SIFAC KE KOLO | EFUH KUH KUHT IN SUWOHS AC PWACYE?
Yac Ohiyac Suwohs ac Pwacye uh Srackna Ahkkahlwemyeyuck ke Pacl Inge?
Hitoshi el orekma ke ip luhn accounting ke acn in orekma se lal fin acn Japan. Ke el ac mwet kol se lal kalweni mukwikwi luhn mani ke business se laltahl inge, fwack nuh sel Hitoshi muh el enenuh in kikiacp ke report lal uh. Hitoshi el ahkuhtweyac lah nuhnak ac puhlakihn lal uh tiac kuh in lwelah elan kikiacp ke orekma lal uh. Ke ma inge, mwet kol se lal inge ahksahngwengyacl muh el ac sisilac ke orekma lal uh ac pa inge ma sikyak ah.
Ke mahlwem ekahsr tohkoh, Hitoshi el arlacna ahsor ke srihpen orekma pucspucs ma el nwacna nuh kac. Ke sie mwe puhpuhlyuck, el fahk ke sie interview lal inge lah el tiac kuh in kikiacp ke kuhtwena inkacnek ke orekma lal uh. Mwet se ma kihsen siyuck sel inge el tohpkohl ac fahk, “Nuhnak lom an arlacna usrnguck!” Sucu ac kawuck lal Hitoshi inge ahkkweyacl elan tu na kuh ke ohiyac suwohs lal uh, tuhsruhktuh el muhtwacwacack in ahlohloh. Ke sie mwe puhpuhlyuck, el nuhnkuh: “Sahp tiac wo nga in sruokyac ohiyac suwohs ac pwacye luhk nuh ke luhlahlfongi luhk uh.”
Ma sikyak nuh sel Hitoshi inge luti kuht lah tiac mwet nuhkewa ahksacohkye ohiyac suwohs ac pwacye uh. Kuhtuh mwet uh puhla muh ohiyac wo inge oraclah ma upac, yohk na ke ip luhn business. Sie muhtwacn suc orekma fin acn South Africa el fahk, “Nga muhta inmahsrlon mwet suc ahkkahlwemye ohiyac sesuwohs ac kuhtuh pacl uh upac in tiac oacna eltahl.”
Sie kain in ohiyac sesuwohs ma kwacna orek ke pacl inge pa kahskahs kikiacp. Ke yac ekahsr somlah ah, lutlut se oreklac sel Robert S. Feldman sie psychologist ke University of Massachusetts Amherst, el ahkkahlwemye lah percent 60 ke mwet mahtuh uh fahklah kahs kikiacp se ke lusen minit singucul ma eltahl sramsram. Feldman el fahk, “Sie mwe lut na yohk in konwacack ma inge. Kuht tiac pahngon muh kikiacp uh sie ma mwet uh pahlah in oruh ke kais sie lwen in moul laltahl.” Yac kom tiac nuhnkuh muh sie ma usrnguck lah inkaiyen mwet uh sruhnga in kiacpweyuck eltahl, a inkaiyen mwet uh kikiacp?
Efuh kuh arlacna puhs mwet kikiacp, pihsrapasr ac oruh kuhtuh pac kain in ohiyac sesuwohs ke pacl inge? Ohiyac sesuwohs uh ahkkulukye mwet nuhkewa fuhkah? Ac yohk srihpac liki nuhkewa, kuht ac oruh fuhkah kuht in tiac wi ke orekma kuh ohiyac sesuwohs nuhkewa?