Yac Kuht Kuh In Etuh Na Pwacye God?

KE KOM riti kahs luhn mwet luo lucng inge, piyac kac seltahl kom insese kac uh? Puhs mwet suc puhla mwe ahkkweye ac insewowo ke kahs lal Saul fin acn Tarsus, suc oacyacpac etweyuck oacna mwet sap Paul. (Orekma 17:26, 27) Ac oasr kuhtuh pac kahs in ahkkweye sahyac ma oacna ma se inge in Bible uh. Ke sie mwe puhpuhlyuck, Jesus el tuh oruh puhruhe se lal suc ahkkahlwemye lah mwet tuhma lutlut lal nuhkewa kuh in etwacl God ac eis mwe insewowo lal uh.​—John 17:3.

Tuhsruhktuh, oasr philosopher oacna Philo ma siena puhlakihn ac nuhnak laltahl kac. Eltahl fahk muh wacngihn kuhtwena ma kuht kuh in etuh ke God mweyen el sie ma mwet uh tiac kuh in kahlwem na pwacye kac. Piyac kac ma pwacye uh?

Bible uh fahk kahlwem lah oasr ma upac nuh sin mwet uh in kahlwem kac ke God. Ke sie mwe puhpuhlyuck, lusen moul lal, lahlmwetmwet luhn nuhnak lal, ac loaliyen etwacack lal uh tiac kuh in srihkasrakuh, acwaclah, kuh etweyuck. Ma inge nohfohn arlacna fuhlwactlac nuh sin mwet uh in kahlwem kac. Tuhsruhktuh ma inge tiac tulokihn kuht in etwacl. Ke kuht nuhnkuh yohk kac, ma inge kewa ac kuh in kahsre kuht in “kaluckyang nuh yurin God.” (James 4:8) Kuht kuh in liye kuhtuh mwe puhpuhlyuck ke ma pucspucs kacl ma kuht tiac kuh in kahlwem na pwacye kac inge. Tukun ma inge, na kuht ac fah tuni kuhtuh ohiyac luhn God ma kuht kuh in kahlwem kac.

Meac Kuhtuh Ohiyac luhn God Ma Upac Kuht in Kahlwem Kac?

LUSEN MOUL LUHN GOD: Bible uh luti lah God el nuhna oasr “emeet me, oacyacpac nuh tok ma pahtpaht.” (Psalm 90:2) Kalmac pa, wacngihn muhtwacwacyel ac fah wacngihn pac sahflahiyacl. Ke nuhnak luhn sie mwet, “kuht tiac kuh in etuh na pwacye . . . kuh oacklah pihsen yac lal uh.”​—Job 36:26.

Ma wo kom kuh in eis kac: God el wuhlelah nuh sum ke moul ma pahtpaht kom fin kwacfeacng na pwacye in etwacllah. (John 17:3) God sifacna el fin tiac kuh in moul ma pahtpaht, kuht ac luhlahlfongi fuhkah ke wuhlelah inge? “Tohkohsrah se suc moul ma pahtpaht” muhkwena pa ac kuh in ahkpwacyeye wuhlelah inge.​—Sie Timothy 1:17.

NUHNAK LUHN GOD: Bible uh luti kuht lah “wacngihn mwet kahlwem ke nuhnak” luhn God, ke srihpen nuhnak lal uh arlacna fuhlwact liki nuhnak lasr uh. (Isaiah 40:28; 55:9) Pwacnacng, arlacna fal kihsen siyuck ma sihmlac in Bible inge: “Suc etuh nuhnak luhn Leum? Suc kuh in sang kahs in kahsruh nuh sel?”​—Sie Corinth 2:16.

Ma wo kom kuh in eis kac: God el kuh in lohng puhruhe luhn mwet million ke pacl sefanna. (Psalm 65:2) El oacyacpac lohacng nuh sin won sparrow nuhkewa ma puhtatlac nuh infohk uh. Yac nuhnak luhn God ac kuh in nwacnwaclah sie pacl ac oruh elan tiac kuh in lohacng nuh sum ac lohng puhruhe lom uh? Moh, tiac kuh. Mweyen tiac kuh in nwacnwaclah mwe nuhnak lal uh. Yohk liki na ma inge, “kowos arlacna sacohk liki won sparrow pucspucs” nuh sel.​—Matthew 10:29, 31.

INKACNEK LUHN GOD: Bible uh luti kuht lah mwet uh tiac kuh in “etuh nohfohn ma El oruh uh.” (Ecclesiastes 3:11) Pwacnacng kuht ac tiacna kuh in etuh ma nuhkewa ke God. Inkacnek lahlmwetmwet lal uh tiac “kuh in kahlwem na pwacye sin mwet.” (Rome 11:33) Tuhsruhktuh, God el engan in ahkkahlwemye inkacnek lal uh nuh sin mwet suc luhngse in ahkinsewowoyacl.​—Amos 3:7.

Ma wo kom kuh in eis kac: Kom fin rit ac lutlut Bible, ac fah wacngihn sahflahiyen ma sasuc ma kom ac fah etwaclah ke God ac ke inkacnek lal uh. Kalmen ma inge pa kuht kuh in kaluckyang ac fototo nuh sin Pahpah tuhmwacsr inkuhsrao nwe tok ma pahtpaht.

Ma Kom Kuh In Etuh

Ke srihpen kuht tiac kuh in kahlwem na pwacye ke ma nuhkewa ke God, tiac kalmen ma inge pa wacngihn na ma kuht kuh in etuh kacl. Oasr kahs in ahkuhtweyac in Bible ma kuh in kahsre kuht in ahkyohkye etwacack lasr ke God. Nuhnkuh ke kuhtuh mwe puhpuhlyuck inge:

INEN GOD: Kuht etwaclah in Bible uh lah oasr inen God. El fahk: “Nga Jeova, pa inge Ek.” Inen God sihmlac in Bible puhs liki pacl 7,000 kuhtuh, suc puhs liki kuhtwena ine sahyac.​—Isaiah 42:8, BMK.

Ma wo kom kuh in eis kac: Jesus el tuh fahk ke puhruhe lal: “Pahpah: Lwelah Ine muhtahl lom in ahkfuhlwactyeyuck.” (Luke 11:2) Yac kom kuh pac in orekmakihn inen God ke puhruhe lom an? Jeova el arlacna ke molwelah mwet nuhkewa ma ahkkahlwemye lah eltahl ahkfuhlwactye inel.​—Rome 10:13.

ACN SIN GOD: Bible uh luti lah oasr “ma ten” ac ma “lucng.” Ma ten inge pa facluh kuh acn kuht muhta we uh ac ma lucng inge pa acn ma ma oreklac in nguhn uh muhta we. (John 8:23; Sie Corinth15:44) In Bible, kahs se inge “inkuhsrao” [heaven] kwacna luhmweyuck nuh ke ma oan lucng uh. ‘Yen [God] el muhta’ we uh oasr “inkuhsrao.”​—Sie Tokosra 8:43.

Ma wo kom kuh in eis kac: Kom kuh in kahlwem na pwacye ke luhman God. El tiac oacna sie eng ma oasr kuh la ac forfor yen nuhkewa kuh oasr in ma nuhkewa. Jeova el mwet na pwacye se suc muhta ke acn na pwacye se. Tuh finne ohinge, “wacngihn ma kuh in wihklac liki God.”​—Hebrew 4:13.

OHIYEN GOD: Bible uh luti lah ohiyacl Jeova arlacna wo. “God el luhng.” (Sie John 4:8) El koflahna kikiacp. (Titus 1:2) El kuhlwacng, pahkotwen, tiac sa in muhlat ac tiac pac sulohsohl mwet. (Exodus 34:6; Orekma 10:34) Ac sie ma wo suc mwet uh kwacna lut kac pa kena yohk lal in fototo ac “kawuck” nuh sin mwet ma ahkkahlwemye suhnak nuh sel.​—Psalm 25:14.

Ma wo kom kuh in eis kac: Kom kuh in eklac sie kawuck luhn Jeova. (James 2:23) Ac tok ke kom etwaclah ohiyac wowo pucspucs lal inge, kom ac kuh in kahlwem na pwacye ke ma pucspucs ma sihmlac in Bible uh.

“SOKUHL”

Ahkuhtweyac luhn Bible kacl Jeova God uh arlac kahlwem. El suc orekuhtlac, el ke kom in etwacllah. Kahs lal in Bible uh wuhlelah ma inge: “Kom fin sokuhl, kom fah konwaclwack.” (Sie Chronicle 28:9) Kom kuh in etwacllah God ke kom riti ac nuhnkuh yohk ke ma suhmuhslah in Bible uh. Kom fin oruh ma inge, Bible uh wuhlelah lah God “el ac fah apkuhranwot nuh yuruwos.”​—James 4:8.

Sahp kom nuhnkuh, ‘Ke srihpen nga tiac kuh in kahlwem ke ma nuhkewa ke mwet se ma orekuhtlac inge, nga ac fototo kuh kawuck nuh sel fuhkah?’ Srihke nuhnkuh ma inge: “Yac kawuck fototo luhn sie doctor el enenuh in suhmaht pac ke ip luhn ono? Moh! Orekma luhn kawuck fototo se luhn doctor inge kuh pac in siena luhkel. Tuhsruhktuh, eltahl srackna kuh in kawuck. Ma yohk srihpac emeet uh pa kawuck se inge in etuh ohiyacl, oacyacpac luhngse, ac sruhnga luhn doctor se inge. In oacpacna, kom kuh in etwaclah kain in ohiyac luhn Jeova uh in Bible, ke ma kom enenuh in etuh tuh fah kom kuh in ahkfototoye inmahsrlom nuh sel.

Bible uh ahkuhtweyac ke kain in ma pucspucs ma kuht enenuh in etuh tuh kuht in etuh God. Yac kom luhngse in ahkyohkye etuh lom kacl Jeova God? Oasr program na wowo se luhn Mwet Loh luhn Jeova uh in lutlut Bible ke lohm sum ac ma inge tiac moul. Kuht siyuck kom in sramsram nuh sin Mwet Loh ke acn sum an kuh som nuh ke website inge, www.jw.org.