Fuka Me Akkeok Ku In Wanginla
NUNKU ke mutun met kun su ku in sifwil liye, sren met silongkas su ku in sifwil long pusra nu kemwa, loan met koflanu kaskas su on ke engun, a nien met ul su sifwil ku a fwasr! Kut sramsram ke ma inge, tia ke sripen kapkapek lun ono ke science, a ke sripen God el kasru met nu kemwa. Baibel el palye: “Na mutun met kun fwa ikakla, a sren met silongkas fwa patla. Na met ul fwa srosro oanu soko kosro hart, a loan met koflanu kaskas fwa on.” (Isaia 35:5, 6) Tusruktu, fuka kut ku in lalalfongi na paye la kas palu mwolanu inge e fwa akpayeye?
Ma se meet, ke pal se Jisus Kraist el muta fwin fwalu, el akkeye na paye met ke kain in mas nu kemwa lalos a ke me akkeok ke sripen sikapas a ul. Sayen ma inge, met puspis elos liye na paye menmen nu kemwa su el oru—fwinne met lokwalok lal. Aok, ke sie pal, met lokwalok lal elos tuni na paye ma sikyuk ke pal se el akkeye met se meyen elos lungse in akmwekinyel Jisus. Tusruktu, ke mekin lulap lalos, meyen ma elos oru pa sang me akpayeye ke menmen lal. (Jon 9:1, 5-34) Aok, tokin Jisus el orala siepa menmen yok su met nu kemwa akilen, elos fwak ke me asor lulap: “Mea kut e oru, tu met se inge el oru me akul puspis?” (Jon 11:47) Tusruktu, met srisrik nu kemwa, elos loang yok ke ma sikyuk inge, meyen pus selos mutamwauk in lalalfongi Jisus.—Jon 2:23; 10:41, 42; 12:9-11.
Menmen lun Jisus—Sie Pitse ke Orekma In Akkeyela Mas Fwin Fwalu nu Fon
Menmen lun Jisus tia sang me akpayeye mukena la Jisus pa Messaia a Mwen nutin God. Ma inge sie me akkeye yok ke lalalfongi nu ke mwolela lun Baibel la sie pal met nu kemwa su akos elos fwa akkeyeyuk ke mas lalos ke pal fwasru. Kutena mas su akkeokye metu Jisus el akkeye a wangin kutena ngal su elos pula, ke pal na sa, a wangin pa molo. Oiye fuka met puspis elos akkalemye? Me sramsram ke buk lun Mattu su met sim ka el liye na paye ma sikyuk inge, el fwak: “A ou inge met puspis elos lut ke elos liye met sikas kaskas, met fuka kela, a met ul fwasr, a met kun liye, a elos kaksakin God lun Israel.” (Mattu 15:30, 31) Nu sin met sikapas a met ul puspis, etauk ke fwinsrak mwolanu inge moklelos in ekula tung in asor lalos nu ke tung in engun.