Jeova El Pahnglol “Mwet Kawuck Luhk”

1, 2. (a) Kuht etuh fuhkah lah mwet uh kuh in fototo ac kawuck nuh sin God? (b) Meac kuht ac fah sramsramkihn ke mwe lutlut se inge?

MUHTWACWACACK na ke pacl se kuht isuslac nwe ke pacl se kuht misac uh, kuht enenuh luhngse. Mwet uh enenuh in puhla fototo ac luhngse luhn kawuck laltahl uh. Tiac kain in luhngse se na inmahsrlon mukul ac muhtwacn uh muhkwena, tuhsruhktuh ma kuht enenuh emeet uh pa luhngse luhn Jeova. Mwet pucspucs eltahl tiac luhlahlfongi muh mwet uh kuh in fototo nuh sin God ke srihpen kuht tiac kuh in liyacl ac el kuhlacna. Tuhsruhktuh, kuht etuh ma pwacye uh!

² Ke Bible uh, kuht etuh lah oasr mwet suc kawuck nuh sin God. Kuht enenuh in lutlut ke mwe srihkasrak laltahl uh. Efuh? Mweyen fototo lasr nuh sin God pa finsrak se ma yohk srihpac emeet ke moul lasr uh. Pwacnacng, lwelah kuht in nuhnkuh ke mwe srihkasrak lal Abraham. (Riti James 2:23.) El eklac sie kawuck luhn God fuhkah? Fototo lal Abraham nuh sin God uh ma tuhkuh ke luhlahlfongi lal ac el etweyuck oacna “pahpah tuhmuhn mwet nuhkewa suc luhlahlfongi.” (Rome 4:11) Ke kom tuni mwe srihkasrak lal uh, siyuck sum sifacna, ‘Nga ac etahi fuhkah luhlahlfongi lal Abraham ac ahkkweye fototo luhk nuh sel uh?’

ABRAHAM EL EKLAC KAWUCK SE LUHN GOD KE INKACNEK FUHKAH?

3, 4. (a) Ahkuhtweyac lah oacna meac mwe srihfe se ma upac emeet nuh ke luhlahlfongi lal Abraham uh. (b) Efuh kuh Abraham el kuh in kihsackihn moul lal Isaac?

³ Srihke nuhnkuh, Abraham el apkuhran nuh ke yac 125 ke el fahsr utyak finohl soko ah.^[1] (Liye endnote.) Isaac, suc wen nahtuhl el oasr ke yac 25 ac el fahsr tohkohl. Isaac el utuck etong ac Abraham el us mitmit se wi kuhtuh pac ma sahyac in sang oruh e se. Sahp, pa inge fuhfahsryucsr se ma upac emeet nuh sel Abraham. Tuhsruhktuh, tiac ma ke srihpen mahtuhoh lal, mweyen el srackna kuh. Fuhfahsryucsr se inge upac nuh sel ke srihpen Jeova el siyuck elan kihsackuhnacng moul luhn wen se nahtuhl inge!​—Genesis 22:1-8.

⁴ Sahp pa inge mwe srihfe se ma upac emeet nuh ke luhlahlfongi lal Abraham uh. Kuhtuh mwet uh fahk muh God el suhlallacl ke el siyuck Abraham elan kihsackihn moul luhn wen nahtuhl uh. Ac kuhtuh pac mwet uh fahk muh Abraham el engan in oruh mweyen el tiac luhngse wen se nahtuhl inge. Mwet uh fahk kain in kahs inge ke srihpen wacngihn luhlahlfongi laltahl ac eltahl tiac kahlwem na pwacye kac lah ma inge orekma fuhkah. (Sie Corinth 2:14-16) Tuhsruhktuh, tiac kalmac pa el ahkos ke srihpen el tiac nuhnkuh kac. Abraham el ahkos ke srihpen luhlahlfongi lal uh pwacye. El etuh lah Jeova el tiac kuh in siyuck sel elan oruh kuhtwena ma ma ac ahkkweokyacl nwe tok. Abraham el etuh lah el fin ahkos, Jeova el ac fah ahkinsewowoyacl ac wen sefanna nahtuhl inge. Meac ahkkweye luhlahlfongi lal Abraham uh? Etwacack ac ma sikyak nuh sel uh.

5. Oacna fuhkah nwe Abraham el etuh kacl Jeova? Meac etwacack se inge oruh elan puhla?

⁵ Etwacack. Abraham el mahtuhlah ke sie siti pahngpahng Ur. Mwet ke siti se inge wekuhnacng pahpah tuhmwacl ah alu nuh sin god kikiacp pucspucs. (Joshua 24:2) Pwacnacng, fuhkah nwe Abraham elan etuh kacl Jeova? Bible uh ahkkahlwemye lah sucu lal Abraham pa Shem, sie sin wen nahtuhl Noah ah. Ac el moul nwe ke Abraham el sun yac 150. Shem el sie mukul suc arlacna yohk luhlahlfongi la. Pwacnacng, sahp el sruhmuhn kacl Jeova nuh sin sucu lal inge. Kuht tiac etuh na pwacye, tuhsruhktuh sahp pa inge inkacnek se oruh Abraham el kuh in eis etwacack kacl Jeova. Ma Abraham el lotwelah uh oruh el luhngse Jeova, ac etwacack se inge kahsrel in muhsaheack luhlahlfongi lal uh.

6, 7. Ma sikyak nuh sel Abraham inge ahkkweye fuhkah luhlahlfongi lal uh?

⁶ Ma Sikyak Nuh Sel uh. Ma sikyak nuh sel Abraham inge ahkkweye fuhkah luhlahlfongi lal uh? Kuhtuh mwet uh fahk muh nuhnak lasr uh pa oraclah puhlakihn lasr uh ac puhlakihn lasr uh pa oraclah orekma lasr uh. Ma Abraham el lotwelah ke God uh mokle insiacl in ahkyohkye suhnak lal nuh sin “LEUM GOD, El suc fuhlwactlacna, suc oraclah kuhsrao ac facluh.” (Genesis 14:22) Bible uh pahngon kain in suhnak se inge “sahngweng sin God.” (Hebrew 5:7, BMK) Kuht enenuh in sahngweng sin God kuht tuhfah kuh in fototo nuh sel. (Psalm 25:14) Pa inge ohiyac se ma oasr yohrohl Abraham ma moklel in ahkos Jeova.

⁷ God el fahk nuh sel Abraham ac Sarah eltahl in tuyak liki lohm seltahl fin acn Ur ac som muhta ke sie pacna acn. Eltahl tilac fuhsr ac eltahl ac enenuh in muhta ke lohm nuknuk ke lusen moul laltahl uh nohfohn. Abraham el finne etuh lah ac fah puhs mwe sensen, el sulaclah na muh el ac ahkos Jeova. Ke srihpen ahkostwen lal, God el ahkinsewowoyacl ac karuhnguhnuhl. Ke sie mwe puhpuhlyuck, ke pacl se Abraham el tuh luhkuhn na acnwucki ac Sarah, muhtwacn na kahto se kiyacl uh utucklac luhkel, Jeova el karuhnguhnuhltahl ke inkacnek luhn mwenmwen. Tiac pa inge pacl sefanna ma Jeova el kahsreltahllah uh, a el oruh pacl ke pacl sahyac uh. (Genesis 12:10-20; 20:2-7, 10-12, 17, 18) Ma sikyak nuh sel Abraham inge ahkkweye luhlahlfongi lal uh.

8. Etwacack ac ma kuht puhla sikyak nuh sesr uh ac ahkkweye fototo lasr nuh sin Jeova uh fuhkah?

⁸ Yac kuht kuh in kawuck fototo luhn God? Ahok, kuht kuh! In oacna Abraham, kuht enenuh in eis etwacack kacl Jeova. Kuht kuh pac in eis etwacack ac sun kuh puhla ma pucspucs ma sikyak nuh sin mwet inge. Ke pacl inge, arlacna yohk ac puhs ma oasr yohrohsr liki na pacl lal Abraham ah. (Daniel 12:4, BMK; Rome 11:33) Arlacna yohk etwacack in Bible uh ke God “suc oraclah kuhsrao ac facluh.” Ma kuht lotwelah uh oruh kuht in luhngse Jeova ac kahsre kuht in suhnakuhnuhl. Kain in luhngse ac suhnak inge pa mokle kuht in ahkos God uh. Ke pacl kuht ahkos uh, kuht liye karihngihnyuck ac mwe insewowo lal nuh sesr ac kuht ahkkweyeyuck ke ma kuht puhla sikyak nuh sesr inge ma ahkkweye luhlahlfongi lasr uh. Ke pacl se kuht kuhlwacnsuhpuh Jeova ke kuhiyacsr kewa, kuht ac fah puhla engan, mislac ac insewowo. (Psalm 34:8; Soakas 10:22) Ke yohkwelihk etwacack lasr ac ma sikyak nuh sesr uh, fototo lasr nuh sel uh kuhi liki meet ah.

ABRAHAM EL SRUOKYAC FUHKAH FOTOTO LAL NUH SIN GOD

9, 10. (a) Meac enenweyuck tuhfah fototo luhn mwet luo kuhi? (b) Meac ahkkahlwemye lah Abraham el ahksacohkye ac ahkkweye fototo lal nuh sin Jeova uh?

⁹ Fototo luhn mwet luo ac kuh in luhmweyuck nuh ke sie ma na sacohk. (Riti Soakas 17:17.) Ma inge tiac oacna sie mwe neinyuck ros ma arlacna yohk molo, a orekmakihnyuck in mwe yucn muhkwena. Tuhsruhktuh, ma inge oacna sie ros kahto ma enenuh kof ac karihngihnyuck wo tuh in fahrngelihk. Abraham el ahksacohkye ac sruokyacna fototo lal nuh sin Jeova. El oruh fuhkah ma inge?

¹⁰ Abraham el tahfwelah na in ahkkweye ahkostwen ac sahngweng lal nuh sin God uh. Ke sie mwe puhpuhlyuck, ke pacl se el fuhfahsryucsr som nuh Canaan wi sucu ac mwet kuhlwacnsap lal uh, el tahfwelah in lwelah Jeova elan kohluhl ke sulaclah lal uh kewana ke ma yohk ac ma srihk. Yac se meet liki Isaac el isuslac ah, ke pacl se Abraham el yac 99, Jeova el fahk nuh sel elan kosraclah mukul nuhkewa ke lohm sel uh. Yac Abraham el tahfuh luo kuh sukok srihpac tuh elan tiac ahkos ma Jeova el fahk elan oruh inge? Moh, el luhlahlfongi Jeova ac ahkos ma el fahk inge “in lwen sac pacna.”​—Genesis 17:10-14, 23.

11. Efuh kuh Abraham el sensen ke acn Sodom ac Gomorrah? Jeova el kahsrel fuhkah?

¹¹ Ke srihpen Abraham el ahkos Jeova pacl nuhkewa, finne ke ma srihsrihk, inmahsrloltahl kuhi. El puhla muh el kuh in sramsram nuh sin Jeova ke kuhtwena ma ac siyuck kahsruh ke ma upac ma el nuhnkuh kac. Ke sie mwe puhpuhlyuck, ke pacl se Jeova el fahk lah el ac fah kuhnahoslah siti Sodom ac Gomorrah, Abraham el nuhnkuh yohk kac uh. Efuh? El sensen muh mwet wo we inge ac wi na mwet kuluk ac misac. Sahp el sensen ke moul lal Lot, suc ac ma nahtuhl weacng sucu lal uh fin acn Sodom. Abraham el luhlahlfongi Jeova, “El suc nuhnuhnkuh facluh nohfohn,” pwacnacng el puhsisacl in sramsram nuh sin Jeova ke ma el nuhnkuh ac elyah kac inge. Jeova el arlacna mongfihsracsr nuh sin kawuck se lal inge in ahkkahlwemye nuh sel lah El pahkotwen. Jeova el ahkuhtweyac lah finne ke pacl se el oruh nuhnuhnkuh lal uh, el suk mwet wo ac el molweltahllah.​—Genesis 18:22-33.

12, 13. (a) Etwacack ac ma sikyak nuh sel Abraham uh kahsrel fuhkah tok? (b) Meac ahkkahlwemye lah Abraham el luhlahlfongi Jeova?

¹² Ma na kahlwem se lah etwacack ac ma nuhkewa ma sikyak nuh sel Abraham inge kahsrel in sruokyacna fototo lal nuh sin Jeova in kuh. Pwacnacng tok, ke Jeova el siyuck sel Abraham elan kihsackuhnacng moul luhn wen se nahtuhl uh, Abraham el etuh lah Jeova el mongfihsracsr, pahkotwen, kuh in luhlahlfongiyuck ac karuhnguhnuhl pacl nuhkewa. El luhlahlfongi na pwacye lah Jeova el tiacna eklac sie mwet suhlallacl kuh mwet wacngihn pahkomuhta la! Efuh kuh kuht fahk ohinge?

¹³ Meet liki Abraham el fahlac liki mwet kuhlwacnsap se lal uh, el fahk: “Muhta inse wi donkey uh. Nga ac tuhlihk se nuhtihk inge ac som nuh meet ah in alu, ac kuht ac fah fohlohkoh.” (Genesis 22:5) Meac kalmen kahs lal Abraham inge? Yac el kikiacp muh Isaac el ac weluhl fohlohk, finne el etuh lah el ac som in kihsackuhnuhllah? Moh. Bible uh fahk lah Abraham el etuh lah Jeova el kuh in ahkmoulyaclack Isaac liki misac. (Riti Hebrew 11:19.) Abraham el etuh lah kuh luhn Jeova pa oruh in oasr wen se nahtuhl ac Sarah uh finne eltahl arlacna mahtuhoh. (Hebrew 11:11, 12, 18) Pwacnacng, el akihlen lah wacngihn ma Jeova el tiac kuh in oruh. Abraham el tiac etuh lah meac ac sikyak ke lwen sac. Tuhsruhktuh, el luhlahlfongi lah Jeova el ac ahkmoulyeack wen se nahtuhl uh fin enenweyuck in muh wuhlelah nuhkewa lal sahyac uh ahkpwacyeyuck. Pa inge srihpac se pwacnacng Abraham el pahngpahng “pahpah tuhmuhn mwet nuhkewa suc luhlahlfongi in God”!

14. Ma upac fuhkah kom sun ke kom kuhlwacnsuhpuh Jeova? Mwe srihkasrak lal Abraham uh ac kahsre kom fuhkah?

¹⁴ Ke pacl inge Jeova el tiac siyuck sesr in kihsackihn tuhlihk nahtuhsr uh, tuhsruhktuh el siyuck kuht in ahkos masap lal uh. Kuhtuh pacl uh, kuht tiac kahlwem ke srihpac luhn masap inge kuh sahp upac nuh sesr in ahkos. Nuh oasr pacl kom puhla ohinge? Nuh sin kuhtuh mwet uh, orekma in luti uh pa upac nuh seltahl uh. Sahp eltahl mwekihn oruh upac nuh seltahl in sramsram nuh sin mwet eltahl tiac etuh uh. Nuh sin kuhtuh, upac nuh seltahl in siena liki mwet ke acn in orekma kuh acn in lutlut ac. (Exodus 23:2; Sie Thessalonica 2:2) Ke pacl se siyuckyuck sum in oruh sie ma upac, nuhnkuh ke mwe srihkasrak na wo ke luhlahlfongi ac puhlaik lal Abraham inge. Ke pacl se kuht nuhnkuh yohk ke mwe srihkasrak luhn mukul ac muhtwacn oaru inge, ma inge ac kuh in mokle kuht in etahi mwet inge ac in fototoyang nuh sin Jeova, suc kawuck lasr.​—Hebrew 12:1, 2.

SIE FOTOTO MA ACSE MWE INSEWOWO PUCSPUCS

15. Efuh kuh kuht kuh in luhlahlfongi na pwacye lah wacngihn sie pacl Abraham el auli ke oaru lal in ahkos Jeova?

¹⁵ Yac nuh oasr pacl Abraham el auli ke ahkostwen lal nuh ke ma Jeova el sapkihn nuh sel uh? Bible uh fahk lah Abraham el “misac ke el arulacna mahtuhoh.” (Genesis 25:8) Ke pacl se ma el yac 175, Abraham el nuhnkuh ke moul loes lal ac el arlacna engankihn. Efuh? Mweyen fototo lal nuh sin Jeova uh pa ma se ma yohk srihpac emeet nuh sel pacl nuhkewa. Tuhsruhktuh, tiac kalmen ma inge pa el tiac luhngse in wi moul ke pacl fahsruh uh.

16. Mwe insewowo fuhkah Abraham el ac fah puhla ke Paradise?

¹⁶ Bible uh ahkkahlwemye lah Abraham el “soano siti se suc God El ac fah luhmahlah ac muhsahelah, sie siti suc pweluhng kac ac fah oan ma pahtpaht.” (Hebrew 11:10) Abraham el luhlahlfongi muh sie lwen el ac fah liye siti sac, ma luhmweyuck nuh ke Tohkohsrahi luhn God, ma ac kol fin facluh nohfohn. Pwacye, el kuh in liye ma inge! Srihke luhmahlah ke nuhnak lom luhpan insewowo lal Abraham ke pacl se ma el ac fah muhta ke paradise fin facluh ac tahfwelah na in ahkkweye fototo lal nuh sin God. El ac fah insewowo in etuh lah mwe srihkasrak lal ke luhlahlfongi kahsruh mwet kuhlwacnsap pucspucs luhn God ke lusen tausin yac! Ke Paradise, el ac fah konwacack lah kisac sac ma orek ke Fineol Moriah luhmahlah nuh ke ma suc yohk emeet. (Hebrew 11:19) Ac el etwaclah pac lah ahsor yohk ma el puhla ke el ahkolah in kihsackihn moul luhn wen se nahtuhl inge Isaac, kahsruh million sin mwet oaru in kahlwem ke puhlakihn luhn Jeova ke el sang Wen nahtuhl, Jesus Christ, oana sie mwe molwelah nuh sin mwet uh. (John 3:16) Mwe srihkasrak lal Abraham uh kahsre kuht nuhkewa in srui mwe molwelah se inge, in ahkkahlwemye luhngse yohk suc wacngihn ma oacna!

17. Sulaclah fuhkah kom luhngse na pwacye in oruh, ac meac kuht ac fah lutlutkihn ke mwe lutlut tohkoh uh?

¹⁷ Lwelah kais sie sesr in sulaclah in etahi luhlahlfongi lal Abraham. In oacna Abraham, kuht enenuh etwacack ac puhlakihn ke moul lasr uh lah fuhkah woiyen Jeova. Ke kuht tahfwelah na in eis etwacack kacl Jeova ac in ahksol, kuht ac fah liye lah fuhkah el ahkinsewowoye ac karihngihn kuht. (Riti Hebrew 6:10-12.) Lwelah kuht in kawuck nuh sin Jeova ma pahtpaht! Ke mwe lutlut tohkoh uh, kuht ac fah lutlutkihn mwe srihkasrak tolu luhn mwet oaru suc eklac mwet kawuck fototo luhn God.