SIFAC KE KOLO | EFUH KUH KUHT IN SUWOHS AC PWACYE?
Ohiyac Sesuwohs uh Ahkkulukye Kom Fuhkah
“Oasr na ma upac ma kuh in sikyak, tuhsruhktuh ma inge kuh in ahkwoyeyucklac ke kuhtuh inkacnek sesuwohs.”—Samantha, South Africa.
Yac kom insese ke fahk se inge? In oacna Samantha, kuht nuhkewa sun ma upac ke kais kuhtuh pacl. Ohiyac ma kuht arlacna ahksacohkye uh ac kuh in kahlwem ke pacl ma srihfeyuck kuht in oruh ma sesuwohs. Ke sie mwe puhpuhlyuck, kuht fin kain in mwet se suc arlacna sruhnga in sun mwe mwekihn, kuht ac kuh pacna in nuhnkuh muh ohiyac sesuwohs uh ac kuh in kahsre kuht. Tuhsruhktuh, ke pacl se ma pwacye uh konweyuckyak, arlacna yohk mwe ahsor ma tuhkuh kac. Nuhnkuh ke ma ac fah sramsramkihnyuck tohkoh inge.
OHIYAC SESUWOHS UH KUHNAHOSLAH LUHLAHLFONGI LUHN MWET
Fototo lasr nuh sin mwet sahyac uh fal nuh ke luhlahlfongi lasr nuh seltahl. Ke pacl se ma mwet luo luhlahlfongi sie sin sie, eltahl fototo nuh sie ac tiac sensen sin mwet se sahyac an. Tuhsruhktuh, luhlahlfongi luhn mwet se nuh sin sie mwet ac tiac kuh in sikyak ke kihtin pacl na. Luhlahlfongi luhn mwet se nuh sin sie pac mwet yohkwelihk ke eltahl kwacna tuhkweni sramsram nuh sin sie sin sie ke inkacnek pwacye ac tiac nuhnkuh kacltahl sifacna. Tuhsruhktuh, luhlahlfongi luhn mwet se kuh in wacngihnlac ke sie orekma sesuwohs. Ac ke pacl se ma luhlahlfongi se inge wacngihnlac uh, ac arlacna upac in sifwil fohlohk.
Nuh oasr tari pacl ma sie mwet suc kom nuhnkuh muh kawuck na wowo se lom el kiacpwekomlac? Fin ohinge, meac kom puhla? Kahlwem lah kom ngalyak ac puhla muh el kuhtasrihk nuh sum. Inkaiyen mwet uh ac puhla pac ohinge. Wacngihn ahlohloh kac lah ohiyac sesuwohs uh kuhnahoslah inmahsrlon mwet.
OHIYAC SESUWOHS UH ARLACNA SA IN FAHSRELIHK
Sie lutlut ma oreklac sel Robert Innes, suc professor se ke economics ke University of California, el konwacack lah “ohiyac sesuwohs uh arlacna sa in fahsrelihk.” Ke srihpac se inge, ohiyac sesuwohs uh kuh in luhmweyuck nuh ke sie mas upac. Ke kom kwacna wi sie mwet suc kikiacp, yohk mwe sensen nuh sum in oacyacpac kikiacp.
Kom ac oruh fuhkah kom in tiac sun mwe sensen ma tuhkuh ke ohiyac sesuwohs inge? Bible uh kuh in kahsre kom. Nuhnak muhnahs nuhnkuh ke kuhtuh kahs in kahsruh ke Bible uh.