma ac muhtwacn kiyac uh ac akacsruhi fuhkah nuh sin sie sin sie? (Matthew 19:6) Ke pacl se eltahl kewana luhngse Jeova ac tuhkweni kuhlwacnsuhpwacl, eltahl ac fah insewowo ac inse sefanna ke moul in pahyuck laltahl uh. Eltahl enenuh pac in ahkkahlwemye luhngse nuh sin sie sin sie, oacna Abraham ac Sarah, Isaac ac Rebekah, ac Elkanah ac Hannah. (Genesis 26:8; Sie Samuel 1:5, 8; Sie Peter 3:5, 6) Ke pacl se siacnyacn se oruh ma inge, eltahl tuhkweni orekma ac eltahl fototo nuh sin Jeova.​—Riti Ecclesiastes 4:12.

14. Fin mukul tuhmom kuh muhtwacn kiyom an tiac kuhlwacnsuhpuh Jeova, meac kom kuh in oruh in ahkkweye moul in pahyuck lomtacl an?

¹⁴ Bible uh fahk arlac kahlwem kuht in tiac pahyuck nuh sin mwet suc tiac kuhlwacnsuhpuh Jeova. (Luo Corinth 6:14) Tuhsruhktuh, oasr mwet lili suc pahyuck nuh sin mwet suc tiac Mwet Loh luhn Jeova. Kuhtuh seltahl lotwelah ma pwacye uh tukun eltahl pahyuckyak ac mukul kuh muhtwacn kiyacltahl uh tiac eklac Mwet Loh. Kuhtuh pac seltahl pahyuck nuh sin mwet kuhlwacnsap luhn Jeova, tuhsruhktuh tok mukul tuhmwacltahl kuh muhtwacn kiyacltahl uh som liki congregation uh. Ke kain in ohiyac ac luhmah inge, mwet Christian uh sang kuhiyacltahl kewa in ahkkweye moul in pahyuck laltahl uh ke eltahl ahkos kahs in kahsruh ke Bible uh. Sahp, ma inge tiac fihsracsr in oruh pacl nuhkewa. Ke sie mwe puhpuhlyuck, siacnyacn se inge Mary ac David eltahl tuhkweni kuhlwacnsuhpuh Jeova. Tuhsruhktuh, David el tui ac tilac fahsr wi miting. Mary el kwacfeacng in sie muhtwacn pahyuck wowo ac el ahkkahlwemye ohiyen sie mwet Christian. El oacyacpac luti tuhlihk ohnkohsr nahtuhl uh kacl Jeova ac el tahfwelah na in wi ke miting ac toeni luhlahp uh. Yac ekahsr tohkoh, ke pacl se tuhlihk nahtuhltahl inge mahtuhlah ac tilac muhta ke lohm seltahl uh, Mary el srackna kuhlwacnsuhpuh Jeova finne upaclah liki meet ah. Ke pacl se inge, David el muhtwacwacack in riti mackuhsin ma Mary el ac muhta fihliyac nahtuhl inge. Tohkoh, el sifwil muhtwacwacack in wi pac ke kuhtuh miting. Tuhlihk mukul se nuhtin sie tuhlihk nahtuhl inge suc yac ohnkohsr el ac sackuhnlah na meet acn in muhta lal ke acn in toeni uh. David el fin tiac wi, na tuhlihk mukul se inge ac fahk nuh sel, “Pahpah mahtuh, nga tiacna liye kom ke acn in toeni ac mihsenge.” Tukun yac 25, David el fohlohk nuh yurin Jeova ac el ac muhtwacn kiyacl uh engan lah ingena eltahl kuh in sifwil tuhkweni kuhlwacnsuhpuh Jeova.

15. Siacnyacn mahtuh uh ac kahsruh fuhkah siacnyacn fuhsr uh?

¹⁵ Satan el ahkkulukye sucu nuhkewa ke pacl inge. Pa inge sie srihpac pwacnacng siacnyacn suc kuhlwacnsuhpuh Jeova inge enenuh in akacsruhi nuh sin sie sin sie. Finne lusackac komtacl pahyuck, nuhnkuh ke ma kom kuh in fahk kuh oruh in ahkkweye moul in pahyuck lomtacl an. Komtacl fin sie siacnyacn suc mahtuh, komtacl ac kuh in mwe srihkasrak na wo se nuh sin siacnyacn fuhsr an. Sahp, komtacl kuh in suli sie siacnyacn fuhsr an in wi komtacl ke lutlut in sucu lomtacl an. Eltahl ac kuh in liye lah finne lusackac siacnyacn se pahyuck, eltahl srackna enenuh in ahkkahlwemye luhngse laltahl nuh sin sie sin sie ac inse sefanna.​—Titus 2:3-7.

‘KUHT IN UTYAK NU KE FINOHL LUHN JEOVA GOD’

16, 17. Meac mwet kuhlwacnsap luhn God suc inse sefanna eltahl ngwetlah liye ke pacl fahsruh uh?

¹⁶ Ke pacl se mwet Israel in pacl meet ah som nuh ke mwe ahkfuhlwact laltahl fin acn Jerusalem, eltahl tuhkweni orekma ac akacsruhi. Eltahl ahkolah ma nuhkewa nuh ke fuhfahsryucsr laltahl uh. Na, eltahl tuhkweni fuhfahsryucsr ac kahsruh sie sin sie. Ke tempuhl uh, eltahl nuhkewa tuhkweni alu ac kaksakihn Jeova. (Luke 2:41-44) Ke pacl inge, ke kuht ahkolah nuh ke moul ke facl sasuc uh, kuht enenuh in inse sefanna ac oruh ke kuhiyacsr nohfohn in akacsruhi. Yac kom kuh in nuhnkuh ke kuhtuh inkacnek ma kom kuh in oruh ma inge in yohk liki na meet ah?

¹⁷ Mwet ke facl se inge tiac insese ac eltahl oacyacpac amaci ke ma pucspucs. Tuhsruhktuh, kuht kuloh nuh sin Jeova lah el kahsre kuht in puhla mislac ac in kahlwem ke ma pwacye uh! Mwet lal fin facluh nohfohn uh kuhlwacnsuhpwacl ac alu nuh sel ke inkacnek ma el insewowo kac. Ac yohkna ke lwen sahflah inge, inse sefanna luhn mwet luhn Jeova uh yohk liki na meet ah. In oacna ma Isaiah ac Micah eltahl palye, kuht tuhkweni fahsr utyak nuh ke ‘finohl luhn Jeova God.’ (Isaiah 2:2-4; riti Micah 4:2-4.) Kuht arlacna engan ac ngwetlah liye ke pacl se ma mwet nuhkewa fin facluh uh tuhkweni muhta ac akacsruhi in alu nuh sin Jeova!