Lutlut ke Luman Ma Pwacye

“Luman etauk a paye [in Masap] oasr yurum.”​—ROM 2:20, Baibel Mutal ke Kas Kusaie.

MEAC MWE TOP LOM NUHKE KIHSEN SIYUHK INGE?

Mwe kihsac puhspuhs ke Masap suc ituhkyahng nuh sel Moses el luhmahlah nuhke meac?

Ke ohiyac fukah mwe kihsac lasr oacna sie nuhke mwe kihsac suc mwet Israel kihsackihnyuhk?

Mwe kihsac fukah Jeova el insewowo kac, ac piyac kac ma el tiyac insewowo?

1. Efuh kuh yohk srihpac nuh sesr in kahlwem ke ma Poul el fahk ke Masap suc ituhkyahng nuh sel Moses?

MA MWET sap Poul el suhmuhslah in Bible kahsre kuht in kahlwem ke yohk srihpacyacn ma puhspuhs suc oasr ke Masap suc ituhkyahng nuh sel Moses. Ke sie mwe puhpuhlyuhk, Poul el ahkuhtwacye ke lwacta lal nuh sin mwet Hibru lah Jesus el “Met Tol Fulat . . . oaru” suc kihsackihn mwe kihsac pacl sefanna. Mwet nuhkwewa suc luhlahlfongi kac kuh in engankihn mihslac yurin God ac “molela ma patpat.” (Hibru 2:17; 9:11, 12, BMK) Poul el ahkuhtwacye lah lohm ahktuhktuhk el “lumahla mukena ma orek inkuhsrao.” Jesus pah mwet iumwe ke sie mwuleang suc wo liki Masap suc ituhkyahng nuh sel Moses. (Hibru 7:22; 8:1-5) In lwen lal Poul, mwe ahkuhtwacye inge ke Masap arlacna yohk kahsruh nuh sin mwet Kristian, nwe ke pacl inge. Ma el ahkuhtwacye kuh in kahsre kuht pac in sang kuloh nuhke ma nuhkwewa suc God el orwaclah nuh sesr.

2. Efuh kuh oasr etwacack yohk luhn mwet Jew Kristian ke God ac ke srihpac puhspuhs ke masap lal liki na mwet suc tiyac mwet Jew?

² Kuhtuh ke ma Poul el suhmuhslah nuh sin mwet Kristian in acn Rome pah ma nuh sin mwet Jew Kristian suc muhta we ac lutiyuhk ke Masap suc ituhkyahng nuh sel Moses. El fahk nuh selos lah ke srihpacn elos etuh Masap, oasr tari yurolos “luman etauk a paye” kel Jeova ac ke kain in srihpac suwos ke masap puhspuhs suc el orwaclah. Elos kahlwem ac luhngse ma pwacye suc lutiyuhk ke Masap. Ke ma inge, in oacna mwet Jew oaru su moul met liki pacl lalos, elos kuh in luti nuh sin mwet puhspuhs ma pwacye kel Jeova.​—Riti Rom 2:17-20, BMK.

MWE LUHMALAH KE MWE KIHSAC LUHN JESUS

3. Kuht kuh in eis fukah mwe kahsruh ke kuht lutlut ke kain in mwe kihsac luhn mwet Jew?

³ Ma pwacye su oasr ke Masap suc ituhkyahng nuh sel Moses, suc Poul el ahkkahlwemye oacna luhman ma pwacye, kahsre kuht in kahlwem ke oakwuck puhspuhs luhn Jeova. Mwe lutlut puhspuhs suc Jeova el luti nuh sin mwet lal ke inkacnek luhn Masap srackna yohk srihpac. Ke ma inge kuht fah lutlutkihn ingena ke kain in mwe kihsac puhspuhs suc sapkihnyuhk ke Masap inge. Kain in mwe kihsac inge kol mwet Jew puhspuhs suc inse puhsisel nuh sin Kraist, ac kahsrelos in kahlwem ke ma God el siyuhk selos. Ac ke srihpacn Jeova el siyuhk pacna ma inge nuh sin mwet kuhlacnsap lal ke pacl inge, masap lal nuh sin mwet Israel ke mwe kihsac kuh in kahsre kuht in tuni ahkwoye inkacnek suc kuht kuhlacnsap nuh sel.​—Malakai 3:6.

4, 5. (a) Ke meac Masap su ituhkyahng nu sel Moses ahkacsmakihnye met Jew? (b) Mwe kihsac nuhkwewa luhmahlah nuhke meac?

⁴ Ma puhspuhs ke Masap suc ituhkyahng nuh sel Moses ahkacsmakihnye mwet Jew lah elos mwet sesuwos. Ke mwe puhpuhlyuhk, kuhtwena mwet suc kalye monin sie mwet misac el enenuh in ahknwacsnwacsyel sifacna. In oruh ma inge, el enenuh in kihsackihn soko kao sruhsrah. Mwet tol el fah uniye kao soko, esukak ma inge, ac orekmakihn apact kac in orwaclah “kof nu ke aknasnas.” Ke lwen ahktolu ac ahkitkohsr tukun sie mwet el fokfokla, kof inge ahksroksrokyeyuhk nu fwel in ahknwacsnwacsyel. (Oekyuk 19:1-13) Mwet Jew ahkacsmakihnyeyuhk pac lah mwet nuhkwewa oasr tari ohiyacn sesuwos ac ma kuluk ke pal se elos isusla, mweyen sie mutan el tiac nwacsnwacs ke sie lusen pacl ke pacl se el oswela tulik. Ac tukun ma inge el enenuh in kihsackihn sie mwe kihsac ke nuhnak muhnas.—Livitikus 12:1-8.

⁵ Mwet Ju elos enenuh in kihsackihn kosro nuhke nuhnak muhnas ke ohiyac saye puhspuhs ke moul lalos. Finnwe elos etuh ku tiyac, mwe kihsac su elos kihsackihnyuhk in lohm ahktuhktuhk ac ke pacl tok in tempul pa “lumah se na” ke mwe kihsac suwoswos lun Jesus.​—Hibru 10:1-10.

NUHNAHK SUMWOS KE MWE KIHSAC

6, 7. (a) Meac mwet Israel elos enenuh in esam ke elos sulelah sie mwe kihsac? Sie mwe kihsac wo el luhmahack nuhke meac? (b) Kihsen siyuhk puhspuhs fukah kuht kuh in siyuhk sesr sifacna?

⁶ Jeova el siyuhk sin mwet Israel elos in kihsackihn kosro su wangin “kutena ma koluk ke mano,” tiyac kun, musalla ipin mahno, sekapahslah, kuh mahs. (Livitikus 22:20-22) Ke pacl se mwet Israel elos kihsackihn fahko kuh witu nuh sin Jeova, mwe kihsac inge enenuh in “fahko se meet” ac “ma wo oemeet” ke ma elos kosrani. (Oekyuk 18:12, 29) Mwe kihsac suc tiyac ma wo emeet tiyac mwe ahkihnsewowoye nuh sin Jeova. Fin mwet Israel elos kihsackihn kosro ma wo emeet, ma inge luhmahlah ke mwe kihsac luhn Jesus lah wacngihn ma kuluk ac wacngihn meta. Jeova el sang ma wo ac ma sacohk emeet lal tuh in molela mwet uh liki ma kuluk ac mise.​—1 Piter 1:18, 19.

⁷ Fin sie mwet suc orwaclah sie mwe kihsac el luhngse na pwacye in sang kuloh nuh sin Jeova ke kuhlwacng Lal, na el engan pac in sulelah ma wo emet liki ma oasr yurol. Mwet se el kuh in sulelah ma el e fah kihsackihn fal nuhke ohiyacn moul lal ac ke ma suc oasr yurol. Tuhsruhktuh el etuh lah God el tiyac insewowo ke sie mwe kihsac fin ma inge tiyac ma wo emet lal. Fin el kihsackihn ma se suc oasr ma kuluk kac, el ahkkahlwemye lah el tiyac nuhnkuh lah mwe kihsac arlacna yohk srihpac, kuh el nuhnkuh muh Jeova el siyuhk alukela ma el kuh in oruh. (Riti Malakai 1:6-8, 13.) Mwe puhpuhlyuhk se inge kuh in oruh kuht in nuhnkuh ke ohiyac suc kuht kuhlacnsap uh God. Kuht kuh in siyuhk sesr sifacna: Efuh Nga kuhlacnsapu Jeova? Ya Nga enenuh in ekulla ohiyac suc Nga kuhlacnsap nuh sel? Ya Nga sang nuh sel ma wo emet luhk?

8, 9. Meac kuht lotela ke ohiyac suc mwet Israel puhla ke elos kihsackihn sie mwe kihsac?

⁸ Sie mwet Israel el kuh in sang mwe kihsac nuh sin Jeova ke inse mulala in ahkkahlwemye kuloh lal. Kuh, el kuh in siyuhk ke insewowo luhn Jeova ke el inse mulala in sang sie mwe kihsac fihrihr. Ke ohiyac inge, saap fihsracsr nuh sel in sulelah kosro suc wo emet. El insewowo in sang kosro soko inge nuh sin Jeova. Ke pacl inge, kuht tiyac enenuh in kihsackihn mwe kihsac suc akkalemyeyuk ke Masap suc ituhkyahng nuh sel Moses, tuhsruhktuh kuht oruh pac mwe kihsac saye puhspuhs. Kuht orekmakihn pacl, kuh, ac ma puhspuhs lasr in kuhlacnsap nuh sin Jeova. Mwet sap Poul el kahskahs ke orekma in “fwakak” finsrak lasr nuh sin mwet puhspuhs ac “in oru mwo, a sang nu sin met ngia” oacna mwe kihsac suc ahkihnsewowoye God. (Hibru 13:15, 16, BMK) Nuhnak lasr, kuh ma kuht puhla, ke orekma in kuhlacnsap nuh sin Jeova ahkkahlwemye lah kuht luhngse na pwacye in sang kuloh ke ma nuhkwewa el ase nuh sesr. Ke ma inge, in oacna mwet Israel, kuht enenuh in tuni oiyen puhlakin lasr ke kuhlacnsap lasr nuh sin God ac lah efuh kuht kuhlacnsap nuh sel.

⁹ Ke kuhtuh ohiyac, Masap sapkinyuk nuh sin sie mwet Israel in kihsackihn mwe kihsac ke ma kuluk fin el orwaclah ma kuluk. Ke srihpacn mwe kihsac inge sapkihnyuhk, ya kom nuhnkuh ma upac nuh sin mwet Israel in kihsackihn ma inge ke inse mulala lal? (Livitikus 4:27, 28) Mo, el e tiyac puhlakin ouinge fin el luhngse na pwacye in karihngihn fototo wowo nuh sin Jeova.

10. Kain in mwe kihsac puhspuhs fukah kuht enenuh in oruh kuht fin orwaclah ma kuluk se?

¹⁰ Ke pacl inge kuht kuh in fahk ma se su kuh in aktoasrye sie mwet lili, finnwe kuht akihlen ma inge kuh tiyac, kuh mweyen kuht tiyac nuhnkuh ahkwoye met liki kuht kahskahs. Kuh, saap inse ac pulakin lasr ahkkahlwemye nuh sesr lah kuht orwaclah ma kuluk se. Kuht fin luhngse na pwacye in ahkinsewowoye Jeova, kuht fah oruh ma nuhkwewa ke ku lasr kewa in ahksuwosye ma kuluk inge. Kalmen ma inge pah kuht enenuh in siyuhk nuhnahk munas sin mwet lili su kuht aktoasryeyuk. Kuh, kuht fin orwaclah ma kuluk upac, kuht enenuh in siyuhk ke kahsruh sin mwet liaung luhn congregation. (Mattu 5:23, 24; Jemes 5:14, 15) Kuht enenuh in kafweang yohk in ahksuwosye sie ma kuluk nuh sin sie mwet lili kuh nuh sin God. Ma inge oacna ke kuht oruh sie me kihsac. Kuht fin luhngse in oruh ma inge, kuht kuh in engankihn sie fototo wowo nuh sin Jeova ac nuh sin mwet lili wiyesr, ac kuht fah engankihn sie inse ac pulakin nasnas. Ma mwomwo puhspuhs inge oruh kuht in luhlahlfongi lah Jeova el etuh ma wo emeet nuh sesr.

11, 12. (a) Meac se inge mwe kihsac mihslac? (b) Meac kuht kuh in lotela ke mwe kihsac mihslac?

¹¹ Kuhtuhpac mwe kihsac suc ahkkahlwemyeyuck ke Masap pah ke mwe kihsac mihslac. Mwe kihsac inge ahkkahlwemye lah sie mwet el engankihn mihslac yurin Jeova. Mwet se suc kihsackihn kain in mwe kihsac inge ac sucu lal elos kuh in kang ikwen kosro suc kihsackihnyuck, saap lun sie acn in mongo in tempul. Mwet tol suc kihsackihn kosro inge wi mwet tol saye puhspuhs suc kuhlacnsap in tempul, kais sie selos eis pac ipin ikwen kosro inge. (Livitikus 3:1; 7:31-33) Ke srihpacn sie mwet el luhngse in oasr fototo wowo nuh sin Jeova, pwacnacng el oruh mwe kihsac se inge. Ma inge oacna ke mwet se inge, sucu lal, mwet tol puhspuhs, ac Jeova, elos tukeni mongo wi insewowo ac mihslac.

¹² Ke ma inge, orekma in sang mwe kihsac mihslac el oacna in suli Jeova in wi ke sie mongo. Sie mwe insewowo yohk pah inge nuh sin sie mwet Israel fin Jeova el eis mwe solsol lal in wi ke sie mongo. El luhngse na pwacye in kihsackihn ma wo emet nuh sin God. Mwe kihsac mihslac oasr pac ke luhman pwacye suc oasr ke Masap suc ituhkyahng nuh sel Moses, ac ma inge ahkkahlwemye lah mwet nuhkwewa suc luhngse in engankihn fototo wowo nuh sin God suc orwacloslah, ku in oruh ma inge ke inkacnek luhn mwe kihsac luhn Jesus suc yohk liki mwe kihsac mihslac. Ke pacl inge, kuht kuh in kawuk luhn Jeova fin kuht inse mulala in kihsackihn mwe kihsac, kuh orekmakin ma puhspuhs lasr ac kuh lasr nuhke orekma in kuhlacnsap nuh sel.

MWE PUHPUHLYUHK KE MWE KISE SUC GOD EL TIYAC INSEWOWO KAC

13, 14. Efuh kuh Jeova el tiyac insewowo ke ma Tohkohsrah Soul el luhngse in kihsackihn?

¹³ Jeova el insewowo ke mwe kihsac fin mwet suc kihsackihn ma inge oasr nuhnahk sumwos lal kac. Tuhsruhktuh Bible el ahkkahlwemye pac ke kuhtuh mwe puhpuhlyuhk ke mwe kihsac suc God el tiyac insemwomwo kac. Efuh kuh el tiyac insewowo ke mwe kihsac inge? Lela kuht in lutlut ke ma sikyak luo.

¹⁴ Mwet palu Samuel el fahk nuh sin Togusra Soul lac pacl sun tari nuh sin Jeova in kuhnahosla mwet Amalek nuhkwewa. El fahk nuh sel Soul in uniye mwet inge nuhkwewa ac kosro natulos. Tuhsruhktuh tukun Soul el kuhtanglah ke mweun, el lela mwet mweun lal elos in fulela Agag, togusra luhn mwet Amalek in moul. Soul el eis pac ma wo emeet ke kosro natulos in kihsackihn nuh sin Jeova. (1 Samuel 15:2, 3, 21) Meac Jeova el oruh? Ke srihpacn seakos lal Soul, pwacnacng Jeova el srungela elan togusra fin acn Israel. (Riti 1 Samuel 15:22, 23.) Meac kuht lotela kac? God el insewowo ke mwe kihsac lasr fin kuht ahkos masap lal.

15. Meac mwet Israel elos ahkkahlwemye ke pacl se elos sang mwe kihsac ac ke pacl sepacna oruh ma kuluk?

¹⁵ Oasr sie pac mwe puhpuhlyuhk in buk lal Isaia. Mwet Israel in pacl lal Isaia elos kihsackihn mwe kihsac nuh sin Jeova ke nuhnakmuhnas. Tuhsruhktuh ke pacl sepacna inge, elos tahfwaclah in oruh ma kuluk puhspuhs. Ma inge ahkkahlwemye lah elos wosonkahs. Jeova el siyuhk: “Ya kowos nunku mu nga lungkin mwe kisa ma kowos oru nu sik?” El fahk nu selos: “Alukela tari pisen sheep ma kowos furreak in mwe kisa, ac kiris ke kosro wowo nutuwos an. Nga totola ke sra in cow mukul ac sheep ac nani.” El fahk pac nu selos: “Nimet sifil fahsr kihmkim in kalkal sik uh! Wangin srihpacn mwe sang lowos. Nga srungala foulin mwe kisa kowos isik uh.” Efuh kuh God el srunga mwe kihsac lalos? God el fahk: “Finne arulana yohk pre lowos, nga fah tia porongo, tuh pouwos nukla ke srah. Oulkowosla sifacna in nasnas. Tulokinya orekma koluk ma kowos oru nga liya.”​—Isaia 1:11-16.

16. Mwe kihsac fukah God el insewowo kac?

¹⁶ Jeova el tiyac insewowo ke mwe kihsac luhn mwet puhspuhs suc tahfwaclah in oruh ma kuluk. Tuhsruhktuh el insewowo ke puhruhe ac me kihsac lun mwet su oruh ke kuh lalos kwewa in ahkos masap lal. Luhman ma pwacye su oasr ke Masap suc ituhkyahng nuh sel Moses luti mwet inge lah elos sesumwos ac enenuh nuhnakmuhnas lun Jeova. (Galetia 3:19) Ke pacl se mwet Israel el kahlwem ke ma Masap luti nuh sel, el ahsor na pwacye ke ma kuluk lal ac el luhngse Jeova in nuhnakmuhnas nuh sel. Ke pacl inge, kuht enenuh pac in esam lah ke inkacnek luhn mwe kihsac luhn Christ muhkwena Jeova el kuh in nuhnakmuhnas ke ma kuluk lasr. Kuht fin kahlwem ke yohk srihpacyacn mwe kihsac luhn Christ ac kuht luhngse na pwacye in sang kuloh kac, Jeova el fah “insewowo” ke ma nuhkwewa kuht oruh ke orekma in kuhlacnsap nuh sel.​—Riti Sam 51:17, 19.

AHKKAHLWEMYE LUHLAHLFONGI KE MWE KIHSAC LUHN JESUS!

17-19. (a) Kuht kuh in ahkkahlwemye fukah nuh sin Jeova lah kuht luhngse in sang kuloh ke mwe kihsac luhn lahngo luhn Jesus? (b) Meac kuht fah lutlutkin kac ke mwe lutlut toko?

¹⁷ Mwet Israel elos liye “lumah se na” ke oakwuck lun God. Tuhsruhktuh oasr yurosr ma na pwacye. (Hibru 10:1) Masap ke mwe kihsac luti mwet Israel ke ma elos enenuh in oruh in oasr fototo wowo lalos nuh sin God. Elos enenuh in ahkkahlwemye kuloh lalos nuh sel, in oasr luhngse lalos in sang ma wo emeet nuh sel, ac in kahlwem kac lah elos enenuh nuhnakmuhnas lal. Ke pacl inge, ma Suhmuhslah ke kahs Greek kahsre kuht in kahlwem lah ke inkacnek luhn mwe kihsac luhn lahngo lal Jesus, Jeova el fah ahkwacngihnyelah ma kuluk ac misac ma pahtpaht. Ke inkacnek luhn mwe lahngo se inge, el kuh in nuhnakmuhnas ma kuluk lasr tuh kuht in engankin sie inse ac puhlakin wo finnwe ke pacl inge. Mwe lahngo el sie mwe sang wowo sin Jeova me.​—Galetia 3:13; Hibru 9:9, 14.

¹⁸ Tuh kut in eis ma lane ke mwe kihsac lun lahngo, oasr ma saye kuht enenuh in oruh yohk liki na in eis etwacack ke kalmen ma inge. Poul el simusla: “Oinge masap sie met liaung lasr in kol kut nu sin Kraist, tu kut fwa aksumwosyeyuk ke lalalfongi.” (Galetia 3:24, BMK) Kut enenuh in ahkkahlwemye luhlahlfongi lasr ke orekma lasr. (James 2:26) Mwet Jew Kristian in pacl sacn elos kahlwem ke luhman ma pwacye ke srihpacn elos etuh Masap su ituhkyahng nuh sel Moses. Poul el ahkkeyelos in orekma fal nuhke ma elos lotela kac. Ke inkacnek inge, elos fah moulkihn moul fal nuhke ma pwacye suc elos luti nuh sin mwet saye puhspuhs.​—Riti Rom 2:21-23.

¹⁹ Finnwe tiyac eneneyuk nuh sesr in ahkos Masap su ituhkyahng nu sel Moses, kuht srakna kihsackihn mwe kihsac puhspuhs suc ahkinsewowoye Jeova. Ke mwe lutlut toko, kut fah lutlutkin lah fukah kuht kuh in oruh ma inge.

[Petsac ke sra 15]

Ma Jeova el siyuhk sin mwet kuhlacnsap lal tiyac ekyek

[Petsac ke sra 16]

Piyac kac kosro kom fah kihsackihn nuh sin Jeova?

[Petsac ke sra 17]

Kuht ku in eis mwe insewowo lun Jeova kuht fin sang mwe kihsac suc ahkihnsewowoyel