Pa Inge Lohm Alu Lasr uh
“Moniyuck luhk nuh ke Tempuhl lom fihrihr in nga oacna sie e.”—JOHN 2:17.
KOM AC TOPUK FUHKAH?
Kuht ac ahkkahlwemye suhnak nuh ke toeni lasr uh fuhkah?
Inkacnek fuhkah ma mwet luhn Jeova uh sang kahsruh in muhsahi Lohm in Toeni pucspucs?
Efuh kuh yohk srihpac in ahknwacsnwacsye ac karuhnguhnwacng Lohm in Toeni lasr uh pacl nuhkewa?
1, 2. (a) In pacl meet ah, mwet kuhlwacnsap luhn God uh alu nuh sel oyac? (b) Meac puhlakihn lal Jesus nuh ke tempuhl luhn Jeova fin acn Jerusalem? (c) Meac kuht ac fah sramsramkihn ke mwe lutlut se inge?
IN PACL meet ah ac ke pacl inge, oasr lohm alu ma mwet kuhlwacnsap luhn God uh orekmakihn. Ke sie mwe puhpuhlyuck, ke pacl se Abel el oruh mwe kihsac lal nuh sin Jeova, sahp oasr mwe loang ma el muhsahelah elan orekmakihn. (Genesis 4:3, 4) Noah, Abraham, Isaac, Jacob, ac Moses eltahl nohfohn na muhsah mwe loang. (Genesis 8:20; 12:7; 26:25; 35:1; Exodus 17:15) Jeova el fahk nuh sin mwet Israel ah in muhsah lohm nuknuk. (Exodus 25:8) Tok, el sapkihn nuh seltahl in muhsahi tempuhl. (Sie Tokosra 8:27, 29) Tukun mwet luhn God ah sukohsohklah liki sruhoh laltahl fin acn Babylon, eltahl oruh toeni laltahl ah ke iwen lohlngohk, ma inge oacpacna lohm alu. (Mark 6:2; John 18:20; Orekma 15:21) Mwet Christian ke pacl luhn mwet sap ah eltahl oacyacpac toeni ke lohm sin mwet lili ke congregation laltahl ah. (Orekma 12:12; Sie Corinth 16:19) Ke pacl inge, mwet luhn Jeova fin facluh nohfohn eltahl tuhkweni ke Lohm in Toeni pucspucs in eis etwacack kacl Jeova ac in alu pac nuh sel.
2 Arlacna yohk srui lal Jesus ke tempuhl luhn God fin acn Jerusalem. Luhngse yohk lal nuh ke tempuhl sac ahkacsmakihnye mwet tuhma lutlut lal ah ke kahs luhn mwet sihm luhn psalm inge: “Moniyuck luhk nuh ke Tempuhl lom fihrihrrihr in nga oana sie e.” (Psalm 69:9; John 2:17) Lohm in Toeni uh tiac “lohm sin LEUM GOD” oacna tempuhl fin acn Jerusalem in pacl meet ah. (Luo Chronicle 5:13; 33:4) Tuhsruhktuh kuht enenuh in suhnakihn lohm alu lasr uh. Ke mwe rit se inge, kuht ac fah sramsramkihn kahs in kahsruh in Bible ma ac luti nuh sesr lah fuhkah ohiyacsr ke pacl se kuht oasr lun Lohm in Toeni uh. Oacyacpac, lah kuht ac kahsruh fuhkah in karihngihn ac moli Lohm in Toeni lasr uh.a—Liye footnote.
KUHT AHKKAHLWEMYE SUHNAK NUH KE TOENI LASR UH
3-5. Meac se inge Lohm in Toeni ac fuhkah puhlakihn lasr nuh ke toeni lasr uh?
3 Lohm in Toeni uh pa acn se ma kuht tuhkweni kac in oruh alu lasr nuh sin Jeova. Toeni lasr uh mwe sang sin God me, ac ma inge kahsre kuht in ahkkweye inmahsrlosr nuh sel. Ke toeni lasr inge, u lasr uh ahkkweye kuht ac use kahs in kolyuck ma kuht enenuh uh. Kuht arlacna ahksacohkye mwe solsol luhn Jeova ac Wen nahtuhl in mongo ke “tepuh luhn Leum [Jeova]” ke wik nuhkewa. (1 Corinthians 10:21) Kuht enenuh in tiacna muhlkuhnlah ke sacohkiyacn mwe solsol se inge.
4 Jeova el fahk arlacna kahlwem nuh sesr lah el ke kuht in wi toeni nuhkewa in alu nuh sel ac in ahkkweye sie sin sie. (Riti Hebrew 10:24, 25.) Fin wacngihn elyah yohk srihpac, kuht ac wi ke toeni nuhkewa in ahkkahlwemye lah kuht ahkfuhlwactye Jeova. Ke pacl se kuht ahkolah ac engan in wi top ke toeni lasr inge, kuht ahkkahlwemye pac lah kuht arlacna srui kac.—Psalm 22:22.
5 Ohiyacsr ke pacl in toeni uh ac karihngihnyen Lohm in Toeni lasr uh ahkkahlwemye suhnak lasr nuh sin Jeova. Kuht luhngse ohiyacsr in wo tuh in sang kaksak nuh ke inen Jeova, in oacna sihmlac ke mwe akucl ke Lohm in Toeni lasr uh.—Liye Psalm 96:8.
6. Meac mwet sahyac uh fahk ke Lohm in Toeni ac mwet ma wi toeni lasr uh? (Liye petsac se meet ke mwe lutlut inge.)
6 Ke pacl se kuht ahkkahlwemye suhnak nuh ke Lohm in Toeni lasr uh, mwet sahyac uh akihlen. Ke sie mwe puhpuhlyuck, sie mukul fin acn Turkey el fahk: “Ke nga akihlen nwacsnwacsiyacn Lohm in Toeni uh, pa inge ma se ma nga arlacna fwefwelac kac ah. Arlacna los nahweyuck luhn mwet ah, ac eltahl arlacna engan ac kuhlwacng nuh sihk. Pa inge ma nga arlac fwefwelac kac ah.” Mukul sac tahfwelah na in wi ke toeni nuhkewa ac ke kihtin pacl tohkoh el bacptaislac. Ke sie siti fin acn Indonesia, mwet lili ekahsr suli mwet tuhlan laltahl, mayor ac kuhtuh pac mwet ke government eltahl in liye Lohm in Toeni sasuc laltahl ah. Mayor sac arlacna fwefwelac na pwacye ke kuhiyacn lohm sac, woiyen muhsah kac ah, ac wi imac kahto se we ah. El fahk: “Nwacsnwacsiyacn lohm se inge ahkkahlwemye luhlahlfongi pwacye lomtacl uh.”
7, 8. Kuht ac ahkkahlwemye fuhkah lah kuht suhnakihn Jeova ke pacl se kuht oasr ke Lohm in Toeni uh?
7 Jeova pa suli kuht nuh ke toeni nuhkewa lasr uh, ac el nuhnkuh ke nahweyuck lasr ac ohiyacsr ke acn inge. Pwacnacng kuht enenuh na in taran ac liyacacng ahkwoyac ohiyacsr. Tuhsruhktuh kuht tiac orek masap nuh ke nuknuk luhn mwet nuh ke toeni uh, ac kuht sruhnga in nahweyuck ke inkacnek ma ahkkahlwemye muh wacngihn suhnak lasr. Jeova el ke kuht ac mwet ma kuht suli nuh ke Lohm in Toeni uh in engan in utyak ac muhta. Pwacnacng kuht ke ahkkahlwemye lah kuht suhnakihn toeni lasr uh ke inkacnek nuhkewa. Pa inge srihpac pwacnacng kuht tiac nukum nuknuk ma fohkfohk kuh ma tiac ahkkahlwemye suhnak, kuht tiac text, sramsram, kuh in mongo ac nihm ke pacl in toeni uh. Pahpah ac ninac enenuh in luti tuhlihk nahtuhltahl uh in kahlwem kac lah tiac acn in kahsruhsr kuh acn in sritacl se pa Lohm in Toeni uh.—Ecclesiastes 3:1.
8 Ke Jesus el liye mwet ma kuhka ke tempuhl luhn God ah, el foloyak ac luhsuhltahllah. (John 2:13-17) Ke Lohm in Toeni lasr uh, kuht alu nuh sin Jeova ac lutlut kacl. Pwacnacng tiac fal kuht in oruh kuhtwena ma ma kuhpahsr nuh ke business kuh tiac kuhpahsr nuh ke alu lasr uh.—Liye Nehemiah 13:7, 8.
OASR KAHSRUH LASR IN MUHSAHI LOHM IN TOENI PUCSPUCS
9, 10. (a) Mwet luhn Jeova uh muhsahi Lohm in Toeni laltahl uh fuhkah, ac meac sahflahiyen orekma laltahl uh? (b) Kahsruh na wowo fuhkah oreklac nuh sin congregation pucspucs ma koflah in sifacna oruh kuh moli Lohm in Toeni laltahl?
9 Mwet luhn Jeova fin facluh nohfohn orekma upac in muhsahelah Lohm in Toeni pucspucs. Mwet lili pucspucs sang pacl laltahl in kahsruh muhsahi, nahwelah ac ahkwoye lohm inge nuhkewa. Ke lusen yac 15 somlah ah, puhs liki 28,000 ke Lohm in Toeni na kahto ma oreklac fin facluh nohfohn nuh ke alu pwacye. Pwacnacng, kuht kuh in fahk muh Lohm in Toeni lihmekohsr muhsahiyucklac ke kais sie lwen.
10 U luhn Jeova uh oakiyac mwet lili ma sang pacl laltahl inge ac orekmakihn mwe kahsruh luhn mwet pucspucs in sang muhsahelah Lohm in Toeni pucspucs ke acn nuhkewa ma enenweyuck. Kuht ahkos kahs in kahsruh ke Bible ma fahk lah mwet ma yohk suhna se uh kuh in kahsruh mwet ma wacngihn suhna yohroh. (Riti Luo Corinth 8:13-15.) Fuhkah sahflahiyen orekma inge? Ke srihpen orekma inge, Lohm in Toeni na kahto inge muhsahiyucklac nuh sin congregation pucspucs ma koflah in sifacna oruh kuh moli.
11. Meac mwet lili ekahsr inge fahk ke Lohm in Toeni sasuc se laltahl, ac meac kom puhla ke kom etuh ma inge uh?
11 Ke sie congregation fin acn Costa Rica, pa inge ma mwet lili ekahsr eltahl suhmuhslah ac fahk: “Lohm in Toeni lasr uh tuhfahna tari. Ma nuhkewa ahksahfyeyucklac, nwe ke ma na srihsrihk kac uh ke lusen lwen oalkosr na. Ke pacl se kuht tu liye Lohm in Toeni lasr uh, kuht puhla muh oacna in muh kuht mwemwe na! Kuht suhlahlahlfongi na pwacye. Ma inge kuh in sikyak ke srihpen kahsruh luhn Jeova, ke oakwuck nuhkewa ma oreklac sin u lal uh, ac ke kahsruh ma tuhkuh sin mwet lili pucspucs wiyacsr uh. Ma na pwacye se lah lohm alu se inge mwe sang sacohk se sin Jeova me. Kuht arlacna engan kac.” Mwe engan na yohk se nuh sesr in lohng ke mwet lili wiyacsr uh sang kuloh nuh sin Jeova ke ma nuhkewa ma el oruh nuh seltahl uh. Ac mwe insewowo na yohk se lah kuh in oasr Lohm in Toeni sin mwet lili nuhkewa wiyacsr fin facluh nohfohn. Ma na kahlwem se lah Jeova el ahkinsewowoye orekma inge in muhsahi Lohm in Toeni pucspucs, mweyen puhseni mwet ma muhtwacwack wi miting in lutlut kacl Jeova tukun na muhsahiyucklac lohm inge.—Psalm 127:1.
12. Kahsruh fuhkah kom kuh in oruh in muhsahi Lohm in Toeni uh?
12 Kom ac kahsruh in muhsahi Lohm in Toeni uh fuhkah? Sahp kom kuh in oraclah pacl in wi ke orekma se inge. Ac kuht nuhkewa kuh pac in sang kahsruh ke mani in sang moli ma enenweyuck in muhsahelah Lohm in Toeni inge. Ke kuht sang insiacsr kewa in kahsruh orekma se inge, kuht arlacna engan, tuh yohk liki na, kuht sang kaksak nuh sin Jeova. Kuht ukwe mwe srihkasrak ke mwet luhn God in pacl meet ah ma arlacna engan in sang kahsruh nuh ke muhsahiyucklac luhn lohm alu pucspucs laltahl uh.—Exodus 25:2; Luo Corinth 9:7.
KUHT ORUH IN NWACSNWACS LOHM IN TOENI LASR UH PACL NUHKEWA
13, 14. Meac kuht lotwelah in Bible ma ahkkahlwemye lah kuht enenuh in oruh Lohm in Toeni lasr uh in nwacsnwacs pacl nuhkewa?
13 Jeova el God na nwacsnwacs ac muhtahl se. El sie God suc luhngse ma oakwuck ac tahklac wo. Pa inge srihpac se oruh kuht ahknwacsnwacsye acn in toeni lasr uh. (Riti Sie Corinth 14:33, 40.) Kuht fin ke nwacsnwacs ac muhtahl oacna Jeova, alu lasr, nuhnak lasr, orekma lasr ac oacyacpac mahnosr enenuh in nwacsnwacs pac.—Fwackyuk 19:8.
14 Ke kuht oruh in nwacsnwacs Lohm in Toeni lasr uh pacl nuhkewa, kuht engan ac tiac mwekihn in suli mwet nuh ke toeni lasr uh. Ac mwet uh ac kuh pac in liye lah kuht orekmakihn na pwacye ma kuht luti ke sie facl nwacsnwacs. Eltahl ac liye lah kuht alu nuh sin sie God muhtahl ac nwacsnwacs suc ac fah oruh tuh facluh in eklac sie paradise na kahto.—Isaiah 6:1-3; Fwackyuk 11:18.
15, 16. (a) Efuh kuh tiac pacl nuhkewa fihsracsr in ahknwacsnwacsye Lohm in Toeni lasr uh? Tuhsruhktuh efuh kuht enenuh in ahknwacsnwacsye pacl nuhkewa? (b) Meac oakwuck nuh ke ahknwacsnwacsyeyacn Lohm in Toeni lom uh, ac kunohkohn sacohk fuhkah se oasr yohrohsr nuhkewa?
15 Siena nuhnak luhn kais sie mwet nuh ke ahknwacsnwacs uh. Efuh? Sahp ma ke srihpen acn ma eltahl mahtuhlah kuh kapkapack we uh. Oacyacpac, kuhtuh mwet uh muhta ke acn ma arlacna fohkfohk kuh ke acn ma inkacnek we uh kutkut ac arlac fohk fuhrahrrahr. Kuhtuh mwet uh muhta ke acn ma srihklac kof we kuh wacngihn suhnuhn kuhfa in ahknwacsnwacs laltahl. Tuhsruhktuh kuht finne muhta oyac kuh finne meac nuhnak luhn mwet ke acn sesr nuh ke inkacnek ma fal in ahknwacsnwacs, kuht enenuh in ahknwacsnwacsye Lohm in Toeni lasr uh pacl nuhkewa. Pa inge acn kuht oruh alu lasr nuh sin Jeova uh.—Deuteronomy 23:14.
16 Kuht fin ke in nwacsnwacs Lohm in Toeni lasr uh, oasr ma kuht enenuh in oruh. Mwet elder uh oraclah oakwuck nuh sin congregation uh ac liyacacng ahkwoyac in muh oasr kuhfwen mwe ahknwacsnwacs laltahl pacl nuhkewa. Mwet elder uh oakiyac in oreklac orekma nuhkewa ma enenweyuck uh. Oasr ma enenuh in ahknwacsnwacsyeyuck tukun toeni nuhkewa, tuh kuhtuh kuh in orek ke kais kuhtuh pacl sahyac. Kuht nuhkewa oasr ip kunac in wi kunohkohn na sacohk se inge in ahknwacsnwacsye Lohm in Toeni lasr uh.
KUHT KARUHNGUHNWACNG LOHM IN TOENI LASR UH
17, 18. (a) Meac kuht kuh in lotwelah sin mwet kuhlwacnsap luhn Jeova in pacl meet ah ke karihngihnyen tempuhl uh? (b) Efuh kuht enenuh in karuhnguhnwacng Lohm in Toeni lasr uh?
17 Kuht oacyacpac karihngihn Lohm in Toeni lasr uh ke pacl se kuht ahkfalye kuhtwena ma ma enenuh in ahksasucyeyuck kuh ahkwoyeyuck. Mwet kuhlwacnsap luhn Jeova in pacl meet ah oruh pac ma inge. Ke sie mwe puhpuhlyuck, Tohkohsrah Jehoash fin acn Judah el sapkihn mwet we ah in sang mani nuh ke tempuhl sac. Tohkohsrah el sapkihn mwet tol ah in orekmakihn mani inge in ahkwoye kuhtwena ma muhsahllah ke tempuhl sac. (Luo Tokosra 12:4, 5) Yac lofoko kuhtuh tohkoh, Tohkohsrah Josiah el oacyacpac orekmakihn mwe kahsruh luhn mwet nuh ke tempuhl sac in sang moli kuhtwena ma ma enenuh in ahkwoyeyucklac.—Riti Luo Chronicle 34:9-11.
18 Un mwet elder ma liyacacng congregation pucspucs eltahl akihlen lah mwet sahyac ke acn seltahl uh tiac arlacna elyah in karihngihn lohm kuh kuhfwen mwe orekma nahtuhltahl uh. Sahp suhpuhs mwet ke muhtuhnfacl inge ma etuh in oruh orekma ma enenweyuck nuh kac uh. Kuh sahp wacngihn mani in sang ahkwoyelah ma inge. Tuhsruhktuh kuht fin tiac na ahkwoyelah ma enenweyuck nuh ke Lohm in Toeni lasr uh, ma inge ac tilac nwacsnwacs ac oasr mwet ac akihlen. Ma inge ac tiac pac sang ma loh wowo kacsr. Tuhsruhktuh, ke kuht nuhkewa oruh kuhiyacsr in karihngihn Lohm in Toeni lasr uh, kuht sang kaksak nuh sin Jeova ac kuht tiac sisi mani wel ke mwe kahsruh luhn mwet lili wiyacsr uh.
19. Meac kom ac oruh in ahkkahlwemye suhnak lom nuh ke lohm ma kom alu nuh sin Jeova kac uh?
19 Lohm in Toeni uh sie ma kihsackihnyuckyang nuh sin Jeova. Tiac ma luhn kuhtwena mwet kuh kuhtwena congregation. Oacna ma kuht sramsramkihn tari ke mwe lutlut se inge, kahs in kahsruh ke Bible uh ac kahsre kuht in ahkkahlwemye ohiyac wo ke lohm alu lasr nuh sin God. Ke srihpen kuht ahkfuhlwactye Jeova, kuht ahkkahlwemye suhnak lasr nuh ke toeni lasr wekuhnacng Lohm in Toeni uh. Kuht engan in sang kahsruh ke mani in muhsahi Lohm in Toeni inge, ac kuht kwacfeacng in karuhnguhnwacng ac ahknwacsnwacsye. In oacna Jesus, kuht ahkkahlwemye moniyuck ac suhnak lasr nuh ke lohm ma kuht alu nuh sin Jeova kac uh.—John 2:17.
[Sihm srihsrihk e ten]
a Mwe lutlut se inge sramsram yohk ke Lohm in Toeni pucspucs. Tuhsruhktuh ma kuht ac fah sruhmuhn inge fal pac nuh ke lohm ma orekmakihnyuck ke Toeni Luhlahp pucspucs ac ke kuhtuh pac acn in toeni sahyac ma orekmakihnyuck nuh ke alu lasr nuh sin Jeova uh.