Christ—El Ahkkahlwemye Kuh luhn God
“Christ suc fahkwack kuh luhn God.”—SIE CORINTH 1:24.
KOM KUH IN AHKUHTWEYAC?
Ohiyac fuhkah Jesus el ahkkahlwemye ke el oruh mwenmwen se emeet lal ah?
Efuh kuh Jesus el oruh mwenmwen se ma sihmlac in Matthew 14:14-21?
Meac Jesus el ahkkahlwemye ke pacl se el ahkmihsyelah pahkah na upac sac?
1. Efuh kuh Paul el kuh in pahnglol Jesus oacna “Christ suc fahkwack kuh luhn God”?
JEOVA el orekmakuhnuhl Jesus in ahkkahlwemye kuh lal ke inkacnek na usrnguck pucspucs. Ke pacl se Jesus el muhta fin facluh ah, el oruh kain in mwenmwen pucspucs. Kuht kuh in riti kuhtuh sin mwenmwen inge in Bible, ac ma inge kuh in ahkkweye luhlahlfongi lasr uh. (Matthew 9:35; Luke 9:11) Pwacye lah Jeova el sang kuh na yohk nuh sel Jesus, pwacnacng mwet sap Paul el kuh in pahnglol: “Christ suc fahkwack kuh luhn God.” (Sie Corinth 1:24) Tuhsruhktuh, mwenmwen lal Jesus uh kahsre kuht fuhkah?
2. Meac kuht kuh in lotelah ke mwenmwen pucspucs lal Jesus inge?
2 Mwet sap Peter el fahk lah Jesus el oruh kain in “mwenmwen ac orekma usrnguck” pucspucs. (Orekma 2:22) Meac mwenmwen inge luti kuht kac? Ma inge ahkkahlwemye nuh sesr ke ma Jesus el ac fah oruh ke lusen Sie Tausin Yac ke Kolyuck lal. Ke pacl sacn, el ac fah oruh mwenmwen pucspucs ac ma inge ma ac wo nuh sin mwet nuhkewa fin facluh. Mwenmwen lal ah kahsre kuht pac in kahlwem yohk ke ohiyac wowo lal ac luhn Pahpah tuhmwacl uh. Ke mwe lutlut se inge, kuht ac fah lutlutkihn mwenmwen tolu lal Jesus. Oacyacpac kuht ac fah lotelah lah ma inge kahsre kuht fuhkah ke pacl inge ac ke pacl fahsruh uh.
SIE MWENMWEN MA LUTI KE OHIYACN ENGAN IN SANG
3. (a) Efuh Jesus el oruh mwenmwen se emeet lal ah? (b) Jesus el ahkkahlwemye fuhkah ke ohiyen engan in sang fin acn Cana?
3 Jesus el oruh mwenmwen se emeet lal ah ke sie macruht ma orek ke sie acn pahngpahng Cana. Kuht tiac na etuh lah efuh, tuhsruhktuh wain ah tiac fal nuh sin mwet nuhkewa ma wi kac. Ma inge luhkuhn ahkmwekihnye siacnyacn sasuc sac, ke srihpen ma kunacltahl in kihte mwet ma eltahl suli ah. Mary, suc ninac kiyacl Jesus, pa sie mwet ma wi som nuh kac ah. Yac el siyuck kahsruh lal Jesus ke srihpen el luhlahlfongi muh oasr kuh lal in oruh? Kahlwem lah Mary el nuhnkuh yohk ke kahs pahluh ke tuhlihk mukul se nahtuhl ah, ac el etuh muh el ac fah pahngpahng “Wen nuhtin God Fuhlwactlacna.” (Luke 1:30-32; 2:52) Ma kahlwem uh pa Mary ac Jesus eltahl kewana ke kahsruh siacnyacn sac. Pwacnacng Jesus el ekuhllah gallon siofok kuhtuh ke kof nuh ke “wain wo.” (Riti John 2:3, 6-11.) Yac enenuh se na Jesus elan oraclah mwenmwen se inge? Moh. El oruh ke srihpen el nuhnkuh mwet uh ac el etahi Pahpah tuhmwacl, suc arlacna engan in sang.
4, 5. (a) Mwe lutlut fuhkah se kuht lotelah ke mwenmwen se emeet lal Jesus ah? (b) Meac mwenmwen se fin acn Cana ah luti nuh sesr ke facl fahsruh uh?
4 Jesus el orekmakihn mwenmwen lal in oraclah wain nihmacn u na luhlahp se. Meac mwenmwen se inge luti nuh sesr? Lah Jeova ac Jesus eltahl tiacna srohwohsr; a eltahl arlacna engan in sang. Mwenmwen se inge ahkpwacyeye nuh sesr lah eltahl nuhnkuh yohk ke puhlakihn lasr uh. Ma inge ahkkahlwemye pac lah Jeova el ac fah orekmakihn kuh lal in oraclah mongo pucspucs ke facl sasuc uh, finne acn oyac kuht muhta kac.—Riti Isaiah 25:6.
5 Srihke nuhnkuh! Ke pacl na sa Jeova el ac fah use ma nuhkewa ma kuht enenuh na pwacye uh. Ac fah oasr lohm ac mongo wo nwacn mwet nuhkewa. Ke kuht nuhnkuh ke ma wowo pucspucs suc Jeova el ac fah use nuh sesr ke sie Paradise fin facluh uh, kuht arlacna kulohkihn.
6. Jesus el orekmakihn fuhkah kuh lal uh, ac kuht ac etahel fuhkah?
6 Jesus el tiac wi orekmakihn kuh lal uh nuh ke srihpac kuh luhngse lal sifacna. Nuhnkuh ke ma sikyak ke Devil el srihfacl Jesus elan ekuhllah yot nuh ke bread. Jesus el sruhnga orekmakihn kuh lal uh nuh ke ma ac wo nuh sel sifacna. (Matthew 4:2-4) Tuhsruhktuh, Jesus el engan in orekmakihn kuh lal uh in kahsruh mwet sahyac. Kuht ac etahi fuhkah ohiyac lal inge in tiac nuhnkuh kacsr sifacna? Jesus el fahk lah kuht enenuh in “sang mwe kihte nuh sin mwet sahyac.” (Luke 6:38) Kuht kuh in oruh ma inge ke pacl se kuht suli mwet sahyac nuh ke lohm sesr uh in wi kuht mongo. Kuht kuh pac in oraclah pacl tukun miting uh in kahsruh sie mwet suc enenuh, oacna in lohng ke sie mukul lili el oruh mwe ahkpah ke mwe sramsram lal. Kuh sahp kuht kuh pac in sang kahs in kahsruh wo ac in ahkpahye mwet sahyac ke orekma in luti uh. Kuht etahi ohiyen engan in sang luhn Jesus ke kuht kwacfeacng in kahsruh mwet sahyac ke pacl nuhkewa ma kuht kuh in oruh.
“MWET NUHKEWA MONGO AC KIHPI”
7. Meac sie ma upac ma ac fah oan ke lusen kolyuck lal Satan uh?
7 Moul suhkahsruhp uh tiac ma sasuc se. Jeova el fahk nuh sin mwet Israel ah lah ac fah oasr mwet suhkahsruhp inmahsrloltahl pacl nuhkewa. (Deuteronomy 15:11) Ke yac pucspucs tohkoh, Jesus el fahk: “Ac oasr mwet suhkahsruhp inmahsrlowos pacl nuhkewa.” (Matthew 26:11) Yac kalmen ma Jesus el fahk inge pa pacl nuhkewa ac fah oasr mwet suhkahsruhp fin facluh? Moh, kalmac pa ac fah oasr mwet suhkahsruhp fin facluh ke lusen kolyuck lal Satan uh. Ac fah arlacna siena ke kuht ac muhta ke facl sasuc uh! Ke pacl sacn, ac fah wacngihnlac moul suhkahsruhp. Ac fah puhs mwe mongo, ac mwet nuhkewa ac fah engan na pwacye!
8, 9. (a) Efuh kuh Jesus el kihteyac tausin sin mwet? (b) Meac puhla lom ke mwenmwen se inge?
8 Mwet sihm luhn Psalm el fahk kacl Jeova: “Kom sang fal nuh selos ac kom ahkfalye enenuh luhn ma nuhkewa suc moul.” (Psalm 145:16) Ke Jesus el muhta fin facluh ah, el etahi ohiyen Pahpah tuhmwacl ke inkacnek suwohs ac el arlacna nuhnkuh yohk ke enenuh luhn mwet sahyac uh. El tiac oruh ma inge in ahkkahlwemye na kuh lal uh, a el oruh ke srihpen el luhngse na pwacye mwet uh. Kuht srihke tuni Matthew 14:14-21. (Riti.) Oasr un mwet se tuh ukwacllah Jesus liki siti uh. (Matthew 14:13) Ke ekwelac, mwet tuhma lutlut ah muhtwacwack in pahkomuhta mwet ah, muh eltahl ullac ac masrinsracllah. Pwacnacng eltahl siyuck sel Jesus elan suhpwaclah un mwet inge in som molwelah mongo nwacltahl. Ac meac Jesus el oruh?
9 Ke loaf in bread lihmekohsr ac ik lukwac, apkuhran nuh ke mukul 5,000, sahyacn na muhtwacn ac tuhlihk ma Jesus el kihteyac. Efuh kuh Jesus el oruh mwenmwen se inge? Ke srihpen luhngse pwacye lal nuh sin mwet uh ac el nuhnkacltahl. Ac kahlwem lah Jesus el oraclah mongo na yohk, ke srihpen un mwet sac “mongo ac kihpi.” Mongo ma eltahl kanglah inge sang kuh ma eltahl enenuh uh in sifwil fohlohk nuh acn seltahl ah. (Luke 9:10-17) Ac tukun pacna mwet nuhkewa kihpi, mwet tuhma lutlut ah nwacklah fohtoh singucul luo ke mongo ma yolyak ah.
10. Meac ac fah sikyak nuh ke moul suhkahsruhp ke pacl fahsruh uh?
10 Ke srihpen rahpkuh ac kolyuck suhlallacl luhn mwet uh, million pucspucs sin mwet eltahl kwacoh. Wacngihn pac suhnuhn mongo nwacn kuhtuh sin mwet lili wiyacsr uh. Tuhsruhktuh ke pacl na sa, mwet ma ahkos Jeova uh ac fah muhta ke sie facl ma wacngihn suhlallacl kuh moul suhkahsruhp we. Jeova pa God kuhlacna, ac yohk kuh lal ac kena lal tuh mwet nuhkewa in engan. El wuhlelah muh el ac fah ahkwacngihnyelah mwe kweok nuhkewa ke pacl na sa!—Riti Psalm 72:16.
11. Efuh kom luhlahlfongi lah Christ el ac orekmakihn kuh lal uh in kol facluh nohfohn ke pacl na sa? Ac ke kom etuh ma inge, meac kom ke oruh?
11 Ke Jesus el muhta fin facluh ah, el orek mwenmwen ke kihtin acn na ke lusen yac tolu tahfuh. (Matthew 15:24) Tuhsruhktuh, oacna sie Tohkohsrah, Jesus el ac kahsruh mwet nuhkewa fin facluh nohfohn ke lusen kolyuck lal ke Sie Tausin Yac. (Psalm 72:8) Mwenmwen lal Jesus uh use luhlahlfongi nuh sesr in etuh lah el ke orekmakihn kuh lal nuh ke ma ac wo nuh sesr. Wacngihn kuh lasr in orek mwenmwen, tuhsruhktuh meac kuht kuh in oruh? Kuht kuh in orekmakihn pacl ac kuh lasr in fahkwack nuh sin mwet sahyac ke ma wowo pucspucs ma Bible uh wuhlelah muh ac sikyak ke pacl fahsruh uh. Pa inge kunohkohn lasr oacna Mwet Loh luhn Jeova. (Rome 1:14, 15) Ke kuht nuhnkuh yohk ma Christ el ac oruh ke pacl na sa, ma inge ac ahkyohkye kena lasr in fahkwack nuh sin mwet sahyac.—Psalm 45:1; 49:3.
PUHLAN PACL AC YEN ENGYENG UH
12. Efuh kuht kuh in luhlahlfongi lah Jesus el etuh na pwacye luhman facluh ac koano uh?
12 Ke God el oraclah facluh ac ma nuhkewa loac, Jesus el “muhta siskacl oacna sie mwet lwemlwem” ke orekma. (Soakas 8:22, 30, 31; Colossae 1:15-17) Pwacnacng Jesus el etuh na pwacye luhman facluh. El etuh in orekmakihn ac kihfucs ip nuhkewa ke facluh ac koano uh.
13, 14. Sang sie mwe puhpuhlyuck an lah Christ el kutong ac kihfucs fuhkah puhlan pacl ac yen engyeng uh.
13 Ke Jesus el muhta fin facluh ah, el ahkkahlwemye lah kuh luhn God oasr yohrohl ke el kihfucs puhlan pacl ac yen engyeng uh. Nuhnkuh ke sie mwe puhpuhlyuck, ke Jesus el tuh tulokihnyac eng na upac sac. (Riti Mark 4:37-39.) Sie mwet ma yohk etwacack la ke Bible el ahkuhtweyac lah kahs Greek ke “eng na upac” ke puk luhn Mark orekmakihnyuck in ahkuhtweyac sie pahkah luhlahp kuh eng for. Ma inge oacna sie pahkah ma nuklac ke puhkuhnyeng, eng upac, puhlahl ac af upac. Ke pacl se mihsi, okahrack acn nuhkewa.
14 Nuhnkuh ke ma sikyak inge: Noa uh fungul sisken oak uh. Finne yohk puhsren pahkah wi puhsren noa uh ke kihmkihm sisken oak uh, Jesus el mutul ke srihpen el tohtohlah. Tuhsruhktuh mwet tuhma lutlut ah sahngweng, oruh eltahl okasuhlwack Jesus ac fahk: “Kuht ac kuhracnna misac!” (Matthew 8:25) Meac Jesus el oruh? El tuhkahkwek ac fahk nuh sin eng ac inkof uh: “Mislac!” (Mark 4:39) Pahkah na upac sac tui, ac “arlacna mihsi.” Mwe srihkasrak na wo se pa inge ke kuh lal Jesus in kutong ac kihfucs puhlan pacl ac yen engyeng uh!
15. Jeova el ahkpwacyeye fuhkah lah el kuh in kihfucs ac kutong puhlan pacl uh ac yen engyeng uh?
15 Kuh luhn Christ tuhkuh sin Jeova me, pwacnacng kuht etuh lah God Kuhlacna el kuh in kihfucs ac kutong puhlan pacl ac yen engyeng uh. Ke sie mwe puhpuhlyuck, meet liki Sronot ah, Jeova el fahk: “Lwen itkohsr nga ac suhpwacma af ma ac kahk ke lwen angngaul ac fong angngaul.” (Genesis 7:4) Oacyacpac, Exodus 14: 21 ahkkahlwemye ohinge: “LEUM GOD El oruh tuh sie eng upac kuhtuhlacp me in ahkfahsryelihk kof uh.” Ac kuht rit in Jonah 1:4: “LEUM GOD El suhpwaclah sie pahkah nuh meoa, ac eng uh arlacna upac pwacnacng oak soko ah apkuhran in muhsahllah.” Arlacna wo in etuh lah ke facl sasuc uh, Jeova el ac fah kihfucs ac kutong puhlan pacl ac yen engyeng uh pacl nuhkewa.
16. Efuh kuh sie mwe ahkkweye in etuh lah oasr kuh luhn Jeova ac Jesus in kutong ac kihfucs puhlan pacl ac yen engyeng uh?
16 Mwe ahkkweye se in etuh lah oasr kuh luhn Jeova ac Jesus in kutong ac kihfucs puhlan pacl ac yen engyeng uh. Ke lusen Kolyuck luhn Christ ke Sie Tausin Yac, mwet nuhkewa fin facluh ac fah muhta in mislac ac karihngihnyuck wo. Wacngihn sie mwet fah ngal kuh misac ke kuhtwena kain in puhlan pacl kuluk, oacna pahkah upac, noa luhlahp, fuhlkino, kuh kusrusr. Kuht ac tiac sahngweng ke kuhtwena mwe ongaiyac ke srihpen “lohm sin God oan yurin mwet uh”! (Fwackyuk 21:3, 4) Kuht kuh in luhlahlfongi na pwacye lah Jeova el ac sang kuh nuh sel Jesus in kutong ac kihfucs puhlan pacl ac yen engyeng uh ke lusen Kolyuck lal ke Sie Tausin Yac.
ETAHI GOD AC CHRIST KE PACL INGE
17. Meac sie inkacnek ma kuht kuh in etahi God ac Christ ke pacl inge?
17 Pwacye lah kuht tiac kuh in tulokihn mwe ongaiyac ma tuhkuh ke puhlan pacl kuluk uh. Jeova ac Jesus muhkwena pa kuh in oruh ma inge. Tuhsruhktuh, oasr sie ma kuht kuh in oruh. Kuht kuh in orekmakihn Soakas 3:27. (Riti.) Ke pacl se mwet lili wiyacsr uh sun mwe ongaiyac, kuht kuh in kahsreltahl ac sang mwe enenuh laltahl ke mahno ac ke kahs in kahsruh, ac kuht kuh pac in ahkkweyacltahl. (Soakas 17:17) Ke sie mwe puhpuhlyuck, kuht kuh in kahsreltahl tukun sie pahkah upac ma sun acn seltahl. Sie muhtwacn katinmas suc lohm sel ah kuhnanuclac ke sie eng for el fahk: “Nga arlacna engan na pwacye ac kulohkihn lah nga wi u luhn Jeova uh, tiac ke na srihpen mwe kahsruh ke mwe enenuh ma ituckuh nuh sihk tuh oacyacpac ke mwe kahsruh nuh ke fototo luhk nuh sin Jeova uh.” Sie pac muhtwacn lili lolacp el puhla muh wacngihn na pwacye finsrak lal ke pahkah se ma kuhnahoslah lohm sel ah. Tukun mwet lili ah kahsrel in ahkwoyelah, el fahk muh: “Nga tiac na kuh in ahkuhtweyac ma nga puhla uh. Kuloh nuh sum Jeova!” Kuht arlacna kuloh nuh sin mwet lili wiyacsr uh ke eltahl nuhnkuh na pwacye ke mwe enenuh luhn mwet sahyac uh. Yohk liki na ma inge, kuht arlacna kuloh nuh sin Jeova ac Jesus Christ eltahl arlacna nuhnkuh kacsr uh.
18. Meac kom kaksakihn ke srihpac lal Jesus in orek mwenmwen?
18 Ke lusen orekma in luti lal Jesus ah, el ahkpwacyeye lah el “kuh luhn God.” Wacngihn sie pacl el orekmakihn kuh lal inge tuh mwet sahyac uh in kaksakuhnuhl kuh in ahkinsewowoyacl sifacna. Tuhsruhktuh, Jesus el orekmakihn kuh lal in orek mwenmwen mweyen el luhngse na pwacye mwet uh. Kuht ac fah ahkyohkye lutlut lasr ke ip se inge ke mwe lutlut tok uh.