Yac Kom Liye Kahsruh luhn God ke Moul Lom?

1, 2. Meac kuhtuh mwet uh nuhnkuh ke God?

PUHS mwet ma nuhnkuh muh God el tiac elyah ke ma eltahl oruh uh ac ke ma sikyak nuh seltahl uh. Ke sie mwe puhpuhlyuck, tukun pahkah na upac se tuh kuhnahoslah kuhtuh acn na luhlahp fin acn Philippine ke November 2013 ah, mayor ke sie siti luhlahp inge fahk muh: “Sahp God el oasr ke sie pacna acn ke pacl sac.”

² Oasr pac mwet ma nuhnkuh na muh God el tiac liye ma eltahl oruh uh. (Isaiah 26:10, 11; Tolu John 11) Kuhtuh mwet uh nuhnkuh pac ohinge ke lwen lal Paul. El fahk nuh seltahl: “Mwet uh srahngesr in nuhnkuh ke etwacack pwacye ke God.” Eltahl sesuwohs, suhlallacl, rahpkuh, ac kuluk.​—Rome 1:28, 29.

3. (a) Kihsen siyuck fuhkah kuht enenuh in siyuck sesr sifacna? (b) In Bible, meac poun God el kwacna luhmweyuck nuh kac?

³ Ac fuhkah nuh sesr? Kuht etuh lah Jeova el liye ma nuhkewa kuht oruh uh. Tuhsruhktuh, yac kuht luhlahlfongi na pwacye lah Jeova el nuhnkuh kacsr? Yac kuht liye mwe kahsruh luhn pahol in moul lasr uh? Ke Bible uh, poun God kwacna luhmweyuck nuh ke kuh lal uh. El orekmakihn kuh lal in kahsruh mwet kuhlwacnsap lal ac in kuhtanglah mwet lokoalok lal. (Riti Deuteronomy 26:8.) Jesus el tuh fahk lah oasr mwet ac muh “liye God.” (Matthew 5:8) Yac kuht wi mwet inge? Kuht ac “liye God” fuhkah? Kuht kuh in lutlut ke mwe srihkasrak luhn mwet in Bible ma liye poun God kuh kahsruh luhn God ke moul laltahl ac mwet ma tiac pac liye. Kuht ac fah oacyacpac lutlutkihn lah fuhkah luhlahlfongi lasr uh ac kahsre kuht in liye poun God.

ELTAHL SRUHNGA LIYE POUN GOD

4. Efuh kuh mwet lokoalok luhn mwet Israel inge tiacna liye poun God?

⁴ In pacl meet ah, puhs mwet ma wi liye ac lohng ke kahsruh ma God el sang nuh sin mwet Israel. Jeova el orek mwenmwen in ahksukohsohkyelah mwet lal liki acn Egypt ac in kuhtanglah Tohkohsrah pucspucs ke Facl Wuhlelah. (Joshua 9:3, 9, 10) Tohkohsrah sahyac inge finne lohng ac liye ke Jeova el molwelah mwet lal uh, “elos nuhkewa tuhkweni inseselac in mweun lainuhl Joshua ac mwet Israel.” (Joshua 9:1, 2) Ke pacl se eltahl acnwuck lain acn Israel, tohkohsrahi inge nuhkewa wi liye poun God. Ke srihpen kuh yohk luhn Jeova, “faht ah tui, ac mahlwem ah tiac mukwilac nwe ke na facl sac oneloslac suc mweun lainuhlos.” (Joshua 10:13) Tuhsruhktuh, Jeova el lwelah insiacn mwet lokoalok luhn acn Israel inge “in luhngse mweun” lain mwet Israel. (Joshua 11:20) Mwet lokoalok luhn mwet Israel nuhkewa kuhtangyucklac ke srihpen eltahl sruhnga luhlahlfongi lah Jeova pa kahsruh mwet Israel in kuhtanglah.

5. Meac Tohkohsrah Ahab el sruhnga in luhlahlfongi?

⁵ Tok kuhtuh, puhs pacl Ahab, tohkohsrah na kuluk se inge el liye poun Jeova. Elijah el fahk nuh sel: “Ac fah wacngihn aunfong kuh af, . . . nwe ke pacl se nga fahk in af.” (Sie Tokosra 17:1) Ma inge kuh in sikyak ke na srihpen kuh luhn God, tuhsruhktuh Ahab el sruhnga luhlahlfongi. Tok, Elijah el puhruhe nuh sin Jeova. God el tohpohkohllah ke el suhpwacma sie e inkuhsrao me. Ahab el liye ma inge. Na Elijah el fahk nuh sel Ahab lah Jeova el ac tulokihnyac paholah luhn acn inge ac oruh sie af na mahtol in kahklah. (Sie Tokosra 18:22-45) Ahab el liye mwenmwen inge nuhkewa ac el srackna sruhnga luhlahlfongi lah kuh luhn Jeova pa el liye inge. Meac kuht lotwelah ke mwe srihkasrak inge kewa? Kuht enenuh in akihlen poun Jeova ke ma nuhkewa el oruh ke moul lasr uh.

ELTAHL LIYE POUN JEOVA

6, 7. Meac Rahab ac mwet Gibeon inge akihlen?

⁶ Mwet Gibeon eltahl arlacna siena liki muhtuhnfacl sahyac ma rauneltahllah uh. Eltahl liye poun God. Mwet Gibeon inge suk in orek mislac nuh sin mwet Israel, ac tiac acnwuck nuh seltahl. Efuh? Eltahl fahk lah ma ke srihpen ma pucspucs ma eltahl lohng kacl Jeova ac ke ma el oruh uh. (Joshua 9:3, 9, 10) Eltahl lahlmwetmwet ke eltahl akihlen lah Jeova pa kahsruh mwet Israel inge.

⁷ Rahab el oacyacpac liye poun Jeova. El tiac mwet Israel se, tuhsruhktuh el lohng ke inkacnek ma Jeova el ahksukohsohkyelah mwet lal liki acn Egypt. Ke pacl se ma mwet kalngeyuck luo luhn acn Israel som nuh yohrohl, el fahk nuh seltahl: “Nga etuh tuh LEUM GOD El sot nuh suwos facl se inge.” Rahab el luhlahlfongi lah Jeova el kuh in molwellah ac sucu lal uh. El ahkkahlwemye luhlahlfongi lal nuh sin Jeova finne el etuh lah ma el oruh inge mwe sensen nuh ke moul lal uh.​—Joshua 2:9-13; 4:23, 24.

8. Mwet Israel inge akihlen fuhkah poun God?

⁸ Oasr mwet Israel ma tiac oacna Tohkohsrah Ahab. Kuhtuh seltahl liye e ma puhtat inkuhsrao me in topuk puhruhe lal Elijah, eltahl akihlen lah God pa oruh ma inge. Eltahl tuhng ac fahk: “El [Jeova] muhkwena pa God” pwacye! (Sie Tokosra 18:39) Arlacna kahlwem nuh seltahl lah kuh luhn God pa eltahl liye inge.

9. Ke pacl inge, kuht ac liye fuhkah kahsruh luhn Jeova ke pahol?

⁹ Nwe ingena, kuht liye mwe srihkasrak wo ac kuluk ma ac kuh in kahsre kuht in kahlwem kac lah meac kalmac in “liye God” kuh in liye poun God. Kuht liye pahol ke kuht etwacllah Jeova ac etwaclah ohiyacl wi orekma lal uh. Ma inge mokle kuht in luhngse etahi mwet oaru in pacl meet ah ac ke pacl inge suc liye ke Jeova el kahsruh mwet lal uh. Tuhsruhktuh, yac oasr mwe ahkpwacyeye nuh kac lah God el kahsruh mwet lal ke pacl inge?

MWE AHKPWACYEYE NUH KE KAHSRUH LUHN GOD KE PACL INGE

10. Meac ahkpwacyeye nuh sesr lah Jeova el kahsruh mwet lal ke pacl inge? (Liye petsac se meet ke mwe lutlut inge.)

¹⁰ Arlacna puhs ma ahkpwacyeyuck nuh sesr lah Jeova el tahfwelah na in kahsruh mwet lal ke pacl inge. Kuht kwacna lohng ma sikyak nuh sin mwet ma puhruhe siyuck kahsruh luhn God ke moul laltahl ac el tohpohkuhltahllah. (Psalm 53:2) Ke sie mwe puhpuhlyuck, ke Allan el wi forfor ke sie tuhka srihsrihk fin acn Philippine, el ohsun nuh sin sie muhtwacn suc muhtwacwack na tuhng. Allan el fahk lah: “Ke lututacng sac na, muhtwacn se inge puhruhe nuh sin Jeova tuh Mwet Loh lal uh in konwacllack.” Ke el srackna muhtwacn fuhsr, el lutlut Bible yurin Mwet Loh, tuhsruhktuh el tui ke lutlut lal uh ke srihpen el pahyuckyak ac som muhtalac ke sie pacna tuhka. God el sa in tohpohklah puhruhe lal uh ac ma inge arlac sun insiacl. Soenna sun yac se, na el wuhlelah moul lal nuh sin Jeova.

11, 12. (a) Jeova el kahsruh fuhkah mwet kuhlwacnsap lal uh? (b) Ahkuhtweyac lah Jeova el kahsruh fuhkah sie muhtwacn lili wiyacsr.

¹¹ Puhs mwet kuhlwacnsap luhn Jeova suc liye kahsruh luhn pahol ke pacl se eltahl sislah ohiyac fohkfohk laltahl meet, oacna sismohk, orekmakihnyen ono kuluk, kuh liyeyuck petsac fohkfohk. Kuhtuh seltahl srihke in sifacna tulokihnyac ke pacl pucspucs, tuhsruhktuh eltahl tiac kuh. Ke pacl se eltahl siyuck ke kahsruh luhn Jeova, el sang “kuh fuhlwactlacna” ac eltahl kuh in tui ke orekma fohkfohk laltahl inge.​—Luo Corinth 4:7; Psalm 37:23, 24.

¹² Jeova el oacyacpac kahsruh mwet kuhlwacnsap lal uh in muhtwacnglah ma upac laltahl sifacna. Pa inge ma sikyak nuh sel Amy. Srihsrngiyucki elan kahsruh ke muhsah nuh ke Lohm in Toeni wi lohm sin missionary ke sie tuhka srihsrihk ke Meoa Pacific. Facsin ke acn se inge siena, kwacna wacngihn sahrom kuh kof, inkacnek we uh sronot, el ahsroelah sucu lal uh, ac acn se el muhta we uh kihtin na hotel. Sie lwen ah, el kohuyak ac muhlat nuh sin sie muhtwacn lili wiyacl ma weluhl orekma inge, ke srihpen el arlac toasrlah ke ma el oruh ah. Ke pacl se el fohlohk nuh ke acn el muhta we ah, wacngihn sahrom. El puhruhe nuh sin Jeova ac siyuck elan kahsrel. Na, ke pacl se fohlohkyuck sahrom ah el riti mwe lutlut se ke Tower in San uh ke sie Gilead graduation. Mwe lutlut sac sramsram ke kain in ma upac ma el enenuh in muhtweng kac inge. El fahk: “Nga puhla muh Jeova el kahskahs nuh sihk ke fong sac. Ma inge use mwe ahkkweye nuh sihk in tahfwelah na oruh kunohkohn luhk uh.”​—Psalm 44:25, 26; Isaiah 41:10, 13.

13. Kuht ahkpwacyeye fuhkah lah Jeova el kahsruh mwet lal uh in sang top ac ahkuhtweyac suwohs laltahl in forfor luti?

¹³ Jeova el oacyacpac kahsruh mwet lal in sang top ac ahkuhtweyac pweng wo uh ke inkacnek suwohs. (Philippi 1:7) Ke sie mwe puhpuhlyuck, ke pacl se ma goverment srihke in tulokihnyac orekma in luti uh, kuht sang top ac ahkuhtweyac nuh seltahl in court. Puhs liki high-court cases 268 fin facluh nohfohn ma kuht kuhtanglah kac, ac 24 seltahl ma ke European Court of Human Rights muhtwacwack ke yac 2000 fahsruh nwe mihsenge. Arlacna kahlwem lah wacngihn kuhtwena mwet kuh in tulokihnyac poun God!​—Isaiah 54:17; riti Isaiah 59:1.

14. Meac pac kuhtuh mwe ahkpwacyeye lah God el wi mwet lal uh?

¹⁴ Orekma in luti pweng wo fin facluh nohfohn uh sie pac mwe ahkpwacyeye ke kahsruh luhn God ke pahol. (Matthew 24:14; Orekma 1:8) Ke srihpen kahsruh lal, oasr inse sefanna inmahsrlon mwet kuhlwacnsap luhn Jeova ke muhtuhnfacl nuhkewa. Wacngihn ma oacna inse sefanna se inge! Nwe ke mwet ma tiac alu nuh sin Jeova eltahl akihlen ac fahk pac: “Pwacye na lah God El oasr yuruwos!” (Sie Corinth 14:25) Arlacna puhs mwe ahkpwacyeye lah God el wi mwet lal uh. (Riti Isaiah 66:14.) Fuhkah nuh sum? Yac kom liye poun Jeova ke moul lom an?

YAC KOM LIYE POUN JEOVA KE MOUL LOM?

15. Meac ac kuh in pwacnacng kuht tiac liye poun Jeova ke kahsruh lal nuh sesr?

¹⁵ Kuhtuh pacl uh, kuht tiac liye poun Jeova ke kahsruh lal nuh sesr. Efuh? Ke pacl kuht sun ma upac yohk, sahp kuht muhlkuhnlah lah Jeova el kahsre kuht ke pacl puhs meet. Pa inge ma sikyak nuh sel Elijah. El arlacna puhlaik, tuhsruhktuh ke pacl se Kasra Jezebel el suk in unilyac, el arlacna sahngweng. Ke kihtin pacl, el muhlkuhnlah kahsruh luhn Jeova nuh sel meet ah. Bible uh fahk lah Elijah el ke misac. (Sie Tokosra 19:1-4) El ac konwacack oyac kahsruh ac puhlaik? El enenuh in ngwet nuh sin Jeova!​—Sie Tokosra 19:14-18.

16. Kuht ac liye God fuhkah finne ke pacl kuht sun ma upac?

¹⁶ Job el lohacng yohk nuh ke mwe fosrngah lal pwacnacng el tiac liye ma upac el sun inge oacna ma Jeova el liye. (Job 42:3-6) Sahp kuhtuh pacl uh kuht puhla muh arlac upac in liye God ke srihpen ma upac ma kuht sun. Meac ac kuh in kahsre kuht in liye ma God el oruh ac use nuh sesr uh? Kuht enenuh in nuhnkuh yohk ke ma Bible uh fahk ke ma upac kuht sun uh. Na Jeova el ac ma na pwacye se nuh sesr, ac kuht fah oacyacpac fahk: “Ma na mwet uh fahk nuh sihk pa nga etuh uh. Tuh pa inge, nga liye kom ke muhtuhk sifacna.”

17, 18. (a) Kom ac liye fuhkah poun Jeova ke moul lom uh? (b) Sruhmuhn sie ma sikyak ma ahkkahlwemye lah God el kahsre kuht ke pacl inge.

¹⁷ Kom ac liye fuhkah poun Jeova ke moul lom? Kuht kuh in nuhnkuh ke mwe srihkasrak lihmekohsr inge. Ma se meet, sahp kom puhla muh Jeova el kahsre kom in konwacack ma pwacye uh. Ahkluo, sahp kom esam ke kom wi sie toeni luhn mwet Christian inge, lohng mwe sramsram kac, ac fahk, “Pa inge ma nga suk uh!” Ahktolu, sahp kom liye ke Jeova el tohpohklah sie sin puhruhe lom uh. Ahkahkosr, sahp kom ke ahkyohkye kuhlwacnsap lom nuh sin Jeova ac kom liye ke el kahsre kom in sun finsrak se lom inge. Ahklihmekohsr, sahp kom sislah orekma se lom ke srihpen ma inge eslah pacl nuh ke orekma in kuhlwacnsap lom nuh sin Jeova ac kom liye lah God el ahkpwacyeye wuhlelah lal inge: “Nga fah tiacna siskomlac.” (Hebrew 13:5) Ke pacl se kuht arlacna fototo nuh sin Jeova, ac arlacna fihsracsr nuh sesr in liye kahsruh lal nuh sesr.

¹⁸ Sarah, sie muhtwacn lili fin acn Kenya el fahk: “Nga puhruhe ke sie mwet lutlut luhk suc nga puhla muh el tiac nuhnkuh lutlut lal ke Bible uh. Nga siyuck sin Jeova fin wo nga in tari tulokihnyac lutlut lal uh. Tukun na nga fahk ‘Amen,’ telefon luhk ah ring. Mwet lutlut se nga puhruhe kac inge el pahng in siyuck el fin kuh in wiyuc som nuh ke toeni lasr uh! Nga arlacna lut!” Kuht fin suk in liye ma God el oruh nuh sesr uh, kuht ac kuh in akihlen kahsruh yohk luhn pahol. Rhonna, sie muhtwacn lili fin acn Asia el fahk lah yohk pacl ma enenweyuck in liye luhpan kahsruh ma Jeova el acse nuh sesr ke moul lasr uh. El oacyacpac fahk: “Tuh pacl se na kom oruh uh, arlacna yohk ma kom ac konwacack ke luhpan luhngse lal nuh sesr uh!”

19. Meac pac kuht enenuh in oruh tuh kuht in liye God?

¹⁹ Jesus el fahk lah mwet ma “liye God” uh enenuh in ‘nwacsnwacs insiac.’ (Matthew 5:8) Meac kalmen ma inge? Kuht enenuh in oruh nuhnak lasr uh in nwacsnwacs ac tiac sifwil oruh kuhtwena ma kuluk. (Riti Luo Corinth 4:2.) Ke mwe lutlut se inge, kuht lotwelah lah kuht enenuh in ahkkweye fototo lasr nuh sin God pacl nuhkewa tuh kuht in liyacl. Ke mwe lutlut se tok uh, kuht ac ahkuhtweyac lah fuhkah luhlahlfongi lasr kuh in kahsre kuht in liye poun Jeova ke moul lasr in kahlwem liki meet ah.