Job El Akfulatye Inen Jeova

“En Jeova in akinsemwomwoyeyuk.”​—JOB 1:21.

1. Su simusla buk se in Baibel inge su pangpang Job, a ngea ma inge simusyukla?

MOSES el oasr ke yea 40 matwe ke pal se el som liki an Ijipt in kaengla liki kasrkusrak lal Fero a el som nu in an Midian a el muta we. (Orekma 7:23) Ke lusen pal su el muta in an se inge, kalem la el long ke me srufwe puspus su Job el sun, su muta in an Uz su on apkuran nu ke an se su el muta we. Yea puspus tok, ke pal se Moses a met Israel nukewa elos apkuran nu ke an Uz ke saflaiyen fwufwasryesr lalos yen mesis, saap Moses el eis etauk ke saflaiyen yea puspus lal Job. In fwal nu ke ma met Ju elos lulalfongi, Moses pa simusla buk se inge in Baibel pangpang Job tia pat tokin Job el mise.

2. Ke inkanek puspus fuka buk lal Job el me akkeye nu sin met kulansap nukewa lun Jeova ke pal inge?

² Buk se inge Job el sang me akkeye yok nu ke lulalfongi lun met kulansap nukewa lun God ke pal inge. Ke inkanek puspus fuka? Me sramsram se inge fwa kasre kut in eis kalem mwomwo nu ke ma sikyak in kosrao su oasr kalme yok ka nu sesr a ma inge akkalemye ke kusensiyuk yok sripe se nu ke sumwos lun God in kol. Me sramsram kel Job el kasre kut pa in akyokye etauk lasr ke ma eneneyuk nu ke oiyen oaru lasr. A ma inge kasre kut in kalem ka la efu ku kutu pal Jeova el lela met kulansap puspus lal in sun me keok. Sayen ma inge, buk se inge Job el akkalemye la Setan su Devil el oana met Lokwalok se meet lun Jeova a lun met nukewa. Buk se inge el akkalemye pa la met sesumwos puspus su oana Job elos ku in sruokye oiyen oaru lalos nu sin Jeova fwinne oasr me srufwe upa elos sun. Lela kut in kalweni kutu ma sikyak su akkalemyeyuk in buk lal Job.

Setan el Srufwel Job

3. Mea kut etu kel Job, a efu ku Setan el akkolukyel?

³ Job el sie met kasrup a pengpeng, sie sifwen sou su kulang a mwo. El sie met su sang kas in kasru mwomwo a sang me kasru yok nu sin met enenu puspus. Yok liki nukewa, Job el sangeng sin God. Job el akkalemyeyuk oana sie met su “sumwosmwos a sumwos, a sie su sangeng sin God, a forla liki ma koluk.” Setan el akkolukyel Job ke sripen sangeng a lungse yok lal nu sin God, a tia ke sripen el kasrup ku pengpeng.​—Job 1:1; 29:7-16; 31:1.

4. Mea se inge oaru a paye?

⁴ Kas in mutamwauk ke me sramsram kel Job el akkalemye ke sie tukeni su orek in kosrao a lipufan nukewa fwakelosyuk ye mutun Jeova. Setan el oasr pa we, a el tukakunulak Job. (Ridi Job 1:6-11.) Fwinne Setan el sramsramkin ke me kasrup lal Job, ne ouinge el kaskas yok ke inkanek in lain ke oiyen oaru lal Job. Kas inge “oaru” a paye el kalmekin nu ke sumwosmwos, wangin meta, a wangin ma koluk. In oana ke oiya se su kas inge orekmakinyuk nu ka in Baibel, oaru lun metu el akkalemye ke paye lun insie in akkalemye lungse yok nu sin Jeova.

5. Mea Setan el fwak kel Job?

⁵ Setan el fwak mu Job el kulansap nu sin God ke sripen rapku lal, a tia ke sripen el oaru a paye nu sin God. Setan el fwak pa la Job el oaru nu sin Jeova meyen el akinsemwomwoyel a karungunul pal nukewa. In sang me top nu ke kas lal Setan inge, Jeova el lela Setan el an srufwe met oaru se inge. Ke sripe se inge, paenang in len sa na, Job el etauk la un kosro natul nukewa pusrapasrla a kunausyukla sin met koluk, wikin pa met kulansap nukewa lal anwuki, a tulik sengoul natul elos mise. (Job 1:13-19) Ya Setan el kunausla oiyen oaru lal Job? Baibel el akkalemye ke oiya mwomwo lal Job, meyen el fwak ouinge: “Jeova el ase, a Jeova el eisla. En Jeova in akinsemwomwoyeyuk.”​—Job 1:21.

6. (a) Mea sikyak ke siepa tukeni orek in kosrao? (b) Su oasr ke nunak lal Setan ke pal se el lain oiyen oaru lal Job nu sin Jeova?

⁶ Tok, siepa tukeni orek in kosrao. Setan el sifwil pa fwakak ma puspus in lainul Job, el fwak: “Kolo ke kolo, aok, ma nu kemwa yurin sie met el fwa sang ke moul lal. A inge asroela poum, a kalye srel a ikwel, a el fwa pilesre kom ye mutom.” Loang akmwoye nu ka la Setan el akkalemye pa la met puspus saye elos fwa fuleak oiyen oaru lalos. Ke el fwak, “Ma nukewa yurin sie met fwa sang ke moul lal,” Devil el kusensiyukkin oiyen oaru lun kutena “met” su alu nu sin Jeova, a tia Job mukena. Tokin ma inge, God el lela Setan elan akkolukyel Job ke sie mas upa. (Job 2:1-8) Tusruktu srakna oasr kutu pa me sruf upa puspus nu sel Job.

Me Lutlut Fuka Kut Ku in Lotela ke Oiya Mwomwo lal Job

7. Ke inkanek puspus fuka mutan kiyel Job a met tolu su muteta nu yurol elos aktoasryel Job?

⁷ Ke mutamwauk, mutan kiyel Job el sun pa me keok oana ke ma el sun. Mise lun tulik nukewa nutulos a ke tula lun me kasrup lalos akasoryel na upa. Paye la el toasr in liye mokul tumal ke el keok ke mas upa lal. Paenang el tung wowoyuk nu sel Job: “Ya kom srakna srukye sumwos lom? Pilesru God, a mise!” Tokin ma inge, mokul tolu inge Elifas, Bildad, a Zofar elos tuku nu yurol, elos srike in sang me akkeye nu sel Job. Tusruktu, elos orekmakin kaskas kikiap a elos akpayeye pa la elos “me akpwar koluk.” Ke sie me pupulyuk, Bildad el fwak mu tulik nukewa natul Job elos orala ma koluk a fwal nu selos in eis ma koluk su sikyak inge. Elifaz el fwak mu me keok lal Job el sikyak ke sripen fwako lun ma koluk lal in pal meeta. El akkalemye pa nunak in alolo ke met nukewa su sruokye oiyen oaru lalos fwin elos saok a akfulatyeyuk sin God! (Job 2:9, 11; 4:8; 8:4; 16:2; 22:2, 3) Job el sruokye na oaru a paye lal fwinne oasr me srufwe upa nu sel. Aok, el tafongla ke pal se el ‘akkalemyel sifwana mu el sumwosmwos a tia God.’ (Job 32:2) Ne ouinge, el sruokye oaru lal a el tia fuleak ke el sun kain in me keok puspus.

8. Me srikasrak mwomwo fuka Eleu el akkalemye nu sin met nukewa su lungse in sang kas in kai?

⁸ Kut ku in ridi pa ke ma simusla kel Eleu inge, su tuku pa nu yurol Job. Eleu el long meet ke kas nukewa lal Job a ke kas lun met tolu su muteta nu yurol. Fwinne el fwusr liki mokul akosr inge, Eleu el akkalemye lalmetmet yok. El akkalemye sunak nu sel Job ke pal se el sramsram nu sel. Eleu el kaksakunul Job ke inkanek sumwosmwos lal. Tusruktu el fwak pa la Job el nunku yok ke kafweang lal in akpayeye la wangin ma koluk lal. Tokin ma inge, Eleu el akkeyel Job la orekma in kulansap nu sin God ke inkanek oaru el saok a yok sripe pal nukewa. (Ridi Job 36:1, 11.) Sie me srikasrak na mwomwo pa inge nu sin met nukewa su lungse in sang kas in kasru nu selos su enenu me kai! Eleu el akkalemye mongfusrasr, el loang akmwoye, el sang kas in kaksak, a sang kas in kai su ku in akkeye met.​—Job 32:6; 33:32.

9. Fuka Jeova el kasrel Job?

⁹ Ma se safla, Job el arlana lut a insemwomwo ke pal se Jeova el sramsram nu sel! Ma simusla el akkalemye: “Jeova el topkul Job in fworu me.” Jeova el orekmakin kusensiyuk puspus, a el kael Job in aksumwosye nunak lal. Job el porongo kas in aksumwos, a el fwak: “Nga srik sripe . . . nga auliyuk in kutkut a apat.” Tokin Jeova el sramsram nu sel Job, El sang me kai nu sin met kawuk tolu lal inge ke sripen elos tia kaskaskin “ma fwal.” Job el enenu in pre kelos. Tokin ma inge “Jeova el ekulla sruo lal Job, ke el pre ke met kawuk lal, a Jeova el sang nu sel Job pal luo ma on yurol meeta.”​—Job 38:1; 40:4; 42:6-10.

Fuka Lupan Lungse Lasr Nu Sin Jeova?

10. Efu ku Jeova el tia loang nu ke kaskas kikiap lal Setan, ku el tia silaklak in kunausella?

¹⁰ Jeova pa Orala ma nukewa, a el pa Met Kol Fulatlana lun ma orekla nukewa. Efu ku el loang nu ke kaskas kikiap lun Devil? Meyen God el etu la fwin el tia loang nu ke kaskas kikiap lal Setan ku fwin el silaklak in kunausella, ma inge tia ku in sang me top mwomwo nu ke kaskas kikiap lal. Devil el fwak mu Job, sie met kulansap mwomwo lun Jeova, el fwa tia sruokye paye a oaru lal fwin ma saok lal, me kasrup nukewa lal tula. Tusruktu Job el tu na ku ke me srufwe nukewa. Tokin ma inge Setan el fwak mu kutena met el ku in forla liki God fwin el sun mas upa. Paye la Job el keok ke mas upa lal, tusruktu el sruokye oiyen oaru lal. Ke ma inge, met oaru se inge fwinne el sesumwos el akpayeye la Setan el kikiap. Na mea nu ke met kulansap puspus saye lun God?

11. Fuka Jisus el sang me top mwomwo nu ke kas in lain nukewa lal Setan?

¹¹ Aok, kais sie met kulansap lun God su sruokye oiyen oaru lal fwinne Setan el srufwel ke inkanek puspus lal el ku in akkalemye la kas in lain nukewa lun met lokwalok inge el kikiap a tia paye. Jisus el tuku nu fwalu a el sang sie me top na mwomwo nu ke kas in lain lal Setan. Jisus el sie met sumwosmwos, oana Adam su papa tuman met nukewa. Oiyen oaru lun Jisus nu ke el mise el akkalemye la Setan el kikiap a kas in lain nukewa lal el tia paye.​—Fwakyuk 12:10.

12. Met kulansap nukewa lun Jeova oasr pal mwomwo fuka a kunokon fuka lalos?

¹² Setan el kafweang in srufwe met nukewa su alu nu sin Jeova. Kais sie sesr oasr pal mwomwo lasr a oasr kunokon lasr in akkalemye la kut kulansap nu sin Jeova meyen kut lungse el a tia ke sripen oasr me insemwomwo su el ase nu sesr. Mea nunak lasr nu ke kunokon mwomwo se inge? Kut kalem ka la sie kunokon na mwomwo pa inge in akpayeye paye lasr nu sin Jeova. Ke sripen kut etu la Jeova el ase nu sesr ku tu kut fwa ku in muteng paenang ma inge akkeye kut. A in oana ke ma sikyak nu sel Job, el fwa oru inkanek tu kut fwa kutangla a muteng ke ma upa su sun kut.​—1 Korint 10:13.

Setan el Sie Met Lokwalok Koluk a El Som liki Ma Paye

13. Ma puspus fuka buk se inge Job el akkalemye kel Setan?

¹³ Buk Matu ku ma Simusla ke kas Hibru el akkalemye ma puspus ke orekma koluk lal Setan in lain Jeova a in kufusla met puspus. Ke buk fwusr ku ma Simusla ke kas Grik, kut ku in ridi ke orekma in lain lal Setan nu sin Jeova. A in Fwakyuk, kut lotela ke orekma lun Jeova God ke pal fwasru in akmutalye kolyuk lal a Setan el fwa kunausyukla. Buk se inge Job el akyokye etauk lasr ke orekma in lain lal Setan. Ke pal se Setan el wi ke tukeni se su orek in kosrao, el tia wi ka in sang kaksak nu sin Jeova. Oasr oiya koluk lun Devil a niyen sun lal arlana koluk. Tokin el kaskas kikiap kel Job a God el lela elan srufwel, “Setan el illa liki ye mutun Jeova.”​—Job 1:12; 2:7.

14. Setan el akkalemye oiya fuka nu sel Job?

¹⁴ Ke ma inge, buk se inge Job el akkalemyel Setan oana sie met lokwalok lun met nukewa su wangin pakomuta yuru. Inmasrlon pal luo oasr tukeni orek in kosrao oana ke ma akkalemyeyuk in Job 1:6 a in Job 2:1, oasr lusen pal se su tia eteyuk la putaka, a ke lusen pal inge Setan el srufwel Job ke inkanek upa. Oiyen oaru lal Job el oru Jeova in fwak nu sel Setan: “[Job] el srakna srukye mwo lal, kom fwinne purik yu lainul, in kunausella wangin sripe.” Tusruktu Setan el tia insese ka la kas in lain lal kel Job el kikiap. A, el fwak la enenu in orek sie pa me srufwe upa nu sel Job. Ke ma inge, Devil el srufwel Job ke pal se srakna oasr me kasrup lal a ke pal se el sekasrupla a asor yok. Kalem la, wangin na paye pakomuta lal Setan nu sin met enenu, ku ke met su sun ongoiye. El srunga met nukewa su sruokye oiyen oaru lalos nu sin God. (Job 2:3-5) Ne ouinge, paye lal Job el akkalemye la Setan el kikiap.

15. Mea ma oana sie inmasrlon met nukewa su som liki alu paye ke pal inge a kel Setan?

¹⁵ Setan pa ma orekla se meet su forla liki ma paye. Met nukewa ke pal inge su som liki ma paye elos akkalemye pa kain in oiya koluk lun Devil. Nunak lalos nenela ke oiya koluk nu sin met puspus ke congregation, nu sin met elder ke congregation, ku nu sin Governing Body. Kutu sin met su som liki alu paye elos srunga na paye in orekmakin inen God, Jeova. Elos tia insemwomwokin in lutlut kel Jeova ku in oru orekma in kulansap nu sel. In oana Setan su papa tumalos, met nukewa inge su tia tu ku ke ma paye elos lungse in akkolukye met nukewa su sruokye ku oiyen oaru lalos nu sin God. (Jon 8:44) Pa inge sripe su paenang met kulansap nukewa lun Jeova elos srunga in sramsram ku asrouki nu selos!​—2 Jon 10, 11.

Job el Akfulatye Yok Inen Jeova

16. Kain in oiya mwomwo fuka Job el akkalemye nu sin Jeova?

¹⁶ Job el orekmakin a kaksakin inen Jeova pal nukewa. Fwinne ke pal se su el arlana asor ke el longak la tulik nukewa natul elos mise, Job el tia nunku a fwak kutena ma koluk nu sin God. Fwinne oasr pal Job el tafongla in nunku mu God pa oru ma koluk su el sun, el srakna akfulatye ke inkanek yok inen Jeova. Ke sie soakas lal, Job el akkalemye: ‘Liye! Sangeng sin Jeova, pa inge lalmetmet a in fwasr liki ma koluk, pa inge etauk.’​—Job 28:28.

17. Mea kasrel Job in sruokye oiyen oaru lal?

¹⁷ Mea kasrel Job in sruokye oiyen oaru lal? Kalem la, meet liki ongoiye puspus sikyak, el akkeyela tari fototo mwomwo lal nu sin Jeova. Fwinne wangin me akpayeye lasr la el etu la Setan el lainul Jeova, tusruktu Job el lungse na paye in sruokye oiyen oaru lal. El fwak: “Nu ke pal nga mise nga fwa tia sisla sumwos luk liki yu.” (Job 27:5) Job el akkeye fuka kain in fototo mwomwo inge? Wangin alolo ka la, el aksaokye ma el long tari ke orekma nukewa lun God nu sel Ebream, Isaak, a Jekob, su met inge nukewa pa sou loeloes lal. A ke inkanek lun orekma lal in loang yok ke ma orekla puspus, Job el ku in eis etauk a kalem yok ke oiya mwomwo puspus lun Jeova.​—Ridi Job 12:7-9, 13, 16.

18. (a) Fuka Job el akkalemye lungse yok lal nu sin Jeova? (b) Ke inkanek puspus fuka kut ku in etawi me srikasrak mwomwo lal Job?

¹⁸ Ma nukewa su Job el lotela el akkeye lungse lal in akinsemwomwoye Jeova. Ke sripen el nunku mu tulik natul nukewa elos oru kutena ma su tia akinsemwomwoye God ku saap elos “pulesru God insielos,” ma inge oru elan kisekin me kise puspus nu sin God pal nukewa. (Job 1:5) Fwinne ke pal se su el sun me srufwe upa, Job el srakna fwak ma mwomwo puspus kel Jeova. (Job 10:12) Sie me srikasrak na mwomwo pa inge! Kut enenu pa in eis etauk sumwos pal nukewa kel Jeova a ke akwuk nukewa lal. Kut enenu pa in akpayeye akwuk mwomwo lasr ke lutlut, in wi ke meeting nukewa, ke pre, a in sulkakin peng mwo. Sayen ma inge, kut oru ke ku lasr kewa in akkalemye nu sin met nukewa inen Jeova. A in oana ke oiyen oaru lal Job el akinsemwomwoye Jeova, oiyen oaru lun met kulansap nukewa lun God ke pal inge ku in oru insien Jeova in engan. Me lutlut nu ka fwa akuteyuki ke me lutlut toku.

Ya Kom Esam?

• Efu ku Setan el lungse na paye in srufwel Job?

• Kain in me srufwe fuka Job el muteng ka? A oiya fuka el akkalemye?

• Mea ku in kasre kut in sruokye oiyen oaru lasr, oana Job el oru?

• Mea kut lotela kel Setan ke buk se inge Job?

[Picture on page 10]

Me sramsram kel Job el kasre kut in loang yok ke kusensiyuk nu ke sumwos lun God in kol in kosrao a fwalu

[Picture on page 12]

Oiyen oaru lom ku in srufweyukla ke ma sikyak puspus fuka?