Nuhnkuh Yohk ke Ma luhn Nguhn ke Pacl Nuhkewa

1, 2. Meac oruh mwet uh in siena liki ma orahkrahk uh?

MWE nuhnak luhn mwet uh sie ma usrnguck ac wacngihn ma oacna. Ke sie mwe puhpuhlyuck, oasr kuh luhn sie mwet in lutlut ac etwaclah kahs (language) uh. Kahs uh pa oruh kuht kuh in rit, sihm, kahskahs ac kahlwem ke ma kuht lohng uh. Ma inge use pac kuh lasr in puhruhe ac yuck on in kaksak nuh sin Jeova. Ma inge nuhkewa oruh kuht in siena liki ma orahkrahk uh. Scientist uh tiac kuh in kahlwem na pwacye kac lah mwe nuhnak lasr uh oruh fuhkah ma na usrnguck inge.

² Jeova el use kuh lasr in kahskahskihn kahs oacna sie mwe sang. (Psalm 139:14; Fwackyuk 4:11) El oacyacpac use sie mwe sang ma oruh kuht in siena liki kain in ma orahkrahk nuhkewa. Mwet uh oreklac ‘oacna luhman’ God. Oasr sukohsohk luhn mwet uh in sifacna oruh sulaclah laltahl ac in orekmakihn kahs uh in kuhlwacnsuhpuh Jeova ac kaksakuhnuhl.​—Genesis 1:27

3. Meac Jeova el use nuh sesr in oruh kuht in lahlmwetmwet?

³ Jeova el use Bible uh nuh sesr in ahkkahlwemye ke inkacnek suwohs ma el ke kuht in kuhlwacnsuhpwacl ac alu nuh sel kac uh. Bible uh kuh ip kac uh oasr tari ke kahs ma puhs liki 2,800. Ke pacl se kuht muhta nuhnkuh ke ma Bible uh fahk, kuht kuh pac in nuhnkuh ma uh oacna God. (Psalm 40:5; 92:5; 139:17) Nuhnak luhn Jeova uh oruh kuht in lahlmwetmwet ac kol kuht nuh ke moul ma pahtpaht.​—Riti Luo Timothy 3:14-17.

4. Meac kalmac in nuhnkuh yohk? Kihsen siyuck fuhkah ma kuht ac fah sramsramkihn?

⁴ Kalmen nuhnkuh yohk pa in oakiyac nuhnak lom an ke sie ma ac in arlacna lohacng ac nuhnkuh ahkwoyac. (Psalm 77:12; Soakas 24:1, 2) Arlacna yohk mwe insewowo ma kuht eis ke pacl se kuht nuhnkuh yohk ke ma kuht lotwelah kacl Jeova ac Jesus uh. (John 17:3) Ke mwe lutlut se inge kuht ac fah tohpohklah kihsen siyuck inge nuhkewa: Piyac inkacnek wo in rit, tuh in fihsracsr nuh sesr in nuhnkuh yohk ke ma kuht riti uh? Meac kuht kuh in nuhnkuh yohk kac uh? Ac meac ac kuh in kahsre kuht in engankihn ac in nuhnkuh yohk ke ma kuht riti uh pacl nuhkewa?

KWACFEACNG IN OASR MA KOM EIS KE LUTLUT LOM AN

5, 6. Meac ac kuh in kahsre kom in esam ac kahlwem na pwacye ke ma kom riti an?

⁵ Yac kom nuh akihlen tari lah kom kuh in oruh kais kuhtuh ma ac tiac nuhnkuh kuh lohacng nuh kac lah kom oruh, oacna nuh ke momong, fahsr, kuh kahsruhsr ke bicycle? Sahp oasr pacl ma kom rit a kom tiac nuhnkuh kac. Sahp ke kom rit uh, kom muhtwacwack pac in nuhnkuh ke kuhtuh pacna ma sahyac. Meac kom kuh in oruh tuh kom in fahsr liki ma inge? Yohk srihpac kom in lohacng nuh ke ma kom riti an ac in nuhnkuh yohk ke kalmac an. Na, ke pacl se kom sun sahflahiyen paragraph se kuh sihfac srihsrihk ke mwe rit se, tui ac nuhnkuh ke ma kom riti an. Nuhnkuh ke ma kom lotwelah an ac oruh kom in kahlwem na pwacye kac.

⁶ Scientist uh konwacack lah fihsracsr in esam sie ma kuht fin lohng puhsracsr ke pacl se kuht rit uh. Jeova el etuh ma inge pa oruh el fahk nuh sel Joshua muh elan riti puk in ma suhmuhslah uh “ke puhsra srihsrihk.” (Riti Joshua 1:8.)a Kom fin kuh in lohng puhsrem ke kom riti sie ma, ma inge ac kuh pac in kahsre kom in lohacng ahkwoyac nuh kac ac in esamyac.

7. Piyac pacl se ma wo emeet in muhta nuhnkuh yohk ke Bible uh? (Liye petsac se meet ke mwe lutlut inge.)

⁷ Arlacna yohk kwacfeacng ma kuht enenuh in oruh tuh kuht in nuhnkuh yohk ac lohacng na nuh ke ma kuht lutlut kac uh. Pa inge srihpac se pwacnacng wo kom in muhta nuhnkuh yohk ke ma inge ke sie pacl ma kom tiac tohtohlah ac ke sie acn ma mihs ac wacngihn kuhtwena ma in ahkkulukye kom. David el konwacack lah pacl se ma wo emeet nuh sel in nuhnkuh yohk ke ma inge uh pa ke pacl se el muhta tari fin mwe oan kiyacl ke fong. (Psalm 63:6) Jesus, suc mwet na suwohswohs se, el sulaclah sie acn na mihs tuh elan muhta nuhnak ac puhruhe we.​—Luke 6:12.

NUHNKUH YOHK KE MA WO

8. (a) Meac kuht kuh in muhta ac nuhnkuh yohk kac? (b) Meac puhlakihn luhn Jeova ke pacl se kuht sruhmuhnuhl nuh sin mwet sahyac uh?

⁸ In wekuhnacng ma kom riti ke Bible uh, oasr pac ma sahyac kom kuh in nuhnkuh yohk kac. Ke sie mwe puhpuhlyuck, ke pacl se kom liye sie ma oreklac na usrnguck luhn Jeova, tui ke kihtin pacl ac siyuck sum sifacna, ‘Meac ma inge lutiyuc kacl Jeova?’ Kain in nuhnak inge ac fah mokle kom in sang kuloh nuh sin Jeova ke inkacnek luhn puhruhe. Ac ke pacl ma kom wi mwet sahyac, kom ac ke sruhmuhn ma kom puhla inge nuh seltahl. (Psalm 104:24; Orekma 14:17) Jeova el akihlen ac el engan ke pacl ma kuht nuhnkuh yohk, puhruhe ac sramsram nuh sin mwet sahyac uh kacl. Bible uh ahkkweye kuht ke kahs inge: ‘Ac sie puk in acsmakihn sihmihsyucklac ye muhtahl, ke elos suc sahngweng sin Jeova, ac suc nuhnkuh ke El.’​—Malachi 3:16, BMK.

9. (a) Meac Paul el fahk nuh sel Timothy elan nuhnkuh yohk kac? (b) Meac kuht kuh in nuhnkuh yohk ke pacl se kuht ahkolah nuh ke orekma in luti uh?

⁹ Mwet sap Paul el fahk nuh sel Timothy elan nuhnkuh yohk ke sramsram, orekma ac mwe luti lal uh. (Riti Sie Timothy 4:12-16.) Kom kuh pac in nuhnkuh yohk ke ma inge. Ke sie mwe puhpuhlyuck, ke pacl se kom ac ahkolah nuh ke sie mwet lutlut lom ke Bible, kom enenuh pacl in nuhnkuh yohk kac. Nuhnkuh ke mwet lutlut lom an ac srihke konwacack kihsen siyuck kuh mwe puhpuhlyuck ma ac kahsrel in kapkapwack. Ke kom orekmakihn inkacnek inge in ahkolah nuh ke mwet lutlut se, luhlahlfongi lom uh oacyacpac ahkkweyeyuck ac kom eklac mwet luti na wowo se suc engan in luti ke Bible. Kom ac kuh pac in engankihn orekma in luti uh ke kom oraclah pacl in nuhnkuh yohk kac meet liki kom som. (Riti Ezra 7:10.) Sahp kom kuh in riti sie sapta ke puk luhn Orekma in kahsre kom in eklac sie mwet moniyuck ke orekma in luti uh. Kom kuh pac in nuhnkuh yohk ke fuhs in Bible ma kom ke orekmakihn ke lwen sacn ac mwe rit ma kom luhngse in kihte an. (Luo Timothy 1:6) Nuhnkuh ke mwet ke acn in forfor lom an ac ma kom kuh in fahk tuh in pihrihk insiacltahl. Ke kom ahkolah ke inkacnek inge, kom ac kuh in orekmakihn Bible uh ke inkacnek se ma wo emeet in sang ma loh nuh sin mwet sahyac.​—Sie Corinth 2:4.

10. Meac kuhtuh pac ma wo sahyac ma kuht kuh in nuhnkuh yohk kac?

¹⁰ Meac pac kuhtuh ma sahyac ma kom kuh in nuhnkuh yohk kac uh? Kom fin sihmihs mwe sramsram ma orek nuh sin mwet nuhkewa ac oacyacpac ke toeni luhlahp, oraclah pacl lom in muhta kalweni ma inge. Ke pacl se kom oruh ohinge, siyuck sum sifacna, ‘Meac nga lotwelah ke Kahs luhn God ac ke u lal uh?’ Kom kuh pac in nuhnkuh yohk ke kais kuhtuh mwe ahkuhtweyac ma ahkkahlwemyeyuck ke mahlwem nuhkewa ke mackuhsin inge, Tower in San ac Awake! ac oacyacpac ke ma kihtakatlah ke toeni luhlahp se tari ac. Ke kom riti Yearbook uh, tui ke kihtin pacl tukun kom riti ma sikyak nuh sin mwet ingacn, nuhnkuh kac, ac lwelah ma inge in sun insiom. Ke pacl se kom riti mwe rit nahtuhsr uh, sahp kom kuh in markiyac ma yohk srihpac nuhkewa kac uh kuh suhmuhslah sisken paragraph an. Ma inge ac kahsre kom ke pacl se kom ahkolah in sifwil fohlohk nuh yurin mwet suc engan in lohng, ke sramsram in ahkkweye luhn sie mwet elder nuh sin sie mwet lili, ac ke sie mwe sramsram. Yohk liki nuhkewa, ke kom tui kihtin pacl ac nuhnkuh yohk ke ma kom riti ac lutlut kac an, ma inge ac oraclah pacl wo se nuh sum in lwelah mwe lutlut inge in sun insiom ac in puhruhe sang kuloh nuh sin Jeova ke ma wo nuhkewa ma kom lotwelah uh.

NUHNKUH YOHK KE KAHS LUHN GOD LWEN NUHKEWA

11. Piyac mwe rit se ma yohk srihpac emeet kuht in nuhnkuh yohk kac uh? Ac ma inge ac kahsre kuht fuhkah? (Liye footnote.)

¹¹ Pwacye lah Bible uh pa mwe rit se ma yohk srihpac emeet kuht in nuhnkuh yohk kac uh. Tuhsruhktuh, ac fuhkah fin sie lwen tiac sifwil lweyucklac in oasr Bible nuhtum?b (Liye footnote.) Wacngihn mwet ac kuh in tulokihn kom in tiac nuhnkuh ke ma kom esamyac tari an, oacna fuhs ma kom luhngse kuh on ke Tohkohsrahi uh. (Orekma 16:25) Nguhn luhn God ac fah kahsre kom in esam ma kom lotwelah uh, ac ma inge ac kahsre kom in sruokyacna oaru lom uh.​—John 14:26.

12. Meac sie inkacnek ma kom kuh in oakiyac pacl in rit Bible lom ke lwen nuhkewa?

¹² Meac sie inkacnek ma kom kuh in oraclah oakwuck lom nuh ke rit Bible ke lwen nuhkewa? Sahp ke kuhtuh lwen in wik se, kom kuh in riti ac nuhnkuh yohk ke rit Bible ma orek ke Lutlut in Oruh Ma luhngse luhn Jeova ke wik sacn. Ke lwen sahyac an, kom kuh in riti puk luhn Matthew, Mark, Luke, ac John ac nuhnkuh yohk ke ma Jesus el fahk ac oruh. (Rome 10:17; Hebrew 12:2; Sie Peter 2:21) Oasr pac mwe rit nahtuhsr ma ahkuhtweyac ac tahkuhnlah ma nuhkewa ma sikyak ke moul lal Jesus. Mwe rit se inge ac kuh in kahsre kom in engankihn ma nuhkewa ma kom riti ke puk in Bible ingacn.​—John 14:6.

EFUH KUH ARLACNA YOHK SRIHPAC IN NUHNKUH YOHK

13, 14. Efuh kuh yohk srihpac nuh sesr in tahfwelah na in nuhnkuh yohk kacl Jeova ac Jesus? Ac meac ma inge fah mokle kuht in oruh?

¹³ Ke sie mwet el nuhnkuh yohk kacl Jeova ac Jesus, ma inge ac kuh in kahsrel elan eklac sie mwet Christian suc pah ac mahtuh in nuhnak ac orekma ac elan sruokyacna luhlahlfongi yohk lal. (Hebrew 5:14; 6:1) Sie mwet suc srihklac pacl lal in muhta nuhnkuh ke God ac kais kuhtuh na loesaclihk ke fototo lal nuh sin Jeova kuh sahp el ac kuh pac in sruhngacllah. (Hebrew 2:1; 3:12) Jesus el sensenkihn kuht muh kuht fin tiac lohng kuh eis Kahs luhn God ke sie “nuhnak wo ac ahkostwen,” ma inge ac tiac kuh in oan ke nuhnak lasr ac insiacsr. Tuhsruhktuh, ac fihsracsr kuht in lohsrlah ke ‘elyah lasr, mwe kahsruhp ac mwe pwacr luhn moul se inge.’​—Luke 8:14, 15.

¹⁴ Pwacnacng, lwelah kuht in tahfwelah na in nuhnkuh yohk ke Bible uh ac in etwacllah Jeova liki na meet ah. Ma inge ac mokle kuht in etahi ohiyacl na pwacye. (Luo Corinth 3:18) Kuht kuh in tahfwelah na lutlut ac etahi Pahpah tuhmwacsr inkuhsrao ma pahtpaht. Wacngihn ma wo oacna!​—Ecclesiastes 3:11.

15, 16. (a) Ma wo fuhkah kom eis ke kom muhta nuhnkuh yohk kacl Jeova ac Jesus? (b) Efuh kuh tiac fihsracsr in nuhnkuh yohk ke ma inge pacl nuhkewa, tuhsruhktuh efuh kuh yohk srihpac?

¹⁵ Ke kom nuhnkuh yohk kacl Jeova ac Jesus, ma inge ac kahsre kom in sruokyac na moniyuck lom nuh ke ma pwacye uh. Moniyuck lom uh ac ahkkweye mwet lili wiyom ac mwet suc kom sun ke orekma in luti uh. Ac ke pacl se kom nuhnkuh yohk ke ma Jeova el oruh nuh sum ke inkacnek luhn mwe kihsac ke mwe lahngo kacl Jesus, kom ac tahfwelah na in ahksacohkye fototo lom nuh sin God. (Rome 3:24; James 4:8) Mark, sie mukul lili fin acn South Africa el muhta in presin ke yac tolu ke srihpen luhlahlfongi lal uh. El fahk: “Orekma in nuhnkuh yohk ac kuh in luhmweyuck nuh ke sie fuhfahsryacsr na wo. Kuht fin ahkyohkye pacl lasr in nuhnkuh yohk ke ma luhn nguhn, puhseni ma sasuc kuht ac konwacack kacl Jeova. Ke pacl ma nga puhla muh nga arlac inse toasr kuh elyahlac ke ma ac sikyak uh, nga ac sruhkwack na Bible nuhtihk uh ac nuhnkuh yohk sie ma nga riti ke Ma Suhmuhslah uh. Nga puhla muh ma inge oruh nga tiac arlac elyah.”

¹⁶ Moul ke facl se inge arlac nwacnwaclah ke ma lusrohngtwen, pwacnacng upac in konwacack pacl in muhta nuhnkuh yohk ke Bible uh. Patrick, sie mukul lili fin acn Africa, el fahk: “Nuhnak luhk uh oacna sie pohk in mail ma nwacnwaclah ke kain in ma, kewana ma luhngkihnyuck ac ma tiac luhngkihnyuck, ac nga enenuh in sraclihk ma inge ke kais sie lwen. Ke nga ilucs koanon nuhnak luhk uh, nga kwacna konwacack nuhnak in fosrngah ma nga enenuh in puhruhe nuh sin Jeova kac meet liki nga nuhnkuh yohk ke kuhtwena ma ke sie nuhnak nwacsnwacs. Finne yohk pacl nga enenuh tuh fah nga kuh in muhta nuhnkuh yohk ke ma luhn nguhn, nga puhla lah nga fototo nuh sin Jeova liki na meet ah. Ma inge ikacslah nuhnak luhk uh nga in kahlwem na pwacye ke ma pwacye uh.” (Psalm 94:19) Ahok, arlacna yohk ma kuht kuh in eis ke pacl se kuht riti ac nuhnkuh yohk ke Bible uh lwen nuhkewa.​—Orekma 17:11.

KOM ORACLAH FUHKAH PACL NUH KAC?

17. Kom ac konwacack fuhkah pacl wo nuh sum in muhta nuhnkuh yohk ke Bible uh?

¹⁷ Kuhtuh mwet uh toang na tuhkahkwek ke lututacng in rit, nuhnkuh yohk kac, ac in puhruhe. Kuhtuh pac mwet uh oruh ma inge ke pacl in mongo kuh monglac laltahl ke infulwacn lwen. Sahp pacl se ma wo emeet nuh sum in riti Bible nuhtum an pa ke ekuh kuh meet liki kom mutul. Kuhtuh mwet uh luhngse rit Bible ke lututacng, na sulpac meet liki eltahl mutul. (Joshua 1:8) Ma se ma yohk srihpac emeet uh pa kom in oruh ma inge ac orekmakihn pacl lom ke inkacnek ma wo emeet tuh kom in kuh in nuhnkuh yohk ke Kahs luhn God uh lwen nuhkewa.​—Ephesus 5:15, 16.

18. Meac Bible uh wuhlelah nuh sin mwet ma nuhnkuh yohk ke Kahs luhn God ke lwen nuhkewa ac kwacfeacng in orekmakihn ma eltahl lotwelah uh?

¹⁸ Bible uh wuhlelah lah Jeova el ac fah ahkinsewowoye mwet nuhkewa suc nuhnkuh yohk ke Kahs lal ac kwacfeacng in orekmakihn ma eltahl lotwelah uh. (Riti Psalm 1:1-3.) Jesus el fahk: “Elos suc lohng kahs luhn God ac ahkos, ac insewowo yohk liki!” (Luke 11:28) Yohk liki nuhkewa kuht nuhnkuh yohk ke Kahs luhn Jeova ke lwen nuhkewa, mweyen ma inge ac fah kahsre kuht in oruh ma uh ke inkacnek ma sang kaksak nuh sel. Ke pacl ma kuht oruh ma inge, Jeova el ac fah ahkinsewowoye kuht ke moul engan ke pacl inge ac nwe tok ma pahtpaht ke facl sasuc uh.​—James 1:25; Fwackyuk 1:3.