“Kalukyung Nu Yurin God”
“Kalukyung nu yurin God, a el a fwa kalukot nu yuromwos.”—Jemes 4:8.
1, 2. (a) Mea sramsram fuka metu oru pal nu kemwa? (b) Kas in kai fuka Jemes el sapkin, a efu ku eneneyuk?
“GOD el wi kut.” Kas inge arulanu pengpeng ke national emblems a ke uniforms pa lun solse. “In God we trust” simusyukla pa ke coins puspis a ke kutupa mani pepu in pal inge. Ma nu fwusesr se nu sin metu in fwak mu el etu God a el futoto nu sel. Tusruktu, ya kom tia insense nu ka mu, fwin paye oasr kain in futoto ou inge, e tia ku in sramsramkinyuk mukena a enenu in oasr fwako in akkalemye ku in oasr kalme paye ku in akilenyuk?
2 Baibel el akkalemye la sie met el ku in futoto na paye nu sin God. Tusruktu, enenu in oasr kaifweung paye orek nu ka. In oupanu ke met Kristian akmusrala in century se meet elos oru ke kaifweung lalos in futoto nu sin Jeova God. Met sropu Kristian Jemes in pal meeta el enenu in sang kas in sensen nu sin kutu met ke me sruf lun ikwe in tia aktafongyela moul in ngun lalos nu ke moul fokfok. In pal se ke el sang kas in sensen inge, el sifwilpanu tafwela ke kas in akkeyelos inge: “Kalukyung nu yurin God, a el e fwa kalukot nu yuromwos.” (Jemes 4:1-12) Mea Jemes el kalmekin ke el fwak “kalukot”?
3, 4. (a) Kain in me akismakin fuka met in century se meet su ridi kas in kai lal Jemes su fwak “kalukyung nu yurin God” in esam? (b) Efu ku fwal kut in lalalfongi la kut ku in tuku nu yurin God?
3 Jemes el orekmakin kas in aketeye fwusesr in mu ku in kalem nu sin met nu kemwa su ridi kas lal. Ke Ma Sap lal Moses oasr akmwuk kalem orekla nu sin met tol fuka in “kalukot” nu sin Jeova in kasre met lal. (Exodus 19:22) Ke ma inge, met nu kemwa su ridi kas lal Jemes enenu in esam la orekma in kalukot lalos nu sin God tia mwo in pilesreyuk. Meyen Jeova el fulat liki nu kemwa in kosrao a fwalu.
4 Sayen ma inge, oasr sie tulik mokul su scholar ke Baibel el fwak, “kas in kai inge [in Jemes 4:8] el akkalemye sie fwinsrak fukoko.” Jemes el etu la pal nu kemwa Jeova el suli ke kulang met sesumwos nu kemwa in kalukyung nu Sel. (2 Kronikel 15:2) Me kise lun Jisus ikasla inkanek in kalukyung nu sin Jeova tu in oasr sie fwinsrak paye. (Efesus 3:11, 12) Misenge inkanek in kalukyung nu sin God ikakla tari nu sin million puspis met! Ke ma inge, fuka, tu kut fwa ku in eis me insemwomwo ke me kasru mwolanu inge? Inge kut fwa tuni ip tolu su ku in kasre kut in futoto nu sin Jeova God.
“Kaifweung in “Eis Etauk lun God
5, 6. Fuka me srikasrak lal Samuel ke el srakna fwusr sang me akpayeye ke ma enenu in “eis etauk” lun God?
5 In fwal nu ke Jon 17:3, Jisus el fwak: “A pa inge moul ma patpat, tu elos fwa ete kom God paye mukefwunnu, a Jisus Kraist su kom supalmu.” Oasr kain in leng puspis nu ke fus se inge su tia oanu sie nu ke New World Translation. Oasr kutu aketeye su fwakak ke “eis etauk” lun God, mu orekmakinyuk fwal nu ke verb “in suk” ku “in etu” God. Tusruktu, oasr met scholar mokul a mutan elos koneak kalmeyen kas inge in fwal nu ke mutamweyen kas Greek su orekmakin meet la kalmeye arulanu loal—in oanu sie akmwuk su tia ku in wanginla, su kol nu ke aetui sie sin sie.
6 In eis etauk paye ke God tia ma sasu se in pal lal Jisus. Ke sie me pupulyuk, ke Ma Simusla lun Hibru, kut ku in ridi ka la ke Samuel, “el soennu etu Jeova.” (1 Samuel 3:7) Ya fwal in kalmekinyuk mu srikla etu lal Samuel nu sin God? Mo. Tia ku in ou inge, meyen papa a nine kiyel wekunang met tol nu kemwa elos lotel yok. Tusruktu, kas Hibru su orekmakinyuk in fus se inge ku in kalmekinyuk, in oanu ke sie met lalmetmet el akkalemye, mu orekmakinyuk ke inkanek su futoto yok nu ka.” Samuel el soennu eis etauk sumwosmwos ke Jeova, in oanu ke tok el oru kulansap lal oanu sie met fwakak kas lal. Ke pal se Samuel el kapkapek, el mutamwauk in eis etauk sumwosmwos el Jeova, a el ouyepa mutamwauk in arulanu futoto nu sel.—1 Samuel 3:19, 20.
7, 8. (a) Efu ku kut tia enenu in fosrngala ke me luti loal lun Baibel? (b) Piye kutu ma loal a paye ke kas lun God su mwo kut in lutlut ka?
7 Ya kom eis tari etauk paye ke Jeova tu kom fwa ku in futoto nu sel? Kom fwin lungse in eis, kom enenu in oasr “lungse” nu ke me mongo lun ngun su tuku sin God. (1 Piter 2:2) Kaifweung in kapkapek a tia muta na ke ma srumtauk lun etauk. Kaifweung in eis me luti loal lun Baibel. (Hibru 5:12-14) Ya kom srunga loang nu ke me luti inge ke sripen kom mu upala? Fwin ou inge, lela kom in esam la Jeova el “Met Luti Lulap” lom. (Isaia 30:20) El etu inkanek in akfwusesrye me lutlut paye lun ma loal nu sin met silalkung. A el ku in kasre kom in eis etauk ke me luti lal nu sum.—Sam 25:4.
8 Efu kom tia siyuk sum sifwanu ke oiyen “etauk lun ma loal lun God”? (1 Korint 2:10) Me etauk loal inge tia ma losrongten in oanu ke kas in akkoluk puspis su orek sin met kol lun alu ku kutu sin met su pangon mu elos etu koanon Baibel. Me luti loal inge ku in ikasla etauk paye ke nunuk a inse lun Papa tumasr su in kosrao. Ke sie me pupulyuk, pa kalem ke me kise, su “ma lukma mutal,” a ke kain in mwoleaung mwolanu puspis su Jeova el sang in kurungin me insemwomwo lun met lal a in akpayeye ma nu kemwa su oasr mwoleaung lal nu ka—su me luti loal inge nu kemwa a wekunang kutupa me luti ou inge ku in sang kasru mwomwo a yok kasrpe nu sin met su lungse in lutlut a suk etauk yok lal.—1 Korint 2:7.
9, 10. (a) Efu ku inse fulat me sensen, a fuka kut ku in fwasr liki? (b) Fwin sramsramkinyuk lalmetmet lun Jeova, efu ku enenu kut in pusisel?
9 Ke pal se kom mutamwauk in kapkapek ke etauk paye lun ma loal lun ke ma lun ngun, lela kom in esam pa in sensenkin me fosrnga yok su fwa sikyuk ke etauk lom—in oanu nunuk lun insefulat. (1 Korint 8:1) Inse fulat el sie me sensen yok, meyen el ku in aktafongyela sie met liki God. (Soakas 16:5; Jemes 4:6) Esam, la wangin sie met fwa sifwanu kaksakunul ke etauk lal. Ke sie me pupulyuk, nunku ke kas inge su tuku ke kas in mutamwauk lun sie buk su tuni kapkapek sasu lun met ke science: “Ke pal se kut mutamwauk in eis lalmetmet yok, na e arulanu kalem la etauk lasr in pal meeta srikla. . . . ma nu kemwa su kut lotela tari arulanu srikla fwin lumeyuk nu ke ma su kut soennu lutlut ka.” Kain in nunuk pusisel inge arulanu mwo. Inge kut fwin sramsram ke etauk yok emeet—ke etauk lun Jeova God—oasr sripe se yok lasr in inse pusisel nu ka. Efu?
10 Nunku ke kutu me sramsram in Baibel kel Jeova. “Nunuk lom arulanu loal.” (Sam 92:5) “Wangin saflaiyen etu Lal [Jeova].” (Sam 147:5) “Wangin sie ku in ilus lalmetmet Lal [Jeova].” (Isaia 40:28) “O fuka loal in kasrpen lalmetmet a etauk lun God!” (Rom 11:33) Arulanu kalem, la kut tia ku in eis etauk nu kemwa kel Jeova. (Ekklisiastis 3:11) El luti nu sesr kain in ma mwomwo puspis, tusruktu, kut srakna enenu in lutlut ke kain in etauk puspis lal. Ya kut tia pulakin insemwomwo a akpusisilyeyuk ke fwinsrak inge su oasr yurosr? Ke ma inge, ke kut tafwela in lutlut, lela kut in orekmakin etauk inge pal nu kemwa in akfutotoye kut nu sin Jeova a in kasru pa kutu met elos in oru ouyepa—a lela kut in tia akfulatye kut liki kutena met.—Mattu 23:12; Luk 9:48.
Akkalemye Lungse Lom Nu Sin Jeova
11, 12. (a) Fuka lalmetmet su kut eis kel Jeova akilenyuk in kut? (b) Mea ku in sang akkalemye la sulela lun sie met in lungse God el paye a sumwos?
11 Arulanu fwal ke met sap Poul el akkalemye la oiye fuka ku in akilenyuk inmaslon lalmetmet a lungse. El simusla: “A ma inge Nga pre ka, tu lung lomwos yokyokelik in lalmetmet a etauk nu kemwa.” (Filippai 1:9) Saye liki na kut in akfulatye kut sifwanu ke nunuk lun insefulat, paenang lela kain in etauk mwolanu nu kemwa lun ma paye kel Jeova a ke akmwuk lal su kut lotela, lela in akyokyelik lungse lasr nu sin Papa tumasr in kosrao.
12 Aok, oasr met puspis su akkalemye mu elos lungse God tusruktu, payeiya u elos tia. Saap elos arulanu pulaik in fwakak ou inge ke insielos kemwa. Kain in pulakin ou inge mwo, a eneneyuk, fwin fwal nu ke sumwos a paye. Tusruktu, ma inge koflanu akpayeye nu selos sifwanu ke lungse paye nu sin God. Efu ku ou inge? Lela kut in liye aketeye lun God ke lungse: “Pa inge lungse lun God tu kut in liaung ma sap lal.” (1 Jon 5:3) Ke ma inge, lungse lun Jeova, paye a wangin kutasrik ka a ku in akpayeyuk mukena ke fwako lun orekma paye in akos ma lungse lun God.
13. Fuka sangeng sin God ku in kasre kut in akkalemye lungse lasr nu sin Jeova?
13 Sangeng sin God mukena fwa ku in kasre kut in akos Jeova. Ke oasr nunuk yok inge a ke akfulat yok nu sin Jeova su tuku ke lalmetmet yok kel, paenang in ikasla inkanek in eis etauk ke mwolanu a mutal lal, ke me insemwomwo, ku, sumwosmwos, lalmetmet, a lungse. Kain in fosrnga ou inge arulanu yok sripe in paenang in futoto nu sel. In akpayeye, liye la mea Sam 25:14 akkalemye: “Kamwuk lun Jeova oasr yurolos su sangeng sel.” Ou inge fwin oasr yurosr sangeng paye in tia aktoasrye Papa tumasr su in kosrao, kut fwa ku in futoto nu sel. Sangeng paye nu sin God fwa ku in kasre kut in akos kas in kai su simla in Soakas 3:6: “Kom fwakulak inkanek lom nu kemwa, a el fwa akkalemye inkanek lom.” Mea kalmen kas inge?
14, 15. (a) Mea kutu kain in sulela su kut enenu in orala ke moul lasr len nu kemwa? (b) Kut e oru fuka sulela su ku in fwakutyuk la oasr sangeng lasr in kunausla akmwuk lun God?
14 Kom enenu in sulela len nu kemwa, nu ke ma nu kemwa fwinne yok ku srik. Nu ke me pupulyuk, kain in sramsram fuka kom muta oru nu sin met wi kom orekma, wi kom lutlut, met atalani lom? (Luk 6:45) Ya kom sang insiom na paye nu ke orekma su sapkinyuk nu sum, ku kom suk kutena inkanek in sang aksafyela orekma sen fwinne tia mwo fwal nu ke ma sapkinyuk? (Kolosse 3:23) Ya kom suk in futoto nu sin kain in met su alollo ku tia lungse na paye in long me luti lun Jeova, ku kom suk in akyokye asrouki lom nu sin met su suk in moul fwal nu ke moul in ngun? (Soakas 13:20) Mea fwal kom in oru, fwinne ke inkanek srisrik, in sang kasru akyokye orekma lun Togusrai lun God? (Mattu 6:33) Fwin kain in me kasru nu kemwa su sramsramkinyuk ke Baibel inge sang kasru sulela lom len nu kemwa, na kom fwa ku in akpayeye la kom tupan Jeova “ke inkanek nu kemwa lom.”
15 In akpayeye, nu ke kais sie sulela lasr, kut enenu in orekmakin kain in nunuk inge: ‘Mea Jeova el lungse Nga in oru? Ke inkanek fuka fwa akinsemwomwoyel?’ (Soakas 27:11) In akkalemye sangeng sin God in ma nu kemwa ku in fwakak lungse lasr nu sin Jeova. Sangeng sin God ku in oru pa kut in orekmakin moul nasnas fwal nu ke moul in ngun, moul sumwos, a in nasnas mano. Esam, la in fus sepanu inge Jemes el sapkin met Kristian in “kalukyung nu yurin God,” a el ouyepa tafwela in fwak: “Aknasnasye poumwos, komwos met koluk, a akmutalye insiomwos komwos met inse luo.”—Jemes 4:8.
16. In oru me sang nu sin Jeova, ma fuka upa in orekla, tusruktu mea ma inge su kut ku in oru pal nu kemwa?
16 Aok, in akkalemye lungse lasr nu sin Jeova oasr me enenu yok liki na in taran ma koluk. Lungse el mokle kut in oru mwo pa. Nu ke me pupulyuk, kut e fwakak fuka engun lasr nu ke kasru mwolanu nu kemwa lun Jeova? Jemes el simusla: “Me kite mwo nu kemwa a kite fwal ma lung me, a tuku lung me yurin Papa tuman kalem.” (Jemes 1:17) Aok, ke pal se ma kut sang nu sin Jeova ma nu kemwa ma lasr, kut tianu akkasrupyallak. Meyen ma mwo nu kemwa ma lal a el pa orala. (Sam 50:12) Paenang pal nu kemwa kut sang pal lasr a ku lasr nu sel, lela kut in tia nunku mu el kofla oru ma inge pasis in orek nu sel. Kut fwinne srunga in oru orekma in fwakak peng mwo ke Togusrai lal, el ku pa in orala eot u in fwakak peng mwo! Fwin ou inge, efu ku kut enenu in sang nu sin Jeova ma nu kemwa ma lasr, pal lasr, a ku lasr? Yok liki nu kemwa, meyen kut lungse in akkalemye lungse lasr nu sel ke insiesr kemwa, moul lasr kemwa, nunkasr kemwa, a ku lasr kemwa.—Mark 12:29, 30.
17. Mea ku in mokle kut in oru me sang nu sin Jeova in me insmwomwo?
17 Kut fwin sang me sang nu sin Jeova, lela kut in sang ke engun, meyen “God el lungse el su insemwomwo in sang.” (2 Korint 9:7) Me kasru yok su simusyukla in Duteronomi 16:17 ku in kasru kut in etu in sang ke inse paye: “Kais sie met fwa sang oanu el ku, fwal nu ke me insemwomwo lun Jeova God lom su el sot nu sum.” Kut fwin nunku ke lupan kasru yok su Jeova el kasru kut ka, kut e arulanu engunkin in sang ma lasr nu sel ke insiesr kemwa. Kain in me sang ou inge, paenang insiel in engun, oupanu ke me sang srisrik fwin orekla sin sie tulik ma inge arulanu akinsemwomwoye sie papa. Fwin oasr yurosr kain in lungse inge e ku pa in kasre kut in kalukyung nu sin Jeova.
Musaiyuk Kamwuk Futoto ke Inkanek lun Pre
18. Efu ku mwo in tuniyuk oiyen pre lasr?
18 In pal se kut oru pre lasr pa inge pal se ma yok sripe emeet—sie pal pa inge in futoto nu sel, in fwakak ma lukma nu kemwa lasr nu sin Papa tumasr in kosro. (Filippai 4:6) Ke sripen pre pa inkanek mwo se emeet in akfutotoye kut nu sin God, paenang mwo in nunkala akmwoye koanon pre lasr a lipsrela me sramsram lasr ke pre. Tia kalme pa in oru aten pre sen in kato in longyuk a arulanu mwo kas nu kemwa su orekmakinyuk, a ma nu kemwa enenu in tuku na paye ke insiesr. Kut e akmwoye fuka pre lasr in mwo?
19, 20. Efu ku mwo in nunkela meet liki pre, a mea kutu akmwuk su mwo in nunku ka?
19 Kut enenu in nunkala akmwoye meet liki kut pre. Fwin kut muta nunkala in paye ma nu kemwa meet, na kut fwa ku in pre akkalemye in mwo kalem me siyuk lasr e fwa yok kalmeye, ou inge pre lasr fwa tia kalweni kas u ku polu kas su fwakyuk tari. (Soakas 15:28, 29) Saap e me kasru mwo pa in muta nunku ke kutu akmwuk lun pre su Jisus el sapkin a srike in kapsra nu ke ma su kut sifwanu pulakin a akola in siyuk. (Mattu 6:9-13) Nu ke me pupulyuk, saap kut ku in siyuk sesr sifwanu la anu ip srisrik fuka kut ku in oru in sang kasru lun Jeova nu fwin fwalu nu fon. Ya kut ku in akkalemye nu sin Jeova la kut lungse el an orekmakin kut nu ke ma lungse lal nu kemwa a siyuk kasru lal nu sesr tu kut fwa ku in oru kulansap lasr nu sel fwal nu ke lungse lal nu kemwa? Ya kut kafofo lanu ke me enenu lasr nu ke ma lun fwalu? Kain in ma koluk fuka kut enenu in siyuk nunuk munas ka, a nu sin su kut enenu in sang nunuk munas? Kain in me srifwe fuka akkeokye kut, a ya kut akilen la kut enenu na paye kasru lun Jeova ke ma se inge?
20 Sayen ma inge, saap anu oasr kutu met su kut etu la yok enenu nu se ke me kasru lun Jeova. (2 Korint 1:11) Ke ma inge lela kut in tia mulkunla in sang kulo pal nu kemwa. Fwin kut muta pal nu kemwa a srike in nunku yok ke ma inge, kut ku in pulakin na paye la kut enenu in sang kulo nu sin Jeova a in kaksakunul ke len nu kemwa ke ma mwo puspis su el kasre kut ka. (Duteronomi 8:10; Luk 10:21) In oru ou inge fwa oasr me lane yok tuku ka—efwa ku in kasre kut in etu in sang kasru, a in kulang pal nu kemwa ke lusen moul lasr.
21. Mea kutu me luti in Baibel su me srikasrak mwo ku in kasre kut fwin kut sramsram nu sin Jeova ke pre?
21 Lutlut ke Baibel el ku in kasre kut ke pre. Oasr kain in pre su mwo in orekmakinyuk sin mokul a mutan lalalfongi in pal meeta su simusyukla in Baibel. Ke sie me pupulyuk, ke pal se fwin oasr me keok upa apkurun in sikyuk nu sesr in paenang kut in sun me fosrnga upa in akkolukyela moul lasr ku met su kut lungse yok, fwin sikyuk ou inge, lela kut in esam in ridi oiyen pre lal Jekob ke me keok su apkurun in sikyuk nu sel sin tamulel se lal, pangpang Isau. (Genesis 32:9-12) Ku saap kut ku pa in lutlut kin pre lal Togusra Esa ke pal se met meun sie million lun an Ethiopia elos tuku in meuni met lun God. (2 Kronikel 14:11, 12) Fwin kut sun me keok su ku in akkolukye en Jeova lela kut in esam pre lal Elaija su el oru ye mutun met su alu nu sin Beal ke Eol lun Carmel su mwo in esamyuk, oupanu pre lal Niemaia ke musalla lun an Jerusalem. (1 Togusra 18:36, 37; Niemaia 1:4-11) In ridi a nunku yok ke pre ou inge ku in akkeye lalalfongi lasr a ku pa in kasre kut in koneak inkanek su kut enenu in oru in eis kasru sin Jeova ke me keok upa su sun kut.
22. Mea koanon yeartext nu ke 2003, a mea kut ku in siyuk sesr sifwanu pal nu kemwa ke lusen yiu sen?
22 Ma na kalem se, la wangin me akfulat, wi kaksak yok, liki na in esam kas in kai lal Jemes “in kalukyung nu yurin God.” (Jemes 4:8) Lela kut in oru ou inge ke kut kapkapek ke etauk lun God a ke kut akkapye futoto lasr nu sel ke inkanek in pre lasr. Ke yiu 2003 nu fon, lela kut in esam Jemes 4:8 in fwal nu ke koanon yeartext, ou inge lela kut in kaifweung in tuni kut sifwanu la paye kut kalukyung nu sin Jeova. A fuka ip safla su akkalemyeyuk ke koanon kai sen? Ke inkanek fuka Jeova el fwa “kalukot nu yuromwos,” in ase me kasru mwomwo? Me lutlut toku fwa sramsramkin ma inge.
Ya Kom Esam?
• Efu ku in kalukyung nu yurin Jeova sie me eneneyuk yok?
• Mea kutu nien sun su kut enenu in orala in ku in eis etauk lun Jeova?
• Fuka kut ku in akkalemye la kut lungse na paye Jeova?
• Ke inkanek fuka kut ku in akkalemye la kut futoto nu sin Jeova in pre?
[Blurb on page 8]
Koanon yeartext lun 2003 pa: “Kalukyung nu yurin God, a el e fwa kalukot nu yuromwos.”—Jemes 4:8.
[Picture on page 8]
Pre su Elaija el oru fwin Eol Karmel sie me srikasrak mwo nu sesr