El Luhngse Mwet uh
“Nga engan . . . ke mwet suc muhta fin facluh.”—SOAKAS 8:31.
KOM KUH IN AHKUHTWEYAC?
Meac ahkpwacyeye lah yohk na pwacye luhngse lal Jesus nuh sin mwet uh?
Mwenmwen lal Jesus uh ahkkweye luhlahlfongi lasr ke pacl fahsruh uh fuhkah?
Mwenmwen fuhkah kom luhngse in liye Jesus elan oruh ke pacl fahsruh uh?
1, 2. Jesus el ahkpwacyeye fuhkah luhngse pwacye lal nuh sin mwet uh?
WEN se meet nuhtin God pa mwe srihkasrak wo emeet nuhke lahlmwetmwet fuhlwact luhn Jeova ac el “mwet lwemlwem” se luhn Pahpah tuhmwacl ah. Srihke nuhnkuh ke luhpan engan ac insewowo lal Jesus ke Pahpah tuhmwacl ah “oakiyac ma oan inkuhsrao” ac “oakiyac pweluhng loangeyen facluh.” Tuhsruhktuh ke ma nuhkewa ma Pahpah tuhmwacl ah oraclah, Jesus el arlacna “engan . . . ke mwet suc muhta fin facluh.” (Soakas 8:22-31) Ahok, el luhngse mwet uh e ke muhtwacwackiyac me.
2 Tok, Jesus el ahkpwacyeye luhngse ac oaru lal nuh sin Pahpah tuhmwacl ac luhngse pwacye lal nuh sin mwet nuhkewa ke el tuhkuh liki inkuhsrao me nuh facluh oacna sie mwet. Jesus el oruh ma inge tuh el in sang moul lal in “molwelah mwet pucspucs.” (Matthew 20:28; Philippi 2:5-8) Ke pacl se Jesus el muhta facluh, God el sang kuh nuh sel elan orek mwenmwen. Mwenmwen inge ahkkahlwemye luhpan luhngse lal Jesus ac ma wowo pucspucs ma el ac fah oruh nuh sin mwet ke pacl na sa fahsruh uh.
3. Meac kuht ac fah sramsramkihn ke mwe lutlut se inge?
3 Ke Jesus el muhta fin facluh ah, el “fahkwack pac Pweng Wo ke Tohkohsrahi lun God.” (Luke 4:43) El etuh lah Tohkohsrahi se inge ac ahkmuhtahlye inen Pahpah tuhmwacl ac ahkwoyelah ma upac luhn mwet uh nwe tok ma pahtpaht. Ke Jesus el som fahkwack, el oruh mwenmwen pucspucs. Mwenmwen inge ahkkahlwemye elyah yohk lal ke mwet uh. Efuh ma inge yohk srihpac nuh sesr? Mweyen ma el oruh inge ac use finsrak wowo nuh sesr in luhlahlfongi ke pacl fahsruh uh. Pwacnacng lwelah kuht in sramsramkihn mwenmwen ahkosr lal Jesus.
“NGA LUHNGSE! KOM IN NWACSNWACSLAH!”
4. Meac sikyak ke pacl se Jesus el ohsun nuh sin mukul mihsen lepa se inge?
4 Ke lusen orekma in luti lal Jesus, el som nuh ke acn se inge, pahngpahng Galilee. Ke sie siti we, el ohsun nuh sin sie mukul suc wi ke mas na upac se, mihsen lepa. (Mark 1:39, 40) Mukul sac arlacna mas pwacnacng Luke, sie doctor, el ahkuhtweyac muh “arlacna aflah mahnol ke mihsen lepa.” (Luke 5:12) Bible uh fahk muh ke pacl se mukul mas se inge liyaclack Jesus ah, “el [mwet lepa] faksucfi ac kwacfe sel, ‘Leum fin wo sum, kom kuh in ahknwacsnwacsyeyuclac!’” Mukul sac etuh lah oasr kuh lal Jesus in ahkkweyacllah, tuhsruhktuh el enenuh in etuh lah Jesus el luhngse in oruh ma inge. Efuh? Mweyen mukul sac pahlah ke mwet Pharisee eltahl srihkkihn mwet ma wi mas lepa. Tuhsruhktuh, meac Jesus el nuhnkuh? El ac kahsruh fuhkah mukul se ma luhman suhkahpahslah inge? Fin kom pa inge meac kom ac oruh?
5. Efuh kuh Jesus el luhngse in ahkkweyaclah mwet lepa sac?
5 Kahlwem tuh mukul mas sac tiac wowoyak ac fahk “Nga tiac nwacsnwacs! Nga tiac nwacsnwacs!” oacna ke Ma Sap ah sapkihn. (Leviticus 13:43-46) Tuhsruhktuh Jesus el tiac foloyak. El pahkomuhta mukul sac ac ke kahsrel. Kuht tiac etuh na pwacye lah meac Jesus el nuhnkuh, tuhsruhktuh kuht etuh puhlakihn lal ah. El arlacna pahkomuhta mukul sac pwacnacng el oruh mwenmwen sac. El kahlyac mukul sac, sie ma ma wacngihn kuhtwena mwet sahyac kuh in oruh. Ke luhlahlfongi ac pahkotwen, Jesus el fahk: “Nga luhngse! Kom in nwacsnwacslah!” In kihtin pacl ah na “mihsen lepa ah wacngihnlac luhkel.” (Luke 5:13) Kahlwem lah Jeova el sang kuh nuh sel Jesus elan oruh mwenmwen wolacna se inge ac in ahkkahlwemye luhpan luhngse lal nuh sin mwet uh.—Luke 5:17.
6. Meac sie ma yohk srihpac ke mwenmwen pucspucs ma Jesus el oruh inge, ac meac ma inge ahkkahlwemye?
6 Ke kuh luhn God, Jesus el kuh in oruh mwenmwen wolacna pucspucs. El ahkkweyaclah ma puhs sahyacn lepa. Jesus el oacyacpac ahkkweyaclah mwet pucspucs suc wi ke kain in mas sahyac. Bible uh fahk lah “mwet uh arlacna fwefwelac ke elos liye mwet nihkihn kahs elos kahskahs, mwet suhkahpahs elos kwelac, mwet ul elos fahsr, ac mwet kun elos liye.” (Matthew 15:31) Ke pacl lasr uh, doctor pucspucs eltahl enenuh in lihseyac monin mwet se tuh fah eltahl kuh in ahkwoyac sie acn kacltahl. Tuhsruhktuh Jesus el tiac enenuh in oruh ma inge in onwelah sie lah kuh kuhtwena ma oan ke monin mwet se. El ahkkweyaclah pac mwet ke pacl na sa, finne mwet ma muhta loes luhkel. (John 4:46-54) Meac mwe srihkasrak wowo nuhkewa inge ahkkahlwemye nuh sum? Lah oasr kuh ac kena luhn Tohkohsrah lasr, Jesus Christ, in ahkwacngihnyelah kain in mas nuhkewa nwe tok ma pahtpaht. Ke kuht lutlut ke inkacnek ma Jesus el ahkkahlwemye nuh sin mwet lal uh, ma inge ahkkweye luhlahlfongi lasr uh lah ke facl sasuc uh el ac “pahkomuhtahlos suc muhnahs ac suhkahsruhp.” (Psalm 72:13) Ke pacl sacn, Jesus el ac ahkkweyaclah mas nuhkewa luhn mwet uh ke srihpen el luhngse na pwacye in oruh.
“TUHKAHKWEK, SRUHKWACK MWE OAN KIOM, AC FAHSR”
7, 8. Meac Jesus el oruh ke el fuhfahsryucsr Galilee nuh Judea?
7 Mahlwem ekahsr tukun Jesus el ahkkweyaclah mwet lepa sac, el fuhfahsryucsr Galilee nuh Judea in tahfwelah na in fahkwack pweng wo ke Tohkohsrahi luhn God. Sahp tausin mwet ma lohng pweng lal Jesus eltahl mokleyuck ke ohiyen luhngse lal nuh seltahl. Jesus el arlacna ke ahkkweye mwet suhkahsruhp ac mwet inse toasr uh, ac el ke pac sang finsrak nuh sin mwet inge.—Isaiah 61:1, 2; Luke 4:18-21.
8 Ke mahlwem luhn Nisan, Jesus el fuhfahsryucsr nuh Jerusalem in ahkfuhlwactye Kuhfa in Ahluhkwelah. Siti sac kahfofo ke mwet pucspucs ma som nuh ke kuhfa na sacohk se inge. Lacyen eir ke temple oasr sie luhluh in kof suc pahngpahng Bethzatha, ac pa inge acn se ma Jesus el sun mukul se ma tiac kuh in fahsr ah.
9, 10. (a) Efuh kuh mwet pucspucs eltahl som nuh ke luhluh se fin acn Bethzatha ah? (b) Meac Jesus el som oruh ke luhluh sac, ac meac ma inge luti nuh sesr? (Liye petsac se meet ke mwe lutlut inge.)
9 Un mwet mas pucspucs kwacna fahsri acn Bethzatha. Efuh? Ke srihpen eltahl nuhnkuh na muh eltahl ac kuh in onweyucklac eltahl fin som nuh ke luhluh sac ke pacl se kof ah mukuikui. Srihke luhmahlah ke nuhnak lom an luhpan fohs laltahl ke srihpen elyah, sensen, ac mwet ma wacngihn finsrak la suc luhngse in ahkkweyeyuck el. Jesus el suwohswohs ac tiac enenuh in ahkkweyeyucklac, pwacnacng meac el oruh we uh? Luhngse lal nuh sin mwet uh pa oruh el som nuh we uh. Ac pa inge pac acn se ma el tuh sun mukul se suc mas la loes liki lusen moul lal Jesus fin facluh ah.—Riti John 5:5-9.
10 Jesus el siyuck sin mukul sac el fin ke kwelac. Srihke petsacelah luhpan ahsor luhn mukul sac ke el fahk nuh sel Jesus lah el ke kwelac tuhsruhktuh el tiac kuh ke srihpen wacngihn mwet in kahsrel sroacng nuh in luhluh sac. Tohkoh Jesus el fahk sie ma na usrnguck elan oruh. El fahk nuh sel elan tuhkahkwek, sruhkwack mwe oan kiacl ac fahsr. Na pa inge ma mukul sac oruh, el sruhkwack mwe oan kiacl ah ac muhtwacwack fahsr! Mwenmwen se inge mwe ahkpwacyeye na wowo se ke ma Jesus el ac fah oruh nuh ke facl sasuc uh. Ma inge ahkkahlwemye pac luhngse yohk luhn Jesus nuh sin mwet uh. El suk mwet ma enenuh kahsruh. Mwe srihkasrak lal Jesus uh ahkkweye kuht in tahfwelah na in suk mwet ke acn in forfor lasr uh, ma ahsor ke srihpen ma kuluk pucspucs ma sikyak fin facluh uh.
“SUC KAHLYAC NUKNUK LUHK UH?”
11. Mark 5:25-34 ahkkahlwemye fuhkah lah oasr luhngse lal Jesus nuh sin mwet mas uh?
11 Riti Mark 5:25-34. Ke lusen yac 12, muhtwacn se maskihn sie inge mas ma el arlacna mwekihn kac. Mas se lal inge ahkkulukyelah moul lal, ac el tiac pac kuh in som in alu nuh sin God ke tempuhl ah. El som eis kahsruh yurin doctor pucspucs ac sislah mani na yohk in konwacack onweyacn mas se lal inge, tuhsruhktuh upaclah liki meet ah. Sie lwen ah, el konwacack sie pac inkacnek sahyac ma el kuh in kwelac liki mas lal uh. El fahlac inmahsrlon un mwet se ac kahlyac nuknuk lal Jesus ah. (Leviticus 15:19, 25) Ke Jesus el puhla lah oasr kuh ma som luhkel, el siyuck lah suc kahlilyac ah. Muhtwacn sac “sahngweng ac rarrar ac tuhkuh puhtati nuh ke niyacl Jesus, ac fahk pwacyeiyacn ma nuhkewa nuh sel.” Ke Jesus el akihlen lah Jeova el ahkkweyelah muhtwacn sac, Jesus el sramsram nuh sel ke inkacnek kuhlwacng ac fahk: “Acn nuhtihk, luhlahlfongi lom oruh kom kwelac. Som in mislac, mweyen kom kwelac liki mas lom an.”
12. (a) Ke ma kuht lotwelah uh, kom ac ahkuhtweyac kacl Jesus fuhkah? (b) Mwe srihkasrak fuhkah Jesus el oakiyac nuh sesr?
12 Arlacna ahkenganye insiacsr in liye luhngse lal Jesus nuh sin mwet lal, yohk na nuh sin mwet mas uh. Ma inge arlacna siena luhkel Satan mweyen el srihke in ahkpwacyeye nuh sesr lah wacngihn srihpacsr ac wacngihn mwet luhngse kuht. Tuhsruhktuh, mwenmwen lal Jesus ah ahkpwacyeye lah el arlacna nuhnkuh kacsr ac ke ma upac lasr uh. Kuht kuh in kulohkihn luhngse luhn Tohkohsrah ac Mwet Tol Fuhlwact se lasr inge! (Hebrew 4:15) Sahp upac nuh sesr in kahlwem ke puhlakihn luhn sie mwet ma mas ke lusen pacl na loeloes se, yohk na kuht fin wacngihn mas lasr. Tuhsruhktuh, nuhnkuh kacl Jesus. El pahkomuhta mwet mas uh el finne tiacna wi mas. Lwelah kuht in sang kuhiyacsr kewa in etahi mwe srihkasrak lal ke luhngse.—Sie Peter 3:8.
“JESUS EL TUHNG”
13. Meac sifwil moulyak lal Lazarus luti nuh sesr kacl Jesus?
13 Mwe kweok luhn mwet sahyac uh arlacna moklel Jesus. Ke sie mwe puhpuhlyuck, Lazarus kawuck lal Jesus el misac, pwacnacng Jesus el “arlacna ahsor ac lihksreni na oelac” ke el liye sucu ac mwet kawuck lal eltahl arlacna ahsor. (Riti John 11:33-36.) El finne etuh lah el ac fah ahkmoulyelack Lazarus, Jesus el tuhng. El tiac mwekihn mwet sahyac uh in liye lah el ahsor. Jesus el arlacna luhngse Lazarus ac sucu lal ah, pwacnacng el orekmakihn kuh lal in ahkmoulyelack Lazarus!—John 11:43, 44.
14, 15. (a) Meac ahkkahlwemye lah Jeova el luhngse in ahkwacngihnyelah ma upac nuhkewa luhn mwet uh? (b) Meac kuht lotwelah ke kahs inge, mwet misac “suc muhta inkuclyuck uh”?
14 Bible uh ahkuhtweyac lah Jesus el oacna Jeova, Pahpah tuhmwacl. (Hebrew 1:3) Pwacnacng mwenmwen lal Jesus uh ahkpwacyeye lah Jeova el luhngse in ahkwacngihnyelah mas, mwe kweok, ac misac. Ke pacl na sa, Jeova ac Jesus ac fah sifwil ahkmoulyeack mwet pucspucs. Jesus el fahk lah “ao se ac fah tuhkuh, ke elos nuhkewa suc muhta inkuclyuck uh” ac fah sifwil ahkmoulyeyuckyak.—John 5:28, 29, BMK.
15 Ke Jesus el fahk kahs inge, mwet misac “suc muhta inkuclyuck uh,” ma inge kalmackihnyuck nuh sin mwet misac ma oasr ke mwe acsmakihn luhn God. God kuhlacna, suc oraclah facluh ac ma nuhkewa inkuhsrao, el kuh in esam atac nuhkewa ke mwet lasr suc misac tari, wekuhnacng ohiyacltahl. (Isaiah 40:26) Jeova el luhngse ac el kuh in esamuhltahl. Sifwil moulyak luhn mwet in pacl meet ah ma sramsramkihnyuck in Bible uh pa mwe srihkasrak na wowo nuh ke ma ac fah orek ke facl sasuc uh.
MA KUHT LOTWELAH KE MWENMWEN LAL JESUS UH
16. Meac sie ma wo ma mwet kuhlwacnsap luhn God uh kuh in wi kac?
16 Kuht fin sruokyacna ohiyen oaru lasr, kuht kuh in wi ke mwenmwen se ma yohk emeet in wi moullac liki lwen in ongaiyac luhlahp! Kihtin pacl tukun Armageddon, kuht ac fah liye kain in mwenmwen pucspucs. Ke pacl sacn, mwet nuhkewa ac fah eis moul ac mahno suwohswohs. (Isaiah 33:24; 35:5, 6; Fwackyuk 21:4) Srihke petsacelah ke kom liye mwet uh sislah eyeglass, sikucl, wheelchair, ac mwe kahsruh nuh ke lohng laltahl uh. Jeova el etuh lah mwet nuhkewa suc moullac liki Armageddon ac fah enenuh in fokoko ac kuh, mweyen puhs orekma ma eltahl enenuh in oruh. Eltahl pa ac fah ekuhllah Facl na kahto se sesr inge nuh ke sie paradise fin facluh nohfohn.—Psalm 115:16.
17, 18. (a) Efuh kuh Jesus el orek mwenmwen? (b) Efuh kom enenuh in kwacfeacng in wi muhta ke facl sasuc luhn God?
17 Ke mwet kuhlwacnsap luhn God in pacl inge eltahl riti kacl Jesus ke el ahkkweyaclah mwet mas in pacl meet ah, eltahl arlacna ahkkweyeyuck kac. (Fwackyuk 7:9) Mwenmwen inge nuhkewa ahkkweye finsrak wowo se lasr in kwelac ma pahtpaht ke pacl fahsruh uh. Mwenmwen inge oacyacpac ahkkahlwemye luhpan luhngse luhn Wen se meet nuhtin God nuh sin mwet uh. (John 10:11; 15:12, 13) Pahkotwen yohk luhn Jesus ahkkahlwemye luhngse yohk luhn Jeova nuh sin kais sie mwet kuhlwacnsap lal.—John 5:19.
18 Mihsenge, arlacna puhs mwe ahkngal, mwe kweok, ac mwet ma misac fin facluh. (Rome 8:22) Pa inge srihpac pwacnacng kuht enenuh facl sasuc luhn God uh. Ke pacl sacn mwet uh ac fah engankihn ma God el wuhlelah ke mahno suwohswohs. Malachi 4:2 use finsrak nuh sesr lah kuht ac fah “srosro ke engan oacna cow fuhsr,” ke srihpen kuht ahkkweyeyucklac ac sukohsohklah liki sesuwohs. Lwelah tuh kuloh lasr nuh sin Jeova ac luhlahlfongi lasr nuh ke wuhlelah pucspucs lal uh in mokle kuht in sang kuhiyacsr in oruh ma enenweyuck tuh kuht in wi muhta ke facl sasuc uh. Mwe ahkkweye na yohk in etuh lah mwenmwen ma Jesus el oruh ah mwe srihkasrak ke sukohsohklah na pwacye ma mwet uh ac fah engankihn ke pacl na sa ke kolyuck lal uh!