Kulansap Ke Oaru Ke U Lun Jeova
“Kom fwa fwakomyuk oaru nu selos su oaru.”—2 SAMUEL 22:26.
SIE met elder el akola sramsram lal ke sie meeting lun met Kristian ke sie eku. El lungse in tui a mongle; tusruktu el tia oru ou inge, a el tafwela na ke orekma lal, suk me srikasrak a me pupulyuk ke Ma Simusla su el ku in orekmakin in sun inse a akkeye u. Ke fong in meeting, seanyen papa a nine se ke congregation senpanu inge elos arulanu ulle a insemwomwo in muta na in loom ke fong se inge; tusruktu elos tia oru ou inge, a elos mongfwusesr in akola tulik nutulos a som nu ke meeting. Tukun meeting, sie un met Kristian elos sramsram ke ma met elder el aketeye. Sie sister srifweyuk in srumon a akkalemye la sie pal elder se inge el aktoasryel; tusruktu el tia oru ou inge, a el sramsram ke insemwomwo ke sie me lutlut yok su el orala. Ya kom ku in liye ma oanu sie ke me sramsram inge nu kemwa?
2 Ma oanu sie pa oaru lalos. Met elder el oaru in oru orekma tu lan ku in kulansap ke u lun God; papa a nine se elos oaru in wi ke meeting lun congregation; sister se el oaru in akkeye met elder. (Hibru 10:24, 25; 13:17; 1 Piter 5:2) Aok, ke oiyen moul nu kemwa, kut ku in liye la met lun God elos oaru in kulansap ke u lun Jeova.
3 Fwin Jeova el ngeti nu ke fwalu koluk inge, el liye la arulanu supus met oaru. Fuka arulanu akinsemwomwoye insiel ke pal se ma el liye oaru lun met kulansap lal! Aok, oaru lom akinsimwomwoyel. Tusruktu, ma inge arulanu akkoskrukye Setan, sie met lain, a ma inge sie me akpayeye la el kikiap. (Soakas 27:11; Jon 8:44) Kom enenu in lalalfongi la Setan el kaifweung in kunausla oaru lom nu sin Jeova a ke u lal fwin fwalu. Lela kut in liye a tuni kutu inkanek lal Setan fuka in oru ou inge. Ke ma inge kut ku in etu fuka kut ku in muta na oaru nu ke safla.—2 Korint 2:11.
In Loang nu ke Moul Sesumwos Ma Inge Ku In Kunausla Oaru
4 Ke pal se ma sie brother el srukye sie kunokon, na ma tafongla lal saap arulanu kalem. Arulanu fwusesr in “liye kutkut ke mutun met lili wiesr a in pal se na pilesru sak lulap ke mutasr’! (Mattu 7:1-5) In mutanu ke tafongla lun kutu met, ku in oswela suoaru. Ke sie me pupulyuk, tuni ma tia oanu sie inmaslon Kora a Devid. Oasr kunokon yok lal Kora, a saap el oaru ke lusen yiu puspis, tusruktu tok el suk mwal fulat. El supwar ke kolyuk lal Moses a Aaron, cousin se meet lal. Fwinne Moses el arulanu fwokpap, tusruktu Kora el mutamwauk in suk ma tafongla lal. Saap el konaok na paye ma tafongla sel Moses. Tusruktu, ma tafongla inge tia sang sumwos nu sel Kora in akkalemye suoaro ke u lun Jeova. El mise ye mutun congregation.—Oekyuk 12:3; 16:11, 31-33.
5 Ke inkanek saye, David, el kulansap ye koko lal Togusra Soul. Sie pal el sie Togusra mwomwo, tusruktu tok el ekla koluk na upa. Devid el enenu lalalfongi, muteng, a kutu orekma usrnguk tu lan ku in moula liki orekma silolel lal Soul ke sripen sok. Fwinne ou inge, ke pal se ma oasr pal mwo lal Devid in suk foloksak, el fwak la ‘tia sumwos ye mutun Jeova,’ lan asroela paol lain el su Jeova el moswella.—1 Samuel 26:11.
6 Fwin sie met su kol inmaslosr el tafongla ke nununku, el kaskas sekulang, ku el luman akkalemye srisri, ya kut torkaskas lainelos, ku saap kut purakak ngun in suk ma tafongla in congregation? Ya kut tia wi meeting in akkalemye srunga lasr? Paye kut tia oru ou inge! Oanu Devid, kut tia lela ma tafongla lun kutu met in mokle kut in akkalemye suoaru nu sin Jeova a ke u lal!—Sam 119:165.
7 Sie me srikasrak yok emeet nu sin met ke oaru pa Jisus Kraist, su akkalemyeyuk ke kas palu oanu “met oaru” lun Jeova.” (Sam 16:10) Orekma koluk lun met kuka ke tempel fwin an Jerusalem orala sie me srifwe ke oaru lun sie met. Jisus el etu la orekma lun met tol fulat a me kise nu kemwa el pitse ke orekma lun forfor a mise lal oanu me kise, a el etu la arulanu yok sripe nu sin met in lutlut ke ma se inge. Ke ma inge el arulanu koskosrok ke pal se ma el liye la tempel el ekla “lufin met pusrapasr.” Ke ku lal su tuku sin God, pal luo el orekma in aknasnasye ma inge.a—Mattu 21:12, 13; Jon 2:15-17.
8 Fwinne ou inge, Jisus el srakna akesrui ke akwuk lun tempel. Mutamwauk ke el tulik me, el wi ke akfulat in tempel a pal puspis el luti we. El moli takma ke tempel—fwinne wangin kunokon lal in oru ou inge. (Mattu 17:24-27) Jisus el kaksakin mutan katinmas sikasrup se meyen el “filiye ma lal nu kemwa” in nien mani. Tia pat toko, Jeova el sisila tempel inge. Tusruktu nu ke pal in safla lal, Jisus el oaru nu ka. (Mark 12:41-44; Mattu 23:38) U lun God fwin fwalu misinge mwo liki akmwuk lun met Ju a tempel lal. Paye, el tia sumwosmwos; paenang oasr aksumwos orek kais kutupal. Tusruktu el tia nenela ke ma koluk, ku Jeova God el akola in ayaola ma inge. Lela kut in tia lela kutena ma tafongla ke sripen moul sesumwos in aktukulkulye kut ku mokle kut in srukye sie nunuk su suk pal nu kemwa ma tafongla, a nunuk sesumwos. A, lela kut, in etawi oaru lal Jisus Kraist.—1 Piter 2:21.
Ma Sesuwmos Lasr Sifwanu
9 Setan el ouyepa srike in purakak suoaru ke el orekmakin sesumwos lasr. Akmwuk lal inge el orekma ke sesumwos lasr, el srifwe kut in oru ma sesumwos ye mutun Jeova. Sie me asor, meyen kais sie yiu tausen puspis putatla nu ke kosro. Kutu met elos toeni suoaru ke elos moulkin moul luo, elos tafwela ke sie inkanek ma koluk a in pal se na elos orek luma oanu met oaru Kristian. In sang topuk lal nu ke sifwen me lutlut inge “Young People Ask . . . ” ke inkanek takla ke Awake! sie mutan fwusr el fwak: “Me lutlut inge nu kemwa, akkalemye moul luk na paye.” In lukma, el orek kamwuk nu sin kutu met fwusr su wangin lungse nu sin Jeova. Fwokin ma inge? El simusla: “Moul luk el putatla nu ten, a Nga sroang nu ke orekma lun kosro ke ma inge Nga eis kai. Futoto luk nu sin Jeova akkolukyeyuk, a lalalfongi lun papa a nine kiuk a met elder wanginla.”b
10 Mutan fwusr inge el eis kasru sin met elder a el folokla nu ke kulansap oaru nu sin Jeova. Tusruktu, sie me asor, meyen met puspis elos kosrani yok a keok ke ma elos oru, a kutu selos tia sifwil folokla nu ke u. Fuka arulanu mwo kut fwin oaru a lain me srifwe nu kemwa lun fwalu koluk se inge! Loang nu ke kas in sensen su tuku ke magasin inge Watchtower a Awake! ke asrouki ke fwalu se inge a me akengun koluk. Lela kom in tia putatla ke kutena pal ke oiye suoaru. Tusruktu kom fwin putatla na paye, lela kom in tia orek luma oanu kom tia oru. (Sam 26:4) A, eis kasru. Pa inge sripe efu oasr met Kristian papa a nine a met elder.—Jemes 5:14.
11 Moul sesumwos lasr ku in filikutla ke siepa me sensen. Kutu met su oru orekma suoaru elos fuleak tari ke kaifweung lalos in akinsemwomwoye Jeova. Esam la, Devid el oru ma koluk upa. Tusruktu, yiu puspis somla tukun mise lal David, Jeova el esamul oanu sie met kulansap sumwos. (Hibru 11:32; 12:1) Efu? Meyen el tia fuleak ke orekma lal in akinsemwomwoye Jeova. Soakas 24:16 el fwak: “Tu sie met sumwosmwos ikori pal itkosr, a sifwil tuyuk.” Paye, kut fwin putatla nu ke ma koluk srisrik—puspis—ke sripen ma sesumwos su kut kaifweung in kutangla nu ka, saap kut srakna sumwosmwos ye mutun Jeova kut fwin tafwela in “tuyuk”—kalmen ma inge pa kut auliyuk na paye ke insiesr a tafwela ke kulansap oaru.—Srike liye 2 Korint 2:7.
Taran ke Suoaru Su Tia Fwusesr in Akilen!
12 Suoaru ku in sikyuk pa ke inkanek su tia fwusesr in akilen. El ku in liyeyuk oanu orekma oaru fwinne tia! Ke sie me pupulyuk, met Farisi in len lal Jisus saap elos nunku la elos oaru na paye liki kutu met.c Tusruktu elos tia liye ma tia oanu sie inmaslon oaru a ituftuf in akos ma sap lun met, meyen elos upa na paye a lungse in oru nununku sekulang. (Srike liye Ekklisiastis 7:16.) Ke sripe se inge elos suoaru na paye—nu sin met su elos enenu in kulansapu, ke ngun lun Ma Sap su elos enenu in luti, a nu sin Jeova. Jisus el tia ou inge, el oaru ke ngun lun Ma Sap, su oakiyuki ke lungse. Ke ma inge el musaiyuk a akkeye metu, oanu kas palu ke Messaia el palye meet.—Isaia 42:3; 50:4; 61:1, 2.
13 Met Kristian nu kemwa su oasr kunokon elos ku in eis ma lane yok ke me srikasrak su Jisus el oru ke ma se inge. Ke sie me pupulyuk, papa a nine oaru elos etu la elos enenu in sang kai nu sin tulik nutulos. (Soakas 13:24) Tusruktu elos enenu na paye in kaifweung la elos tia angon tulik nutulos ke sripen kai sesumwos su orek ke mulat ku ke kas in akkoluk pal nu kemwa. Tulik srisrik nu kemwa su pulakin la elos tia ku in akinsemwomwoye na paye papa a nine kielos ku elos pulakin la alu lun papa a nine kielos orelos in srukye nunuk sesumwos a suk ma tafongla pal nu kemwa, ke ma inge tulik elos toasrla, a fwokin ma inge, elos som liki ma paye.—Kolosse 3:21.
14 In oupanu, met Kristian elder a met fwafwasyesr elos enenu in loang nu ke ma upa a me sensen su u elos sun. Oanu met seperd oaru, elos sang kai fwin eneneyuk, a kaifweung na paye in oasr me akpayeye meet a arulanu tuni kas lalos fwin tuku na paye ke Baibel a ke me rid lun Society. (Sam 119:105; Soakas 18:13) Elos ouyepa etu la, sip elos lalalfongi nu selos ke me akkeye a kitakut in ngun. Ke ma inge elos kaifweung in etawi Jisus Kraist, Met Seperd Mwo. Elos oaru in kulansap nu ke sip wik nu ke wik ke meeting lun met Kristian—elos tia aksupwaryelos, a akkeyelos a musaiyuk lalalfongi lalos.—Mattu 20:28; Efesus 4:11, 12; Hibru 13:20, 21.
15 Siepa kain in oaru sufwal su kut tia akilen pa oaru sesumwos. Oaru na paye ke ma simusla in Baibel tia lela kut in filiye oaru lasr ke kutena ma yok liki oaru lasr nu sin Jeova God. Met Ju puspis ke century se meet elos sremla ke lekkeke ke Ma Sap lal Moses a ke akmwuk lun met Ju. Aok pal lun Jeova tuku in ekulla insemwomwo lal ke mutanfwal lekkeke se inge nu ke mutanfwal lun Israel in ngun. Met ekasr na pa akkalemye oaru nu sin Jeova a insese ke ekla lulap inge. Fwinne inmaslon met Kristian paye, kutu sin met Judaizer elos liksreni in kaifwe ke sifwil forla nu ke “me srumtauk lun etauk su munas a mwes” ke Ma Sap lal Moses, su Kraist el akpayeye tari.—Galetia 4:9; 5:6-12; Filippai 3:2, 3.
16 Tia oanu elos, met lun Jeova ke len inge elos akpayeye la elos oaru na paye ke lusen pal in oasr ma ekla. Ke kut liye la kalem lun ma paye el tafwela in saromromelik, na aksumwos eneneyuk. (Soakas 4:18) Ke sie pal su tufwanu somla, “met kulansap oaru a lalmetmet” elos kasru kut in akyokye kalem lasr ke kas se inge “fwil” su orekmakinyuk in Mattu 25:34 a ke pal in nununku ke “sip” a “goat” su akkalemyeyuk in Mattu 25:31-46, a ke nunuk sumwos lasr ke kutu orekma ke an sesr su tia ma lun solse. (Mattu 24:45) Wangin alollo kutu met luti kikiap pangpang apostate elos arulanu engun fwin kutu sin Met Lo lun Jeova elos lungse na in ukwe ma elos lalalfongi meet ke me lutlut inge a srunga in kapkapek. Tusruktu kain in oiye se inge tia sikyuk. Efu? Meyen met lun Jeova elos oaru.
17 Tusruktu, saap oaru sufwal ku in sun kais sie sesr. Ke pal se ma kamwuk futoto ku sou lasr elos sulela sie inkanek su kunausla ma sap lun Baibel, saap kut pulakin a nunku la piye Nga enenu in filiye oaru luk. Paye, kut pulakin oaru nu sin met in sou lasr. Tusruktu lela kut in tia filiye oaru lasr nu selos oanu yok liki oaru lasr nu sin Jeova! (Srike liye 1 Samuel 23:16-18.) Lela kut in tia sang kasru nu sin met su oru ma koluk upa in okanla ma koluk lalos nu sin met elder ‘su srike in aksumwosye ma inge in ngun lun fwokpap.’ (Galetia 6:1) Suoaru pa inge nu sin Jeova, ke u lal, a nu sin met su kut lungse, kut fwin oru ou inge. Kalem la, in tu inmaslon met su oru ma koluk a ke kai su el enenu in eis, oanu kut kosroila inkanek lun Jeova in akkalemye lungse lal nu sel. (Hibru 12:5-7) Ouyepa lela kut in esam la, “oaru kinit lun sie met kamwuk.” (Soakas 27:6) Kai sumwos, ke lungse su tuku ke Kas lun God ku in orala kinit ku ngal ke insien sie met su oru ma koluk, tusruktu ma inge ku in molela moul lal ke pal fwasru!
Oaru El Tu ke Kolyai
18 Kutupal orekma silolel lal Setan lain oaru lasr arulanu kalem. Tuni ma sikyuk nu sel Nebot. Ke pal se ma Togusra Ehab el liksreni in siyuk nu sel in kukakunla nien grep lal, el topuk: “Jeova lan kutongyuwi, tu Nga fwa sot me usru lun papa tumuk nu sum.” (1 Togusra 21:3) Nebot el tia inse fulat; el oaru na. Ma Lal Moses el sapkin nu sin met Israel nu kemwa in tia kukakin kutena an su elos usru nu tok. (Livitikus 25:23-28) Nebot el arulanu etu la togusra koluk inge el ku in orala inkanek tu lan ku in unilye, meyen Ehab el lela tari mutan kiel, Jesebel, in uniye met palu puspis lun Jeova! Fwinne ou inge Nebot el tu ku.—1 Togusra 18:4.
19 Kutupal oasr ma sikyuk upa ke sripen oaru. Jesebel, ke kasru lun “met losrongten luo,” elos orek lo kikiap ke sie ma koluk upa su Nebot el tia oru. Ke sripe se inge, Nebot a tulik nutul anwuki. (1 Togusra 21:7-16; 2 Togusra 9:26) Ya kalmen ma inge pa, tafongla oaru lal Nebot? Mo! Nebot el sie sin met oaru mokul a mutan su ‘moul’ ke nunuk lun Jeova ke pal inge, elos mutol ke kalyuk a sano pal in sifwil moulyuk.—Luk 20:38; Orekma 24:15.
20 Mwolela siefwunnu pa sang akkeye met kulansap oaru lun Jeova misinge. Kut etu la oaru lasr ku in kol nu ke ma upa yok fwin fwalu se inge. Jisus Kraist el sun mise ke sripen oaru lal a el akkalemye nu sin met tumal lutlut lal la elos ku in oupanu sun ma inge. (Jon 15:20) Meyen fwinsrak lal ke pal fwasru arulanu akkeyel, oupanu nu sesr misinge. (Hibru 12:2) Ke ma inge kut ku in muta na oaru ye kain in kolyai nu kemwa.
21 Paye, arulanu supus inmaslosr sun kain in orekma silolel lain oaru lasr ke pal inge. Tusruktu met kulansap lun God elos fwa sun kolyai puspis meet liki safla tuku. Fuka kut ku in etu na paye kut fwin ku in srukye oaru lasr? Kut ku in oru ou inge kut fwin muta na oaru ke pal inge. Jeova el ase nu sesr kunokon yok—in sulkakin a luti ke Togusrai lal. Lela kut in oaru in oru orekma saok se inge. (1 Korint 15:58) Kut fwin tia lela moul sesumwos lun met in kunausla oaru lasr ke u lun Jeova a kut fwin taran lain suoaru su upa in akilen oupanu oaru sufwal, na kut akola na paye fwin pal tuku la oaru lasr srifweyuk na upa. Ke kutena ma sikyuk, lela kut in lalalfongi la Jeova el oaru na paye nu sin met kulansap lal su oaru. (2 Samuel 22:26) Aok, el kurungin met oaru lal!—Sam 97:10.
[Footnotes]
a Jisus el pulaik in lain met kuka kutusrik inge. Fwal nu ke sie met sramsram lun fwalu, oasr kain in mani lun met Ju in pal meeta su ku in orekmakin mukena in moli takma. Ke ma inge met muteta puspis ke tempel elos enenu in ayaola mani lalos tu elos in ku in molela takma. Met ayaol mani elos pakiye molo ke ayaol inge, a ke ma inge elos eis mani yok.
b Srike liye Awake! lun December 22, 1993; January 8, 1994; a January 22, 1994.
c U lalos tuku ke u se inge pangpang Hasidim, sie u su touyuk century puspis somla in lain me purakak lun met Grik. U se inge Hasidim el eisla e lal ke kas Hibru inge chasi·dhimʹ, su oasr kalme “met oaru” ku “met mwo.” Saap elos pulakin la ma simusla su sramsrakin “met oaru” lun Jeova fwal nu selos. (Sam 50:5) Elos inge, a met Farisi su fwasr tukolos, elos akola in mise ku uniye kutu met ke sripen lalalfongi lalos, a pakiyelos sifwanu oanu met liaung lun Ma Sap.
Fuka Kom Topuk?
◻ Fuka kut ku in fwasr liki tu in tia lela moul sesumwos lun kutu met in kol kut nu ke suoaru?
◻ Ke inkanek fuka saap moul sesumwos lasr ku in kol kut nu ke oiye suoaru?
◻ Fuka kut ku in lain me purakak in filiye lalalfongi lasr ke ma sufwal?
◻ Mea ma inge su ku in kasru kut in srukye oaru lasr ye pal in kolyai?
[Study Questions]
1, 2. Mea kutu me srikasrak ke oaru su kut nu kemwa ku in liye ke congregation?
3. Efu arulanu yok sripe kut in akkalemye oaru ke u lun Jeova fwin fwalu?
4. (a) Efu arulanu fwusesr in srukye nunuk sesumwos nu selos su oasr kunokon? (b) Fuka Kora el akkalemye la el suoaru ke u lun Jeova?
5. Efu David el ku in saap srifweyuk in tunyuna lain Soul?
6. Fwinne kut akilen ma sesumwos a ma tafongla nu sin met elder, tusruktu mea ma inge su kut tia enenu in oru?
7. Mea kutu orekma koluk su kapkapek ke tempel fwin an Jerusalem, a mea Jisus el pulakin ke ma se inge?
8. (a) Fuka Jisus el akkalemye oaru ke akmwuk lun tempel? (b) Fuka kut ku in akkalemye la kut engunkin in alu nu sin Jeova ke inkanek lun u nasnas lal?
9, 10. (a) Fuka akmwuk lal Setan el orekmakin sesumwos lasr in mokle kut in akkalemye oiye suoaru? (b) Mea sie met el enenu in oru el fwin oru ma koluk upa?
11. Efu tia sumwos in nunku la wanginla fwinsrak lasr oanu met koluk, a mea me sramsram in Baibel meet su ku in kasru kut in aksumwosye nunuk lasr?
12. Fwin ke oiyen met Farisi, fuka sie akmwuk upa, a nunuk upa ke ma sap kol nu ke suoaru?
13. (a) Fuka papa a nine Kristian elos ku in akkalemye suoaru? (b) Efu papa a nine elos enenu in taran in tia silolel, lungse in sukok ma tafongla, ku nunuk sesumwos nu sin tulik nutul?
14. Fuka met Kristian seperd elos ku in akkalemye oaru ke u su elos kulansapu?
15. Fuka met puspis ke century se meet elos akkalemye la oasr oaru sesumwos lalos?
16. Fuka met kulansap oaru lun Jeova elos loang nu ke aksumwos?
17. Fuka kutupal saap met su kut lungse elos filiye oaru lasr ke me srifwe?
18, 19. (a) Mea Ehab el lungse nu sel Nebot, a efu Nebot el srunga in sang ma inge? (b) Ya oaru lal Nebot fwal nu ke ma el molela? Aketeye.
20. Fuka fwinsrak ku in kasru kut in srukye oaru lasr?
21. Kain in fwinsrak fuka Jeova el sang nu sin met oaru lal?