Mea Ma Paye Ke God?

1, 2. Efu ku mwo in siyuk kusensiyuk pal nukewa?

YA KOM nu liye ke tulik srisriku elos siyuk ke kusensiyuk? Tulik srisrik nukewa elos mutamwauk in siyuk kusensiyuk ke elos etauk in kaskas. Insemwomwo lalos ku in liyeyuk ke mutalos ke elos siyuk kusensiyuk oana: Efu ku tun in kosrao u folfol? Efu ku itu u kalem? Efu ku pukunyeng u mukuikui? Kom ku in srike sang me top nu ke kusensiyuk puspus inge, tusruktu in oru ma inge tia fusrasr pal nukewa. Fwinne kom sang me top mwomwo nu ke kusensiyuk lalos, tusruktu elos fwa sifwil pa siyuk: Efu ouinge?

² Tia tulik mukena lungse siyuk kusensiyuk. Ke kut matula, kut lungse pa siyuk kusensiyuk pal nukewa. Kut oru ma inge in sun an kut lungse in som nu we, in etu me sensen su kut enenu in fwasr liki, ku in etu me top nu ke kusensiyuk su oasr in nunak lasr. Tusruktu oasr met puspus su srunga siyuk kusensiyuk, yokna ke kain in kusensiyuk puspus su yok sripe. Aok, elos tia ke suk me top puspus.

3. Efu ku met puspus elos tui in suk me top nu ke kusensiyuk nukewa su arlana yok sripe?

³ Nunku ke kusensiyuk su oasr ke kulin buk se inge. Ke kusensiyuk nukewa su oasr ke sra ak akosr a ak limekosr ke buk se inge, ku ke kusensiyuk su oasr ke mutamweyen sapta se inge. Pa inge kutu ma yok sripe su kom ku in siyuk ke inkanek in kusensiyuk. Tusruktu oasr met puspus su fuleak tari in suk me top nu ke kusensiyuk lalos. Efu? Ya me top ka oasr in Baibel? Oasr kutu met elos nunku mu arlana upa in etu ku kalem ke me top nu ke kusensiyuk puspus. Oasr kutu met elos nunku mu sie me mwekin in siyuk kusensiyuk. A kutu sin metu elos fwak mu kusensiyuk inge ku in topukyuk mukena sin met kol lun alu a met luti puspus. Mea kom nunku?

4, 5. Mea kutu kusensiyuk su yok sripe emeet nu ke moul su kut ku in siyuk ka? Efu ku kut enenu in suk ke me top nu ka?

⁴ Saap kom insemwomwo in eis etauk ke me top nu ke kusensiyuk puspus lun moul. Paye la kutu palu kom nunku: ‘Mea akwuk lun moul? Ya pa na inge sripe yok nu ke moul, kut in isusla, a matou, a mise? Fuka luma a oiya na paye lun God?’ Arlana mwo in siyuk kusensiyuk ouinge, a yok sripe kom in tia fuleak nu ke kom koneak me top puspus su mwo, a paye nu ka. Met luti pengpeng se emeet inge Jisus Kraist el fwak: “Siyuk, a fwa etukot nu sumwos; suk, a komwos fwa konoiyuk; tomwolak, a fwa igasla nu sumwos.”​—Mattu 7:7.

⁵ Kom fwin ‘kafweang in suk’ ke me top nu ke kusensiyuk yok sripe nukewa inge, kom ku in koneak la orekma lom in suk ku in me akinsemwomwoye kom. (Soakas 2:1-5) Fwin kutu met elos fwakak kutena ma nu sum, oasr me top nu ke kusensiyuk puspus inge, a kom ku in koneak ma inge in Baibel. Me top nukewa inge tia upa in eteyuk. Yok liki nukewa, ma inge ase fwinsrak a me insemwomwo. A me top inge ku in kasre kom in moulkin moul su oasr engan a insemwomwo ka ke pal inge. Inge, lela kut in nunku ke sie kusensiyuk su akfosye nunak lun met puspus.

YA GOD EL TIA NUNKU KESR A TIA LOANG NU KE PULAKIN LASR?

6. Efu ku met puspus elos nunku mu God el tia karungin kut ku nunku ke me keok nukewa su pulakinyuk sin metu?

⁶ Met puspus elos nunku mu me top nu ke kusensiyuk inge pa aok. Elos fwak mu, ‘fwin God el nunku kesr, ya fwalu fwa sie an mwomwo su tia oana ma kut liye inge?’ Kut fwin liye yen nukewa a kut liye pa la fwalu el tingtingi ke kufwen me meun, srunga, a ke kain in me akasor yok puspus. A nu sin kais sie met, kut pulakin kain in mas puspus, kut pulakin me akkeok puspus, kut pulakin me akasor yok ke met su kut lungse el tula ke sripen mise. Ke ma inge, met puspus elos fwak, ‘Fwin God el karungin kut a nunku kesr a ke ma upa nukewa lasr, ya el fwa tia loangekutla liki ongoiye puspus su sikyak in len inge?’

7. (a) Fuka met kol lun alu puspus elos oru met puspus in nunku mu God el tia pulakin a nunku ke ma upa puspus su metu sun? (b) Mea Baibel el luti na paye ke me srifwe nukewa su kut keok ka?

⁷ Sayen ma inge, ke kutu pal met kol puspus lun alu elos oru metu in nunku mu God el tia pulakin ma upa lasr. Ke inkanek fuka? Ke pal se oasr ongoiye sikyak, elos fwak mu lungse lun God pa inge. Ke ma inge, met kol inge elos fwak mu God el oru ma koluk puspus in sikyak. Ya pa inge ma paye ke God? Mea Baibel el luti na paye? Jemes 1:13 el sang me top nu ka: “Lela tu wangin met in fwak fwin srifweyuk el: ‘God el srifweyu.’ Tu God el tia srifweyuk ke ma koluk a oayepa el tia srifwe kutena met.” Kalem la God el tia sropon ma koluk su kom liye fwin fwalu. (Job 34:10-12) Paye la, el lela ma koluk puspus in sikyak. Tusruktu oasr ma tia oana sie inmasrlon in lela ma se in sikyak a in oru ma se in sikyak.

8, 9. (a) Kom ku in akuteye fuka ma su tia oana sie ke oiya luo inge in lela ma koluk in sikyak a in oru in sikyak? (b) Efu ku tia sumwos nu sesr in suk ma tafongla ke sulela lun God in lela metu in fwasr ku moulkin inkanek koluk lalos?

⁸ Ke sie me pupulyuk, srike nunku ke sie papa su lalmetmet a kulang a oasr sie tulik natul su matula tari a el srakna muta in loom sin papa a nine kiyel. Fwin tulik mokul se inge el mutamwauk in seakos a lain papa a nine, a el oru sulela lal in som liki loom u, a papa tumal el tia kutungol. Tulik mokul se inge el som a orala moul lal in moulkin sie moul su oasr ke inkanek koluk a pulakin me keok. Ya papa tumal pa orala a paenang ma koluk upa lun tulik mokul se inge? Mo. (Luk 15:11-13) Oapana, nu sin God la el tia kutongya metu fwin elos orala sulela lalos in moulkin moul lalos ke sie inkanek su oasr ke inkanek koluk, a tia el pa paenang ma koluk upa puspus su sikyak nu selos. Ke ma inge, paye la tia mwo in fwak mu God pa paenang ma koluk upa nukewa lun metu.

⁹ Oasr sripe mwomwo puspus lun God in lela metu in fwasr ke sie inkanek koluk. In oana ke Met Orekutla su lalmetmet a kulanu, el tia enenu in akuteye nu sesr sripe puspus lal. Tusruktu, ke sripen lungse lal, God el akkalemye ma inge. Kom ku in lotela ma puspus ke sripe mwo nukewa inge in Sapta 11. Kom ku in lulalfongi la tia God pa oru ma koluk upa puspus su kut pula ke pal inge. A, el ase nu sesr fwinsrak sefwanna nu ke sie me aksumwos ku me kasru mwolana!​—Isaia 33:2.

10. Efu ku kut ku in lulalfongi mu God el fwa akwanginyela fwako koluk nukewa su tuku ke orekma koluk?

¹⁰ Oayepa, God el mutal. (Isaia 6:3) Kalmen ma inge pa el mutal a nasnas. Wangin kutena ma koluk in el. Paenang kut ku in lulalfongel ke inkanek nukewa. Tusruktu kut tia ku in filiye lulalfongi lasr nu sin metu ke inkanek inge, meyen oasr pal elos akkalemye oiya koluk. Fwinne sie met paye emeet su oasr ku la pal puspus el tia ku in akwanginyela ku aksumwosyela ma upa su met koluk elos oru. Tusruktu God el ku a kulanu. Oasr ku lal a el fwa ku in akwanginyela ma koluk nukewa su pulakinyuk sin met nukewa. Ke pal se God el fwa oru me aksumwos inge, el fwa oru ma inge ke inkanek su fwa aksafyela ma koluk nukewa ma patpat!​—Sam 37:9-11.

MEA PULAKIN LUN GOD KE OREKMA SESUMWOS NUKEWA SU KUT SUN?

11. (a) Mea pulakin lun God ke orekma sesumwos? (b) Mea pulakin lun God ke me keok su kom pula?

¹¹ Ke pal inge, mea pulakin lun God ke ma su sikyak fwin fwalu a ke moul lom? Aok, Baibel el luti la God el “lungse nununku sumwos.” (Sam 37:28) Paenang el tuni ku nunku yok ke ma mwo a ma koluk. El srunga kain in oiya sesumwos nukewa. Baibel el akkalemye la God el “toasr insiel” ke pal se ma koluk el nekla fwalu in pal meeta. (Genesis 6:5, 6) God el tia ekyek. (Malakai 3:6) El srakna srunga in liye me keok su sikyak yen nukewa fwalu. A God el srunga in liye metu elos sun me keok. Aok Baibel el akkalemye la, “El karungin kom.”​—1 Piter 5:7.

12, 13. (a) Efu ku oasr yurosr oiya mwomwo ke lungse? A fuka lungse el sang kasru nu ke nunak lasr ke met puspus lun fwalu? (b) Efu ku kom lulalfongi mu God el fwa aksumwosyela na paye ma upa nukewa fwin fwalu?

¹² Kut etu fuka la God el srunga in liye me keok? Pa inge kutu pa me akpayeye. Baibel el luti la metu orekla in luman God. (Genesis 1:26) Paenang oasr oiya mwomwo lasr meyen oasr oiya mwomwo puspus lun God. Ke sie me pupulyuk, ya kom pulakin toasr a asor ke kom liye met puspus elos pulakin keok? Kom fwin nunku a asor ke oiyen sesumwos inge, kom ku in liye na paye la oasr pa pulakin a nunak yok lun God kelos.

¹³ Sie ma su mwo emeet yurin metu pa ke ku lasr in akkalemye lungse. Oiya mwo lun God liyeyuk pa ka. Baibel el luti kut la “God el lung.” (1 Jon 4:8) Kut akkalemye lungse meyen God el akkalemye pa lungse. Ya oiyen lungse el akkeye kom in aksafyela me keok a oiya sesumwos nukewa su kom liye fwin fwalu? Fwin oasr ku lom in oru ma inge, ya kom fwa oru ma inge? Paye kom fwa oru! Kom ku in lulalfongi la God el fwa aksafyela me keok a oiya sesumwos nukewa. Oasr mwolela puspus su akkalemyeyuk ke kas in mutamwauk su oasr in sra ak akosr a aklimekosr ke buk se inge a ma inge tia mwemwe se mukena ku fwinsrak se su tia paye. Paye la mwolela nukewa lun God fwa akpayeyuk! Tusruktu, fwin kom lungse in filiye lulalfongi lom nu ke mwolela nukewa inge, kom enenu in eis etauk yok ke God su orala mwolela inge.

GOD EL LUNGSE KOM IN ETEL

14. Su inen God, a efu ku kut enenu in orekmakin?

¹⁴ Kom fwin lungse sie met in ete kom, mea kom fwa oru? Ya kom tia akkalemye nu sin met se inge inem? Ya oasr inen God? Alu puspus elos fwak mu in el pa “God” ku “Lord,” tusruktu ma inge tia akkalemye ke e paye lal. Kas inge orekmakinyuk nu ke mwal mukena, oapana nu ke mwal inge “togusra” ku “president.” Baibel el luti kut la oasr mwal puspus lun God. Wekunang nu ke ma inge pa “God” a “Leum.” Tusruktu, Baibel el luti pa la oasr e paye se lun God: pa inge Jeova. Sam 83:18 el akkalemye: “Tu elos fwa ku in etu tu Kom mukena, su em pangpang Jeova, kom el su Fulatlanu fwin fwalu nufon.” Fin ine se inge wacngihn ke lweng luhn Bible ma kom orekmakihn uh, sahp kom luhngse in liye mwe lutlut se inge “Inen God​—Orekmakinyen Ma Inge a Kalmeyen Ma Inge” ma oasr ke Kutu Pa Me Akuteye tuh kom in etwelah lah efuh ohinge. Paye la inen God sikyak tausan puspus ke Baibel in pal meeta. Aok Jeova el lungse kom in etu inel a orekmakin ma inge. Ke ma inge kut ku in fwak mu el orekmakin Baibel in sifwana akkalemyel nu sum.

15. Mea kalmen e se inge Jeova?

¹⁵ God el sifwana sang inel su oasr kalme yok ka. Kalmen e se inge Jeova, pa God el ku in akpayeye kutena mwolela su el orala a el ku in akpayeye kutena akwuk su oasr ke nunak lal.a Inen God wangin sie ma oana, el ma sefwanna. E se inge ma nu sel mukena. Ke inkanek nukewa, wangin ma ku in oana Jeova. Fuka tu ouinge?

16, 17. Mea kut ku in lotela kel Jeova ke mwal puspus lal inge: (a) “Ku liki Ku”? (b) “Togusra ma patpat”? (c) “Met Orala ma nukewa”?

¹⁶ Sam 83:18 el akkalemye kel Jeova ouinge: “Kom mukena el su Fulatlanu.” (Sam 83:18) Ke inkanek sepana inge, Jeova el mukena akkalemyeyuk oana “God Ku liki Ku.” Fwakyuk 15:3 el fwak: “Yoklanu a me lut orekma lom, Jeova God, Ku liki Ku. Sumwosmwos a paye inkanek lom, kom Togusra ma patpat.” Mwal se inge “Ku liki Ku” el luti kut la Jeova el ku liki ma nukewa. Ku lal wangin ma oana; ma inge arlana yok. A mwal se inge “Togusra ma patpat” akesmakinye kut la wangin ma oana Jeova ke siepa oiya. El mukena oasr pal nukewa. Sam 90:2 el akkalemye: “Kom God omeet me nu tok ma patpat.” Ya kas inge tia akkeye kut in akkalemye akfulat a sunak nu sel?

¹⁷ Oayepa wangin kutena ma oana Jeova meyen el mukena pa Met Orala ma nukewa. Fwakyuk 4:11 el akkalemye: “Fwal nu sum, Jeova Leum lasr, a God lasr, tu kom in eis mwolanu a kaksak a ku, tu kom orala ma nukewa, a ke lungse lom elos on, a orekla tari.” Ma nukewa kom ku in nunku ka​—mutamwauk ke ma orekla lun lipufan su tia liyeyuk in kosrao nu ke itu puspus su liyeyuk in kosrao ke fong, ke fwokunsak su tuku ke saku, a ke ik puspus su oasr in mwea a infwal—​ma inge nukewa oasr ke sripen Jeova pa Met Orala ma nukewa!

YA KOM KU IN FOTOTO NU SIN JEOVA?

18. Efu ku met puspus elos pulakin mu elos tia ku in fototo nu sin God, tusruktu mea Baibel el luti?

¹⁸ Met puspus ridi ke oiya mwomwo puspus lun Jeova, saap ma inge oru elos in pulakin nunak in alolo kutu. Elos nunku mu God el arlana fulat paenang upa nu selos in liyel a elos tia ku in fototo nu sel. A elos nunku pa mu God su arlana fulat el tia aksaokyelos. Tusruktu ya nunak inge sumwos? Baibel el luti kut la tia ouinge. El fwak kel Jeova: “El tia loes liki kutena sesr.” (Orekma 17:27) Baibel el kaifwe kut: “Komwos in kalukyung nu yurin God, a el a fwa kalukot nu yurumwos.”​—Jemes 4:8.

19. (a) Kut ku in fototo fuka nu sin God, a ma lane fuka oasr ka? (b) Oiya mwo fuka lun God arlana akkeye kom?

¹⁹ Fuka kom ku in fototo nu sin God? Ma se meet, kom enenu in kafweang in oru ma kom oru ingena​—in lutlut ke God. Jisus el fwak: “A pa inge moul ma patpat, tu elos fwa ete kom God paye mukefwanna, a Jisus Kraist su kom supalma.” (Jon 17:3) Aok, Baibel el luti la in lutlut kel Jeova a kel Jisus kol nu ke “moul ma patpat”! In oana ke ma akkalemyeyuk tari, “God el lung.” (1 Jon 4:16) Oasr kutu pa oiya mwolana puspus lun Jeova. Ke sie me pupulyuk, Baibel el akkalemye la Jeova el “sie God pakomuta a kulang, tia sa in mulat, a yoklanu lungkulang a paye lal.” (Exodus 34:6) El “mwo, a lungse in nunak munas.” (Sam 86:5) God el mongfusrasr. (2 Piter 3:9) El mukena oaru. (1 Korint 1:9) Ke kom kafweang in ridi Baibel, kom ku in liye ke inkanek mwo su Jeova el akkalemye la oasr yurol oiya mwomwo puspus inge a kutu pa oiya mwomwo saye lal.

20-22. (a) Ke sripen kut kofla in liye God, ya ma inge tulokinkuti in fototo nu sel? Akuteye. (b) Mea kutu met su kulang nu sum elos kaifwe kom in oru, tusruktu mea kom enenu in oru?

²⁰ Paye la, kom tia ku in liye God meyen el sie ngun su koflana in liyeyuk. (Jon 1:18; 4:24; 1 Timote 1:17) In lutlut kel ke inkanek lun Baibel, kom ku in etel oana sie met in ngun na paye. Oana ma met sim lun sam el fwak, kom ku in “liye mwoiyen Jeova.” (Sam 27:4; Rom 1:20) Ke kom lotela ma puspus kel Jeova, kom fwa ku in etel na paye a oasr sripe puspus lom in akkalemye lungse lom nu sel a in pulakin fototo lom nu sel.

²¹ Kom ku in eis etauk kalem ke sripe paenang Baibel el luti nu sesr in nunku kel Jeova oana Papa tumasr. (Mattu 6:9) Tia ke sripe inge mukena pa moul lasr tuku sel me, a el lungse pa kut in engankin moul mwomwo emeet, oana kutena papa su oasr oiya mwomwo lal el lungse tulik puspus natul in engankin. (Sam 36:9) Baibel el oayepa luti kut la metu elos ku in kawuk lun God. (Jemes 2:23) Nunku ka​—kom ku in ekla sie met kawuk lun Met Orala kosrao a fwalu!

²² Ke kom lotela ma puspus ke Baibel, kom ku in koneak la oasr kutu met elos fwa kaifwe kom in tui liki kain in lutlut inge. Saap elos ku in alolokin mu kom ku na in ekulla lulalfongi lom. Tusruktu, nik kom lela kutena met in kutongkomi liki orekma lom in orala sie akwuk nu ke oiya lun kawuk mwomwo su kom ku in engankin.

²³ Aok, paye la oasr ma puspus su kom tia kalem ka ke mutamwauk. Oiyen inse pusisel eneneyuk nu ke inkanek in suk kasru, tusruktu nikmet lela oiyen mwekin a sangeng in kutongkomi. Jisus el fwak la mwo in akkalemye inse pusisel, oana sie tulik srisrik. (Mattu 18:2-4) A oana ke ma kut etu tari, tulik srisrik elos lungse in siyuk ma puspus. God el lungse kom in eis me top puspus. Baibel el kaksakin met nukewa su arlana lungse in eis etauk paye ke God. Elos loang mwo nu ke ma Simusla in liye la ma elos lotela inge pa ma paye.​—Orekma 17:11.

23, 24. (a) Efu ku kom enenu in tafwela in siyuk kusensiyuk puspus ke ma kom lotela? (b) Mea sifwen me lutlut toku?

²⁴ Inkanek mwo emeet in lutlut kel Jeova pa in tuni a lutlutkin Baibel. Ma inge tia oana sie nu ke kutena buk. Ke inkanek fuka? Sapta se toku fwa akuteye me lutlut inge.